Génesis 19
19
Sodomatawan Gomorrata Teyta Dios ushakätsinqan
1Patsa asqurëkaptinnam Sodomaman chäyarqan puntaq kaq ishkë angelkuna. Lotnam tëkarqan markaman yëkuna sawan kaqchö. Pëkunata rikëkurnam Lotqa urkunpis patsaman chanqanyaq puntankunaman qonqurikïkurqan. 2Qonqurirëkarnam pëkunata nirqan: <<Tëtakuna, wayïman ewkulläshun posadakuyänëkipaq. Tsëchömi chakikikunata paqakurir jamakuriyanki. Warënam qoyallana pasakuyanki>>.
Tsënam pëkunaqa niyarqan: <<Payllä, tëtë. Noqakunaqa pläzallachömi waräkuyäshaq>>.
3Tsënö mana munëkäyaptinpis wayinchö quedakuyänanpaq Lot kutïkuryan rowaptinmi wayinman ëwayarqan. Chäriyaptinnam levadürannaq tantatawan alli mikïta Lot arukatsirqan mikuyänanpaq.
4Manaraq punuyaptinmi Sodoma marka nunakuna Lotpa wayinta tumariq churakäriyarqan. Jövinpita qallëkur hasta awkinyaq limpu ëllukäriyarqan. 5Tsëpitanam Lotman qaparir qayarir kënö qayakuyarqan: <<¿Mëtaq wayikiman posadakamuq nunakuna? ¡Jinallachö qarqamï pëkunawan punuyänäpaq!>>
6Tsënö niyaptinnam Lotqa wayinpita yarqurqan punkunta shumaq wichqarkur. 7Y tsë nunakunatanam kënö nirqan: <<Tëtakuna, watukayämaqnïkunataqa ama imatapis mana allita rurëkulläyëtsu. 8Pëkunapa rantin doncëllallaraq ishkë shipashnïkunata jorqaramushaq munayanqëkita rurayänëkipaq. Wayïman posadakamuq nunakunataqa ama imatapis rurëkulläyëtsu>>.
9Tsënam pëkuna kënö niyarqan: <<¡Qamqa washa washata ëwë! ¿Forastëru nuna këkarku noqakunata mandamëta munayanki? ¡Pëkunata rurëta munayanqäpitapis qamkunataqa peormi rurayashqëki!>>
Tsënö nirmi Lotta kumakacharkur ëwayarqan wayi punkuta tsoqayänanpaq.
10Tsë posadakushqa nunakunanam Lotta wayi ruriman sutëkur punkuta wichqarayämurqan. 11Waqtachö këkaq nunakunatanam jövintapis awkintapis pasëpa wiskuyäratsiyarqan. Tsënö karmi wayi punkuta ashiyanqanllachö utikäyarqan.
12Tsëpitanam tsë posadakushqa nunakuna Lotta niyarqan: <<¿Castëkikuna kë markachö kanraqku? Kaptinqa warmitapis, ollqutapis, mashëkipaq kaq jövinkunatapis pusharkur y llapan imëkikunatapis aparkur kë markapita ewkï. 13Atskaqmi Teyta Diosman quejakuyashqa kë markachö nunakuna alläpa jutsasapa kayanqanta. Tsënö kayaptinmi Teyta Dios kachayämashqa kë markata chipyëpa ushakätsiyänäpaq>>.
14Tsënö niptinnam mashan kayänanpaq kaq jövinkunaman ëwëkur Lot nirqan: <<¡Këpita llapantsik ewkushun! ¡Teyta Diosmi kë markata ushakätsinanpaqna këkan!>>
Tsë mashan tukuqkunaqa yarpäyarqan Lot brömapëkanqantam.
15Patsa warärëkaptinnam Lotta angelkuna niyarqan: <<Kë markata ushakätsiyaptï mana ushakänëkipaq ras ewkï warmikita y ishkan tsurikita pusharkur>>.
16Lot mana ras yarquptinnam angelkuna pëta, warminta y tsurinkunatapis jancharkur tsë markapita jorquyarqan. Tsënöpam Teyta Dios pëkunata ankupar jorqurqan tsëchö mana ushakäyänanpaq.#2Ped. 2.7. 17Tsë markapita karuchö këkäyaptinnam juk kaq ángel nirqan: <<Mana wanuyänëkipaq qepaman mana tumashpa ëqillapa ewkuyë. Pampachöpis mana shärärishpa jirkayaq ewkuyë>>.
18Tsënö niyaptinnam Lotqa nirqan: <<¡Tëtakuna, ichiklla shuyëkulläyë! 19Qamkunaqa alli nunakuna karmi ankupäyämar mana wanuyänäpaq jorqayämarqunki. Manaraq jirkaman chäyaptïchi tsë castïgu taripëkayämanqa. Tsënö këkuptinqa këllachöchi ushakärilläyäshaq. 20Taqë amänullachö këkaq taksha markallaman safayanqäyaq shuyëkulläyë. Tsë taksha markataqa ama ushakëkatsilläyëtsu>>.
21Tsënam juknin kaq ángel nirqan: <<Mañakamanqëkinö katsun. Manam tsë markata ushakätsishaqtsu. 22Tsënö kaptinqa ras tsë markaman ewkuyë. Tsëman manaraq chäyaptikiqa manaran imatapis rurashaqraqtsu>>.
Tsëpita patsam tsë markapa shutin churarqan Zoarta.#19.22 Zoar ninanqa takshalla ninanmi.
23Inti yarqarëkämuptinnam Zoarman Lot chärirqan. 24Chäriptinnam Sodoma y Gomorra markakunaman azufrillantin ninata Teyta Dios tamyatsimurqan. 25Tsë markakuna këkanqan pampachö nunakunata, wätakunata y llapan imëka kaqtapis chipyëpam nina usharqan.#Mat. 10.15; 11.23-24; Luc. 10.12; 17.29; 2Ped. 2.6; Jud. 7. 26Lotpa warminnam#Luc. 17.32. safëkanqanchö qepaman tikrëkurqan. Tsëmi jinanllachö wanka kachi rumi tikrarirqan.
27Tsëpita waränin qoyanam Abraham ëwarqan Teyta Dioswan parlanqan kaqman. 28Tsëpitam rikärirqan Sodoma y Gomorra markakunapita jornupitanöraq qoyë sharkukïkaqta. 29Tsënömi Teyta Dios ushakätsirqan Lot täranqan pampachö këkaq markakunata. Tsënö ushakätsirpis Abraham mañakushqa kaptinmi tsë markakunapita Lotta safatsirqan.
Lotpa shipashninkuna imanöpa wawayuq kayanqan
30Tsëpitanam Lot alläpa mantsakurqan Zoarllachö täkïta. Tsëmi ishkan warmi tsurinkunata pusharkur jirkaman ewkurqan. Tsëchönam machëkunallachö täkuyarqan. 31Tsënam mayor kaq shipashqa nananta nirqan: <<Tëtantsikqa awkinnam. Y këchöqa manam ollqukuna kantsu costumbrintsikmannö noqantsikwan täkuyänanpaq. 32Tsëmi tëtantsikta macharkatsir pëwan punushun noqantsikchö tsurin yurikuptin mirënintsik mana ushakänanpaq>>.
33Tsëmi tsë paqas tëtanta vïnuwan macharkatsiyarqan. Mayor kaq shipashnam tëtanman ullurkur pëwan punurirqan. Tëtanqa machashqa karmi mäkurqantsu imë höra tsurin yëkunqanta ni yarqunqantapis.
34Waräninnam mayor kaq shipash qepa kaq nananta nirqan: <<Qanyan paqasmi tëtantsikwan punurqü. Kanan paqasna qampis pëwan pununëkipaq vïnuta uputsir yapë macharkatsishun. Tsënöpam tëtantsikpita miraqkuna ushakäshuntsu>>.
35Tsënö nirmi tsë paqas tëtanta yapë machatsiyarqan. Tsëpitanam qepa kaq shipashna tëtanwan punurqan. Alläpa machashqa karmi tëtanqa mäkurqantsu imë höra tsurin yëkunqanta ni yarqunqantapis.
36Tsënöpam Lotpa ishkan tsurinkuna tëtanpata qeshyaqyäriyarqan. 37Mayor kaqmi qeshpikurirqan ollquta. Tsë wamrapa shutinmi churayarqan Moab nir. Pëpita miraqkunapitam moabita nunakuna këkäyan. 38Tsëpitanam qepa kaqpis qeshpikurirqan ollquta. Tsë wamrapa shutinnam churayarqan Ben-ammi nir. Ben-ammipitanam amonita nunakuna këkäyan.
Currently Selected:
Génesis 19: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.