Geenesis 40
40
Josee pohuatasacari maqueyojosano
1Na nuhuaji, querajaa na seruuri camarnu Faraoon juaatiquiaari nocuara. Niquiriyatuuri vino na camarnu Faraoon raatojonaa jiyaniijia quijia. Tamonu saniniuujia, nojuajaari camarnu Faraoonra pan majeetejonaa jiyaniijia quijia. 2Cuno querajaa jiyaniijianucuaari na camarnu Faraoon najiquititiuquiaari tama nojoriicuarajaaja. 3Naacuatej, Faraoonri nojori quiooteree. Tamasacata na jiyarotaree nujuatejojua tiajiniaari Potifar cojuatesocoriquiano tii. Cuno nujuatejojua tiajinia nujuatesano quiriquiaajaariuhuaj Josee. 4Jiyacaritij, Potifarri Josee seerataree cuno shusha tiuquitiano querajaa jiyaniijianucua. Cuno querajaa jiyaniijianucuaari tarishiquiaari nujuatejosano nojori quishacari.
5Tamonu niucua, camarnu Faraoon raatojonaa jiyaniijiani, nera pan majeetejonaa jiyaniijiajuhuaj, nojoriiri mariyataa maquiyonuuquiaari. Nojori maquiyojosanoori tama nojoriicuarajaaja quiquiaari. 6Cuno tariqui saniniuujia Josee jaara nojori niquiniuucua niquiaari, macuhuajetacoyano nojori niquishiiri. 7Joseeri naacua nojori nequesotareequij:
—¿Casaara macuhua nia juhuaquemaani?
8Nojoriiri naa Josee riucuareequij:
—Canaari niucua maquiyojoreeni. Majaari quenaaja niquiriyatu pueyano quiniu canaara na pohuatanura canaa maquiyojosanojiniji.
Joseeri saniniuujia naa cuno pojori riucuareequij:
—¿Majateeri nio nia niishiniu? Pueyasojuanaacuajaari na naata niaara pohuataniniu maatia nia maquiyojosanojiniji. Quiarijiaja ritia cua pohuatature nia maquiyojosano.
9Jiyacaritij, camarnu Faraoon raatojonaa jiyaniijiaari naa coteeree Josee pohuatanu na maquenujiniji:
—Janiyari cua maquenujinia uva jiyona shootiariquiaani. 10Cuno uva jiyonaari jiuujianaraca cashacucuaraca quiriquiaa. Naa cua shootiasacarijiatej, cuno uva jiyonaari catuutiacoriquiaa. Ritia shuutiacomaa cua niquiarajaari. Naajuhuaj, cuno uva shuucuacaari cua niquiaraja jataquee tariucua querajaaca noshuriujua uvara. 11Jiyacaritij, janiyari cua camarnu Faraoon ratutaja mueturiquiaani. Janiyari tii minijioriquiaa uva noshuriujua cua maquenujiniani. Naa cua miiniu nuhuajitij, janiyajanaari cua camarnu Faraoon juaashiquiajinia niataree na raatonuque na ratusocoriquianoni.
12Jiyacaritij, Joseeri naa sequeree camarnu Faraoon raatojonaa jiyaniijiatej:
—Cuno quia maquiyojosanoni, cunoori naa quia niishitiniu paniyaquij: Cuno quia niquishano jiuujianraca uva cashacucuani, cunoori jiuujianraca juuca. 13Naacuatej, jiuujianraca juucajinia, camarnu Faraoonri quia jiiquiootenutaniya nocua quia quianura. Jiyacaritij, sesa quia miishano na jeecanu nuhuaji, nojuajanaari quia sequenutaniya quia poonijiosano quia miiniuhuarohuaj. Naacuatej, quiaari camarnu Faraoon juaashiquiajinia na raatonuque niojotanara quiniutianiuhuacuhua. 14Cua tojiri. Quia jaara naa taquiya maninia miishaarecuaatej, quiocua quenaaja cua niishishiijia. Quiocua cucuara sequere camarnu Faraoon nio nujuatejojuajiniji na tohuatenura janiyajuhuaj. Quiocua naa cucua taraajere quenaajatej. 15Janiya saniniuujia, majaari nio nujuatejojuajinia cua nujuatesaanu quiquianu sesa miijia cua quiniuucua. Janiyari cua Hebreo jiyajiniji nohuasesaaquiaarini. ¿Janiyateeri sesa miiquianujaarani, janiya jaara nio nujuatejojuajinia nujuatesaare pueyaracaanuni?
16Naa Josee riucuanuucua maniniacuaa camarnu Faraoon raatojonaa jiyaniijiacuaatej, saniniuujia, Faraoonra pan majeetejonaa jiyaniijiaari naa Josee sequequiaarijuhuaj:
—Janiya saniniuujia, janiyari naa maquiyoreenijia. Janiyari cua maquenujinia cua nacaacua jiuujianaraca canaasatuhua mishaja pan patariquiaani. 17Jiyareta na cacojiria cajitiaanoori saaja shoqueeca pan quiriquiaa, queraatia tamaatiuucua pan shoqueecata cojitishano. Puetunu cuno panjanaari cua camarnu Faraoonrano cua majeetejosano quiriquiaa. Naa cua nacaacua cua patasacari canaasatujinia cuno pantej, shuhuari cua cacojijia na miojonuuriquiaa.
18Jiyacaritij, Joseeri naa riucuaree camarnu Faraoonrano pan majeetejonaa jiyaniijia:
—Cuno quia maquesanoni, cunoori nio quia niishitiniu paniya: Cuno jiuujianraca canaasatu mishaja pan quia maquesanoni, cunoori jiuujianraca juuca. 19Naacuatej, jiuujianraca juucajinia, camarnu Faraoonri quia jiiquiootenutaniya nocua quia quianura. Nojuajaari jiyacari sesa quia miishano saneenutaniya. Na nuhuaji sohuaneyocuata quia riquiajiniji quia jaasutenutaniya naanaacuajiiri. Naacuatej, mopueeri tii quia miojonutaniya quia jaasusaquijia.
20Cuno nuhuaji jiuujianaraca juucajiniaja, camarnu Faraoonri na rasaanu juuca queranacuquiaari. Puetunujuanaa nera poonijionaa jiyaniijianucuajanaa masuuquiaariiri, nojoritia na queranacunura. Jiyacaritij, camarnu Faraoonri puetunu na masu niquiarajanaa, cuno querajaa nera poonijionaa jiyaniijianucua tohuatejoree nujuatejojuajiniji. Cuno pojoriiri quiriquiaa camarnu Faraoon raatojonaa jiyaniijia, nera na pan majeetejonaa jiyaniijiajaajanio. 21Jiyacaritij, camarnu Faraoonri na juaashiquiajinia na raatonuque niojotana jiyaniijia sequeree nera na poonijionuhuara juhua coteenujua. Naacuatej, cuno jiyaniijiaari camarnu Faraoonra poonijionu coteerohuacuhua. 22Saniniuujia, camarnu Faraoonri nera pan majeetejonaa jiyaniijia seerataree na seya, nojori sohuatenura sohuaneyocuata naanaacuaji na riquiajiniji. Naa tohuatequiaariiri nojori maquenujiniji Josee pohuatasano nojoriria. 23Saniniuujia, camarnu Faraoon raatojonaa jiyaniijiaari Joseejiniji niyajetaquiaari tojetaarucuajanaa.
Currently Selected:
Geenesis 40: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.