If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

एक यहूदी धार्मिक नेता फरीसियै मौंझ़ै न निकुदेमुस नाँ रा एक मांहणु ती, ज़ो यहूदी रा एक नेता ती। तेइयै राती बै यीशु हागै एज़िया मसीह यीशु बै बोलू, “ओ गुरू, आसै ज़ाणा सी कि तुसै परमेश्वरै री धिरै न गुरू होईया आऐ सी, किबैकि कोई इन्हां चमत्कारा बै ज़ो तुसै रिहा सी, अगर परमेश्वर तेई सैंघै नी होला ता नी रिहाई सकदा।”
मसीह यीशुऐ तेइबै बोलू, “हांऊँ तौभै सच़-सच़ बोला सा, ज़ो कोई नौंऊँईं धिरै न नी जन्मला ता परमेश्वरा रा राज्य नैंई हेरी सकदा।”
निकुदेमुसऐ तेइबै बोलू, “मांहणु ज़ैबै खापरा होआ सा, ता कैण्ढै जन्म लेई सका सा? कि सौ आपणी आमा रै फाह्ड़ै न जाईया जन्म लेई सका सा? कि सौ आपणी आमा रै पेटा न जाईया दुज़ी घेरै जन्म लेई सका सा?”
मसीह यीशुऐ ज़वाब धिना, “हांऊँ तौ हागै सच़–सच़ बोला सा ज़ैबै तैंईंयैं कोई मांहणु पाणी होर आत्मा न नी जन्मला ता सौ परमेश्वरा रै राज्य न नैंई जाई सकदा। किबैकि ज़ो शरीरा न जन्मा सा, सौ शरीर सा; होर ज़ो आत्मा न जन्मा सा, सौ आत्मा सा। हैरान मत हो, कि मैं तौभै बोलू, ‘तेरा नौंऊँईं धिरै न जन्म लेणा ज़रूरी सा।’ बागर ज़ौखै चाहा सा तौखै ज़ा सा होर तू तेसरी छेड़ शुणा सा, पर नी ज़ाणदा कि सौ कौखै न एज़ा सा होर कौखै बै जा सा? ज़ो कोई पवित्र आत्मा न जन्मा सा सौ ऐण्ढा सा।” निकुदेमुसऐ मसीह यीशु बै ज़वाब धिना, “ऐ गैला कैण्ढै होई सका सा?”
ऐ शुणिया मसीह यीशुऐ तेइबै ज़वाब धिना, “तू इस्राएली रा गुरू होईया भी कि इन्हां गैला बै नी ज़ाणदा?” हांऊँ तुसाबै सच़-सच़ बोला सा कि आसै ज़ो ज़ाणा सी सौ बोला सी, होर ज़ो आसै हेरू सा तेथा री गुआही देआ सी। होर तुसै आसरी गुआही पैंधै बशाह नैंई केरदै? ज़ैबै मैं तुसा सैंघैं धौरती री गैला केरी, होर तुसै बशाह नी केरदै, अगर हांऊँ तुसा सैंघै स्वर्गै री गैला केरनु ता फिरी कैण्ढा बशाह केरना? कोई बी स्वर्गा पैंधै नैंई नौठा, सिर्फ़ सौहै ज़ुण स्वर्गा न उतरु मतलब हांऊँ मांहणु रा बेटा ज़ुण स्वर्गा न सा। होर ज़ुणी रीति न मूसै बौणा न कीड़ै (साँपा) बै उथड़ै पैंधै च़ढ़ाऊ, तैण्ढी रीति सैंघै ज़रूरी सा कि हांऊँ मांहणु रा बेटा भी उथड़ै पैंधै चड़ाईणा। किबैकि ज़ुण कोई मूँ पैंधै बशाह केरला तेई हमेशा री ज़िन्दगी पाणी।
“किबैकि परमेश्वरै दुनिया रै लोका सैंघै ऐण्ढी झ़ुरी रखी कि तेइयै आपणा इकलौता बेटा धिना ताकि ज़ो कोई तेई पैंधै बशाह केरला तेई नाश नैंई होंणा पर हमेशा री ज़िन्दगी पाणी। परमेश्वरै आपणा बेटा एक दुनिया न तैबै नैंई भेज़ू, किबैकि दुनिया पैंधै सज़ा रा हुक्कम देला पर तैबै कि दुनिया तेई रै ज़रियै मुक्ति पाऐ। ज़ुण कोई यीशु पैंधै बशाह केरा सा, तेई पैंधै सज़ा रा हुक्कम नैंई होंदा, पर ज़ो कोई तेई पैंधै बशाह नैंई केरदा, सौ दोषी बणा सा, तैबै कि तेइयै परमेश्वरै रै इकलौते बेटै रै नाँ पैंधै बशाह नैंई केरू। होर सज़ा री हुक्कमे रा मतलव ऐसा कि प्याशा दुनिया न आऊ सा, होर मांहणुऐ निहारै बै प्याशे न ज़ादा खरा बुझू किबैकि तिन्हां रै कोम बुरै सी। किबैकि ज़ो कोई बुरा केरा सा सौ प्याशे सैंघै वैर डाह सा, होर प्याशे रै नेड़े नैंई ऐन्दा, ऐण्ढा नी हुआ लोड़ी कि तेई रै कोमा पैंधै दोष लागला। पर ज़ुण सच़ा पैंधै च़ला सा, सौ प्याशे रै नेड़े एज़ा सा, किबैकि तेई रै कोम सामनै होंणै कि ऐ परमेश्वरा रै धिरै न हुऐदें सी।”

तैबै इन्हां गैला न बाद प्रभु यीशु होर तिन्हां रै च़ेले यहूदिया देशा न आऐ; होर प्रभु यीशु तौखै तिन्हां सैंघै रौहिया बपतिस्मा देंदै लागै। यूहन्ना भी शालेम नगर रै नेड़े ऐनोन ग्राँ न बपतिस्मा देआ ती, किबैकि तौखै बोहू पाणी ती, होर लोका तौखै एज़िया बपतिस्मा लेआ ती किबैकि यूहन्ना तेई बोक्ते जेला न बंद नैंई केरू ती। तौखै यूहन्ना रै च़ेले री यहूदी लोका सैंघै च़ोखै केरनै रै बारै न बैंहस हुई। होर तिन्हैं यूहन्ना हागै एज़िया बोलू, “ओ गुरू, ज़ुण मांहणु यरदन नौई रै पौरलै धिरै तौ सैंघै ती, होर ज़ुणिरी तुसै गुआही धिनी सा; हेर सौ बपतिस्मा देआ सा, सैभ तेई आगै एज़ा सा।”
यूहन्नै ज़वाब धिना, “ज़ाँ तैंईंयैं मांहणु बै स्वर्गा न नी धिना, ताँ तैंईंयैं तेइबै किछ़ नैंई मिलणा। तुसै ता आपु मेरै गुआह सी, कि मैं बोलू, ‘हांऊँ मसीह नैंई,’ पर तेईन पहले भेजुन्दा सा। ज़ुणिरी लाड़ी सा, सौहै लाड़ा सा, पर लाड़ै रा सैंघी ज़ुण खड़ा होईया तेइरी शुणा सा, लाड़ै री गैला शुणीऐ बोहू खुश होआ सी: ऐबै मेरी ऐ खुशी पूरी हुई सा। ज़रूरी ऐसा कि सौ बढ़ला होर हांऊँ घटनू।”
“ज़ुण स्वर्गा न एज़ा सा सौ सैभी न बड़ा सा, ज़ो दुनिया न एज़ा सा सौ दुनिया रा सा, होर ज़ो स्वर्गा न एज़ा सा, सौ सैभी न ऊझै सा। ज़ो किछ़ तैईऐ हेरू, होर शुणू सा, तेसा गैला री गुआही देआ सा, पर बोहू कम लोका तेई पैंधै बशाह केरा सी। पर ज़ुणियै तेइरी गैला मनी तेइयै ऐसा गैला पैंधै मोहर लाई कि परमेश्वर सच़ा सा। किबैकि ज़ो परमेश्वरै भेजुन्दा ती, सौ परमेशरे री गैला बोला सा, किबैकि पवित्र आत्मा बै नापी नापिया नी देंदा। बापू परमेश्वर बेटै सैंघै झ़ुरी डाहा सा, होर तेइयै सैभ चीज़ा तेइरै हौथा न धिना सा। ज़ो परमेश्वरा रै बेटै पैंधै बशाह केरा सा, हमेशा री ज़िन्दगी तेइरी सा; पर ज़ो बेटै री नी मनदा, तेइयै ज़िन्दगी भी नैंई हेरणी, पर परमेश्वरा री सज़ा तेई पैंधै रौहा सा।”

ស្ដាប់នូវ यूहन्ना 3