Exodo 2
2
Moisees rasacari
1Jiyacaritij, supuetana Jacob niyanu Leviicuajinio caneno pueyanoori tama na supuetana Leviicuajinio caneno maaji camiquiaari. 2Maajiiri nera manajequiaari. Caya raquiaariiri. Mueya nucua niquishacari na rasano mueyari mueya maniniu quiriquiaa, jiuujianaraca raca na jamoquiaari maja na jatasaanura moojinia. 3Majaari socua na naata na jamonu quiquiaari. Na nucuaari nocuaji jeenucuaquiaari tucuaco canaasatu juhua teeco. Cuno canaasatuuri papiro jiyanishano jiyasocuajiniji shitiasano quiriquiase. Mueya nucuaari cuno canaasatu jiniacuma roshiquioquiaari maninia, maja mohuaca shiitianura mii. Naa na rupanacunu nuhuaji puetunujuanaatej, na nucuaari na mueya niaquiaari mii. Na nuhuaji Nilo jiyanishano moojinia nahua tajinia mueya niataquiaari moo casaqueejiiri. 4Naa na miiniu nuhuajitij, tariucua maaji samiriu neyatu seerataquiaari na nanuniyojuaari, tucuajijia na shanacunura taa na miishaanutaniyajanojoni, mueya jaara riuriatasaare moojinia cuataano.
5Cuno juucaja tenacari, camarnu Faraoon niyatuuri moojiniji rosetaquiaari nanoonuucua na cojuanaa niyacoojoritia. Nojori rucoojosacari moo shuriuquioco, Faraoon niyatuuri canaasatu niquirii cuataano nahua tajinia. Faraoon niyatuuri niquiriyatu na seru niyacoo sequeree nera moojiniji cuno canaasatu na patanura. 6Faraoon niyatu jaara riataquiaari cuno canaasatu, mueyari quiriquiaa. Marteriquiaari. Faraoon niyatuuri nocua taraajequiaari. Cunora naa sequequiaariiri: “Nio mueyari Hebreo pueya mueyaniyojua.”
7Mueya rimiatuuri Faraoon niyatu sequesee naatej:
—Quiaa jaara nio mueya paniri, tiacoji quiara sequecoora Hebreo maajipohuajinijinio quiara na canashitiniuria nio mueya.
Naa Faraoon niyatu tojishacari mueya rimiatu sequesanotej, 8na sequereeri:
—¡Ritiacuarajaj, jiyaj nio tariuhuaj!
Maaji samiriuuri ritia netecuhua na tiaco na nucua numootenuucua na nanuniyojuaacuara. 9Moojiniji mueya nucua tiuquishacari, camarnu Faraoon niyatuuri naa na sequeree:
—Nio mueya quiria quia supuere. Quiria quia canashitirinioj. Janiyari cua cumaneeca quia niquitioriquianoni quiria mueya quia canashitiniuucua.
Naacuatej, tama mueya nucuajaarijia cuno mueya paquiaari. Faraoon niyatura na canashitiquiaariiri. 10Cuno mueya jaara maashiquiaari, saniya na nucuajanaari Faraoon niyatuucua na jiyataquiaari. Faraoon niyatu niquitioseerinioj. Cuno niyacoori seetanujuanaa juhua neyanura na jiyatequiaari. Na jiyaniquiriiri “Moisees.” Nioori sequeya, “Moojiniji cua pasano.”
Egipto jiyajiniji Moisees mashishacari
11Na nuhuaji, tariucua mashaja Moisees quishacari, nojuajaari tohuataquiaari narta pueya poonijiyano niquiniuucua. Jiyacaritij, tama nojuajaari niataquiaari narta pueyari puera poonijiotesaariquiaa naquiya nojori miitiasaanuta. Naa na rucuanejosacari cuno juucajatej, tamonu Egipto tahueri narta Hebreo pueyano piquiriquiaa na niquiara. 12Moiseesri jiyacari coteenu puetunu niquinijioreejanaa. Tojetaarucuajanaa shaaquiiri quiriquiaa. Jiyacari cuno Egipto tahue moreeri. Naa na monu nuhuajitij, cuniquijia jaaquiajinia na jamoreeri. 13Naa na miiniu nuhuajitij, socua tariqui pacutequiaari quianu narta Hebreo pueya niquiniuucuaari. Jiyacari niquiquiaari tama narta pueya piyotaanojaarijia. Jiyacaritij, Moiseesri tama narta pueyano piquiyano sequeree:
—¿Casaara naa quia piquiya quiarta pueyanoni?
14Narta pueyano piquiyanoori saaja naa Moisees riucuaree na juaaniutia.
—¿Canteeri taquiya canaa camarnura canaa nequesoreenara quia jiyaterecuaani? ¿Quiaateeri cua monu paniyajuhuaj, naatej taa quia moriquiacuaa Egipcio tahuecuaani?
Moisees jaara tojiquiaari naa narta pueyano sequesano nojuajatej, puerereeri. Tama nojuajaarijia niishiquiaari pueyaqui tari niishirii Egipcio tahue na monujiniji. 15Seetanujuanaa, camarnu Faraoon jaara niishiquiaari Moisees miishanojiniji, nojuajaari Moisees pajetequiaari na mosaanura saniniuujia. Moiseesri naacua ritia mashiquiaari Madiaan jiyajinia. Pueyaracaanu tii quishiiquiaariiri.
23Queraatia marijia shocojonu nuhuaji, Moisees quishacari Madiaan jiyajinia, Egipto jiya camarnu Faraoonri jiyacari shaajequiaari. Supuetana Israelcuajinio caneno pueya saniniuujia, seya nojori quiniuucua, puera nojori poonitijiosaanuucuajuhuaj, nojoriiri naacua ririjionuujua. Sapiyonuuriquiaajaariuhuaj. Pueyasoori nojori tojiriquiaacuaja. 24Pueyasoori jiyacari nojoriicua taraajeree na tojishacari nojori sohuareejotanu. Jiyacaritij Pueyasoori nojoriria na miishocoriquiano niishiquii taa na sequequiaari cuno pueyapue supuetanaa Abraham, Isaac, Jacobcuajani. 25Naacuatej, Pueyasoori jiyacari cuno pueya tacaatiaree. Cuno pueyari seetanujuanaa puera naquiya miitiasaariquiaa jiyacari.
Currently Selected:
Exodo 2: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.