Salmos 26
26
1Kye̱ˊ daˊ kwa̱a̱t˜ kinꜙ, hneˉ DSAˉJØ̱Ø̱Hˈ kya̱a̱nꜙ,
mahꜗ jëëˋ maˉmiˉteˋ baˊ jnäꜘ läꜙjëꜙ madaꜚ kyahꜗ.
Chaˉ baˊ oˉjø̱hꜙ dsëˉ kinꜙ kya̱a̱hˊ hneˉ,
niꜙ miihˉ saꜙ gohnꜙ.
2Hneˉ DSAˉJØ̱Ø̱Hˈ kya̱a̱nꜙ, jë̱ë̱ˋ daˊ jnäꜘ
cheˊ chaˉ gaˊ heˉ naˉhmääˊ kinꜙ.
Jëëˋ daˊ haˉ läꜙ laꜗ hʉʉˊdsëˉ kinꜙ
hiꜙ haˉ läꜙ laꜗ nehꜙ tuhˉdsënꜙ.
3Hehꜗ heˉ läˉñihꜘ hohꜘ jnäꜘ, ji̱hˊko̱hꜘ saꜙ gaaꜘ dsënꜙ.
Hiꜙ jmeeꜙ baˊ jnäꜘ läꜙko̱o̱ˉ laꜗ juˈdsooꜘ kyahꜗ.
4Ji̱hˊko̱hꜘ saꜙ maˉjmeenꜗ ko̱ˉjø̱hꜘ kya̱a̱hˊ hi̱ˉ taˉju̱u̱ˈ.
Niꜙ saꜙ maˉjmeenꜗ ko̱ˉjø̱hꜘ kya̱a̱hˊ hi̱ˉ jmää˜ hñiiꜘ läꜙko̱o̱ˉ ja̱a̱ˉ hi̱ˉ llu̱u̱ꜗ.
5Saꜙ tɨh˜ dsënꜙ läꜙko̱o̱ˉ jmeeꜙ hi̱ˉ hñaaˉ dsëꜗ waˊraˉ gaꜙku̱yhꜗ.
Ji̱hˊko̱hꜘ saꜙ maˉkuhnꜗ kya̱a̱hˊ hi̱ˉ heꜘ.
6Maˉnaˉjngɨɨˈ baˊ maˉgoonꜙ,
maˉnaˉjngëëˈ baˊ jnäꜘ kihꜗ heˉ hlɨɨhˈ.
Läꜙja̱ˉ nɨɨnˋ naˊngënˈ läꜙkuˊ läꜙji̱i̱ꜗ jeeˊ laˈ naˊhyooꜘ kyahꜗ hneˉ DSAˉJØ̱Ø̱Hˈ kya̱a̱nꜙ,
7mahꜗ hlëëhnˊ ki̱ˉga̱a̱ˉ kwanˋ tiˊhmaahˊ kyahˈ.
Läꜙja̱ˉ jmeehnꜚ juuˈ kihꜗ dsaꜙ
kihꜗ läꜙjëꜙ heˉ jʉhˉga̱a̱ˉ heˉ jmeehˉ.
8Peerꜙ tɨh˜ dsënꜙ gwahꜙ jeeˊ ñehꜘ hneˉ DSAˉJØ̱Ø̱Hˈ kya̱a̱nꜙ.
Jnaahˈ laꜗ gwahꜙ jeeˊ jnäꜘ jmëëꜗ kyahꜗ.
9Taꜙ jmeehˋ jnäꜘ läꜙko̱o̱ˉ jmeehˉ hi̱ˉ jmeeꜙ dsoˊkyeˉ,
niꜙ taꜙ jmeehˋ jnäꜘ kweeˉ kya̱a̱hˊ hi̱ˉ tʉ̱ʉ̱˜ jmaˉ.
10Heˉ hlɨɨhˈ jmahꜗ baˊ jmeeyꜙ.
Johꜘ heˉ hlɨɨhˈ saꜙ jmeeyꜙ, kihꜗ heˉ ji̱i̱h˜ dsaˉ kuuˊ kiyhˈ.
11Pero jnäꜘ, hnoohnꜙ heˉ lluꜗ jmahꜗ baˊ.
Lä̱ä̱ˋ jnäꜘ, waˊ läˉñihꜘ hohꜘ kinꜙ.
12Ngooꜗ baˊ jnäꜘ kya̱a̱hˊ juꜗdsooꜘ jmahꜗ.
Ngooꜗ baˊ jnäꜘ kwanˋ tiˊhmaahˊ kihꜗ DSAˉJØ̱Ø̱Hˈ jnänˋ toꜙloꜙnëˊ jeeˊ läꜙjë̱ë̱ꜙ.
Currently Selected:
Salmos 26: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.