Hechos 21
21
Jerusalén llaqtaman Pablopa risqanmanta
1Iñiqkunamanta rakikuykuspaykum barcopi Cos islaman pasakurqaniku. Paqarinnintinñataqmi Rodas islaman chayaruspayku Pátara llaqtaman rirqaniku. 2Chay llaqtapim Feniciaman riq barcota tariruspayku chaywan pasarqaniku. 3Chipre islapa alleq lawnintam Siriaman rirqaniku, hinaspam cargakuna bajachina kaptin Tiro llaqtaman chayarqaniku. 4Chay llaqtapi iñiqkunata tariruspaykum paykunawan qanchis punchaw qeparqaniku. Pablotam paykuna Chuya Espiritupa rimarichisqan nirqaku:
Ama riychu Jerusalén llaqtamanqa, nispanku.
5Chay qanchis punchaw pasaruptinmi lloqsirqaniku, hinaptinmi lliw iñiqkuna warmipas qaripas warmakunapas llaqtapa patankama qatiwarqaku aviawanankupaq, chaymi lamar qochapa patanpi qonqorakuykuspa Diosta mañakurqaniku. 6Chaymantam llapallayku abrazanakuykuptiyku wasinkuman kutikurqaku, ñoqaykuñataqmi barcoman qespiykuspa pasakurqaniku.
7Tiro llaqtamantam barcopi Tolemaida llaqtaman chayarqaniku, hinaspaykum iñiqkunata watukuspayku paykunawan huk punchaw qeparqaniku. 8#Hch 6.5; 8.5.Paqarinnintin punchawñataqmi Cesarea llaqtakama rirqaniku. Chaypim watukurqaniku evangelista Felipeta, payqa karqa Jerusalenpi ñawpaqtaraq akllasqanku qanchis diaconokunapa hukninmi. Paypa wasinpim samakurqaniku. 9Paypam karqa manaraq qari reqsiq tawa sipas churinkuna. Paykunaqa karqaku profetizaqkunam. 10#Hch 11.28.Felipepa wasinpi unayña kachkaptiykum Judeamanta profeta Agabo chayaramurqa. 11Paymi watukamuwaspanku Pablopa chumpinta hapiykuspa chakintawan makinkunata watakuruspan nirqa:
Chuya Espiritum nin: “Jerusalenpi judiokunam kay chumpipa dueñonta kaynata wataruspa mana judío kaqkunaman entreganqaku”, nispa.
12Chayta uyarispaykum Cesareapi iñiqkunapiwan Pablota mañakurqaku amaña Jerusalén llaqtaman rinanpaq. 13Pabloñataqmi nirqa:
¿Imanasqataq waqaspaykichik llakichiwankichik? Manam watasqa kanallaypaqchu kachkani, ñoqaqa chayllam kachkani Señor Jesucristorayku Jerusalenpi wañunaypaqpas, nispa.
14Mana imayna harkayta atispaykum, “Señorpa munasqanyá ruwasqa kachun” nispayku upallakurqanikuña.
15Chay punchawkunapa qepantam alistakuruspayku Jerusalén llaqtaman qespirqaniku. 16Riysiwarqakutaqmi Cesareamanta wakin iñiqkunapas, paykunam Chipre llaqtayuq Mnasonpa wasinman pusawarqaku, payqa unay watakunaña iñikuqmi karqa. Paypa wasinpim samakurqaniku.
Jacobota Pablo watukusqanmanta
17Jerusalenman chayaruptiykum kusikuyllawanña llapa iñiqkuna chaskiwarqaku. 18Paqarinnintin punchawtam Pablo ñoqaykuwan kuska rirqa Jacobo watukuq, chaypim kachkasqaku llapallan ancianokunapas. 19Pablom paykunata rimaykuspan willakuyta qallaykurqa, imaynam paynintakama mana judío kaqkunapi Diospa tukuy imakunam ruwamusqanmanta. 20Uyariykuspankum Diosta yupaycharqaku, hinaspam Pablota nirqaku:
Wawqelláy, yachasqaykipi hinapas waranqanpim judiokuna Jesucristoman iñikurunku, ichaqa hinallaraqmi Moisespa leyninman hapipasqa kachkanku. 21Paykunamanmi wakin runakuna qanmanta willarunku, huklaw nacionpi judiokunatas yachachinki Moisespa leyninta manaña kasukuspa amaña churinkutapas señalanankupaq, hinaspa costumbrenchikkunaman hina amaña kawsanankupaq. 22¿Imanisuntaq llapa runakuna kay llaqtaman chayamusqaykita yacharuptinkuqa? 23Chaynaqa, kaynatayá ruway: Kaypim ñoqanchikwan kachkan tawa runakuna Diosman prometekusqankuta cumpliqkuna. 24#Nm 6.13-20.Templomanyá paykunawan kuska rispayki costumbrenchikman hina chuyanchakamuychik, paykunapa gastonta pagaspayá chukchankuta rutuchimuy. Chaynapim lliw yachanqaku qanmanta tukuy ima rimasqankuqa mana cheqapchu kasqanta, aswanqa Moisespa leynin kasukusqaykita. 25#Hch 15.29.Ichaqa mana judío kaq iñiqkunamanqa, ñam cartata aparqankichikña, chaypim nirqanchik: “Amam mikunkichikchu idolokunaman ofrecesqa mikuytaqa, amam mikunkichikchu yawartaqa nitaq yawarpa pasasqan aychatapas, amataqmi huchapakunkichikchu”, nispanku.
PABLOPA TAWA KAQ ILLASQANMANTA
Templopi Pablota presochasqankumanta
26Chaymi Pabloqa chay tawa runakunata pusarikuspan paqarinnintin punchaw chuyanchakurqaku, hinaspam temploman yaykurqa chuyanchakusqanku punchawkuna tukusqanta willakunanpaq, chaynataq haykapim ofrendankuta sapakama Diosman ofrecenankuta yachamunanpaq.
27Qanchis punchaw chuyanchakuyninkuta tukuruchkaptinkuñam, Asia lawmanta kaq judiokuna Pablota templopi rikururqaku, hinaspam llapa runakunata paypa contranpi hatarirachirqaku. Hapiruspankuñataqmi 28qayaykachakurqaku:
¡Israelpa mirayninkuna yanapawayku! Kay runam tukuy hinastinpi purispan Israel runakunapa contranpi, Moisespa leyninpa contranpi hinaspa templopa contranpi yachachin. Kunanpas templomanmi mana judío kaq runakunata pusaykurun, hinaspam millakuypaqta kay templota ruwarun.
29 #
Hch 20.4. Chaynataqa nirqaku Éfeso llaqtayuq Trofimotawan Pablota Jerusalén llaqtapi rikurusqankuraykum, Trofimoqa manam judiochu karqa. Payta temploman Pablo pusarusqantam piensarqaku.
30Llaqtapi runakunam chayta uyariruspanku llapallanku kallpamurqaku. Pablota hapiruspankum templomanta hawaman aysarqaku, hinaspam templopa punkunta apurawllamanña wichqarurqaku. 31Wañurachinankupaq kachkaptinkuñam Roma llaqtayuq soldadokunapa kamachiqninman willaykamurqaku:
Jerusalenpi lliw runakunam chaqwata ruwachkanku, nispanku.
32Paymi capitanninkunatawan soldadonkunata pusarikuspa kallpaylla chayarurqa, hinaptinmi payta soldadokunatawan rikuruspanku chay llapa runakuna Pablota maqachkaspanku sayarurqaku. 33Soldadokunapa kamachiqninñataqmi asuykuspan Pablota presocharurqa, hinaspam iskay cadenawan watanankupaq kamachirqa, chaymantam tapurqa pim kasqanta, hinaspa imatam ruwarusqanta.
34Llapa runakunañataqmi wakin hukta wakinñataq hukta qaparispa chaqwakurqaku, hinaptinmi capitanñataq chaqwakusqankuwan mana allinta uyarisqanrayku cuartelman Pablota pusanankupaq kamachirqa. 35Cuartelpa gradasninman chayaruptinkum, llapa runakuna imatapas ruwarunankumanta Pablotaqa wantupiña soldadokuna apaykurqaku. 36Llapa runakunañataqmi qepankuta qatispanku qaparirqaku:
¡Wañuchun! nispanku.
Pablopa rimarikusqanmanta
37Pablota cuartelman apaykuchkaptinkum soldadokunapa capitanninta Pablo tapurqa:
¿Imallatapas rimariymanchu? nispa.
Chaymi payñataq nirqa:
¿Griego rimayta yachankichu? 38¿Manachum qamqa kachkanki qayninpakunalla Roma nacionpa contranpi tawa waranqa runakunata hatarirachispa chunniqman pusaruq Egipto llaqtayuq runa? nispa.
39Hinaptinmi Pabloñataq nirqa:
Ñoqaqa Cilicia lawpi Tarso llaqtapi naceq judiom kani, llaqtayqa ancha reqsisqam. Ama hina kaspa saqeykuway llapa runakunata rimapayaykunaypaq, nispa.
40Chay capitán “allinmi” niykuptinmi, gradaspi Pablo sayaykuspa runakunata makinwan señaschaspa upallachirqa. Upallaruptinkum hebreo rimayninkupi paykunata nirqa:
Currently Selected:
Hechos 21: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012