Mahte 4
4
Yesuq, Gúnglaú Huî É Hkyô
Mrk 1:12-13; Luk 4:1-13
1Hau htâng má, Chyoiyúng Woi-nyí gi, Yesuq lé, nat Tsadán èq gunglaú é hui nhâng râ matú, yoso shut shuî ê ri. 2Yesuq gi, zoshuq gám é myi xê nyí myi xê myìn jé jáng, zòmut hui bê nghut ri. 3Haú hkûn, gunglaú sû gi, Yhâng chyáng lé mù, "Nàng, Garai Gasâng é Yhangzo nghut le gi, luqgok shí pé lé muk dut nhâng aq." ga taî ri.
4Haû jáng, Yesuq gi, "'Byù gi, muk èq za asak duì râ a nghut; Garai Gasâng é nhut mai htoq lo é mungdang hkangmó èq sheq asak duì râ nghut lhê.'#Tarâ Pun 8:3 ga luî, Chyúmdang má kâ tô ri." ga yhang lé tû taî ri.
5Haú hkûn, nat Tsadán gi, Yesuq lé, chyoiyúng myuq#4:5 chyoiyúng myuq gi, Yerusalem lé gâ lhê. má shuî ê mù, noqkuq yhum je myhang é shûhtâng htoq má yap nhang to luî, 6"Nàng, Garai Gasâng é Yhangzo nghut le gi, byam gyó kat wú aq. Hkâsu mù gâ le,
'Náng é matú, Garai Gasang gi, Yhâng é maumang lagyô pé lé taî to râ nghut mù,
luqgok má Náng é hkyî a ló htung shoq,
yhangmoq é loq èq Nang lé lhom bún yû kó râ nghut lhê.'#Hkya-on 91:11-12
ga luî, Chyúmdang má kâ tô ri." ga taî ri.
7Nghut kôlhang, Yesuq gi, "'Haû Yhumsîng, nungmoq é Garai Gasang lé, wó chyam wú râ a nghut.'#Tarâ Pun 6:16 ga luî le, Chyúmdang má kâ tô ri." ga, yhang lé tû taî ri.
8Nat Tsadán gi, Yesuq lé, gyai yhang myhang é bùm htoq má shuî doq ló mù, mingkan má joq é mingdán pé banshoq eq haú pê é hkikhkâm hkyô lé tûn shit ri. 9Hau htâng, yhang gi, "Nàng hkyihput htuq mù, ngo lé noq é nghut jáng, shí pé banshoq, Nang lé ngò byi râ." ga, Yesuq lé taî ri.
10Haú hkûn, Yesuq gi, "Tsadán nàng, ló byuq aq! Hkâsu mù gâ le, 'Haû Yhumsîng náng é Garai Gasang lé za, nàng noqkuq dojaú ra râ nghut lhê.'#Tarâ Pun 6:13 ga luî, Chyúmdang má kâ tô ri." ga, yhang lé taî ri.
11Haû mù, nat Tsadán gi, ló byuq bê nghut luî, maumang lagyô pé gi, Yesuq lé, lé dojaú nyi akô nghut ri.
Yesuq Mungdang Hko Hi Ló É Hkyô
Mrk 1:14-15; Luk 4:14-15
12Yesuq gi, Wui-myhup Sará Yohan htóng gyó é hkyô lé wó gyo jáng, Galile mau shut dum taû ló bê nghut ri. 13Yhang gi, Nazaret wà mai htoq ló mù, Zebulun eq Nahtali mau mâ é nhông yàm má joq é Kaperna-um wà má ló nyi nyi ri. 14Haû gi, myiqhtoi Esai-aq laiká má,
15"Zebulun mau eq Nahtali mau, wuimau mâ é hkyô, Yodan làng yàm, tûngbaù pé nyi é Galile mau ê,
16mauchut hkaû má nyi nyi é bang, maubó mó lé myàng bê nghut ri;
shî wup hkaû má nyi to bâng é matú, maubó lô bê nghut ri."#Esai 9:1-2
ga kâ tô é dang lé lhoq dik râ matú nghut ri.
17Haú hkûn mai, Yesuq gi, "Myit lhîng keq! Mauhkûng mingdán gi, chyâng lò bê nghut ri." ga, mungdang hko hi e ló bê nghut ri.
Yesuq É Chángzo Hí Dut Bang
18Yesuq gi, Galile nhông yàm má hkyô sô wún é hkûn, Petruq gâ é Simun eq yhanggu Andre nhiktâng lé myang ri. Yhangnhik tâng gi, ngozo kóng zo su nhik nghut mù luî, nhông má gùn dú nyi akô nghut ri. 19Haû mù, Yhang gi, haú nhiktâng lé, "Ngá htâng cháng keq; Ngò, nungnhik lé, byù lé châng kóng su nhik dut nhâng râ nghut lhê." ga taî ri. 20Haú hkûn, yhangnhik gi, radá dâm, gùn pé lé tô pyâm to luî, Yhang htâng cháng bekô nghut ri.
21Yesuq gi, jowò haú mai xoq sô e ló le, Zebedi é yhangzo, Yakuq eq yhanggu Yohan nhiktâng lé myang ri. Yhangnhik gi, yhangnhik é yhângwa Zebedi eq rahá, lhaî hkaû má gùn hpo nyi akô. Yhangnhik lé, Yesuq wut kat jáng, 22yhangnhik gi, radá dâm, yhangnhik é yhângwa eq lhaî haú lé, tô pyâm to kôluî Yesuq htâng cháng bekô nghut ri.
Nò Bang Lé, Yesuq Lhoq Gê Byî É Hkyô
Luk 6:17-19
23Yesuq gi, Galile mau ramau gón má htoq ê mù, tarajong pé má, mhoqshit luî, mauhkûng mingdán eq sêng é gabú danglù lé, hko kyo uchyang, byu pê chyáng mâ é nòhpyo ajung jung hui bang eq nolì nojàng amyû myû dap bang lé, lhoq gê byî wún ri. 24Yesuq eq sêng é hkyô ludang gi, Suriq ramau gón má byo myín ló mù, byu pé gi, awáng nòhpyo ajung jung huî é bang, hkê-nhô jamjaû nyi é bang, nat gang wang júng é bang, mhûngtuq tuq é bang, gùngjum shi é bang lé, shuî lé lô kôluî, Yhang gi, haú bang lé lhoq gê byî ri. 25Galile mau, Dekapoli,#4:25 Dekapoli gâ é gi, Grik dông myuq raxê lé gâ lhê. Yerusalem, Yuda mau eq, Yodan làng tû tap mâ é byù moq mó gi, Yesuq htâng châng bum akô nghut ri.
Currently Selected:
Mahte 4: atb
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.