Salmos 59
59
1Hneˉ Dio kya̱a̱nꜙ, lä̱ä̱ˋ jnäꜘ kihꜗ hi̱ˉ naˉhøøhˊ kinꜙ.
Hiꜙ läꜙja̱ˉ lä̱ä̱ˋ jnäꜘ kihꜗ hi̱ˉ hnooˉ juuˈ kinꜙ.
2Hä̱ä̱ˋ jnäꜘ kihꜗ hi̱ˉ jmeeꜙ heˉ hlɨɨhˈ.
Hiꜙ lä̱ä̱ˋ jnäꜘ kihꜗ hi̱ˉ jngɨɨhꜙ.
3Jëëhꜘ tä̱ä̱y˜ jnäꜘ, maˉku̱hꜗ hi̱ˉ hä̱ä̱ˈ
jø̱ø̱y˜ lɨhꜘ baˊ jngëëyhˈ jnäꜘ.
DSAˉJØ̱Ø̱Hˈ kya̱a̱nꜙ,
ja̱ꜙ taꜙlaꜙ kihꜗ heˉ maˉhlä̱ä̱hnˉ kya̱a̱yhˊ,
niꜙ ja̱ꜙ heˉ maˉjmeenꜗ heˉ hlɨɨhˈ kiyhꜗ.
4Niꜙ saꜙ ä̱ä̱nˉ kiyhꜗ mahꜗ goˉnääꜘ gyihꜗ nëˊ kinꜙ.
Näˊ mɨˊnëhˊ mahꜗ ñaˉ miˉje̱e̱ꜚ jnäꜘ
hiꜙ jëëˋ haˉ läꜙ jmeeyhꜙ jnäꜘ.
5Hneˉ DSAˉJØ̱Ø̱Hˈ kya̱a̱nꜙ hi̱ˉ chaˉ gaꜙläꜙjëꜙ beꜘ kihꜗ,
hneˉ Dio kya̱a̱ꜗ jnäähꜗ dsaˉ Israel,
näˊ mɨˊnëhˊ mahꜗ heehˋ wɨɨꜘ läꜙjë̱ë̱ꜙ hi̱ˉ saꜙ la̱a̱ꜗ dsaˉgooˉ jnäähˈ.
Taꜙ waˊ läˉñihꜘ hohꜘ niꜙ miihˉ kihꜗ hi̱ˉ taˉju̱u̱ˈ heꜘ.
6Goˉnääyꜘ taꜙ gaꜙnʉʉˉ mahꜗ jey˜ läꜙko̱hꜘ dsɨɨˉ.
Dsaˉta̱a̱yhˋ läꜙkuˊ läꜙji̱i̱ꜗ kihꜗ jeeˊ jwɨɨˉ.
7Naˉka̱hˈ baˊ tʉˊwɨhˉ hooyˊ,
hlëëyhꜙ juuˈ wɨɨꜘ heˉ laꜗ läꜙko̱hꜘ ñeˈchʉ̱ʉ̱hˉ.
Mahꜗ jäyhꜘ: “Niꜙ ja̱a̱ˉ saꜙ cha̱a̱ˉ hi̱ˉ nuuˉ jnänˋ.”
8Pero hneˉ Dio kya̱a̱nꜙ, ngɨɨˋ baˊ hneˉ kiyhꜗ.
Miˉkwa̱hꜚ kihꜗ läꜙjë̱ë̱ꜙ hi̱ˉ saꜙ la̱a̱ꜗ dsaˉgooˉ jnäähˈ.
9Taꜙlaꜙ kyahꜗ hneˉ baˊ chaˉ jeeˊ lä̱ä̱nꜘ, jeeˊ saꜙ hiiꜘ gooˉ.
Jëëhꜘ hneˉ baˊ la̱a̱hˈ beꜘ kinꜙ, hneˉ baˊ hi̱ˉ chehꜗ nëˊ kinꜙ.
10Dio hi̱ˉ hnääꜗ jnäꜘ, jäyꜙ miˉje̱e̱yꜚ jnäꜘ.
Jmeeyꜗ kihꜗ hi̱ˉ naˉhøøhˊ kinꜙ läꜙko̱o̱ˉ hyohˉ dsënꜙ baˊ.
11Taꜙ miˉlla̱a̱ˈ ko̱ˉhäˊ baˊ läꜙjë̱ë̱ꜙ
mahꜗ saꜙ gaaꜘ dsëꜗ dsaˉ kya̱a̱nꜙ haˉ läꜙ jmeeyꜙ.
Hëëꜙ kiyhꜗ taꜙ laꜙ taꜙ jnøꜙ kya̱a̱hˊ beꜘ kyahꜗ,
jwä̱ä̱yꜙ taꜙ hwaꜗ goˉte˜, hneˉ Dsaˉjø̱ø̱hˈ kya̱a̱nꜙ hi̱ˉ chehꜗ nëˊ kya̱a̱ˈ jnäähꜗ.
12Kihꜗ heˉ hlëëyhꜙ heˉ hlɨɨhˈ jmahꜗ, heˉja̱ˉ waˊ jä̱yꜘ läꜙ maˉla̱a̱yꜗ naˉ heˉ jmääy˜ hñiiꜘ ka̱a̱hˊ.
Kihꜗ heˉ jwäy˜ dsoˊjwɨɨꜘ hiꜙ hlëëyhꜙ juuˈ taˉjuuˈ,
13heˉja̱ˉ miˉlla̱a̱ˈ goˉte˜ kya̱a̱hˊ heˉ yaˉjë̱ë̱ˈ hohꜘ mahꜗ
moꜙtoꜙ waˊ cha̱a̱ˉ gyihꜗ.
Mahꜗ läˉñeˉ läꜙjë̱ë̱ꜙ, hneˉ la̱a̱hꜗ Dio hi̱ˉ jmeeꜙ hihꜙ kihꜗ Jacob hiꜙ kihꜗ läꜙka̱a̱ˉ läꜙjʉhꜗ jmɨˉgyʉʉꜙ kaˉlähꜘ.
14Goˉnääyꜘ taꜙ gaꜙnʉʉˉ mahꜗ jey˜ läꜙko̱hꜘ dsɨɨˉ,
dsaˉta̱a̱yhˋ läꜙkuˊ läꜙji̱i̱ꜗ kihꜗ jeeˊ jwɨɨˉ.
15Gaꜙnääyˊ hnooyhˉ heˉ kuyhꜙ,
hiꜙ cherˊmahꜗ saꜙ gaꜙkë̱ë̱yꜗ lluꜗ gaꜙnääyˊ kɨˉhooyh˜.
16Pero jnäꜘ hänˋ kihˈ beꜘ kyahꜗ,
tiih˜ gaˊ hänˋ kihˈ heˉ hnaahꜙ jnäꜘ.
Hneˉ hi̱ˉ chehꜗ nëˊ kinꜙ hi̱ˉ kwaꜙ jeeˊ gyanˋ
jeeˊ saꜙ hiiꜘ gooˉ läꜙ maˊ cha̱a̱nˉ heˉ wɨɨꜘ.
17Hneˉ la̱a̱hꜗ beꜘ kinꜙ, kyahꜗ hneˉ baˊ hänˋ su̱ꜚ.
Jëëhꜘ hneˉ la̱a̱hꜗ Dio hi̱ˉ kwaꜙ jeeˊ gyanˋ,
hneˉ Dio kya̱a̱nꜙ hi̱ˉ hnääꜗ jnäꜘ chaˉmiihˉ.
Currently Selected:
Salmos 59: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.