San Mateo 4
4
Jena ruwimela alué Satanasi 'we najkíligo napurigá Esusi e'wímala alué Satanasi
1'Liko Onorúgame Alawálate o'tóleru Esusi 'mi bilena tabilé riógachi. Remónisika 'we 'yégali olánilile Esusi napurigá Esusi tabilé 'la nochámala.
2Esúsika oká liá rawé 'lige rukomi tabilé go'ale. A'kinana kulí e'luíle. 3'Lige Remónisika a'bé nawile 'yéginiliga Esusi, 'lige anele Remónisi alué Esusi:
―'La bijchiá Onorúgame Inolá níriká, baní gaináriwagó alué we'ká rejté.
4'Lige Esusi nejele:
―Onorúgame nila ra'íchali aní: «Tase pe go'ámecho go'gá ejperélamala ralámuli, abiena semátiri ra'íchali Onorúgame nila rejcholi 'nátaga ejperélamala ralámuli.»#4:4 E'nesi Deuteronomio 8:3.
5'Liko alué Remónisi Rusaleni o'tole Esusi 'lige asíriga re'pá ilígame wa'lú re'obachi amoba 'mórale, 6'lige anele:
―'La bijchiá Onorúgame Inolá níriká 'légana o'pachípuagó jena iligá. Regá aní Onorúgame nila ra'íchali:
We'ká santo ánjeli julámala ne napurigá mué repúmala.
Alué santo ánjeli nokimela mué cha'piá sekate
napurigá ta iwégame chibámala mué 'légana wijchí.#4:6 E'nesi Salmos 91:11-12.
7'Lige Esusi anile:
―Abiena regá aní Onorúgame nila ra'íchali: «Tabilé o'pochípua napurigá Onorúgame mué gu'írimala, mueka pe tonto neraga re'eme kame.»#4:7 E'nesi Deuteronomio 6:16. Onorúgameka tabilé najkí napurigá bilé tonto neraga o'pachípua.
8'Lige alué Remónisi uchéchigo siné o'tole Esusi bilena rabó re'pá ilígame, 9'lige anele alé o'tosá:
―'Nee, aka e'nébá bochígimi gawichí napu ma'chí 'lige suwábaga ralámuli etéru'é napu ekí mochí jena wijchimoba, aka e'nébá asíriga 'la suwétiri kámpá. 'Lige suwábaga ye 'yámala ne mué 'la chojkóbisiga iligá nirásaká mué ne'chí.
10'Lige Esúsika anele:
―'Mi simigá mué Satanasi, cha 'yégame ke. Regá aní Onorúgame ra'ichálila: «Pe alué Wa'lula Onorúgamecho 'la niraga etewa, pe alekecho 'la e'wiwa.»#4:10 E'nesi Deutoronomio 6:13.
11'Liko alué Remónisi 'ma waná simile alé Esusi ajtígichi. 'Liko yati neraga jsile santo ánjeli go'ame 'yamia Esusi, 'lige aminami gu'írimia.
Jena ruwimela Esusi pe kulí siné o'wínaligo nocha alé Galilea anilime ejírochi
12Esusi akele Juani galírale bajcháriga ajtigó. 'Lige simile Esusi uchéchigo ku Nasareta anilichi Galilea ejírochi. 13Tabiléchigo bejterálekó alé Nasareta anilichi, pe chebilena we'ká riógichi simile bejteramia Kapernaumi anilichi. Alé a'bé nile wa'lú ba'wí ilígichi. 'Yako alé sébale alué ralámuli israelita napu Sabuloni chojkégame nile, 'lige napu Neptalí chojkégame nile napu'lige bajchá sébalige alué ralámuli israelita alé Kanani. Makué oká chojkégame nile alué ralámuli israelita. 14Alueka alé simílekuru, alarigáchigo osáligime 'ya bejtégame rió Isaíasi anilime, napu ruyame nílige napu Onorúgame anélige alarigá ikimeo. Regá anime osale:
15Alué we'é Sabuloni anilime 'lige Neptalí anilime,
napu wa'lú ba'wí ilí,
alé simírame bowé bo'í,
alé ju, alé napu Jorani anilime bakó bo'í,
alemi napu bokuíme ju rayénali Jorani anilichi asiruga,
napu jipe ju ejiro Galilea anilime,
napu ejperégame nile ralámuli tabilé jurío.
16Alué ralámulika tabilé machime ju Onorúgame.
Jípeko 'máchigo sébako Onorúgame Inolá
napurigá bilé ra'ósali neraga.
'Lige alué ralámuli asíriga resítiri nóchali nocha mochile.
Jípeko 'ma sébaguru 'we a'lá semátiri ra'ósali.
Jípeko 'ma námamaleké alué ralámuli.#4:16 E'nesi Isaías 9:1-2.
17'Lige alé sebasa Esusi, a'lige kulí o'wínale rejcholi beniria. Regá anile:
―'Ma a'rewa alué resítiri nóchali. 'Ma amulí seba raweli napurigá Onorúgame suwábaga ralámuli nulémala. Alekeri 'ma ku 'la 'nátame gainawa.
Jena ruwimela Esusi bayéligo naó rió ro'chí i'mume
18Esusi enale suweke wa'lú ba'wí ilígichi Galilea anilichi. 'Lige alué Esusi oká rió etele bi'lepi o'nógame. Bilé Simoni anilime nile. Oká rewégame nile alué Simoni, Pegro anilime nílechigó. 'Lige uché bileka Antresi anilime nile. 'Lige alué rió ba'ichíkana pa uchule alué morali ro'chí cha'pináliga alué morálite. 19'Lige anele Esusi alué oká rió:
―Jeka simasi ne'chí 'yuga. Jípeko 'emi nokimela ralámuli gu'iria buyana chátiri bowechi e'yéname.#4:19 Esusi anile: Ralámuli i'mume nímala 'emi.
20'Lige alué oká rió a'rele alué morali 'lige simíbale alué Esusi 'yuga.
21'Lige abé a'mibemi e'yéniga Esusi uchéchigo jaré rió etele. Santiago anilime nile bilé, 'lige uché bilé Juani anilime nile. Sebereo 'kúchila nile alué oká rió. Bilé bárkochi mochile alué oká rió o'nola 'yuga morali napisua. 'Lige Esúsika bayele alué rió. 22'Lige 'ma a'rele alué barko o'nola 'yúriga, 'lige simíbale Esusi 'yuga.
Jena ruwimela Esusi we'ká ralámuli beníraligo
23Esusi bochígimi eyénale alé Galilea anilichi ejiro. Napu ekiná we'ká riógichi Esusi ruwile Onorúgame ra'ichálila ra'íchali 'lige napu ekiná u'kuchí jurío re'obálachi alé «sinagoga» anilichi. 'We a'lá semáriga ruwile alué ra'íchali churigá nulamio Onorúgame. 'Lige suwábaga ralámuli sa'wale napu ekí nayúkame nile. 24'Liko suwábaga ralámuli napu ichúrimi ejperégame nílige Siria anilichi 'ma akele alarigá nocha ajtigó Esusi. 'Lige a'pale suwábaga ralámuli napu ekí nayúkame nílige, jaré asíriga a'wágame o'kome, 'lige jaré u'kuchípala remónisi mochígame, 'lige jaré rekúpame, 'lige jaré sujírigame. 'Lige Esúsika 'ma suwábaga sa'wale. 25'Lige asíriga we'ká ralámuli najátale alué Esusi. Alé Galilea anilime ejiro mochígame, 'lige ejiro Rekápolisi mochígame ralámuli abiena najátale Esusi, 'lige Rusaleni mochígame ralámuli abiena najátale Esusi. 'Lige Jurea ejiro mochígame ralámuli abiena najátele Esusi. 'Lige alé bakochi Jorani na'lebo 'nálige 'omi niraga napu ma'chínami ju rayénali we'ká riógachi mochígame ralámuli abiena najátale Esusi.
Currently Selected:
San Mateo 4: tac
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.