Génesis 16
16
Ismael yurikunqan
1Abrampa warmin Sarai qolloq kaptinmi wawan karqantsu. Saraipa sirwiqninmi Agar shutiyuq shipash karqan. Agarqa karqan Egiptupitam. 2Sarainam Abramta nirqan: <<Qolloq kanäpaqmi Teyta Dios permitishqa. Tsëmi rowëkuq sirwimaqnï Agarwan punuyänëkipaq. Tsënöpa itsa pëchö tsuriki yurikuptin wawä cuenta kanman>>.
Tsënö rowaptinmi Abram änirqan Sarai ninqanta.
3Tsënam Saraiqa Abramta punutsirqan Egiptupita apamunqan sirwiqnin Agarwan. Tsëqa karqan Canaánchö chunka watana Abram tëkaptinmi. 4Abramwan punurir qeshyaqyärirmi Agarqa patrönan Saraita allqutsar qallëkurqan.
5Tsëmi Abramta Sarai nirqan: <<Agarwan pununëkipaq kikï nikaptiqpis qeshyaq tikrarir chikimänanpaq qammi culpayuq kanki. Tsënö kanqëkipitam Teyta Dios juzgashunki>>.
6Tsënö niptinnam warmin Saraita Abram nirqan: <<Sirwishuqnikiqa makikichömi këkan. Qamna mä imatapis pëta rurë>>.
Tsënö niptinmi Saraiqa alläpa allqutsar qallakïkurqan Agarta. Tsënö ruraptinnam Agarqa pëpita safar ewkurqan.
7Tsënö ëwëkaptinmi Teyta Diospa angelnin chusyaqchö këkaq pukyu nöpanchö yuripïkurqan. Tsë pukyuqa sur partipa ëwana nänichömi karqan. 8Angelnam kënö tapurqan: <<Saraipa sirwiqnin Agar, ¿mëpitataq shamïkanki? Y ¿mëtataq ëwëkanki?>>
Agarnam nirqan: <<Patrönä Saraipita safarmi ewkïkä>>.
9 Teyta Diospa angelninnam nirqan: <<Patrönëki Saraiman kutïkur llapan mandashunqëkita imatapis rurë>>.
10Jina kënöpis nirqanmi:
<<Wawëkipitam yupëtapis mana puëdipaq atskaman mirayanqa.
11Qeshyaq këkanqëki wawëki ollqum kanqa.
Teyta Diosmi wiyashurqunki llakikur mañakunqëkita.
Tsë wawëkipa shutinmi churanki Ismaelta.#16.11 Ismael ninanqa Teyta Dios wiyan ninanmi.
12Tsë wawëkiqa chucaru cawallunömi kanqa.
Pïmëwan pelyaptinmi pïmëpis chikir contran sharkuyanqa.
Castankunawanpis chikinakurmi kawanqa>>.
13Kikin Teyta Dios parlapëkanqanta käyirirnam Agarqa <<rikämaqnï Diostam rikarqü>> nirqan.
Tsëpitam Diospa shutin churarqan El-Roí#16.13 El-Roí ninanqa Rikämaq Teyta Dios ninanmi. Tsënö shutin churarmi Diospa mas juk shutin churarqan. nir. 14Tsëmi tsë pözupa shutin churarqan Beer Lahai-Roí.#16.14 Beer Lahai-Roí ninanqa Kawëkaq Rikämaqpa Pözun ninanmi. Tsë pözuqa këkan Cadespita Beredman pasaq nänichömi.
15Tsëpita kutikurnam Agar Abrampa tsurinta qeshpikurqan.#Gál. 4.22. Tsë tsurinpa shutinnam churarqan Ismaelta. 16Ismaelta Agar qeshpikunan tiempu Abramqa këkarqan puwaq chunka joqta (86) watayuqmi.
Currently Selected:
Génesis 16: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.