Mateo 19
19
Iáiguë Jesos aisati irogomere aiquero Joreaquë.
(Mr 10.1)
1Aroque icomantagueque Jesos cara Garireaquë. Aique yogagaiganaja Iriro aisati irogomere cara Joreaquë, canta antatinta Joriránquë. 2Aisati yoguiataiganaqueri tojai matsiguenga. Aintasati tojai janaitaguetatsiri. Yoguibegajiri Jesos.
Jesos yogometocoqueri ira joquërone iina.
(Mt 5.31-32; Mr 10.2-12; Ir 16.18)
3Aisati iátasitaiguëri Jesos bariseopague; icogabeca iraniantëmari irantacaquerime ora te onganinate. Yosamitaigapëri:
—¿Caninataqueco irojocajiro iina sërari aitica pairorapagueraca ora te iranintocotiro?
4Yotabitobëri Jesos:
—¿Teco pinibatapinintabetimaro Sanguenari? Jirai Tosorintsi yobetsiquëri ira sërari aisati tsinane. 5Aisati icanque Tosorintsi:
Cara iráquero iina sërari, irojocanëri iriri aisati iniro, irágasantëro iina, intimacaquero casiriconiati. Coshoni iroquero iina, pitirooti inganquima paniro ibatsa.
6Jirai inabitaca sërari aisati iina; yamai coshoni irogobaquima, intimaiguë inganquima paniro. Iniaiguëri Tosorintsi irianti paniro ibatsa. Ipanirootitaiguëri. Iroro te onganinataguëte irojocobagajima. Querootisati ijocaguiri basini matsiguenga.
7Aisati yosamitaigapëri bariseo:
—¿Aisonori? ¿Pairo isanguenabirique Moisés jirai?
Pisanguenatinero pijina pomero ora pijogantaimaro, aro ocaninati pijocajiro.
8Icantaigabaqueri Jesos:
—Te pinganinasëretaigue, aro icanquemi Moisés cara caninataque pijocajiro pijina. Carari te iranintacaguimi Tosorintsi pijocajiro. Icocaquemi quero pijoquiro. 9Nacantaiguëmi Naro, aroca pijoquero pijina, aisati págae basini, aroque paguimintëmaro pijinasonori. Patiro aroca aguimintëmi, aro caninataque pijocajiro. Aisati ira agairone tsinane ora ijoque ojime aroque yaguimintacari ojime.
Icantocoqueri Jesos ira te irágue iina.
10Aro icantaiguëri irogomere:
—Aique, queroca ocaninati ijocajiro iina, caninataque quero yáganti.
11Icanqueri Jesos:
—Tigueti ongantima inguemiro antagaisati sërari oca nacantaiguëmica. Paniro inguemaquero ira yogometasanti Tosorintsi. 12Ainta ira te irágobinte iina. Aintasati basini ira yágaguitsoiti, quero pini iina. Aisati ainta te iraninte iráguiro iina. Icoguini intimasitima arota inganquineri pairoraca ingocaqueri Tosorintsi. Aroca pinguianquero oca piquemaque, aro pinguengasëretëro.
Jesos yoguëneri janequipague ibaco.
(Mr 10.13-16; Ir 18.15-17)
13Aique pamapëneri Jesos janequipague, ocantaigapëri:
—Poguineri pobaco notomipague, pomanocotiri Tosorintsi arota ingábintseri.
Icantaigabaquero irogomere:
—Quero paseriguiri Atingomi.
14Carari icanqueri Jesos:
—Quero picantiri. Nocoguini iribocasitaigapëna janequijegui. Igóiguë iriro intingomintina. Antagaisati icantaigari ibega ica intiomoquina cara itingomibintanti Tosorintsi.
15Aro yoguëneri ibaco, yamanaque:
—Pabati, nanintini pingábintsaigueri icaegui janequipague.
Aique iáque Jesos.
Jesos icamanaaqueri ira sërari casintasantachari.
(Mr 10.17-27; Ir 18.18-27)
16Aro ipocasiqueri oboina sërari yosamitapëri:
—Ogomeantatsiri, picaninati. ¿Pairo caninatatsi nanganque naro arota nantimaque përosati canta Jonogaguitequënta?
17Yotabitanëri Jesos:
—¿Pairo picantobiquina Naro caninari? Paniro ini caninari, Irianti Tosorintsi. Carari picoguica pijáte Jonogaguitequë, pingantiro omagaro ora isanguenaque Moisés.
18Icanque oboina:
—Aiti tojai isanguenaque. ¿Pairo pininti nanganque?
Yotabitanëri Jesos:
—Quero póganti, quero pintiro tsinane cagaro pijina, quero picositanti, quero pitsoiguëgotari pomatsiguenga. 19Pinguemisantiri piri aisati piniro quero pipëgatsatari; pinintiri pitimanamitane aisa ocanta cara pininta obiati.
20Icanqueri sërari:
—Aroque naquemisanquero omagaro oca cara ninë janequi irooti yamai. ¿Paironibani nanganque basini?
21Icanqueri Jesos:
—Pinintica iraniacaninatimi Tosorintsi, atsi pijáte pomimantiro antagaisati ora pasinta, pomaguetiri ira coguitiaguetacha omagaro opënataga; aique imëmi Tosorintsi ora caninaro cara Jonogaguitequë. Cara pomimantëroca antagaisati, omana piguiatanëna Naro.
22Cara iquemabecaro oca, iáque oboina yogasëretasantanaca irironta casintaguetasantacha, te iraninte imimantiro. 23Aro icantaiguëri irogomere Jesos:
—Aisonori nacantasantëmi: opomirintsitomocari casintaguetachari iriátë cara itingomibintanti Tosorintsi. 24Nagatsitaimiro aitosati, opomirintsitomocari cameyo ingue otiomijaniquë omoro quitsapi. Carari omomirintsitomotasantëmari casintachari iriátë cara iragáantanequë Tosorintsi.
25Iquemaiguëri irogomere iquenganeintasantaigacari, yosamitobaca:
—¿Aisonorico? ¿Pairo inganque matsiguenga cara irabisaicotajima?
26Jesos inetsaiguëri irogomerejegui, icantaiguëri:
—Quero icantiro matsiguenga, carari Irianti Tosorintsi inganquero antagaisati. Te omomirintsitomotimari Iriro.
Quero itsipiriaro quemisantatsiri ira aguiatëri Jesos.
(Mr 10.28-31; Ir 18.28-30)
27Aique icanqueri Peroro:
—Pinguengaiguena naroegui, tojai nocogasantaigui naguiataiganaquemi, iroro nojocaigaguëtanëro omagaro nasintaiga. ¿Pairo nágaigae aiquenta?
28Yotabitanëri Jesos:
—Nangantasantaiguëmi aisonori: aronta nopaniaca Jonogaguitequë nomatsiguengatapë, aiquenta nopocaje aisati iroraiquë quibatsi nagáantasantapë antagaisati. Cara nosobiaque nagáantomentoquë, obirojegui aguiataiguëna yamai, aisati pisobicaiguë pigáantomentoquë ocarati 12. Pigáantaiguëri joríojegui. 29Aroca piguiataiganaquina, quero pitsipiriaro. Aroca pijocaiganaquero pobangopague, pirentipague, pitsiropague, piri, piniro, pitomipague, piguebatsitepague, pairorapagueraca, quero pitsipiriaro. Aroca pijogobitanënaro arosata piguiatëna, imaiguëmi Tosorintsi tojai. Aisati irágaiganaquemi cara Jonogaguitequë cara pintiomoqueri Tosorintsi përosati. 30Ainta yamai tojai itingomipague yaca quibatsica, carari quero igáanti canta Jonogaguitequë cara panironta Atingomi. Aintasati yamai tojai itsipiriaiguë yaca, imaintaiguëri matsiguenga carari aiquenta imaiguëri Atingomi iromitocoiguëri cara igáanti Iriro. Icaranti yamai carari aiquenta irobaque.
Currently Selected:
Mateo 19: not
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.