Lucas 24
24
Jesús kawarimushqan
Mateo 28.1-10; Marcos 16.1-8; Juan 20.1-10
1Semäna qalaykunan junaqmi Jesús pamparashqan kaqman saka sakala warmikuna aywayarqan kamarikuyashqan mushkuq jachakunata apakurkur. [Paykunawanmi wakin warmikunapis aywayarqan.] 2Chaykurmi sepultüra saparaq rumi witisish kaykaqta tariyarqan. 3Ruriman yaykuyashpan Señor Jesúspa ayanta manami tariyarqansu.
4Mansakash kaykäyaptinmi ishkay runakuna chipipiykaq mödanash nawpankunacho yuriskiyarqan. 5Sayta rikaykurmi seqaypa mansakäyashpan urkunpis pasaman töpashqanyaq qonqurpakuykuyarqan. Say runakunanami niyarqan: <<¿Imanirtaq kawaykaq runata ashiykäyanki wanushkuna pamparäyashqancho? 6Manami kaychönasu. ¡Kawarimushnami! Yarpäyay Galileacho kayno niyäshushqaykita: 7<Runapa Surintaqa jusasapa runakunapa makinkunamanmi churayanqa. Nirkurmi crucificaypa wanusiyashqanpita kimsa junaqta kawarimunqa> >>.#Luc. 9.22, 44.
8Sayno niyaptinmi say warmikuna Jesús nishqanta yarparkuyarqan. 9Saypita kutiykuyashpannami chunka juk apostolkunata y saycho kaq runakunatapis wilayarqan rikayashqanta y wiyayashqanta. 10Say warmikuna kayarqan María Magdalena, Juana, Santiagupa maman María y wakin warmikunapis. 11Warmikuna sayno wilayaptinpis juiciun oqrash japuy parlaykäyashqanta yarparmi criyiyarqansu. 12Wakin mana criyiyaptinpis Pedrumi isanqa Jesús pamparashqanman cörrila aywarqan. Uchkuman watqaykurmi säbanaslatana rikar espantash kutikurqan.
Emaúsman aywaqkunata Jesús yuripashqan
Marcos 16.12-13
13Say junaqmi Jesúspa ishkay qatiraqninkuna Emaús markapa aywaykäyarqan. Emaús karqan Jerusalénpita ishkay lëwanölami. 14Paykunaqa Jerusaléncho lapan päsashqankunata parlaraykarmi aywaykäyarqan. 15Sayno parlaraykar aywaykäyaptinmi Jesús yuripaskir paykunawan aywarqan. 16Rikaykarpis Tayta Dios mana permitiptinmi Jesús kashqanta tantiyayarqansu.
17Saymi Jesús tapur nirqan: <<¿Imata parlartaq aywaykäyanki?>>
Sayno niptinmi aywaykäyashqancho lakish ichiskiyarqan.
18Saymi Cleofas jutiyuq runa nirqan: <<Pascuaman shamuqkunaqa lapanmi musyayan kay junaqkuna Jerusaléncho ima päsashqantapis. ¿Qam manaku musyanki?>>
19Niptinmi Jesús tapur nirqan: <<¿Imataq kash?>>
Sayno tapuptinmi niyarqan: <<Nazaretpita kaq Jesúsmi Tayta Diospa profëtan karqan. Paymi Tayta Diospa munayninwan milagrukunata rurashpan lapan runakunata Diospa wilakuyninta wilaparqan. 20Paytami mandaq cürakuna y autoridäninsikuna Pilatuman apayaptin crucificaypa wanusiyash. 21Noqakuna yarpäyarqä chikimaqninsipa munayninpita jorqamänansipaq kashqantami. Kananwanqa kimsa junaqnami payta wanusiyashqan. 22Manami saylasu. Yanapäyämaq warmikunami mana criyiypaqta wilayämash. Kanan tuta saka sakala Jesús pamparashqanman aywarshi 23ayanta tariyashnasu. Saychöshi angilkuna yuripaykur Jesús kawarimushqanta wilayash. Saykunatami kutimur wilayämash. 24Saymi wakin kaq discïpulu mayïkunapis pamparashqanman aywar warmikuna wilakuyashqannöla Jesúspa ayanta tariyashsu>>.
25Saymi Jesús nirqan: <<¿Juiciuynaqku kayanki mana tantiyayänaykipaq? Profëtakuna wilakuyashqanta ¿imanirtaq criyiyankisu? 26¿Manaku musyayanki Cristo wanurkurraq lapanpaq munayyuq kananpaq kashqanta?>>
27Sayno nishpanmi Moisés qelqashqanpita qalaykur profëtakuna qelqayashqanyaq paykunata tantiyasirqan Cristupaq imata nishqantapis.
28Emaús markaman chaykuyaptinnami paykunapita Jesús päsaq tukurqan. 29Saymi ruwar niyarqan: <<Pasa sakaykannami. Kaylachöna posädakushun>>.
Sayno niyaptinmi paykunawan posädakunanpaq markaman yaykuyarqan. 30Saypita mësaman jamaykurnami tantata aptarkur Tayta Diosta päkilä nirqan. Nirkurnami pakiskir paykunata aypurqan. 31Say hörami Jesús kashqanta tantiyaskiyarqan. Jesúsnami elaqaskirqan.
32Saymi kikinpura parlar niyarqan: <<¡Jesús kaptinchir Tayta Diospa palabranta parlapämash nänicho shonqunsipis akaqyarqan!>>
33Saymi jinan höra Jerusalénman kutiyarqan. Chaykurnami tariyarqan chunka juk apostolkunawan wakin runakunapis kaykäyaqta. 34Saycho shuntaraykaqkunami niyarqan: <<¡Rasunpaypami Señor Jesús kawarimush! ¡Simóntapis yuripashqami!>>
35Niyaptinnami Emaúspita kutiqkunapis wilapäyarqan nänicho ima päsashqanta y tantata pakishqan höra Jesústa reqiyashqantapis.
Apostolninkunata Jesús yuripashqan
Mateo 28.16-20; Marcos 16.14-18; Juan 20.19-23
36Sayno parlaykäyaptinmi paykunapa chawpincho Jesús yuriparkur nirqan: <<Ali kaway qamkunacho kaykuläsun>>.
37Sayno yuripaskiptinmi alma kashqanta yarpäyashpan fiyupa mansakäyarqan.
38Saymi Jesús nirqan: <<¿Imanirtaq mansakash kaykäyanki? ¿Imanirtaq noqa kashqäta criyiyankisu? 39Makïta chakïta rikayay. ¡Noqami kä! ¡Yatayämay! Rikayämashqaykinöpis manami almasu kä. Almaqa aysaynaq y tuluynaqmi>>.
40Sayno nirmi makinta y chakintapis rikasirqan. 41Rikaykarpis pasaypa kushikuyashpanpis manami criyiyarqanraqsu pay kashqanta. Saymi Jesús tapurqan: <<¿Imalapis kanku mikurkunäpaq?>>
42Sayno niptinmi qarayarqan juk pedäzu kankash pescädutawan [abëjapa mishkinta]. 43Say qarashqantami lapanpa nawpancho mikurqan.
44Mikuskirnami nirqan: <<Moisés qelqashqan leykunacho, profëtakuna qelqayashqancho y salmukunachömi päsamänanpaq kaqkuna qelqaraykan. Qamkunawan kaykarmi wilarqä qelqaraykashqannöla lapanpis cumplikänanpaq kashqanta. Say wilashqänölami päsamash>>.
45Nirkurmi Tayta Diospa palabranta tantiyasir 46nirqan: <<Diospa palabranmi nikan Cristo nakar wanunanpaq kashqanta y kimsa junaqta kawarimunanpaq kashqanta. 47Saynöpis nikan Jerusalénpita qalaykur lapan markakunacho wilakuyänanpaq kashqanta y paypa jutincho wilakuyaptin runakuna jusankunata wanakur perdonashna kayänanpaq kashqanta. 48Lapan ima päsamashqantapis rikash karmi wilakuyänaykipaq testïgu kaykäyanki. 49Qamkunamanmi kachamushaq Taytä promitishqan Espíritu Santuta. Isanqa Jerusalénlacho shuyaraykäyay munayninta chaskiyashqaykiyaq>>.
Gloriaman Jesús kutishqan
Marcos 16.19-20; Hechos 1.9-11
50Saypitanami discïpulunkunata Jesús pusharqan Betaniaman. Saychönami makinta joqarkur paykunapaq Tayta Diosta manakurqan. 51Sayno manakuykaptinmi gloriamanna Tayta Dios shuntakurqan. 52Saycho discïpulukuna Jesústa adoraskirmi Jerusalénman kushish kutikuyarqan. 53Saypitanami Tayta Diosta alabayänanpaq waran waran templuman shuntakäyaq. [Amén.]
Currently Selected:
Lucas 24: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.