Salmos 11
11
1Maˉnaˉhä̱ä̱nˊ jeeˊ maˉla̱a̱nꜘ kihꜗ DSAˉJØ̱Ø̱Hˈ jnänˋ.
¿Haˉ läꜙja̱ˉ heˉ jwahꜘ,
kyʉ̱ʉ̱ꜘ taꜙ mohꜘ läꜙko̱hꜘ ja̱a̱ˉ ta̱ˈ?
2Hi̱i̱ꜚ hi̱ˉ hñaaˉ dsëꜗ heꜘ ka̱˜ flecha kihꜗ mahꜗ miˉlluyꜗ.
Tä̱ä̱yhˊ jeeˊ naˉhmääˊ mahꜗ jmääyhꜙ dsooˊ hi̱ˉ saꜙ chaˉ ä̱ä̱ˉ niꜙ miihˉ.
3Waˊraˉ jähꜘ kihꜗ saꜙ cha̱a̱ˉ dsaˉtaˊ,
haˉ läꜙ jmeeꜗ hi̱ˉ llu̱u̱ꜗ gaˉ ja̱ˉ.
4Pero DSAˉJØ̱Ø̱Hˈ jnänˋ gyaꜗ nehꜙ gwahꜙ naˉjngɨɨˈ kihꜗ,
läꜙ gaꜙtëꜘ gyʉʉhˈ jmɨˉgyʉʉꜙ jmeeyꜙ hihꜙ,
hiꜙ läꜙ gaꜙdsaꜗ jmɨˉgyʉʉꜙ jëëy˜ haˉ läꜙ tä̱ä̱hˊ ha̱a̱ˊ dsaˉ.
5DSAˉJØ̱Ø̱Hˈ jnänˋ jëë˜ haˉ läꜙ tä̱ä̱hˊ hi̱ˉ llu̱u̱ꜗ kya̱a̱yꜗ,
pero läˉhøøyhˊ kihꜗ hi̱ˉ hñaaˉ dsëꜗ,
hiꜙ läꜙja̱ˉ kihꜗ hi̱ˉ hnøøꜗ läꜙjmeeꜗ heˉ hlɨɨhˈ.
6Nëˊ kihˈ hi̱ˉ hñaaˉ dsëꜗ che̱e̱yꜗ chaˉmiihˉ heˉ wɨɨꜘ,
hyaꜙ jeˉ jeeˊ kiyhˈ, kooˉ kya̱a̱hˊ azufre,
hiꜙ jäꜙ lleꜘ lliiꜘ jeeˊ tä̱ä̱yhˊ,
jëëhꜘ läꜙjëꜙ heˉ wɨɨꜘ ja̱ˉ maˉnaˊjä̱ä̱ꜘ kiyhꜗ.
7Llu̱u̱ꜗ baˊ Dio, hnääꜗ bihꜗ hi̱ˉ jmeeꜙ heˉ lluꜗ,
hi̱ˉ llu̱u̱ꜗ heꜘ lloo˜ jmɨɨˊ jë̱ë̱yˈ Dio.
Currently Selected:
Salmos 11: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.