Salmos 41
41
1Lluꜗ laꜗ kihꜗ hi̱ˉ kye̱ˉ hʉʉˊdsëˉ kihꜗ hi̱ˉ täˉñeeꜘ.
Jmɨɨˊ maˊ cha̱a̱yˉ heˉ wɨɨꜘ, lä̱ä̱ꜗ baˊ DSAˉJØ̱Ø̱Hˈ jnänˋ.
2DSAˉJØ̱Ø̱Hˈ jnänˋ hä̱ä̱yꜗ hiꜙ jmeeyꜗ cha̱a̱yˉ.
Leꜘ lluꜗ kiyhꜗ taˊko̱ˉji̱i̱hˈ gyayꜗ hwaꜗ laˉ.
Saꜙ kwayꜗ jwëꜘ kihꜗ hi̱ˉ naˉhøøhˊ jmeeyhꜙ läꜙ hyohˉ dsëyꜗ.
3DSAˉJØ̱Ø̱Hˈ jnänˋ baˊ kwaꜗ beꜘ kiyhꜗ
läꜙ maˊ kya̱a̱yꜗ nëˊ ji̱i̱ˊ kuˈji̱i̱ꜙ kiyhꜗ.
Miˉhlä̱ä̱ꜘ bihꜗ kihꜗ dsooˊ heˉ la̱a̱yꜗ.
4Jnäꜘ gaꜙjwɨɨnꜗ DSAˉJØ̱Ø̱Hˈ jnänˋ:
“Waˊ läˉñihꜘ hohꜘ kinꜙ,
miˉhlä̱ä̱ˈ jnäꜘ jëëhꜘ maˉhlä̱ä̱hnˉ chaˊnëhˊ.”
5Hi̱ˉ naˉhøøhˊ hlëëyhꜙ wɨɨꜘ kinꜙ, jäyhꜘ:
“¿Lɨhꜘ baˊ ju̱u̱yꜘ? ¿Lɨhꜘ baˊ he̱e̱yꜘ goˉte˜?”
6Läꜙko̱o̱ˉ maˊ goˉnääyꜘ goˉjë̱ë̱yˉ jnäꜘ,
jmeeyꜙ läꜙko̱o̱ˉ heˉ hnääyꜗ jnäꜘ.
Ko̱o̱ˉ goˉnääyꜘ goˉki̱i̱yˈ juuꜗ,
mahꜗ waˊraˉ gaꜙhwë̱ë̱yˉ taꜙ chaˊjwëꜗ jʉʉhˉ,
jñiiyh˜ läꜙjëꜙ heˉ laꜗ kinꜙ.
7Läꜙjë̱ë̱ꜙ hi̱ˉ naˉhøøhˊ kinꜙ,
ko̱ˉjø̱hꜘ baˊ dsaˉta̱a̱yhˋ chaˉhä̱ä̱y˜ jnäꜘ,
jø̱hꜘllʉyhꜗ kinꜙ jäyhꜘ:
8“Dsooˊ kiyhˈ laꜗ hwehˉ.
Maˉta̱yhꜘ nëˊ ji̱i̱ˊ, ja̱ˉ ji̱i̱hˈ moꜙsoꜙ naahꜙ gyihꜗ.”
9Maꜙkeꜙ maˊ la̱a̱yˈ omeꜚ llu̱u̱ꜗ
hi̱ˉ maˊ chaˉ oˉjø̱hꜙ dsëˉ kinꜙ kya̱a̱hˊ,
heꜘ baˊ hi̱ˉ maˉkuhˉ maˉhuhnꜗ ko̱ˉjø̱hꜘ kya̱a̱hˊ,
maˉje̱e̱yh˜ naˉhøøyhˊ kinꜙ.
10Pero hneˉ DSAˉJØ̱Ø̱Hˈ kya̱a̱nꜙ, waˊ läˉñihꜘ hohꜘ jnäꜘ.
Jmeeˊ waˊ naahnꜙ mahꜗ kwëëhꜚ jnihꜘ heˉ hnøøyꜗ.
11Naꜗ maˉläˉmanꜙ heˉ maˉtɨhꜗ baˊ hohꜘ kinꜙ.
Jëëhꜘ saꜙ maˉkwahˊ jwëꜘ heˉ ngɨɨꜗ hi̱ˉ naˉhøøhˊ heꜘ kinꜙ.
12Hneˉ baˊ maˉkwahˊ beꜘ kinꜙ,
jëëhꜘ saꜙ chaˉ heˉ maˉhlä̱ä̱hnˉ kyahꜗ.
Läꜙja̱ˉ maˉkwëëhˋ jnäꜘ jeeˊ gyanˋ chaˊnëhˊ läꜙjëꜙ johꜘ jmɨɨˊ chaˉ.
13¡Heˉ baˊ cheˉ jø̱hˈga̱a̱ˉ DSAˉJØ̱Ø̱Hˈ jnänˋ, Dio jnäˋ jneˊ,
Dio kya̱a̱ꜗ hi̱ˉ la̱a̱ꜗ dsaˉ Israel,
naꜗ hiꜙ gaꜙläꜙjëꜙ johꜘ jmɨɨˊ chaˉ!
Waˊ laˈ läꜙja̱ˉ.
Currently Selected:
Salmos 41: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.