Salmos 31
31
1Hneˉ DSAˉJØ̱Ø̱Hˈ kya̱a̱nꜙ,
kyahꜗ hneˉ baˊ chaˉ oˉjø̱hꜙ dsëˉ kinꜙ.
Ji̱hˊko̱hꜘ taꜙ kwaˉ jwëˈ jä̱nˋ oˉhihꜙ.
Lä̱ä̱ˋ jnäꜘ, jëëhꜘ hneˉ baˊ hi̱ˉ jmeeꜙ heˉ lluꜗ jmahꜗ.
2Hiiꜘ toˉgwahˊ taꜙ kinꜙ hiꜙ lä̱ä̱ˋ jnäꜘ cha̱hꜘ.
Waˊ la̱a̱hˈ hneˉ läꜙko̱o̱ˉ ku̱u̱ˊ hlooˉ
jeeˊ leꜘ hmähnˊ mahꜗ lä̱ä̱nꜘ.
3Jëëhꜘ hneˉ la̱a̱hꜗ läꜙko̱hꜘ ku̱u̱ˊ hlooˉ heˉ ñiiꜘ.
Hneˉ la̱a̱hꜗ hi̱ˉ kye̱ˉ nëˊ kinꜙ läꜙka̱a̱ˉ jeeˊ nɨɨnˋ
mahꜗ jmeeꜗ dsaˉ jʉʉhˉ kyahꜗ.
4Hneˉ baˊ lle̱e̱hꜗ jnäꜘ nehꜙ läꜘ heˉ maˉhɨɨꜘ dsaˉ kinꜙ,
jëëhꜘ hneˉ baˊ hi̱ˉ chehꜗ nëˊ kinꜙ.
5Jaˊgoohˉ hneˉ ngëënˊ jmɨˉlleꜘ kinꜙ.
Hneˉ DSAˉJØ̱Ø̱Hˈ kya̱a̱nꜙ hi̱ˉ la̱a̱ꜗ juˈdsooꜘ,
maˉlä̱ä̱hˋ jnäꜘ.
6Läˉhä̱ä̱hnˊ läꜙjë̱ë̱ꜙ hi̱ˉ jmeeꜙ jʉʉhˉ kihꜗ dio hi̱ˉ naˉla̱a̱ꜚ ka̱a̱h˜ dsaˉ, niꜙ miihˉ saꜙ jmääꜗ heˉ ja̱ˉ.
Pero jnäꜘ, kihꜗ DSAˉJØ̱Ø̱Hˈ kya̱a̱nꜙ baˊ kye̱nˊ oˉjø̱hꜙ dsëˉ.
7Heˉ hnaahꜙ jnäꜘ jmeeꜙ cha̱a̱nˉ lluꜗ hiꜙ jë̱ë̱ˉ dsënꜙ.
Hneˉ baˊ maˉjëëhˋ heˉ tiˉmeehˉ dsënꜙ.
Ñehˊ baˊ hneˉ maˊ cha̱a̱nˉ lliꜘwɨɨꜘ.
8Saꜙ gaꜙngëëhˋ jnäꜘ jaˊgooˉ hi̱ˉ naˉhøøhˊ kinꜙ.
Gaꜙche̱e̱hˉ jnäꜘ jeeˊ saꜙ hiiꜘ gooˉ niꜙ miihˉ.
9Waˊ läˉñihꜘ hohꜘ kinꜙ DSAˉJØ̱Ø̱Hˈ kya̱a̱nꜙ,
jëëhꜘ maˉchehnꜗ jëën˜ wɨɨꜘ.
Kihꜗ heˉ tiˉmeehˉ dsënꜙ ngooꜗ gaꜙhwa̱a̱ꜘ jmɨˉngoꜗ kinꜙ,
jmɨˉlleꜘ kinꜙ hiꜙ läꜙkye̱ˉ mɨˈnënꜙ kaˉlähꜘ.
10Heˉ kuˈji̱i̱ꜙ kinꜙ kya̱a̱hˊ heˉ kɨˊhoohnˊ
ngooꜗ dsaˉlla̱a̱ꜙ ji̱ˉñeˉ heˉ cha̱a̱nˉ.
Läꜙja̱ˉ miˉlla̱a̱ꜙ jnäꜘ kihꜗ heˉ tiˉmeehˉ dsënꜙ,
hiꜙ jmɨˉngoꜗ kinꜙ ngooꜗ gaꜙhwa̱a̱ꜘ.
11Kihꜗ läꜙjë̱ë̱ꜙ hi̱ˉ naˉhøøhˊ kinꜙ,
la̱a̱nꜗ läꜙko̱hꜘ waˊhløøˉ baˊ.
Hiꜙ hi̱ˉ tä̱ä̱hˊ läꜙka̱a̱ˉ kooꜘ kinꜙ miˉkwa̱hꜗ bihꜗ kinꜙ.
La̱a̱nꜗ naˉhøøꜘ kihꜗ läꜙjë̱ë̱ꜙ hi̱ˉ kyu̱u̱ꜙ jnäꜘ.
Kyʉ̱ʉ̱ꜙ bihꜗ kinꜙ waˊraˉ gaꜙjë̱ë̱yꜗ jnäꜘ.
12Maˉgaaꜘ dsëyꜗ kinꜙ goˉte˜,
läꜙko̱hꜘ hi̱ˉ naˉju̱u̱ˊ baˊ jnäꜘ kiyhꜗ.
Maˉla̱a̱nꜗ kiyhꜗ läꜙko̱hꜘ mɨˈhyaˉ gwaahˊ
heˉ maˉlaꜗ jwɨˊdsuhꜗ.
13Nuunꜙ hlëëhꜙ dsaˉ wɨɨꜘ kinꜙ
hiꜙ hiiꜘ gooˉ kinꜙ taꜙ laꜙ taꜙ jnøꜙ.
Dsaˉku̱hꜗ dsaˉ, dsaˉta̱a̱yhˋ juuˈ kweeˉ
hnooyhˉ haˉ läꜙ jmeeyꜗ kinꜙ,
hiꜙ hnooyhˉ haˉ läꜙ jngëëyhꜗ jnäꜘ.
14Hneˉ DSAˉJØ̱Ø̱Hˈ kya̱a̱nꜙ,
ja̱a̱ˉ hneˉ baˊ la̱a̱hˈ oˉjø̱hꜙ dsëˉ kinꜙ.
Jnäꜘ jwahnꜙ, hneˉ baˊ la̱a̱hˈ Dio kya̱a̱nꜙ.
15Hneˉ baˊ ñehˊ haˉ läꜙ dsaˉngëënꜘ taꜙ chaˊnëˊ.
Lä̱ä̱ˋ jnäꜘ kihꜗ hi̱ˉ naˉhøøhˊ hi̱ˉ cha̱a̱ˈ kaahˋ kinꜙ.
16Miˉjnääˈ heˉ lluꜗ hohꜘ kihꜗ hi̱ˉ jmeeꜙ taˊheꜗ kyahꜗ.
Lä̱ä̱ˋ jnäꜘ läꜙlluꜗ heˉ läˉñihꜘ hohꜘ kinꜙ.
17Taꜙ kwaˉ jwëˈ jä̱nˋ kya̱a̱hˊ oˉhihꜙ,
jëëhꜘ maˉchu̱u̱ꜗ baˊ jnäꜘ kya̱a̱hˊ hneˉ DSAˉJØ̱Ø̱Hˈ kya̱a̱nꜙ.
Waˊ jä̱ꜘ oˉhihꜙ läꜙjë̱ë̱ꜙ hi̱ˉ hñaaˉ dsëꜗ.
Waˊ jä̱yꜘ ka̱a̱yˋ nehꜙ toˉhø̱ø̱ˉ.
18Waˊ läꜙka̱a̱ˋ hi̱ˉ hlëëhꜙ juuˈ taˉjuuˈ,
läꜙja̱ˉ hi̱ˉ hlëëhꜙ wɨɨꜘ kihꜗ hi̱ˉ llu̱u̱ꜗ.
Waˊ jnëˈ hooˊ hi̱ˉ hlëëhꜙ juuˈ kaahˊ
mahꜗ miˉkwa̱yhꜗ hi̱ˉ llu̱u̱ꜗ.
19Haˉ ko̱hꜘ saꜙ jʉʉhˉ heˉ lluꜗ hohꜘ
heˉ maˉhä̱ä̱hˋ läꜙjë̱ë̱ꜙ hi̱ˉ ga̱hꜙ hneˉ.
Hiꜙ toꜙloꜙnëˊ jeeˊ läꜙjë̱ë̱ꜙ dsaˉ maˉmiˉjnäähˈ
heˉ lluꜗ hohꜘ kihꜗ läꜙjë̱ë̱ꜙ hi̱ˉ kye̱ˉ oˉjø̱hꜙ dsëˉ kyahꜗ.
20Kooꜘ kyahꜗ kwahˈ jeeˊ hmähꜙ hi̱ˉ llu̱u̱ꜗ kya̱a̱hꜗ
mahꜗ saꜙ të̱ë̱ꜗ hi̱ˉ hñaaˉ dsëꜗ heꜘ jmeeyhꜙ.
Ta̱a̱yhˈ nehꜙ gwahꜙ kyahꜗ
jeeˊ saꜙ lloo˜ juuˈ wɨɨꜘ heˉ hlëëhꜙ dsaˉ kiyhꜗ.
21Jnaahˈ llu̱u̱ꜗ la̱a̱ꜗ DSAˉJØ̱Ø̱Hˈ jnänˋ.
Haˉ ko̱hꜘ naˊhñaahꜗ saꜙ gaꜙlaꜗ heˉ gaꜙläꜙhnääyꜗ jnäꜘ
läꜙ maˊ chehnꜗ jeeˊ hiiꜘ gooˉ ju̱u̱nꜘ.
22Läꜙ maˊ gaꜙläꜙgohnꜙ,
gaꜙjmeenꜗ hʉʉˊdsëˉ heˉ maˉjmäähˋ jnäꜘ taꜙ kooꜘ.
Pero läꜙ maˊ gaꜙngɨɨnˋ beꜘ kyahꜗ,
gaꜙnʉʉhˉ baˊ hneˉ kinꜙ.
23Waˊ hnaaꜙ hnähꜘ DSAˉJØ̱Ø̱Hˈ jnänˋ,
hnähꜘ hi̱ˉ naˉjngëëˈ kya̱a̱yꜗ.
DSAˉJØ̱Ø̱Hˈ jnänˋ hä̱ä̱˜ läꜙjë̱ë̱ꜙ hi̱ˉ miˉte̱hꜗ kiyhꜗ,
pero heeyh˜ chaˉmiihˉ wɨɨꜘ läꜙjë̱ë̱ꜙ hi̱ˉ jmää˜ hñiiꜘ ka̱a̱hˊ.
24Waˊ jë̱ë̱ˉ hohꜘ hnähꜘ hiꜙ waˊ nøhˈ hohꜘ hnähꜘ,
läꜙjë̱ë̱ꜙ hi̱ˉ kye̱ˉ oˉjø̱hꜙ dsëˉ kihꜗ DSAˉJØ̱Ø̱Hˈ jnänˋ.
Currently Selected:
Salmos 31: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.