Génesis 12
12
Abramta Teyta Dios äninqan
1Juk junaqmi Abramta Teyta Dios kënö nirqan: <<Markëkita y castëkikunata jaqirir rikätsinaqpaq kaq läduman ewkï.#Hech. 7.2-3; Heb. 11.8.
2<<Qampita miraqkuna jatun nación kayänanpaqmi permitishaq.
Bendisiptiqmi pïmëpis respetayäshunki.
Qam rëkurmi wakin nunakunapis bendicionta chaskiyanqa.
3Bendisishuqnikikunataqa bendisishaqmi.
Maldisishuqnikikunataqa maldisishaqmi.
Qam rëkurmi kë patsachö llapan casta nunakunapis bendicionnïta chaskiyanqa>>.#Hech. 3.25; Gál. 3.8.
4 Teyta Dios tsënö niptinmi sobrinun Lotwan Abram ewkuyarqan. Haránpita Abram ewkurqan qanchis chunka pitsqa (75) watayuq këkarmi. 5Canaánman ewkurmi warmin Saraita, sobrinun Lotta y Haránchö tarinqan llapan sirwiqninkunata pushakurqan. Tsënöllam wätankunatapis qatirkur y llapanninkunata aparkur ewkurqan.
Canaánman chëkurnam 6Siquem marka nöpanyaq ëwar Moripa sagrädu encina montin nöpanchö Abram täkurqan. Tsëchöqa cananeo nunakunam yachëkäyarqan. 7Tsëchö tëkaptinmi Teyta Dios yuripur Abramta nirqan: <<Qampita miraqkunatam kë llapanta qoykushaq>>.#Hech. 7.5.
Tsëchö yuripunqanpitam altarta Abram perqarqan Teyta Diosta adorananpaq.
8Tsëpitanam Bet-elpa tsimpan inti yarqamunan läduchö këkaq jirkakunaman ewkurqan. Tsëchömi toldun shäritsirqan täkunanpaq. Tsëchöpis juk altarta perqarirmi Teyta Diosta tsëchö adorarqan. Täranqan kaqpita inti jeqanan kaq läduchömi Bet-el markaqa karqan. Hai markanam këkarqan inti yarqamunan kaq läduchö. 9Tsëpitanam ichikllapa ichikllapa ëwar Neguev kinranpa ëwarqan.
Egiptuchö Abram täranqan
10Täranqan kaqchö pasëpa muchï kaptinmi Egipto nacionmanna täkunanpaq Abram ewkurqan. 11Egiptuman yëkïkarnam warmin Saraita nirqan: <<Alläpa shumaqllallan warmim kanki. 12Egipto nunakunam warmï kanqëkita musyëkurqa wanuratsimar apakuyäshunki. 13Mana wanutsiyämänanpaq pëkunata ninki <paninmi kä> nirlla>>.#Gén. 20.2; 26.7.
14Egiptuman Abram chäriptinmi tsëchö täraq nunakuna Saraita rikäyarqan shumaqllan kanqanta. 15Egiptuchö Faraónta mandakur yanapaq nunakunapis rikäyarqan Sarai shumaqllallan kanqantam. Tsëta willëkuyaptinmi Faraónqa palaciunman qayatsirqan. 16Tsëmi Sarai rëkur Abramta qoykurqan üshakunata, chiwakunata, wäkakunata, ashnukunata y camëllukunatapis. Tsënöllam qoykurqan sirwiqninkuna kayänanpaq ollqutapis warmitapis.
17Saraita apanqanpitanam Faraónta llapan castankunatawan feyu qeshyawan Teyta Dios castigarqan. 18Tsëmi Abramta qayëkatsirnin Faraón nirqan: <<¿Imanirtaq këta rurëkamarqunki? Sarai warmiki këkaptin ¿imanirtaq willamarqunkitsu? 19¿Imanirtaq <panïmi> nimarqunki? Tsënö nimaptikim warmï kananpaq apakurqü. Y cäsillapam punurqü. Jina höra warmikita pusharkur këpita ewkuyë>>.
20Tsënö nirmi Faraónqa nunankunata kacharqan Egiptupita Abramta qarquyänanpaq. Tsëmi Abram Egiptupita ewkurqan warminta y imëkankunatapis aparkur.
Currently Selected:
Génesis 12: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.