Mateo 5
5
III. MACUËSH TAPA YACNOSHON ESUSËN CHUIBANAID
(5.1—7.29)
Nadquido Nuquin Papan bëdambo icmendac, quequin Esusën chiaid
(Duc. 6.20-23)
1Matses dadpenshun tsibananacsho isash macuësh tapa pudundoec poctsebi Esus tsadtuidpanëdash. Asho isash abëd icquido Esusën dayunquio tabadpanëdash. 2Adshobien Esusën Nuquin Papan matses bëdambuen ismete chuibanquin bedampanëdash.
3¿Mitsipadquid Nuquin Papan bëdambuen ispec? Tantia. Mibitedi chuinu. Ubembi bëdambuec tabadtiapimbo icquid nebi. Nuquin Papan bëdambuen tabadmiaquini bëdambuec tabadtsiac, quequidën abi tantiasho Nuquin Papan: Umbi namiacno tabadtequid nec, quequin bëdambuen isquin bëdambo icmendac.
4Matsesën natiamiac mëyadquidombi abi tantiasho Nuquin Papan bëdambuen isquin bëdambo icmendac.
5Atonauidi tantienquio icquin Nuquin Papa tantiaquin utsibotsen tantiaquid Nuquin Papan bëdambo icmendac. Iuecshun Nuquin Papan: Menenu, caid ambi nidaid chuca uaidën tabadmendac.#5.5 Nëid chiacbimbuen Cuëd. 37.11 dada uapampic.
6Petebëta acte bunquiacbimbuec ambi chiacpadec bëdambuec tabadte bunquid Nuquin Papan bëdambuen nashunquin bëdambo icmendac.
7Utsibo natiasho isash uënësquiocquin bëdambuen isquid Nuquin Papan uënësquiocquin bëdambuen isendac.
8Ambi chiacpadombuenuidi bëdambuen nate bunquid bëdambo icmequin Nuquin Papan abibi bëismendac.#Cuëd. 24.3-4.
9Aton matses chieshënnansho isash: Padi. Bëdambuequien tabadtiad, quequid Nuquin Papan bëdambo icmequin dada cun mado caquimbi chido cun champi caindac.
10Bëdambuec tabadsho issun utsibon chieshënquin mëyanaid icsho Nuquin Papan bëdambo icmequin uënësacsho ambi namiacno tabadmendac. 11Ubi tantiaquido icsho utsibon chieshënquin icsambuen chuishunsho abëd tabadmenuen Nuquin Papan mibitedi bëdambo icmendac. Adembidi mibi mëyansho issun bëdambo icmendac. Adembidi: Aido icsambo iquec, quequin mibi mua uashobi Nuquin Papan mibitedi bëdambo icmendac. 12Aden utsibon chieshënaqui chieshtoenquio yec cuishonqueta. Adembidi ënden min tsusedpabo Nuquin Papan oncamiaidon chuibansho issun chieshënquin utsibon cuessunnepampic. Aden nampid icnuc utsibon chieshënac: Ubi bëdambuen isquin uënësacsho abuc abëdi tabadmequin ubi bëdamboshëcquid menendac, quiash cuishonqueta, quequin Esusën chuipanëdash.
Utsibo Nuquin Papa tantiamete chiaid
(Madc. 9.50; Duc. 14.34-35)
13Adshumbic abi macuësh tapa poctse tsadquin Esusën naden chuibampanëdash: Ma utsibontsen Nuquin Papa tantianu, quiash mibitedi sa casecac pambid bëdambo icsho petiadquio yacbimbuec bëdambuec tabadta. Sa bëdambocquid bëdambo iquec. Sa bëdambo icbuedi icsacsho ¿Mitsipaden bëdambo icmeuapec? Adotiapimbo iquec. Sa icsambo yanacsho umanuc secacsho matsesën mannetequid nec, quepanëdash Esus.
14Adashic padpidec onquec: Tabote taboac uëshëmbo chënquiacbimbuen utsibo bëdambuen tantiamequido mibitedi nec. Macuësh abucquiocquid mannanënquio shubu dadpen icquid ompodtiapimbo icsho abitedishun isec. 15Tabote taboshon matsun bëtashquin ¿dectanaidta icpadic? Padenquio. Ma shubu nuntan icquid abitedishun isnu, queshumbien tabote taboshon nënantanquio abuc dectanquid. 16Adacbimbuec ubi tantiesabobëd tabadquin: Ma Nuquin Papa abuc tabadquid tantianu, quequin aido ismec Nuquin Papan chiacpaden nabanec bëdambuec tabadta. Nuquin Papa bëdambo iquec, ma utsibotsen quenu, quiash adta, quequin Esusën chuipanëdash.
Esusën Moisesën chiampid chuibanaid
17Nadentsen Esusën chuipanëdash: Umbi chuibansho tantiashun: Nuquin Papan Chiaidquio chienquio iquec, quequin tantienda. Nuquin Papan Moises dada uamiampidbëta ambi oncamiaidon dada uamiampid chienquio icquin utsi uapec, mimbi ubi capec. Mambi utsi uainquio icpayoc. Nuquin Papan Chiaid utsi uainquio icquin ambi chiactedimbo nanuec chobique. 18Tantia. Abimbo chuinu. Abubëta nidaid nibëdanmiabi icnuc Nuquin Papan: Naden nata, quequin chuiquin dada uamiampid utsi uatiapimbo iquendac. Ambi chiampictedimbo namequin nainendac.
19Adquid icnuc Nuquin Papan: Naden nata, quequin chiaid abentsëc niacquin aden chiaidbidi utsi niacmequid Nuquin Papan ambi namiacnoshon: Bëdambo icquid nec, catiapimbo iquec. Utsibic Nuquin Papan chiacpadec tabadec: Nuquitsen bëdambuec tabadnuna, quequin utsibo chuiquid abi yacno ambi namiacno nidacsho Nuquin Papan: Bëdamboshë icquid nec, caindac. 20Moisesën chiampid tantiamequidobëd padiseobo Nuquin Papan namiacno puduedtequidoen mimbi dampec. Aido abi bëdambocquid danmianashic ompodshon icsambuen naquido nec. Adash Nuquin Papan namiacno puduedtiapimbo iquendac. Adecbidi Nuquin Papan Chiaid niac niaquec tabadash Nuquin Papan namiacno mibitedi puduedtiapimbo iquendac, quequin Esusën chuibampanëdash.
Nëishnanash badedquio bëdante Esusën chiaid
(Duc. 12.57-59)
21Adshumbic Esusën padpiden naden chuiuapanëdash: Nuquin Papan Chiaid nuquin tsusedpabo chuiquin Moisesën: Cuessunnianenda, quequin chiampid icnubi aid niacquin cuessunnequid cuidtequid nendac, quequin chiampid mibitedishun tantiec.#5.21 Buan. 20.13bëta M.I.Ch. 5.17 tantiaquin nëid dada uapanëdash. 22Nadquidotsen cuidtequido nec, quequin chuinu. Tantia. Aton matsesbëd nëishnanash baded bëdanenquio icquid icsho Nuquin Papan cuidtequid nendac. Utsibic chieshëmënec icsambuec chuishumënquido isadaidbon chuiquidon cuidtequid nendac. Utsibic aton matses chieshënquin cuessunnemete bunquin: Shëpi, caquin icsambuen chuishunquido Nuquin Papan chian annëdënquequid nësecaquin cuidtequid nendac.
23Adec chieshëmënquido Nuquin Papan cuidtequido nendac, quequin umbi chuisho tantiashun bëdambuen nata. Nuquin Papa tabadte shubu dapa yacno puduedshun: Ambi chiacpadombuen naquin cuna musuc menenu, mimbi capec. Aden menenumbi mimbi naid tantiata. ¿Ubëd chieshënnambuedta icpec? quequin tantiata. 24Adshun: Ai, ubëd chieshënnambued iquec, queshun Nuquin Papa tantiaquin mimbi bëbued meniabi mibëd chieshënnambued yacno nidash aidbëd bëdambuec onqueta. Adec bëdambuec onquiash bëdambuec isnanash padpidec chouashun Nuquin Papa tantiaquin mitsana meneta.
25Mibëd chieshënnambuedën: Nëid cuidmenuen cuidte chuiquid yacno buanchitembimbi iquec, queshun mibi buanac podquiedën nidec aidbëd bëdambuec onqueta: Ma nëish bëdannu, quiash. Matses cuidte chuiquidën cuidnushe, quiash badedquio mibëd chieshënnambuedbëd bëdambuec isnanta. Padenquio icsho matses cuidte chuiquidën: Icsambo iqueque. Quënën tsadunta, cac mibi quënën tsaduntsiashe. 26Aden tsadunmiac mimbi icsambuen nabued cuidquin cuidte chuiquidën chiactedi uesquin meniambo yec quënë yacnouësh mibi puduentiapimbo iquendac, quequin Esusën chuibampanëdash.
Ambi chudtemaidi chudaid chiaid
27Adshumbic nadentsen Esusën chuipanëdash: Min chidopenquio chudenda. Min bënëpenquio chudmenda, quequin Nuquin Papan Moises dada uamiampid mibitedishun tantiec.#5.27 Buan. 20.14bëta M.I.Ch. 5.18 tantiaquin nëid chuipanëdash Esusën. 28Aden chiaid niac niacquin icsambuen naquid icnubi nadquidbidi icsambo icuaic. Aton chidopenquio isec: Uid chudtiadquio icchitebi, quequin otacquio tantiaquin isequi adecbidi matses icsapec.
29Min ëshën isquin mimbi icsambuen naic. Ëshë chicshun uannombo neshunac istiapimbo yacbimbuen mimbi icsambuen naid ënta. Ënenquio icquid Nuquin Papan chian annëdënquiacno nësecaquin cuidtequid nendac. 30Min mëdante abiucshun icsambuen nate bunquin bedec mibi icsaic. Mëteshun uannombo neshunac bedtiapimbo yacbimbuen mimbi icsambuen naid ënta. Ënenquio icquid Nuquin Papan chian annëdënquiacno nësecaquin cuidtequid nendac, quequin Esusën chuibampanëdash.
Aton chidobëd cuëshëdte chiaid
(Mat. 19.9; Madc. 10.11-12; Duc. 16.18)
31Adshumbic nadentsen Esusën chuibampanëdash: Nuquin Papan Moises dada uamequin chiampid utsitsen mimbi naden tantiec. Aton chido bunenquio yanshun naden dada uashun menequid. Mibëd ictiapimbo yanobi, quequin dada uashun aton chidobi menequin cuenmequid, quequin Moisesën dada uapampic.#5.31 M.I.Ch. 24.1-4 Moisesën chiampid tantiaquin nëid dada uapanëdash. 32Utsitsen mibi chuinu. Aton chidon dada utsi chudmesho istuidshun Moisesën chiacpadombuen naic icsainquio ictsiash. Aton chido dada utsi chudmesa icshobi aton bënën ambembi dada uaid menequin aton chido cuenmiac icsambo iquec. Aden cuenmequin chido icsametsiash. Chido cuenmiaid bedquidtsen dada icsaindac, quepanëdash Esus.#5.32 D.N.Ch. 18.6 nëid dada uapanëdash.
Abimbo chiacbimbuen chienda, quequin chiaid
33Adshumbic Esusën padpiden chuibampanëdash: Naden Nuquin Papan Ambi Chiaid nuquin tsusedpa Moises dada uamepampic: Nuquin Papan tantianubi abimbo chuinu, quequin chiaid niactemaid nec. Aid niacsho issun Nuquin Papan cuidendac, quequin Moisesën chiampid mibitedishun tantiec.#5.33 D.N.Ch. 19.12 issun chotaquën dada uaid I.T. 30.2bëta M.I.Ch. 23.21 tantiaquin nëid dada uapanëdash. 34Utsitsen mibi chuinu: Nuquin Papan tantianubi abimbo chuinu. Umbi chiacpadombuen naindambi, quequin chienda. Adembidi abu chuiquin: Abimbo chuinu, quequin chienda. Abu Nuquin Papa tsadaid neque. 35Adembidi nidaid cuënquin: Abimbo chuinu, quequin chienda. Nuquin Papan tincaid neque. Adembidi Edusaden cuënquin: Abimbo chuinu, quequin chienda. Edusaden yacnoshon Nuquin Papan Chomiaidën bëdambuen namendac, quequin chiaid neque. 36Adembidi mapi cuënquin: Abimbo chuinu, quequin chienda. ¿Min mapin icboda mibi nedi? Padenquio. ¿Mimbida min manëdaid masedcamedi? Padenquio. Aton Icbo icquimbien Nuquin Papan naique. 37Aden chienquio icquin: Ai, Aden naimbi, queshun muainquiocquin nata. Adembidi: Padi. Aden natiapimbo iquebi, queshun mimbi chiacpadombuen nainda. Utsi uaquin mimbi icsambuen naindac, quepanëdash Esus.
Utsibëd cuidnanec chieshënnanenda, quiaid
(Duc. 6.29-30)
38Adashic padpidec Esus abi onquec: Nuquin Papan Moises chuiquin dada uamiampid mimbi tantiaid nad iquec: Chieshënquin ëshë ansiac adecbidi cuidnanec ëshë ansenanquid. Chieshënquin sëcsiac adecbidi cuidnanec sëcsenanquid, quequin chiampid icnubi#5.38 Buan. 21.24 tantiaquinc D.N.Ch. 24.20 tantiaquinc M.I.Ch. 19.21 tantiaquinc nëid Esusën chuipanëdash. 39utsitsen chuinu. Tantia. Mibi chieshënquin icsa uaquid cuidenda. Mibi icsambuen chieshënquin tancuesquid cuidenquio yec: Në utsiuctsen na, quequin bëdambuen nata. 40Min matsesën chieshënquin: Cuidte chuiquid yacno buanchitomane. Min dashcute bec cho, quequin chushcac aid dashcute meneshumbic min dashcute bëntsecquidtsen chicshun meneta. Aden bëdambuen nata. 41Utsibic: Nëbi nidtuidquin cuna buanec nid, quequin ancabudac nëbi nidtuidenquio icquin udimbo buanshunta.#5.41 Doma yacnocquidon sondadon isadaidbo ancabudquin atona buanmepanëdash. 42Utsibic: Mitsana bec cho, quesho meneta. Utsibic: Mitsana buanshun bëuaindambi, quesho cudasënenquio icquin meneta, quepanëdash Esus.
Chieshëmënquidobi bëdambuen tantiaquiote chiaid
(Duc. 6.27-28, 32-36)
43Adshumbic abi macuësh tapa poctse tsadquin bëdambuec tabadte Esusën naden chuibampanëdash: Nuquin Papan Moises chuiquin dada uamiampid mimbi tantiaid nad iquec: Mibi anoentsëqui tabadquid tantiaquin mibi chieshënquido chieshënta, quequin chuipampic.#5.43 D.N.Ch. 19.18bëta M.I.Ch. 10.18-19 tantiaquin nëid chuipanëdash Esusën. 44Aden chiaid icnubi utsi mibitedi chuinu. Tantia. Mibi chieshënquidobi bëdambuen tantiaquin nashumbanta. Chieshënaqui: Ubi chieshënquid bëdambuen ista, Papa, quequin Nuquin Papa chianneta. 45Aden chiannesho tantiec Nuquin Papa abuc tsadquidën: Cun mado nec. Cun champi nec, caido mibitedi iquendac. ¿Bëdambo icquido yacnouidtsëquida Nuquin Papan uëshë chëncamepadic? Padenquio. Icsambo icquido yacnotsen uëshë chëncamec. ¿Bëdambo icquido yacnouidtsëquida ue chomepadic? Padenquio. Icsambo icquido yacnotsen ue chomec. 46¿Mibëd tantiananquidouidtsëqui tantiaquin mimbi nashunsho issunda Nuquin Papan: Bëdambo iquec, queshun mibi nashumpec? Padenquio. Mimbi: Icsambo icquido nec, caid piucquid bedshumënquidombien aton shubun icquidouidtsëqui tantiaquin nashuneque. Aden nainda. Utsibotsen tantiaquin bëdambuen nashunta. 47¿Min matsesadobëduidtsëqui onquec: Mibi tantiembi, quec bëdamboda mibitedi icpe? Nuquin Papa tantiesaboen adec tabadpec. 48Abuc tabadquid Nuquin Papabimbuec bëdambocquid icta. Bëdambo icquidobëta icsambo icquidobi Nuquin Papan bëdambuen isquin tantiacpadombuembidi utsibotsen tantiata, quepanëdash Esus.
Currently Selected:
Mateo 5: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.