Génesis 8
8
Diluviu yaku tsakinqan
1Teyta Diosqa manam qonqarqantsu Noéta ni arcachö këkaq animalkunatapis. Tsëmi yaku wallkänanpaq vientütsimurqan. Tsë vientuwanmi yaku pullanyar qallëkurqan. 2Tsëmi patsa rurinchö kaq lamarpita yaku pashtamuqpis pärarirqanna. Ciëlupita yaku yarqamunanpaq kicharëkaq punkupis wichqakärirqanmi.
3Tsëmi yaku mermar qallëkurqan. Juk pachak pitsqa chunka (150) junaqtanam 4arca tärirqan Araratchö këkaq jirkaman. Tsënö tärirqan qanchis kaq killa chunka qanchis junaqchömi. 5Yakunam ichikllapa ichikllapa wallkayarqan. Chunka kaq killa qallanan junaqnam jirkapa puntankuna rikakaramurqan.
6Tsëpita chusku chunka (40) junaqtanam Noé kicharqan arcapa ventänanta. 7Tsëpitanam juk cuervuta#8.7a Cuervuqa rukusnö yanam. kacharqan yaku tsakinqanta o mana tsakinqantapis musyananpaq. Tsënö kaptinpis tsë cuervuqa manam kutirqantsu, sinöqa yaku jananpam wakpa këpa pärir#8.7b Wakin nunakunaqa bolar niyanmi. purirqan yaku tsakinanta shuyar.
8Tsëpitanam kacharqan juk urpëtana patsa tsakishqanta o mana tsakishqanta musyananpaq. 9Patsa jananchö yaku juntaraptinmi mëchöpis ratananpaq mana kaptin urpëqa arcaman kutirqan. Tsëmi Noéqa makinta makyarqan urpë ratananpaq. Täriptinnam arcaman yëkatsirqan.
10Tsëpita qanchis junaqtanam Noé yapë kacharqan urpëta. 11Patsa paqasyarëkaptinnam urpëqa kutirqan olïvupa räman amushqa. Tsënöpam Noé musyarirqan yaku tsakikanqantana. 12Kutinqanpita qanchis junaqtanam urpëta yapë kacharqan. Tsë urpëqa mananam kutirqannatsu.
13Joqta pachak juk (601) watayuq Noé këkaptinmi yaku tsakirirqan. Tsëqa karqan mushuq wata qallëkunan junaqmi. Tsë junaqmi arcapa qatananta kicharkur Noé rikarqan patsa tsakishqatana. 14Ishkë kaq killachö ishkë chunka qanchis (27) junaq këkaptinmi patsa tsakirirqan. 15Tsëmi Noéta Teyta Dios nirqan: 16<<Kananqa warmikiwan, tsurikikunawan y llumtsïnikikunawan arcapita yarquyëna. 17Tsënölla tukïläya animalkunata, lätëpa puriqkunata y llapan casta päriqkunatapis qarqïna jinantinpa ëwar mirayänanpaq>>.
18Tsënö niptinmi Noé yarqurqan warminwan, tsurinkunawan y llumtsïninkunawanpis. 19Tsënöllam yarquyarqan llapan animalkuna, lätëpa puriqkuna y llapan casta päriqkunapis. 20Noé yarqurnam juk altarta perqarqan Teyta Diosta adorananpaq. Tsëpitanam cada casta püru kaq wätakunapita y päriqkunapita pishtarkur altarchö sacrificiuta kayarqan.#Lev. 1.1-7. 21Tsë kayanqanpa pukutëninmi Teyta Diospa shonqunpaqnö karqan. Tsëmi kënö nirqan: <<Nunakuna wamra kayanqanpita patsam shonqun munashqannö jutsata rurar kawayan. Tsënö kawayaptinpis kë patsata manam yapëqa maldisishaqnatsu. Kanan ushakätsinqänöqa kë patsachö kawaqkunata mananam ushakätsishaqnatsu.
22<<Kë patsa manaraq ushakanqanyaqqa nunakuna murukuyanqam y ëllupakuyanqam.
Kanqam alalëpis, achachëpis, usyapis, tamyapis, junaqpis y paqaspis>>.
Currently Selected:
Génesis 8: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.