Matyu 10
10
TAMBA VƗLI KIYELI VƗLƗLƗK JISASNA KWUPMBA LA APOSELNA SƗ
1Jisas wandɨ maa ndɨna kwupmba la tamba vɨli kiyeli vɨlɨlɨk nɨmba yisolaa lɨndi. Yisolaa lɨndi maa kavle waagan savɨlɨnjeya kwondu ndi kat kwindɨ. Yelogwen kat kwaiga nɨmba kat kwunatnjeya kwondu ndi kat kwindɨ.
2Wan tamba vɨli kiyeli vɨlɨlɨk aposelna sɨ kɨngiyan. Tat ta nyan Saimon waa Pita walɨnja nyan. Nat nyan Pitana yakwa nyan Endru. Nat vɨlɨlɨk palɨ Sebedina nyan Jemsagwi Jono. 3Nat nyan Filip. Nat nyan Batolomyu. Nat nyan Tomas. Nat nyan Matyu. Ndɨ takis sanya klala nyana. Nat nyan Alfiasna nyan nat Jems. 4Nat nyan Tadias. Nat nyan nat Saimon. Ndɨ ngepma ngepma yiga nat nɨmba nɨna kɨpma kat yalaa vɨga lɨnjangat kai waa ngambulɨndɨ. Nat nyan Judas Iskeriot Jisas kat vatnyavat kamwin kwiga ndɨ kat sɨmogwiya nyana.
JISAS WANDƗ MAA APOSEL NJƗVWA KWUPMAK YINDI
5Jisas tamba vɨli kiyeli vɨlɨlɨk nɨmba kat wandɨ. Ngwuk ngepma ngepma yiga njɨvwa kwuk ngwula. Juda ana ndi nat nɨmbana ngepma ke yingwa. Sameria lɨga nɨmbana ngepma ke yingwa. 6Juda lɨga ngepma ngepmat ay ngwula. Wundi Juda nɨma nyan kat pogwula lɨga sip sip vla lɨgandi. 7Yiga ndi katambuk ngwula. Nginangwupmba lɨga nɨma nyan nɨn kat vɨga lɨndeya njɨmbla tamba ngway tologandɨ waga yiga ndi kat mbuk ngwula. 8Yelogwen kat tɨgiyaa nɨmba kat vɨlaa kwunak ngwula. Kiya nɨmba kat vɨlaa wangwuk mala laakiyandi. Kawia kɨga lɨgiya nɨmba kat yiga vɨlaa kwunakngwuk mala kwo lɨgiyandi. Kavle waagan tavila lɨgiyaa nɨmba kat vɨlaa savɨlɨmba ngwuk. Wunamba la kwondu kwo klangwuk. Wun kat wenga kwilaa ana klangwuk. Ngi kat tɨga yiga ndi kat kwo kwunak ngwula. Ndina wenga ke klangweya.
9Moni sanya kwuka wana yilɨngweya. Yimbwi kwuka wana yilɨngweya. 10Mandɨp waavwi mandɨp man su vasɨ vasɨ ke kwutaa yiga. Ngwuk njɨvwa kwutɨga nɨmba ngwuk. Njɨvwa kwukngwuk maa ngwuk kat wan da kwigiyandi.
11Ngepma wuleilaa wuna ngay yagwa waiga nyan kat vɨlaa ndɨna ngay wuleigiyangwuk. Ngay ngay ke yilɨngweya. 12Ngay wuleilaa apma nandinya waga apma vat tɨgiyangwuk waa waigangwuk ndi kat. 13Wuleingwuk maa ngwuk kat yagwa wanjeyan apma nyaangɨt wangwa nyaangɨt ndinamba tɨgiyandɨ. Wuleingwuk mala ngwuk kat kai wanjeyan wangwa apma nyaangɨt lungwamata ngwula lak yaigandɨ. Lungwamataa ngwula lak yandɨ maa ndi kavle savle tɨgiyandi. 14Wan ngaymba lɨgiya nyan wan nɨma ngepmamba lɨgiya nyan ngwuk kat kai wandeyan wan ngepma kwagalavat laataa man mbaw vɨvlɨlaa kwagalalaa laataa aymba ngwuk. Ngwuk vɨga lɨgiyangwuk. God ngwuk kat sɨgiyandɨ waa ndi kat waga man mbaw vɨvlɨmba ngwuk. 15Ngɨni yaiga nandinya God ndinyangu kat sɨga naguvat tɨndeya nandinya Sodom Gomora walɨnja kavle ngepmamba la nɨmba ndi nɨma vat dlaigandi. Ngwuk kat kai waiga ngepma nɨmba ndi nɨma nglei vat klaigandi.
NƗMA SAKWAT NƗMA VAK YAIGANDƗ WAA JISAS MBUTNDƗ
16Awuk ngwula. Ngwuk ngepma ngepma yivat yilɨgangwuk. Kavle waala sip sip kat valɨnda vla wundi nɨmba ngwuk kat kavle vat yigiyandi. Kamboy apma maawut yelavɨka yigumba yilɨga vak vla ngwuk wupma ay ngwula. Namiyo yilɨga vak kap ana yalɨgandɨ. 17Ngwuk yigumba vɨga lɨgiyangwuk. Nat nɨmba ngwuk kat kwutaa kotngwangat kaligiyandi. Juda ngaangɨt ngambulɨnja ngay ngwuk kat kwutaa kalilaa viyaigandi. 18Wuna sɨ wangwuk maa ngwuk kat kwutaa kaligiyandi. Njambwi king mat king ngwuk kat vɨga sɨga nagunjangat kaligiyandi. Ngwuk kat kalindi maa wan njambwi nɨmba kat kwutaa lɨngwa apma nyaangɨt ndi kat mbukiyangwuk. Juda ana ndi nat nɨmba ndino ndi kat mbukiyangwuk. 19Notngwangat kalindi maa kotmak tɨngweya nyaangɨt kat nɨmamba ke vaaka yelavɨkngweya. Ngwuk kat kwutaa kalindi maa kotngweya nyaangɨt ngwutna maawupmba mbukiyowun. 20Mbukngweya nyaangɨt ngwutna nyaangɨt ana ndɨ. Nɨna nyaek kwigiya waagan ngwutna mbangɨmba tavindɨ maa mbukiyangwuk.
21Ngɨni yaiga kavle njɨmbla kavle vat nɨma sakwat yaigandɨ. Kɨta nyan ndɨna yakwa nda nyan kat kwutaa kotmak kalindɨ maa ndɨ kat kwutaa vatnyangiyandi. Nyaek ndino indina nyangu kat kwutaa kotnjangat kaligiyandi. Nyangu ndina nyaek nyɨme kat kai walaa nyaek nyɨme kat kwutaa kotmak kalindi maa vatnyagiyandi. 22Wuna sɨ ngwuk tamba kwutaa lɨgangwuk. Ngi kat tɨga nɨma sakwat nɨmba ngwuk kat kai waigandi. Wan kavle njɨmbla ngɨlɨndɨ maa kwo lɨga wuna sɨ kwutaa lɨga nɨmba ndi apma vat tɨigiyandi. 23Kɨta ngepmana nɨmba ngwuk kat kavle vat yinjeyan wan ngepma kwagalalaa vaaka nat ngepmat ay ngwula. Ngwuk kat wowun. Judana ngepma ngepma yiga mbutɨngweya njɨvwa kwiyatapman ana ngɨlɨgiyandɨ. Wun Godna vak sɨmogwi lɨga nyan yilaa yawun maa wan njɨvwa ngɨlɨgiyandɨ.
24Kwupmba lɨga nyan ndɨ kat vɨga lɨga sɨmogwi lɨga nyana njambwi nyan ana ndɨ. Sɨmogwi lɨga nyan ndɨ njambwi nyana. Njɨvwa kwutɨga nyan wan njɨvwa kat vɨga lɨgiya njambwi nyana njambwi ana ndɨ. Njɨvwa kat vɨga lɨgiya nyan ndɨ njambwi nyana. 25Kwupmba lɨga nyan ndɨ kat vɨga lɨga sɨmogwi lɨga nyan lɨnda vla lɨndeyan wovuna. Njɨvwa kwutɨga nyan wan njɨvwa kat vɨga lɨgiya njambwi nyan lɨnda vla lɨndeyan wovuna. Wun ngwutna njambwi nyan wun. Nat nɨmba wun kat wandi. Mɨn waagana njambwi nyan mɨn. Mɨn Bielsebul mɨn waa wun kat wandi. Ngwuk wuna kwupmba lɨga mbaapma nɨmba ngwuk. Ngwutno ngwuk kat kavle nglei sɨ waigandi.
NDINYANGU GOD KAT MƗNA VAAKA LƗGIYANƗN
26Ndinyangu ngwuk kat yigiya kavle vak kat nɨmamba ke vaaka yelavɨka lɨngwa. Ngwuk kat pagwuga kavle vat yilɨnja vak ngɨni nat nɨmba aywaa vɨgiyandi. Pagwulɨnja kavle nyaangɨt ngɨni nat nɨmba aywaa wukiyandi. 27Mbambala ngwuk kat pagwuga mbutuwa nyaangɨt ngepma ngepma yiga kapmba mbukiyangwuk. Kan ngwuk kat mbutuwa nat nɨma sakwat nɨmba ana wutɨgandi. Ngwuk kat mɨna mbutɨgowun. Ngwuk wutaa yiga nɨma sakwat nɨmba kat kak kiya mbukiyangwuk ngepma ngepmamba. 28Ngwuk kat vatnyagiya nɨmba kat ngwuk ke vakngwa. Ndi ngwutna wundumbu kat ana vatnyagiyandi. God kat mɨna vaaka alɨ ngwula. Nɨna mbango wundumbu kat ya vɨtɨga kavamba yiga alɨpsɨga taagagiyandɨ. 29Mat waavi kɨlɨnja waavi peni kɨta yaagilaa vɨlɨlɨk klaigangwuk. Kan mat waavi kiyalɨnja vak kat nɨna nyaek ndɨ vɨga lɨgandɨ. Mat waavi ana kiyaigandɨ waa wandeyan wan waavi ana kiyaigandɨ. 30Ngwulo ngwuk kat wupma vɨga lɨgandɨ. Ngwula nambumba lɨga yuwina sakwat vɨga sɨga naguga lɨgandɨ. 31Ngwuk ke vatɨngwa. Ngwuk kat vɨga lɨgandɨ. Mat waavi kat ngwuk kwulatɨgangwuk.
JISAS NƗNA NJAMBWI NYANA WAA WALƗNJA VAK
32Kɨta nyan Jisas wuna njambwi nyana waa nat nɨimba kat wandeyan nyinangwuk tɨga wuna nyaek kat vɨlaa wan nyana sɨ waa ndɨ wuna nyana waa waigowun. 33Kɨta nyan Jisas wandeyan nyinangwut tɨga wuna nyaek kat waigowun. Wan nyan wuna nyan ana ndɨ waa waigowun.
JISAS KAO SƗNJANGAT YANDƗ
34Kan kɨpmana nɨmba kao yilɨnja vak kat kalɨpmak ana yawun. Wungi vak kat ana yawun. Awat sowat kao sɨnjangat yawun. 35Yawun maa nat nɨmba wun kat kai wandi maa nat nɨmba wun kat yagwa wandi, wungi vak kat tɨga laataa awat sowat waliandi. Mat nyangu laataa ndina nyaek kat waliagiyandi. Taagwa nyangu ndino laataa ndina nyɨme kat waliagiyandi. Ndinyanguna taagwa laataa ndina lana nyɨme kat waliagiyandi. 36Yawun maa kɨta ngaymba lɨlɨga nɨmba laataa waliaga kapma kapma nɨmingi vla lɨgiyandi.
37kita nyan wun kat samat samat yelavɨtaa ndɨna nyaek nyɨme kat nɨma nɨma vat yelavɨtndeyan ndɨ ana wuna mbaapma wuleigiyandɨ. 38God wandɨ, ndɨna njɨvwa kwupmat yawun. Nat nɨmba kai waa wun kat sɨnjeya vak kat ana vaakiyowun. Wun kat kwinda njɨvwa kwutapman yiga wuna kwupmba yalapman yindeyan wan nyan wuna mbaapma ana wuleigiyandɨ. 39Kɨta nyan avla ndɨna mbangɨ kat mɨna yelavɨka kwo yetɨndeya vak kat mɨna yelavɨka lɨndyan ndɨ kavle yigiyandɨ. Kita nyan wuna njɨvwa kwuka ndɨna mbangɨ kat yelavɨtapman yindeyan ndɨ apma vat tɨgiyandɨ.
GODNANAMBA APMA WENGA KLANJEYA VAK KAT JISAS NDƗNA APOSEL KAT MBUTNDƗ
40Kɨta nyan ngwuk kat apma vat yindeyan wan apma vat yinda vak wuna lak yaigandɨ. Kita nyan wun kat ay waa nyanat yaigandɨ. 41Kɨta nyan Godna nyaangɨt mbuka yetɨlɨga nyan kat vɨlaa yagwa waa ndɨna ngayat kalindeyan wan apma vatna. Godna nyaangɨt mbuka yetɨlɨga nyan klaiga wenga ndɨno ngayat kwutaa kalia nyan klaigandɨ. Kita nyan apma nyan kat vɨlaa yagwa waa ndɨna ngayat kalindyan wan apma vatna. Apma nyan klaiga wenga wan dɨ kat kwutaa ngayat kalia nyan ndɨno klaigandɨ. 42Ngwuk ke maawut tɨvɨga lɨngwa. Kɨta nyan wuna mbaapmamba la mat nyan kat vɨlaa ndɨ Jisasna mbaapma nyana walaa ndɨ kat kɨgɨn ngu kuvuk kwindeyan ndɨ apma wenga klaigandɨ. Wan kwinda mat nda kat vɨlaa God ndɨ kat wenga kwigiyandɨ. Ndɨna maawut ana tɨvɨgiyandɨ waa wandɨ Jisas.
Currently Selected:
Matyu 10: ian
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.