Salmos 39
39
1Jmeenꜙ hʉʉˊdsëˉ: “Hä̱ä̱nꜚ hñiinꜙ miihˉ läꜙko̱o̱ˉ hlëëhnˊ,
mahꜗ saꜙ jmeenˋ heˉ hlɨɨhˈ kya̱a̱hˊ juuˈ heˉ hwëëˉ hoonꜙ.
Gyanˋ tiiˊ taˊko̱ˉji̱i̱hˈ dsaˉta̱a̱hˋ hi̱ˉ hñaaˉ dsëꜗ
läꜙkuˊ läꜙji̱i̱ꜗ kinꜙ.”
2Gaꜙjmäänꜙ hñiinꜙ läꜙko̱hꜘ ja̱a̱ˉ hi̱ˉ kooˋ
niꜙ moꜙsoꜙ gaꜙhlëëhˋ gaˊ jnäꜘ kihꜗ heˉ lluꜗ.
Kihꜗ heˉja̱ˉ chaˉgaˊmiihˉ gaꜙkuˊ gaꜙji̱i̱ꜗ kinꜙ.
3Maˊ lliiꜘ nehꜙ tuhˉdsënꜙ,
hiꜙ läꜙko̱o̱ˉ maˊ jmeenꜙ hʉʉˊdsëˉ kihꜗ dsaˉ heꜘ,
chaˉgaˊmiihˉ gaꜙjaꜗ kinꜙ.
Ja̱ˉgaˊ naꜙ gaꜙløønꜗ hlëëhnˊ:
4“Hneˉ DSAˉJØ̱Ø̱Hˈ kya̱a̱nꜙ, jmeeˊ läꜙmanꜙ haˉ ko̱ˉji̱i̱hˈ lloon˜ hiꜙ johꜘ ji̱ˉñeˉ gaˊ naˉ cha̱a̱nˉ,
mahꜗ läꜙmanꜙ ko̱ˉhwëëꜘ baˊ janˈ jmɨˉgyʉʉꜙ.
5Tʉ̱ʉ̱hˊ gaꜙjmeehˊ ji̱ˉñeˉ kinꜙ,
miihˉ goˉte˜ baˊ gaꜙjmeehˊ cha̱a̱nˉ.
Läꜙjë̱ë̱ꜙ dsaˉ cha̱a̱ˉ ko̱o̱ˉ gaꜙngëëꜘ baˊ.
6Läꜙko̱hꜘ hi̱i̱hˈ baˊ dsaˉngëëꜘ dsaˉ jmɨˉgyʉʉꜙ laˉ.
Niꜙ miihˉ saꜙ jmääꜗ heˉ jmääyhˉ hñiiyꜘ taˊ.
Høøyꜙ chaˉmiihˉ kuuˊ
mahꜗ niꜙ saꜙ ñeyˉ hi̱ˉ kihꜗ jä̱ꜗ kuuˊ ja̱ˉ.
7ʼHehꜗ läꜙja̱ˉ Dsaˉjø̱ø̱hˈ kya̱a̱nꜙ,
¿heeˉ gaˊ naˉ moꜙ ka̱nˋ hʉʉˊdsëˉ kihꜗ?
Ja̱a̱ˉ hneˉ baˊ la̱a̱hˈ läꜙjëꜙ oˉjø̱hꜙ dsëˉ kinꜙ.
8Lä̱ä̱ˋ jnäꜘ kihꜗ läꜙjëꜙ dsoˊkyeˉ kinꜙ.
Taꜙ kwaˉ jwëˈ kihꜗ hi̱ˉ saꜙ ngëëꜘ hi̱ˉ saꜙ kyʉʉh˜ miˉkwa̱yhꜗ jnäꜘ.
9Gaꜙjmäänꜙ hñiinꜙ ja̱a̱ˉ hi̱ˉ kooˋ, saꜙ gaꜙhlëëhnˋ.
Jëëhꜘ hneˉ baˊ naˉ jmeehˉ kinꜙ läꜙnaˉ.
10Moꜙtoꜙ jmeehˋ jnäꜘ gaꜙngëëꜘ jwë̱ë̱ˈ.
Jëëhꜘ maˉngooꜗ dsaˉlla̱a̱nꜙ heˉ heehꜙ jnäꜘ wɨɨꜘ.
11Kya̱a̱hˊ heˉ heehꜙ dsaˉ wɨɨꜘ,
kwëëhꜘ dsaˉ nʉʉhꜚ kwa̱a̱t˜ kihꜗ dsoˊkyeˉ kiyhꜗ.
Jmeehˉ läꜙko̱hꜘ tʉˊhløøˉ läꜙjëꜙ heˉ kye̱e̱ꜘ kihꜗ dsaꜙ.
Läꜙjë̱ë̱ꜙ dsaˉ la̱a̱ꜗ läꜙko̱hꜘ lleꜘ heˉ dsaˉngëëꜘ.
12ʼNʉʉˉ heˉ chu̱u̱nꜘ kyahꜗ hneˉ DSAˉJØ̱Ø̱Hˈ kya̱a̱nꜙ.
Hiiꜘ taˉgwahˊ heˉ kɨˊhoohnˊ laˉ.
Jëëˋ daˊ haˉ läꜙ tu̱u̱ˉ jmɨɨˉ mɨˈnënꜙ.
Läꜙko̱hꜘ ja̱a̱ˉ hi̱ˉ cha̱a̱ˉ ʉ̱ʉ̱ꜘ baˊ la̱a̱nˈ kyahꜗ,
hiꜙ läꜙko̱hꜘ ja̱a̱ˉ hi̱ˉ saꜙ kyu̱u̱hꜙ baˊ la̱a̱nˈ kyahꜗ,
ja̱ˉbaˊ läꜙko̱hꜘ yaꜙnääꜗ dsaˉ maˉgyu̱hˉ kya̱a̱nꜙ.
13Jø̱ø̱ˊ daˊ moꜙtoꜙ jmeehˋ jnäꜘ taˊko̱ˉji̱i̱hˈ të̱ë̱hnꜗ beꜘ,
mahꜗ ja̱ˉgaˊ naꜙ ju̱u̱nꜘ hiꜙ nahnꜚ.”
Currently Selected:
Salmos 39: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.