Salmos 34
34
1Läꜙjëꜙ ji̱i̱h˜, läꜙ maˉhänꜙ ja̱ˉbaˊ jnäꜘ kihꜗ DSAˉJØ̱Ø̱Hˈ jnänˋ.
Kya̱a̱hˊ waˊhoonꜙ hänˋ kiyhˈ tä̱ä̱ꜘ.
2Peerꜙ cha̱a̱nˉ lluꜗ heˉ kya̱a̱hnˊ DSAˉJØ̱Ø̱Hˈ jnänˋ.
Waˊ nʉʉꜘ hi̱ˉ hwa̱a̱ˊ hiꜙ waˊ jë̱ë̱ˉ dsëyꜗ.
3Jmeeˊ jʉʉhˉ kihꜗ Dio ko̱ˉjø̱hꜘ kya̱a̱hˊ jnäꜘ,
waˊ jmeenˊ jʉʉhˉ kiyhꜗ.
4Gaꜙchu̱u̱nꜗ kya̱a̱hˊ Dio, gaꜙnuuꜘ bihꜗ kinꜙ.
Hiꜙ gaꜙlä̱ä̱yꜗ jnäꜘ kihꜗ läꜙjëꜙ heˉ maˊ gohnꜙ.
5Läꜙjë̱ë̱ꜙ hi̱ˉ maˉdsooꜘ dsëꜗ kiyhꜗ, jnääyꜘ jë̱ë̱ˉ dsëyꜗ.
Ji̱hˊko̱hꜘ saꜙ jä̱yꜗ kya̱a̱hˊ oˉhihꜙ.
6Gaꜙnuuꜘ baˊ DSAˉJØ̱Ø̱Hˈ kya̱a̱nꜙ kihꜗ hi̱ˉ hwa̱a̱ˊ laˉ,
hiꜙ gaꜙlä̱ä̱yꜗ kihꜗ läꜙjëꜙ heˉ wɨɨꜘ heˉ maˊ cha̱a̱yˉ.
7Ángel kya̱a̱hꜗ DSAˉJØ̱Ø̱Hˈ jnänˋ
chehꜗ kooꜘ kihꜗ läꜙjë̱ë̱ꜙ hi̱ˉ ga̱yhꜙ, läꜙja̱ˉ lä̱ä̱y˜ kaˉlähꜘ.
8Jëëˋ daˊ hnähꜘ haˉ läꜙ la̱a̱ꜗ DSAˉJØ̱Ø̱Hˈ jnänˋ
mahꜗ läˉñehˊ hnähꜘ haˉ ko̱hꜘ jnaahˈ saꜙ la̱a̱yꜗ.
Lluꜗ laꜗ kihꜗ hi̱ˉ kye̱ˉ oˉjø̱hꜙ dsëˉ kiyhꜗ.
9Waˊ ga̱hꜙ hnähꜘ DSAˉJØ̱Ø̱Hˈ jnänˋ,
hnähꜘ hi̱ˉ naˉjngëëˈ kya̱a̱yꜗ.
Saꜙ chaˉ heˉ jmeeꜙ biiꜗ kihꜗ läꜙjë̱ë̱ꜙ hi̱ˉ ga̱yhꜙ.
10Kihꜗ hyahˉ mähꜗ, chaˉ maˊ jmeeꜙ wë̱ë̱ꜘ heˉ kuyhˉ,
chaˉ maˊ jëëy˜ hooˊ.
Pero läꜙjë̱ë̱ꜙ hi̱ˉ hnaahˉ DSAˉJØ̱Ø̱Hˈ jnänˋ,
ji̱hˊko̱hꜘ saꜙ jmeeꜗ wë̱ë̱ꜘ heˉ lluꜗ kiyhꜗ.
11Yaˉnääꜘ hnähꜘ gyʉ̱ʉ̱ˉ kya̱a̱nꜙ mahꜗ nʉʉˉ hnähꜘ kinꜙ,
mahꜗ heehnꜚ hnähꜘ heˉ jmeeꜙ biiꜗ heˉ läꜙga̱hꜙ jneˊ Dio.
12¿Cheˊ hnoohˉ heˉ läˉcha̱a̱hˉ chaˉmiihˉ jmɨɨˊ?
¿Cheˊ hnoohˉ jë̱ë̱ˉ hohꜘ taˊko̱ˉji̱i̱hˈ cha̱a̱hˉ?
13Heˉja̱ˉ høøˊ waˊhoohˊ mahꜗ saꜙ hyaꜙ heˉ hlɨɨhˈ.
Läꜙja̱ˉ høøˊ waˊhoohˊ mahꜗ saꜙ yaˉhɨɨˈ juuˈ taˉjuuˈ.
14Waˊ läꜙø̱ø̱hꜘ kihꜗ heˉ hlɨɨhˈ,
mahꜗ jmeeˊ heˉ lluꜗ jmahꜗ baˊ.
Hnøøhˈ haˉ läꜙ hɨɨꜗ tiiˊ hohꜘ,
mahꜗ gohˈ baˊ hneˉ taꜙ chaˊnëˊ.
15DSAˉJØ̱Ø̱Hˈ jnänˋ hä̱ä̱˜ läꜙjë̱ë̱ꜙ hi̱ˉ jmeeꜙ heˉ lluꜗ,
hiꜙ nuuˉ bihꜗ kiyhꜗ läꜙ maˊ chu̱u̱yꜘ kya̱a̱hˊ.
16Yaˉjë̱ë̱ˈ dsëꜗ Dio kya̱a̱hˊ läꜙjë̱ë̱ꜙ hi̱ˉ jmeeꜙ heˉ hlɨɨhˈ.
Miˉlla̱a̱yꜙ goˉte˜, läꜙji̱i̱hˈ moꜙsoꜙ läꜙnʉʉhꜘ gaˊ kihˈ dsaˉ heꜘ nëˊ hwaˈ laˉ.
17DSAˉJØ̱Ø̱Hˈ jnänˋ nuuˉ bihꜗ kihꜗ läꜙjë̱ë̱ꜙ hi̱ˉ llu̱u̱ꜗ maˊ chu̱u̱yꜘ kya̱a̱hˊ
hiꜙ lä̱ä̱y˜ kihꜗ läꜙjëꜙ heˉ wɨɨꜘ heˉ cha̱a̱yˉ.
18Jä̱hꜙ baˊ chehˈ DSAˉJØ̱Ø̱Hˈ jnänˋ kihꜗ hi̱ˉ kuˈji̱i̱ꜙ tuhˉdsëꜗ.
Lä̱ä̱y˜ hi̱ˉ moꜙsoꜙ chaˉ oˉjø̱hꜙ dsëˉ kihꜗ.
19Chaˉmiihˉ wɨɨꜘ dsaˉngëëꜘ hi̱ˉ llu̱u̱ꜗ,
pero DSAˉJØ̱Ø̱Hˈ jnänˋ lä̱ä̱y˜ kihꜗ läꜙjëꜙ heˉ dsaˉngëëyꜘ ja̱ˉ.
20Saꜙ kwayꜗ jwëˈ chʉˉjøøꜘ mooˈ kiyhꜗ,
niꜙ ko̱o̱ˉ mooˈ saꜙ chʉˉjøøꜘ kihꜗ hi̱ˉ llu̱u̱ꜗ kya̱a̱yꜗ.
21Ja̱ˉbaˊ heˉ hlɨɨhˈ heˉ jmeeꜙ hi̱ˉ hñaaˉ dsëꜗ,
ja̱ˉbaˊ heˉ ja̱ˉ jngɨɨhꜙ kihꜗ hñiiyꜘ.
Läꜙja̱ˉ hi̱ˉ naˉhøøhˊ kihˈ hi̱ˉ llu̱u̱ꜗ, dsaˉnääyꜗ chaˊjeˉ.
22Pero DSAˉJØ̱Ø̱Hˈ jnänˋ lä̱ä̱y˜ hi̱ˉ jmeeꜙ taˊheꜗ kiyhꜗ.
Läꜙjë̱ë̱ꜙ hi̱ˉ maˉchaˉ oˉjø̱hꜙ dsëˉ kihꜗ,
saꜙ dsaˉnääyꜗ chaˊjeˉ.
Currently Selected:
Salmos 34: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.