Ruk. 21
21
Waje̱ ni kuítri̱n susamu
(Mar. 12:41-44)
1Yusa Uunt Je̱e̱n kuítrintin kuít eṉketai̱niam kuítian eṉkeenan Jesus wainkiamiayi. 2Tura waje̱ kuítri̱ncha jimiará uchich kuítian, sentapua ániun eṉkean wainkiamiayi. 3Wainiak chichaak “Nekas tájarme, ju̱ waje̱ kuítrinchaitiat, ashí eṉkeena nú naṉkaamas núkap eṉkeayi. 4Warí, chikicha ampiniárua nuna eṉkeenawai. Tura nisha aya núchiniak takurmakman ampirmatsuk ashí eṉkeayi” tímiayi.
Yusa Uunt Je̱e̱n sa̱a̱naktinian Jesus ujakma
(Mat. 24:1-2; Mar. 13:1-2)
5Yusa Uunt Je̱e̱n kaya shíirmach armia nuna tura chíkich shíirmach susamu armia nunasha chíkich shuar áujmatuk pujuarmiayi. Nuyá̱ Jesus chichaak 6“Átum yamái shiir wáintrumna nu ashí emesnartatui. Kaya ekentramusha mash yumpuntrartatui” tímiayi.
Amuukatin tsawant urukuk ati nu nekaatin
(Mat. 24:3-28; Mar. 13:3-23)
7Nuyá̱ Jesusan chicharainiak “Uuntá, nusha ¿urutáik túrunatⁱ? ¿Kame ju̱ túrunatin jeatemámtaisha wariji̱a̱i̱ṉ nekaatajⁱ?” tiármiayi. 8Tutai Jesus chicharuk “Aneartarum, anaṉnawairap. Nekaatarum. Winia náarun pachisar ‘Wi Krístuitjiai’ tuinia ti untsurí jíintrartatui. ‘Nuṉka amuukatin jeayi’ tu etserkartatui. Tuíniakui anturkarum nemarsairap. 9Tura meset chicham antukrum sapijmiakairap. Nusha emka túrunatniuiti. Túrasha nú chichamaik amuukatin tsawant jeashtatui.”
10Nuya̱ṉka chicharainiak tímiayi “Uunt nuṉka nuamtak uunt nuṉka mátsatkamuja̱i̱ṉ mai̱ maani̱ ajainiakui núnisaraṉ úunt akupniu akupeamuri̱sha nuamtak úunt akupniu akupeamuri̱ji̱a̱i̱ mai̱ maani̱ ajartatui. 11Tí ú̱u̱rkattawai. Untsurí nuṉkanam tsukasha, suṉkursha ti átatui. Nayaimpinmasha ti ashammai náṉkamas túrunattawai. Nuja̱i̱ Yus ni kakarmari̱n iniakmastatui.
12 Tura ju̱ túruntsa̱i̱ṉ atumín pataaturmakar achirmákartatui. Iruntai̱ je̱a̱nmasha makurmartai tusar juramkiartatui. Sepunmasha eṉketmattarme. Tura winia naar pachia asakrumin akupniúnmasha, úuntnumsha juramkiartatui. 13Nuiṉkia atumín túrutmakrumin wi túramu etserkatin arutmáttarme. 14-15Tura atumí nemasri̱ nakitramainiak ‘wáitiaiti’ títinian tujintkiarat tusan winia nekatairja̱i̱ chichastinian amastatjarme. Tuma asamtai ‘Jurakuisha warinia tíniak kíishtumaktaj tusan aetak enentáimsashtatjai’ titiarum.
16 Tura imia atumí aparí̱sha surutmakartatui. Atumí yachi̱sha, atumí shuari̱sha amikrumsha núnisaraṉ surutmakartatui. Tura mámunka máwartatui. 17Tura Winia ajasáru asakrumin ashí aents nakitrámprartatui. 18Tura peṉké ishichkisha yajauch awajtámsachartatui. 19Katsuntrarmeka iwiaaku átin wainkiattarme.
20 Ju̱ pepru Jerusaréṉka a̱a̱ tanishri̱i̱n suntar téntakar matsatu wáinkiurmeka emesratin jeá nekaattarme. 21Nuikia ju̱i̱ Jutanam pujuinia nu nainnium pisartin áiniawai tura ju̱i̱ Jerusaréṉnum pujuinia nusha ju̱ya̱ṉka jiinkí̱ wétin áiniawai. Tura ajanam pujuinia nusha péprunam waketkishtin áiniawai. 22Nu tsawantincha Yus asutiámun wáinkiartatui. Yus Papinium nu túrunatin yaunchu aarma nu uminkiattawai nu tsawantin. 23Nuṉkanam tí waitsatin átatui. Tura ju̱ aents ti asutniáwartatui. Tuma asamtai nuwa̱ ajamtin ainia nusha tura uchi kuírchin takakainia nusha imiá itiurchatan wáinkiartatui. 24Tura ju̱yá̱ aents mesetnum jákartatui. Tura chikichnaka ashí nuṉkanam misaawar júkiartatui tura yajaya̱ apach, Yúsnan enentáimtuiniatsna nu, ju̱i̱ Jerusaréṉnum waya̱war najakartatui. Nu túratniunka Yus tsaṉkatkana nui̱ṉ túrawartatui.
Aents Ajasu tutai tátintri̱
(Mat. 24:29-35,42-44; Mar. 13:24-37)
25 Nuiṉkia etsanmasha, nantunmasha, yáanmasha Yuska ni kakarmari̱n iniakmak nusháa túrattawai. Nuṉkanmasha ashí aents páchim enentáimprartatui. Tura nayantsanam chíchimi ti aku tantá ajakui ti ashamkartatui. 26Tura túrunatin ana nuna enentáimsar mayái̱ ashinkiartatui. Warí, nayaimpiniam kakaram ainia nusha peantrartatui. 27Nuyá̱ Winia, Aents Ajasu tutain, yuraṉminiam ti shiir ajasan winiái̱ Tan. 7:13; Apu. 1:7 wáitkiartatui. 28Nu túrunatin náṉkamkui uwempratin jeatémayi tusarum kaka̱a̱rum shiir enentáimsatarum.”
29Tura ju̱ chichamnasha nekapmamiayi. “Ikiu numi tura náṉkamas numisha enentáimsatarum. 30Ju̱ nuṉkanam ni nuké̱ yama puṉkakmatai ‘esat jeatémayi’ tátsurmek. 31Núnisaṉ Wi tájana nu wáinkiurmeka Wi ju̱ nuṉkanam akupin ajastin jeatéma nu nekaatarum.
32 Tura aents pujuinia nu jáiniatsa̱i̱ṉ nusha ashí túrunattawai. Núnaka paant tájarme. 33Nayaimpisha nuṉkasha amuukartatui. Tura winia chichampruka amuukachminiaiti. 34-35Nu tsawant aya aneachma jeattawai. Ashí aents ju̱ nuṉkanam pujuinia nu, nuna enentáimtsuk pujuiniai̱ jeattawai. Tuma asamtai atumsha anearum wekasatarum. Yajauchiniam emetnarum, aya yurumátniuk, aya umartiniak enentáimtusrum ju̱ nuṉkanam ana nu ti wakerakrumni̱ṉkia péṉker enentáimsatin tujintkiattarme. Nu atsutí tusarum tura nu tsawant aya áwaktamka̱i̱j tusarum péṉker wekasatarum. 36Anearum wekasatarum. Túrunattana nui̱ katsuntrataj tusarum Yus aujsa pujustarum. Túrarum Aents Ajasu tutai íimmianum péṉker átaj tusarum túratarum” tímiayi.
37Tuke tsawant tsawai̱sha Yusa Uunt Je̱e̱n Jesus unuiniamiayi. Tura káshikia Uriwiu nainnium we wémiayi. 38Tura tuke tsawant Yusa Uunt Je̱e̱n Jesus chichaamun anturkatai tusar káshik tariarmiayi.
Currently Selected:
Ruk. 21: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.