Génesis 2
2
1Ora inquite jero quipatsi aisati maaroni timantajeitarori, itsoncaquero maaroni. 2Ora caratapaintsiri 7 quitaiteri itsoncaquero Tasorentsi maaroni yovetsicaqueri, irosati yoipacantacaro. 3Ari itasoncaventaquero, icanti: “Irotaque quitaiteri nonashitacaacari, te onquempetearoji otsipapee quitaiteri.” Icantantacari; tempa irotaque yoipacantacarori maaroni yovetsicaqueri. 4Aitaque ocantacari peerani yovetsicantacarori Tasorentsi inquite aisati quipatsi.
Yovetsicantacariri Tasorentsi atiri aisati yoisavicaqueri ivanquiremashiqui
Ari yovetsicantacarori Tasorentsi inquite aisati quipatsi, 5tequera ontimayeteji panquirentsiyetatsiri aisati tojaripee. Iro caariquera oshiocantayeta, tequera iroariyeroji Tasorentsi incani aisati tequerata intimeji antaveeteroneri. 6Iro cantaincha otimi nijapee amotoaajayetatsiri tsincacotirori quipatsi. 7Yovetsicantacariri Tasorentsi atiri, iro yaaqueri ovane quipatsi. Impoiji itasoncaqueri iirinaqui, irosati yaneantanaca; atiritanaque ini.
8Impoiji itimacaaquero ivanquiremashi anta quipatsiqui pajitachari EdÉn, iquenapainta catsirincaiteri. Aitaque yoisavicaqueriri atiri yovetsicaqueri. 9Aisati ishiocacayetaquero inchatopee cameetsayetatsiri timayetatsiri oitsoquipee yoyeetari. Aisati otimaque nianqui apite inchato: aparo oaneantatsiri, iro otsipa iotacantirori cameetsayetatsiri aisati caari cameetsayetatsi.
10Aisati otimi nija antearojatatsiri tsincacotapinitirori panquirentsipee, oquenaajayetanaque ocarati 4. 11Opajita aparoni Pisón. Irotaque shoncaajatarori quipatsi pajitachari Havilá, itimasanotapainta oro. 12Yora oro timatsiri irioperotatsiri. Aisati otimapai iroperori oyashi inchato casancajencayetatsiri, jero mapiquipee icanteetiri ónice pinatasanotachari. 13Ora apitetapaintsiri nija opajita Gihón. Oshoncaajatanacaro iroori quipatsi pajitachari Cus. 14Iro pashini mavatapaintsiri opajita Tigris, oquenaajatanaque Asiriaqui acaqueroca, iquenapainta catsirincaiteri. Jero caratapaintsiri 4 opajita Éufrates.
15-17Yoisavicantacariri Tasorentsi atiri ivanquiremashiqui EdÉn, iramenantearori aisati impanquiveetanteari. Jero oca icantaqueriri: “Ocameetsati poajeitearo maaroni chochoquipee oca nopajeitaquempiri. Irointiquea ora nianquinirira inchato, iotacantirori cameetsayetatsiri aisati caari cameetsatatsi, eiro poarotsi. Ariorica poaquearo ari pincamajeitaque.”
18Impoiji icanti Tasorentsi aisati: “Te oncameetsateji intime apaniro shirampari. Ocameetsati ontime intsipateari quiso oyerineri, irotaque amitacoyeterine.” 19-20Yovetsicantacariri Tasorentsi virantsipee aisati vanquiyetachari, irosati quipatsi yovetsicajeitantacariri iriori, ari yaanaqueneri shirampari impajiyetanteariri maaroni. Ari ipajiyetaqueri maaroni, irosati meeca ipajitantayeta. Iro cantaincha yora shirampari, tecatsi amitacoterine. Apaniro inaque, te intimeji intsipateari. 21Ari yoimaasanotaqueri Tasorentsi atiri. Ainiroquera imaaque, yaaquero aparoni imerequi, impoiji yoameetsatajiri aisati. 22Ora imerequitonqui irotaque yovetsicaqueri tsinane, irosati yonijantacari shirampari. 23Itinantanajari, ineatiiro; icanti:
“Iroovequea irotaque novatsasanori aisati irotaque notonquisanori. Meeca ompajitea ‘tsinane’; tempa aitaque yaaquerori Tasorentsi shirampariqui.”
24Irotaque ocameetsatantari ariorica iraye shirampari ijina, irinijantareanaqueri iriri aisati iriniro, quiso iroanaquero ijina. Inquempetanaquea apaniro irinaque.
25Yora shirampari aisati tsinane imoncaratavacaajeitaca icaaratsempequijeitaque. Tecatsi inquenqueshirejeitaque, te impashiventajeiteaji.
Currently Selected:
Génesis 2: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.