Salmos 55
55
1Hneˉ Dio kya̱a̱nꜙ, nʉʉˉ kinꜙ heˉ chu̱u̱nꜘ kya̱a̱hˊ hneˉ.
Taꜙ jmääꜙ jnäꜘ taꜙ kooꜘ kihꜗ heˉ hlë̱ë̱hnˊ hneˉ.
2Jmeeˊ heꜗ mahꜗ je̱e̱hˋ juuꜗ kinꜙ.
Saꜙ manꜙ heeˉ jmeenˋ heˉ jëën˜ wɨɨꜘ.
3Hi̱ˉ naˉhøøhˊ kinꜙ jmeeꜙ jlä̱ä̱nꜙ kya̱a̱hˊ juuˈ kihꜗ,
peerꜙ ki̱ˉga̱a̱ˉ hooyh˜.
Maˉjwäyꜗ chaˉmiihˉ heˉ wɨɨꜘ nëˊ kinꜙ,
hä̱ä̱yˈ gaꜙngëëꜘ jwë̱ë̱ˈ.
4Peerꜙ kuˈji̱i̱ꜙ nehꜙ tuhˉdsënꜙ,
hiꜙ maˉja˜ nëˊ kinꜙ heˉ gohnꜙ ju̱u̱nꜘ.
5Heˉ gohnꜙ jlä̱ä̱nꜙ,
moꜙsoꜙ liihnꜚ goˉte˜.
6Jwahnꜙ: “¿Hi̱i̱ˉ kwëëhꜗ jnäꜘ saˊkyooꜘ chaˊjuuˉ,
mahꜗ hë̱ë̱nˋ jeeˊ te̱e̱hnˊ dsënꜙ?
7Jeeˊ hë̱ë̱nꜙ ja̱ˉ nɨɨnˋ ʉ̱ʉ̱ꜘ goˉte˜.
Jeeˊ ja̱ˉ jä̱nˋ jeeˊ laˈ hwaꜗ ki̱i̱ꜙ.
8Kyʉ̱ʉ̱nˋ koˉchihˊ jeeˊ lä̱ä̱nˊ hñiinꜙ kihꜗ heˉ wɨɨꜘ heˉ maˉja˜ nëˊ kinꜙ, heˉ laꜗ läꜙko̱o̱ˉ lleꜘ täꜘ heˉ hi̱i̱ˊ gooˉ.”
9Dsaˉjø̱ø̱hˈ kya̱a̱nꜙ, he̱e̱ꜙ goˉte˜ dsaˉ hñaaˉ dsëꜗ heꜘ
hiꜙ waˊ ka̱hˈ waˊ gwë̱hˈ läꜙjëꜙ juuˈ heˉ hlëëyhꜙ.
Jëëhꜘ, ko̱o̱ˉ hä̱ä̱ˈ bihꜗ gaꜙnääyˊ te̱ˉhneeyꜘ läꜙka̱a̱ˉ jeeˊ jwɨɨˉ.
10Läꜙjmɨɨˈ läꜙhwëˈ baˊ gaꜙnääyˊ
läꜙkuˊ läꜙji̱i̱ꜗ kihꜗ jeeˊ jwɨɨˉ.
Läꜙka̱a̱ˉ jeeˊ jwɨɨˉ jmeeyꜙ heˉ hlɨɨhˈ jmahꜗ baˊ.
11Chaˊjwëꜗ jeeˊ gaꜙnääyˊ,
jmeeyꜙ hɨ̱ɨ̱ˉ hiꜙ läꜙja̱ˉ miˉga̱a̱yꜙ dsaˉ, saꜙ tʉyꜗ goˉte˜ heˉ hlɨɨhˈ.
12Waˊraˉ jähꜘ kihꜗ ja̱a̱ˉ hi̱ˉ naˉhøøhˊ gaꜙhlëëhꜘ wɨɨꜘ kinꜙ,
maˊ läꜙbeꜘ baˊ dsënꜙ.
Waˊraˉ jähꜘ kihꜗ ja̱a̱ˉ hi̱ˉ läˉhä̱ä̱hˊ jnäꜘ maˉchooꜘ juuˈ,
leꜘ maˊ hmäähnˊ kiyhˈ.
13Pero hneˉ hi̱ˉ jwa̱hnꜘ kya̱a̱hˊ maˉjmeehꜙ jnäꜘ,
hneˉ hi̱ˉ la̱a̱ꜗ dsaˉkya̱a̱hnˊ hi̱ˉ la̱a̱ꜗ omeꜚ kya̱a̱nꜙ.
14Peerꜙ jmäꜘøøꜘ läꜙko̱o̱ˉ maˊ gaꜙnøøˊ jneˊ ko̱ˉjø̱hꜘ,
läꜙko̱hꜘ maˊ llaˉ jneˊ juuˈ jnänˋ hñaanˈ,
hiꜙ maˊ gaꜙnøøˊ jneˊ ko̱ˉjø̱hꜘ gwahꜙ kihꜗ Dio.
15Waˊ tëˉ gaˉjʉhˉ heˉ jngɨɨhꜙ kihꜗ läꜙjë̱ë̱ꜙ hi̱ˉ hlë̱ë̱hˈ heꜘ.
Läꜙ maˉji̱i̱yhꜙ ja̱ˉ waˊ llaˉnääyꜘ nehꜙ toˉhø̱ø̱ˉ,
jëëhꜘ heˉ hlɨɨhˈ jmahꜗ baˊ chaˉ nehꜙ tuhˉdsëyꜗ.
16Pero jnäꜘ kɨˊhoohnˊ kihꜗ Dio.
DSAˉJØ̱Ø̱Hˈ kya̱a̱nꜙ baˊ lä̱ä̱ˈ jnäꜘ.
17Gaꜙnʉʉˉ gaꜙjnäꜗ hiꜙ lla̱ꜗhyooꜙ,
kɨˊhoohnˊ jeeˊ chu̱u̱nꜘ kya̱a̱yhˊ,
hiꜙ DSAˉJØ̱Ø̱Hˈ kya̱a̱nꜙ nuuꜗ bihꜗ kinꜙ.
18Maꜙkeꜙ laꜗ kinꜙ läꜙko̱o̱ˉ heˉ chehnꜗ jeeˊ hniiˉ,
jmeeyꜗ hɨɨꜗ tiiˊ kinꜙ hiꜙ lä̱ä̱ꜗ bihꜗ jnäꜘ,
maꜙkeꜙ jwë̱ë̱ꜘ la̱a̱ꜗ hi̱ˉ te̱e̱˜ kya̱a̱hˊ jnäꜘ.
19Dio hi̱ˉ cha̱a̱ˉ gaꜙläꜙjëꜙ johꜘ jmɨɨˊ chaˉ,
nuuyꜗ kinꜙ mahꜗ he̱e̱yꜗ goˉte˜ dsaˉ heꜘ,
kihꜗ heˉ saꜙ hii˜ dsaˉje̱e̱yh˜ kya̱a̱hˊ Dio
hiꜙ niꜙ saꜙ ga̱yhꜙ kaˉlähꜘ.
20Dsaˉ hi̱ˉ hñaaˉ dsëꜗ heꜘ, hnooyˉ juuˈ kihꜗ omeꜚ kya̱a̱yꜗ.
Saꜙ miˉteyꜗ hmoohˊ heˉ jmeeyꜙ kya̱a̱hˊ dsaˉkya̱a̱yhˊ.
21Juuˈ kiyhꜗ laꜗ jmäꜘøøꜘ,
pero hniiˉ jmahꜗ baˊ laˈ hʉʉˊdsëˉ kiyhꜗ.
Hlëëyhꜙ juuˈ ta̱a̱hꜗ heˉ saꜙ dsaˉkya̱a̱ꜗ dsaˉnøøꜗ,
pero juuˈ ja̱ˉ laꜗ läꜙko̱hꜘ ñeˈtuuhꜚ heˉ maˉnaˉhiiꜘ heˉ täyꜗ kihꜗ dsaꜙ.
22Tøøhˈ gooˉ Dio läꜙjëꜙ heˉ cha̱a̱hˉ,
hñiiꜘ bihꜗ kwayꜗ beꜘ kyahꜗ.
Ji̱hˊko̱hꜘ saꜙ kwayꜗ tä̱hꜙ hi̱ˉ nʉʉhˊ kiyhˈ.
23Pero hneˉ Dio kya̱a̱nꜙ,
jmeehˈ dsaˉnääyꜗ nehꜙ tooꜙ jeeˊ he̱e̱yꜗ goˉte˜,
läꜙjë̱ë̱ꜙ hi̱ˉ jngɨɨhꜙ hiꜙ läꜙjë̱ë̱ꜙ hi̱ˉ miˉga̱a̱ꜙ dsaˉ.
Saꜙ llaꜙnääyꜗ niꜙ to̱ꜗdsaahˋ läꜙko̱o̱ˉ lleˋ kihˈ cha̱a̱yˉ.
Pero jnäꜘ, kyahꜗ hneˉ baˊ kye̱nˊ oˉjø̱hꜙ dsëˉ.
Currently Selected:
Salmos 55: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.