Salmos 37
37
1Taꜙ jehꜙ hohꜘ kwa̱a̱t˜ kihꜗ hi̱ˉ hñaaˉ dsëꜗ,
niꜙ taꜙ waˊ wɨɨꜘ hohꜘ kya̱a̱yhˊ kaˉlähꜘ.
2Jëëhꜘ, läꜙko̱o̱ˉ dsaˉlaꜘ kihꜗ waˊnuuˉ waˊraˉ gaꜙhnaꜘ,
läꜙja̱ˉ leꜘ kiyhꜗ ko̱o̱ˉ gaꜙngëëꜘ baˊ.
Läꜙko̱o̱ˉ waˊnuuˉ eehˉ heˉ dsaˉläˉki̱i̱ˉ,
läꜙja̱ˉ leꜘ kiyhꜗ kaˉlähꜘ.
3Waˊ chaˉ oˉjø̱hꜙ dsëˉ kyahꜗ kya̱a̱hˊ DSAˉJØ̱Ø̱Hˈ jnänˋ,
hiꜙ jmeeˊ heˉ lluꜗ jmahꜗ baˊ.
Mahꜗ läꜙja̱ˉ ngooꜗ baˊ jëëhꜘ jmɨˉgyʉʉꜙ laˉ,
hiꜙ läꜙchaˉ baˊ läꜙjëꜙ heˉ kuhˈhuhˈ.
4Waˊ he̱e̱ꜘ hohꜘ läꜙjëꜙ heˉ tɨh˜ dsëꜗ Dio.
Mahꜗ kwëëyhꜗ hneˉ läꜙjëꜙ heˉ ka̱ꜗ yaˊjøøꜚ nehꜙ tuhˉhohꜘ.
5Tä̱ä̱hˈ hñaahꜗ gooˉ DSAˉJØ̱Ø̱Hˈ jnänˋ
mahꜗ jä̱ä̱yꜗ hneˉ läꜙ hnøøyꜗ.
Waˊ chaˉ oˉjø̱hꜙ dsëˉ kyahꜗ kya̱a̱yhˊ,
hñiiꜘ bihꜗ kwayꜗ beꜘ kyahꜗ.
6Läꜙjëꜙ heˉ lluꜗ heˉ jmeehˉ, miˉjnääyꜙ jë̱ë̱ˉ goˉte˜.
Ja̱ˉbaˊ läꜙko̱o̱ˉ jnäꜘ jë̱ë̱ˉ lla̱ꜗhyooꜙ,
läꜙja̱ˉ jmeeyꜗ läˉjnäꜘ jë̱ë̱ˉ taˊ lluˈ kyahꜗ.
7Tiˊsɨ̱hꜘ naˉ chaˊnëˊ DSAˉJØ̱Ø̱Hˈ jnänˋ,
jø̱ø̱ˊ daˊ haˉ läꜙ jmeeyꜗ.
Taꜙ jehꜙ hohꜘ kwa̱a̱t˜ kihꜗ hi̱ˉ cha̱a̱ˉ lluꜗ
jeeˊ gaꜙnääyˊ jmeeyꜙ heˉ hlɨɨhˈ.
8Taꜙ waˊ yaˉjë̱ë̱ˈ hohꜘ, niꜙ saꜙ waˊ läꜙlle̱e̱hꜘ.
Taꜙ jmeeˉ läꜙja̱ˉ mahꜗ saꜙ leꜘ jʉʉhˉ gaˊ.
9Maꜙraꜙ heˉ lla̱a̱ꜙ baˊ hi̱ˉ hñaaˉ dsëꜗ.
Pero hi̱ˉ kye̱ˉ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ,
hyoyhꜙ hwaꜗ heˉ kwaꜗ Dio.
10Miihˉ jmɨɨˊ gaˊ cha̱a̱ˉ hi̱ˉ hñaaˉ dsëꜗ.
Waˊraˉ gaꜙjëëhˋ hø̱ø̱yˈ jeeˊ maˊ tä̱ä̱yhˊ,
moꜙsoꜙ jë̱ë̱hˈ gyihꜗ jeeˊ ja̱ˉ.
11Pero dsaˉ hi̱ˉ hwa̱a̱ˊ, hyohꜙ bihꜗ hwaꜗ heˉ laꜗ he̱e̱yꜚ.
Hɨɨˉ tiiˊ chaˉmiihˉ kiyhꜗ, heˉja̱ˉ jmeeꜗ cha̱a̱yˉ lluꜗ.
12Läꜙjë̱ë̱ꜙ hi̱ˉ hñaaˉ dsëꜗ hnoohˉ gyihꜗ
haˉ läꜙ jeeˊ le̱yhꜙ hi̱ˉ llu̱u̱ꜗ.
Läꜙkye̱ˉ ja̱yˊ jʉ̱ʉ̱y˜, kihꜗ heˉ läˉhøøyhˊ gaꜙngëëꜘ jwë̱ë̱ˈ.
13Pero ko̱o̱ˉ ngɨɨꜗ baˊ Dsaˉjø̱ø̱hˈ jnänˋ kiyhˈ.
Jëëhꜘ ñeˉ bihꜗ lloo˜ jmɨɨˊ he̱e̱ꜘ hi̱ˉ heꜘ.
14Hi̱ˉ hlë̱ë̱hˈ heꜘ lleˉ ñeˈ kihꜗ, maˉnaˊlluˋ flecha kiyhꜗ.
Hnøøyꜗ le̱yhꜙ hi̱ˉ täˉñeeꜘ,
hiꜙ hnøøyꜗ le̱yhꜙ läꜙjë̱ë̱ꜙ hi̱ˉ llaˉkya̱a̱ꜗ.
Hnøøyꜗ jngëëyhꜗ hi̱ˉ gaꜙnääˊ ko̱o̱ˉ nëëˈ baˊ.
15Pero ñeˈ kiyhꜗ dsaˉji̱i̱h˜ kihꜗ hñiiꜘ bihꜗ.
Chiˊjøøꜗ hmaˉ heˉ kya̱a̱hˊ maˊ täyˈ flecha.
16Maꜙkeꜙ ko̱ˉhi̱ˊpihˈ baˊ chaˉ kihꜗ hi̱ˉ llu̱u̱ꜗ,
lluꜗ gaˊ heˉ ja̱ˉ, läꜙko̱hꜘ gaˊ heˉ chaˉ chaˉmiihˉ kihꜗ dsaˉ hi̱ˉ jmeeꜙ heˉ hlɨɨhˈ.
17Jëëhꜘ, beꜘ kihꜗ dsaˉ hlë̱ë̱hˈ dsaˉlla̱a̱ꜙ baˊ.
Pero DSAˉJØ̱Ø̱Hˈ jnänˋ baˊ hi̱ˉ kwaꜙ beꜘ kihꜗ hi̱ˉ llu̱u̱ꜗ.
18Hä̱ä̱˜ baˊ DSAˉJØ̱Ø̱Hˈ jnänˋ läꜙjë̱ë̱ꜙ hi̱ˉ llu̱u̱ꜗ.
Ji̱hˊko̱hꜘ saꜙ cha̱a̱ˉ hi̱ˉ jñuuhꜗ jeeˊ laˈ he̱e̱yꜚ.
19Saꜙ jä̱yꜗ kya̱a̱hˊ oˉhihꜙ waˊraˉ jaꜗ lliꜘwɨɨꜘ.
Hiꜙ waˊraˉ jaꜗ ko̱o̱ˉ hooˊ, läˉchaˉ baˊ heˉ kuyhꜙ.
20Pero hi̱ˉ hñaaˉ dsëꜗ, he̱e̱ꜘ goˉte˜.
Läꜙjë̱ë̱ꜙ hi̱ˉ naˉhøøhˊ kihꜗ DSAˉJØ̱Ø̱Hˈ jnänˋ,
ka̱a̱yꜙ läꜙko̱hꜘ kooˉ tʉˊnaaˋ kihꜗ jahꜘ.
Dsaˉä̱ä̱yhꜗ läꜙko̱o̱ˉ dsaˉä̱ä̱hꜗ waˊñeˊ kihꜗ jeeˊ kooꜘ.
21Hi̱ˉ hñaaˉ dsëꜗ ngɨɨyꜙ kuuˊ kihꜗ dsaꜙ,
mahꜗ saꜙ ngëëy˜ kaˉlähꜘ.
Pero hi̱ˉ llu̱u̱ꜗ, kihꜗ heˉ läˉñihꜘ dsëyꜗ,
heˉja̱ˉ kwaꜙ bihꜗ.
22Jëëhꜘ, läꜙjë̱ë̱ꜙ hi̱ˉ naˉjä̱ä̱ꜚ kihꜗ Dio,
hyoyhꜙ he̱e̱yꜚ heˉ kwaꜗ Dio.
Pero läꜙjë̱ë̱ꜙ hi̱ˉ maˉchaˉ dsoˊjwɨɨꜘ nëˊ kihˈ, he̱e̱yꜗ goˉte˜.
23DSAˉJØ̱Ø̱Hˈ jnänˋ baˊ hi̱ˉ jøøꜙ kihꜗ läꜙjë̱ë̱ꜙ dsaˉ,
jë̱ë̱y˜ cheˊ gaꜙnääꜗ bihꜗ lluꜗ.
24Waˊraˉ gaꜙta̱yhꜘ, saꜙ jä̱yꜗ ja̱ˉ ji̱i̱hˈ, maꜙraꜙ heˉ sa̱a̱hˈ bihꜗ.
Jëëhꜘ, hä̱ä̱yˊ gooˉ DSAˉJØ̱Ø̱Hˈ jnänˋ.
25Läꜙko̱o̱ˉ maˊ mähnˈ läꜙji̱i̱hˈ naꜗ heˉ maˉgyu̱hnˉ,
saꜙ chaˉ maˉjëënꜗ maˉjmääꜗ Dio taꜙ kooꜘ ja̱a̱ˉ hi̱ˉ llu̱u̱ꜗ.
Niꜙ jo̱o̱ꜘsɨɨyhˊ saꜙ maˉjëënꜗ gaꜙnääˊ ngɨɨꜙ heˉ kuhˉ.
26Hi̱hꜗ hi̱ˉ llu̱u̱ꜗ heꜘ kwaꜙ bihꜗ cherˊmahꜗ cha̱a̱ˉ hi̱ˉ ngɨɨꜙ,
jëëhꜘ läꜙjëꜙ jmɨɨˊ baˊ lluˈ dsëyꜗ.
Läꜙja̱ˉ läꜙkye̱ˉ saˊju̱ˉ kiyhꜗ maˉnaˉjä̱ä̱ꜚ.
27Waˊ läˉhø̱ø̱hꜘ kihꜗ heˉ hlɨɨhˈ hiꜙ jmeeˊ heˉ lluꜗ jmahꜗ baˊ,
mahꜗ chaˉ jeeˊ jä̱hˉ tä̱ä̱ꜘ.
28Jëëhꜘ DSAˉJØ̱Ø̱Hˈ jnänˋ hnøøyꜗ juˈdsooꜘ jmahꜗ baˊ.
Hiꜙ saꜙ jmääy˜ taꜙ kooꜘ hi̱ˉ miˉteꜗ kiyhꜗ.
Hä̱ä̱˜ bihꜗ tä̱ä̱ꜘ dsaˉ kya̱a̱yꜗ.
Pero hi̱ˉ hñaaˉ dsëꜗ hiꜙ läꜙkye̱ˉ saˊju̱ˉ kiyhꜗ he̱e̱ꜘ goˉte˜.
29Hi̱ˉ llu̱u̱ꜗ hyohꜙ bihꜗ hwaꜗ heˉ kwaꜗ Dio,
jeeˊ dsaˉta̱a̱yhˋ tä̱ä̱ꜘ.
30Hi̱ˉ llu̱u̱ꜗ hlëëhꜙ kya̱a̱hˊ hʉʉˊdsëˉ lluꜗ jmahꜗ.
Hiꜙ hlëëyhꜙ maꜙraꜙ juˈdsooꜘ.
31Ley kihꜗ Dio häˊ nehꜙ tuhˉdsëyꜗ,
Hehꜗ läꜙja̱ˉ saꜙ dsaˉka̱yh˜ jwëˈ.
32Hi̱ˉ hñaaˉ dsëꜗ tøøy˜ kihꜗ hi̱ˉ llu̱u̱ꜗ, mahꜗ jngëëyhꜗ.
33Pero DSAˉJØ̱Ø̱Hˈ jnänˋ
saꜙ kwayꜗ jwëˈ tä̱yhꜙ jaˊgooˉ dsaˉ heꜘ.
Waˊraˉ gaꜙllayꜘ taˊ kiyhˈ hi̱ˉ llu̱u̱ꜗ heꜘ,
saꜙ dsaˉbä̱ä̱yhˉ niꜙ miihˉ.
34Waˊ chaˉ oˉjø̱hꜙ dsëˉ kyahꜗ kya̱a̱hˊ DSAˉJØ̱Ø̱Hˈ jnänˋ,
hiꜙ hä̱ä̱ˋ hñaahˈ jeeˊ ngëhˉ.
Hi̱ˉ heꜘ lla̱a̱ꜗ hneˉ jø̱ø̱hˈ hiꜙ kwayꜗ jeeˊ leꜘ hø̱ø̱hˈ.
Maꜙraꜙ heˉ jëëhˈ baˊ hneˉ jeeˊ he̱e̱ꜘ goˉte˜
läꜙjë̱ë̱ꜙ hi̱ˉ jmeeꜙ heˉ hlɨɨhˈ.
35Gaꜙjë̱ë̱nꜙ ja̱a̱ˉ hi̱ˉ hñaaˉ dsëꜗ hi̱ˉ maˊ jmää˜ hñiiꜘ jø̱ø̱hˈ.
Gaꜙkwa̱a̱ꜗ taˊ kiyhˈ läꜙko̱o̱ˉ dsaˉkwa̱a̱ꜙ chahˈhmaˉ.
36Pero ko̱o̱ˉ gaꜙngëëꜘ baˊ gaꜙlaꜗ kiyhꜗ, moꜙsoꜙ cha̱a̱yˉ naꜗ.
Gaꜙhnaahnꜙ gaˊ jnihꜘ, hiꜙ moꜙsoꜙ gaꜙjnääyꜗ.
37Kye̱ˉ daˊ kwa̱a̱t˜ kihꜗ hi̱ˉ ngëꜙ ko̱o̱ˉ nëëˈ,
hiꜙ jëëˋ daˊ haˉ läꜙ laꜗ kihꜗ hi̱ˉ llu̱u̱ꜗ.
Jëëhꜘ, waˊraˉ gaꜙtëꜘ jeeˊ lla̱a̱ꜙ jmɨˉgyʉʉꜙ,
jnaahˈ laꜗ jeeˊ të̱ë̱ˈ hi̱ˉ saꜙ te̱ˉjë̱ë̱ꜘ kya̱a̱hˊ dsaˉ.
38Pero läꜙjë̱ë̱ꜙ hi̱ˉ jmeeꜙ heˉ hlɨɨhˈ,
läꜙ hiiꜘ nëˊ baˊ he̱e̱yꜘ goˉte˜.
Heˉ ja̱ˉ baˊ laˈ he̱e̱yꜚ.
39Pero DSAˉJØ̱Ø̱Hˈ jnänˋ lä̱ä̱ꜗ hi̱ˉ llu̱u̱ꜗ.
Hi̱ˉ heꜘ baˊ kwaꜗ beꜘ kiyhꜗ maˊ cha̱a̱yˉ wɨɨꜘ.
40DSAˉJØ̱Ø̱Hˈ jnänˋ kwaꜙ beꜘ kihꜗ hi̱ˉ llu̱u̱ꜗ,
hiꜙ läꜙja̱ˉ lä̱ä̱y˜ kaˉlähꜘ.
Hwë̱ë̱y˜ jaˊgooˉ hi̱ˉ hñaaˉ dsëꜗ,
läꜙlluꜗ heˉ maˉchaˉ oˉjø̱hꜙ dsëˉ kiyhꜗ.
Currently Selected:
Salmos 37: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.