Génesis 1
1
Teyta Dios llapanta kamanqan
1Imapis manaraq kaptinmi Teyta Dios kamarqan ciëluta y kë patsata.#Juan 1.1-3. 2Kë patsaqa manam kanan këkanqannötsu karqan, sinöqa paqasyarëkaq yakullam karqan. Tsë yaku jananchömi Teyta Diospa Espïritun kuyukïkarqan.
3Tsëmi Teyta Dios nirqan: <<¡Atsikyaq katsun!>>#2Cor. 4.6.
Niptinnam atsikyarqan. 4Atsikyaqta kamarirmi Teyta Dios rikarqan alli kanqanta. Tsëmi patsakätsirqan tutapëpis y atsikyëpis kananpaq. 5Atsikyëpa shutinmi churarqan junaqta y mana atsikyëpatanam tutapëta. Tsëkunatam kamarqan punta kaq junaqchö.
6Tsëpitanam Teyta Dios nirqan: <<Yaku ishkëman rakikänanpaq yaku chöpinchö azulyarëkaq katsun>>.#1.6 Tsë witsanmi nunakuna yarpäyarqan ciëlu chukru kanqanta y cerninanö kaptin tsëpa tamyamunqanta.
7Ninqannöllam azulyarëkaqta kamarqan. Tsënöpam wakin kaq yaku quedarqan kë patsachö y wakin kaqnam azulyarëkaqpa jananchö. Ninqannöllam llapanpis karqan. 8Azulyarëkaqpa shutinmi Teyta Dios churarqan ciëlu nir. Tsëkunatam kamarqan ishkë kaq junaqchö.
9Tsëpitanam Teyta Dios nirqan: <<Tsaki patsa rikakänanpaq ura kaq yaku juk lädullaman ëllukäyätsun>>.#2Ped. 3.5.
Ninqannöllam llapanpis patsakarqan. 10Tsaki kaqpa shutinmi Teyta Dios churarqan patsa nir. Y ëllukashqa yakutanam lamar nirqan. Tsëta kamarirmi Teyta Dios rikarqan alli kanqanta.
11Tsëpitanam nirqan: <<Patsapita jeqamutsun tukïläya qorakuna: muruyuq qorakuna y tukïläya wayuq montikunapis>>.
Ninqannöllam llapanpis karqan. 12Tsëmi jeqamurqan tukïläya qewakuna y tukïläya wayuq montikunapis. Tsëkunata kamarirmi Teyta Dios rikarqan alli kanqanta. 13Tsëkunatam kamarqan kima kaq junaqchö.
14Tsëpitanam Teyta Dios nirqan: <<Ciëluchö atsikyaqkuna kayätsun junaqpis y paqaspis kayänanpaq, junaqkunata, watakunata yupayänanpaq y muruyänanpaq cosechayänanpaq imë kanqantapis musyayänanpaq. 15Tsënölla atsikyaqkuna ciëluchö kayätsun patsata aktsinanpaq>>.
Ninqannöllam llapanpis kamakarqan.
16Tsënöllam kamarqan intita, killata y qoyllurkunatapis. Intitam kamarqan junaqpa aktsinanpaq y killatanam kamarqan paqaspa aktsinanpaq. 17Tsëkunatam Teyta Dios ciëluman churarqan kë patsata aktsinanpaq 18y tsënöpa junaqpis y tutapëpis kananpaq. Tsëkunata kamarirmi Teyta Dios rikarqan alli kanqanta. 19Tsëkunatam chusku kaq junaqchö kamarqan.
20Tsëpitanam Teyta Dios nirqan: <<Yakuchö pescädukunapis y patsa jananpa päriqkunapis#1.20 Wakin nunakunaqa bolaqkunapis niyanmi. atska kayätsun>>.
21Tsënö nirmi Teyta Dios lamarchö jatusaq mantsanëpaq animalkunata kamarqan. Tsënöllam kamarqan lamarchö, qochakunachö y mayukunachö tukïläya pescädukunata. Tsënöllam kamarqan tukïläya päriqkunatapis. Tsëkunata kamarirmi Teyta Dios rikarqan alli kanqanta. 22Tsëpitanam bendisïkurqan: <<Lamarchö kawaqkuna y patsa jananpa päriqkunapis, atskaman mirayë>> nir.
23Tsëkunatam pitsqa kaq junaqchö kamarqan.
24Tsëpitanam Teyta Dios nirqan: <<Tukïläya wätana kaq y mana wätana kaq animalkunapis kayätsun. Tsënö katsun lätëpa puriqkunapis>>.
Ninqannöllam llapanpis karqan. 25Tsënöpam Teyta Dios kamarqan tukïläya wätana kaq y mana wätana kaq animalkunata y lätëpa puriqkunatapis. Tsëkunata kamarirmi Teyta Dios rikarqan alli kanqanta.
26Tsëpitanam nirqan: <<Kananqa nunata kamashun kikintsik niraqta.#Gén. 9.6; 1Cor. 11.7. Noqantsiknö kananpaqmi pëta kamashun.#1.26 Unë reykunam niyarqan pëkunalla Dios niraq kayashqanta. Tsënöpis niyarqan Dios niraq kar pëpa shutinchö nunakunata mandayanqanta. Tsënö niyaptinpis kë textuchöqa nin llapan nunakunapis Teyta Dios niraq kayashqantam. Pë niraqta nunata kamashqanta nirqa Teyta Dioswan mandar kë patsachö kaqkunata shumaq rikänantsikpaq kashqantam nin. Pëpa munëninchömi kayanqa pescädukuna, päriqkuna, wätana kaq y mana wätana kaq animalkuna y lätëpa puriqkunapis>>.
27Kikin niraqtam Teyta Dios nunata kamarqan.
Pënö kananpaqmi kamarqan.
Ollqutapis warmitapis pëmi kamarqan.#Mat. 19.4; Mar. 10.6.
28Tsëpitanam bendisïkur nirqan:
<<Mirayë kë patsa juntanqanyaq.
Munënikichö kayätsun pescädukuna, päripa puriqkuna y llapanpis kë patsachö kawaqkuna>>.#Gén. 5.1-2; 9.1.
29Tsëpitanam nirqan: <<Mikuyänëkipaqmi kamarqü kë patsachö llapan mikuna kaq qorakunatawan wayuq kaq montikunatapis. 30Animalkuna, päriqkuna y lätëpa puriqkuna mikuyänanpaqmi montikunatawan qewakunata kamarqü>>.
Ninqannöllam llapanpis karqan. 31Llapan kamanqankuna alläpa alli kanqantam rikarqan. Tsëkunatam Teyta Dios kamarqan joqta kaq junaqchö.
Currently Selected:
Génesis 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.