San Mateo 10
10
Ndi̱kaxin Jesús uxi uvi nda taa ta̱xi ra ichí ndaꞌa nda xaa chiñu nda nuu ra
(Mr. 3:13-19; Lc. 6:12-16)
1Ka̱na Jesús uxi uvi nda taa ítaꞌan xiꞌin ra, ta ta̱xi ra ichí ndaꞌa nda tava nda tachi nduvaꞌa kúu mií naꞌa tin sindaꞌa nda na xiꞌin ndiꞌi nuu kueꞌe ndóꞌo na. 2Ta ya yóꞌó ku kivi nda ikán, ra núnu̱ú ku ra Simón, ra káꞌan na xiꞌin Pedro xiꞌin ñani ra, ra Andrés, xiꞌin ra Jacobo xiꞌin ra Juan ñani ra, nda seꞌe ra Zebedeo ku uvi saa nda ikán. 3Xiꞌin ra Felipe, inka ra náni Bartolomé xiꞌin ra Tomás tin inka ra náni Mateo, ra ndíkaya xuꞌun nuu na gobierno, inka ra náni Jacobo seꞌe ra Alfeo ku ra, xiꞌin ra Lebeo, ra káꞌan na xiꞌin Tadeo. 4Xiꞌin inka ra náni Simón, ra ndíkaa xiꞌin partido na náni cananeo, inka ra náni Judas Iscariote, ra ndi̱xiko vata Jesús nuu na sáa ini xíni ñaꞌa.
Kivi ti̱ꞌvi Jesús nda apóstol kuaꞌan nda kaꞌan ndoso nda tuꞌun ra
(Mr. 6:7-13; Lc. 9:1-6)
5Saa ti̱ꞌvi ra uxi uvi saa nda ikán kuaꞌan nda, ta ndi̱kaꞌan ra xiꞌin nda, káchi ra saa:
―Küꞌun ndo ñuu nuu ndóo naꞌa, na köo kúu judío, ni nda iin ñuu nuu ndóo na Samaria küꞌun ndo. 6Ndisaa nuu na judío kuꞌun ndo, saa chi na yóꞌó ta nda tá íyo levo kiti nda̱ñuꞌu nuu xitoꞌo ri, saa íyo na. 7Ta kuáꞌan ndo, kaꞌan ndoso ndo tuꞌun yóꞌó xiꞌin na, kachi ndo saa: “Xa yati ni íyo ichí vaꞌa nuu xáꞌnda chiñu Ndioxi nuu yo”, kachi ndo xiꞌin na. 8Ta sindaꞌa ndo na kúꞌvi, saa sitaku ndo na ndíi. Ñaa sindaꞌa ndo na ndee ndóꞌo xiꞌin kueꞌe náni lepra. 9Kuáꞌan ndo chiñu yóꞌó, ta küniꞌi ndo xuꞌun kuꞌun xiꞌin ndo: ni ya oro, ni ya plata, ni xuꞌun yáꞌa, küꞌun xiꞌin ndo. 10Ni leka ndo küꞌun xiꞌin ndo, ni inka nuu toto ndo ya ndinama ndo küꞌun xiꞌin ndo, ni nduxan ndo, ni itun küniꞌi ndo kuꞌun xiꞌin ndo. Chi ndóꞌo̱ ta kúu mií ndo ichí niꞌi ndo ñaꞌa kuxi ndo nuu na íkan ndo ya vaꞌa xiꞌin.
11Tá ndi̱xaa ndo iin ñuu naꞌnu án ñuu vali, ta nduku ndo naꞌa, na vaꞌa. Ta ikán koo ndo xiꞌin na nda kivi ná kana koo ndo ñuu na. 12Tá ndi̱kiꞌvi ndo ini veꞌe nuu xíto ndo koo ndo, ta kaꞌan ndioxi ndo xiꞌin na. Kaꞌan ndo xiꞌin na ná koo vaꞌa ni ini na, kachi ndo xiꞌin na. Saa ndoo ndo koo ndo xiꞌin na. 13Tá ndi̱kuiso vaꞌa na veꞌe ikán ndóꞌo̱ ta kaꞌan ndo xiꞌin Ndioxi xaꞌa na ná niꞌi na ya vaꞌa nuu ra, tá tu köo ndi̱xiin na ndikuiso na ndóꞌo̱, ta ya vaꞌa niꞌi na nuu Ndioxi, ta nïꞌi ka na ya. 14Tá tu köo xíin na ndikuiso na ndóꞌo̱, ta ni köo xíin na kuni soꞌo na ya káꞌan ndo, ta vaꞌa kana koo ndo veꞌe na, án ñuu na, kisi ndo yaa ya chi̱chi xaꞌa ndo, ya ná kundaa ini na ku̱ndasi na ndóꞌo̱. 15Ya ndaa káꞌan i xiꞌin ndo, tá ná tindaa kivi ya xaa nani Ndioxi kuachi xiꞌin na ñuu ivi, ta ndee ni ka sitixuꞌvi ra na ñuu yóꞌó nuu na ñuu Sodoma xiꞌin na Gomorra na väꞌa xi̱ndoo xinaꞌa.
Kivi vaxi ta tixuꞌvi ni na ndíkun Jesús
16Tiꞌvi i ndóꞌo̱ kuꞌun ndo ndikani ndo tuꞌun Ndioxi nuu naꞌa, ta ìyo ni kuꞌun ndo, nda tá ìyo kuaꞌan levo ñaꞌñu nuu íyo ni kiti ndivaꞌi, saa ìyo kuꞌun ndo tañu naꞌa. Tá kuꞌva íkan kiti ko̱ó, saa koo ndo, ndíchi vaꞌa koo ndo, saa tu tá kuꞌva íin kiti paloma köo kueꞌe ri, kuꞌva saa koo ndo. 17Kuenta ni koo ndo xiꞌin naꞌa, saa chi taxi na ndóꞌo̱ ndaꞌa na ndíso chiñu xiꞌin veꞌe ñuꞌu sinagoga, ta ikán ndikitaꞌan na xaa nduvaꞌa ni na xiꞌin ndo, kani ni na ndóꞌo̱. 18Nda nuu na chiñu naꞌnu, na kúu gobierno án nuu nda rey, kundaka na ndóꞌo̱ kuꞌun ndo xaꞌa ya ndíkun ndo yeꞌe. Ta saa kuchiñu ndo kaꞌan ndo tuꞌun vaꞌa xaꞌa i xiꞌin na ikán tin na köo kúu judío. 19Tá ti̱in na ndóꞌo̱, ta kündiꞌi ini ndo xaꞌa tuꞌun ya kaꞌan ndo xiꞌin na, saa chi mií Ndioxi ku ra taxi tuꞌun ndaꞌa ndo kaꞌan ndo xiꞌin na. 20Süvi tuꞌun vaxi xiní mií ndo kua kaꞌan ndo xiꞌin na, chi tuꞌun Tachi I̱í mií Iva yo Ndioxi kua kaꞌan ndo xiꞌin na.
21’Kivi ya vaxi ta sava nda taa taxi nda kuachi xaꞌa ñani nda ndaꞌa na chiñu, ndixiko taꞌan mií nda nuu na sáa ini xíni ñaꞌa, ya kaꞌni ñaꞌa na. Saa ikán tu iva siꞌí na xiꞌin seꞌe taa na, saa ikán tu seꞌe taa na, ndixiko nda iva nda nuu naꞌa ya kaꞌni ñaꞌa na. 22Ta ndiꞌi ni kúu naꞌa kundasi nuu kuni ndóꞌo̱ xaꞌa ya ndíkun ndo yeꞌe, sundi ndóꞌo̱ ta sïndoo ndo ichí i ya ndíkun ndo yeꞌe, chi saa kua kuchiñu ndo kaku ndo. 23Tá sítixuꞌvi na ndóꞌo̱ iin ñuu, ta kana koo ndo kuꞌun ndo inka ñuu. Ya ndixa káꞌan i xiꞌin ndo, täꞌan ka vi sindiꞌi ndo ndikani ndo tuꞌun Ndioxi nuu ndiꞌi na ñuu Israel ta yeꞌe, Taa ra xa̱a ñuu ivi yóꞌó ta xa ndiko koo tuku va i ñuu ivi yóꞌó.
24’Iin ra síkuaꞌa, ta köo chee ka ra ikán nuu maestro ra, ni iin moso ra köo chee ka ra nuu ra xáa chiñu ra nuu. 25Ta ra síkuaꞌa ta kuchiñu ra nduu ra tá kuꞌva káa maestro ra, ta ra moso kuchiñu ra nduu ra tá kuꞌva káa patrón ra. Ta saa ndóꞌo̱, tá kuꞌva ndóꞌo i saa ndoꞌo ndo, tá káꞌan na xiꞌin i saa kaꞌan na xiꞌin ndo, chi yeꞌe ta ndi̱kaꞌan na xaꞌa i ya náni i Beelzebú, #10:25 inka kivi kiti nǎꞌa, kiti káꞌan na xiꞌin Satanás án kiti Timiaꞌan ta ndisaa ka vi ndóꞌo̱ ndíkun sata i, kuaꞌa ni ya kaꞌan na xaꞌa ndo, xaꞌa ya ndíkun ndo yeꞌe ―káchi Jesús xiꞌin nda ítaꞌan xiꞌin ra.
Ku ïꞌvi yo nuu naꞌa
(Lc. 12:2-9)
26Saa ndi̱kaꞌan tuku Jesús, káchi ra saa:
―Xaꞌa ya ñaa kua ku ïꞌvi ndo nuu naꞌa, na káꞌan väꞌa xiꞌin ndo. Xíniñuꞌu ndo kaꞌan ndoso ndo xaꞌa i xiꞌin na, chi tá íyo ya sěꞌe, saa íyo tuꞌun ya vaꞌa xaꞌa i. Ta nda iin ya vaꞌa ndíkaa sěꞌe küvi koo sěꞌe ya ndiꞌi saa kivi, chi xíniñuꞌu ndituvi ya. 27Yakan ndóꞌo̱ ta ya káꞌan i xiꞌin ndo nuu naá, ta ndituꞌun ndo ya xiꞌin naꞌa nduvi teꞌe. Saa ya káꞌan yaa i xiꞌin ndo xaꞌa soꞌo ndo, ta vaꞌa ndaa ndo xiní veꞌe kaꞌan ndo ya xiꞌin ndiꞌi naꞌa, ya ná kundaa ini ndiꞌi ni kúu na. 28Ku ïꞌvi ndo nuu naꞌa, na kúni kaꞌni ndóꞌo̱, chi küchiñu na kaꞌni na ya vaꞌa ndo. Sundi ku íꞌvi ndo nuu Ndioxi ra kuchiñu sindiꞌi xaꞌa ikin kuñu ndo xiꞌin ya vaꞌa ndo kuꞌun ya ndaya. 29Ta xa kúndaa va ini ndo, kiti sàà vali ta núu ni va yaꞌvi ri, uvi vi ri ndáa iin xuꞌun loꞌo. Ni saa va, sundi ndáa yaꞌvi ni va ri nuu Ndioxi, nda iin ri köo kóyo nuu ñuꞌú ya xíꞌi mií ri, sundi Iva yo Ndioxi ku ra kíꞌin ni kuenta xiꞌin ri. 30Nda ni ixi xiní mií ndo ta xíni vaꞌa ra ndisaa kua. 31Yakan ku ïꞌvi ndo, saa chi ndee ni ka ndáa yaꞌvi ndóꞌo̱ nuu kiti sàà vali.
Na ndíkuiin xaꞌa Jesús nuu inka naꞌa
(Lc. 12:49-53; 14:26-27)
32Saa ndi̱kaꞌan tuku Jesús, káchi ra saa:
―Ndiꞌi na köo kúkaꞌan nuu xaꞌa ya ndíkun na yeꞌe, ni yeꞌe ta kükaꞌan nuu i ndikuiin i xaꞌa na nuu Iva i Ndioxi, ra íyo nuu ndivi. 33Ta ndiꞌi na kúkaꞌan nuu xaꞌa ya ndíkun na yeꞌe, ta saa tu yeꞌe va, kukaꞌan nuu i kuni i na nuu Iva i Ndioxi ra íyo nuu ndivi ―káchi Jesús.
Xaꞌa Jesús kua taꞌvi taꞌan naꞌa
(Lc. 12:49-53; 14:26-27)
34Saa ndi̱kaꞌan ka Jesús, káchi ra saa:
―Ndïkani ini ndo ya vaxi i ñuu ivi yóꞌó sikitaꞌan vaꞌa i ndóꞌo̱ xiꞌin taꞌan ndo. Chi yeꞌe ta växi i ikan i saa, sundi xaꞌa yeꞌe kua taꞌvi taꞌan naꞌa xiꞌin taꞌan na. 35Xaꞌa yeꞌe kua taꞌvi taꞌan naꞌa veꞌe na. Saa chi sava nda taa kuꞌun ichí i, ta sava seꞌe taa nda küaꞌa kuꞌun ichí i. Sava ná ñaꞌa kuꞌun ichí i, ta seꞌe síꞌi ná, küaꞌa ná kuꞌun ná ichí i. Saa ikan tu ná íxanu va xiꞌin siso ná. 36Süvi ka inka naꞌa ku na kanitaꞌan xiꞌin ndo, na veꞌe mií va ndo ku na kani taꞌan xiꞌin ndo.
37’Ndiꞌi naꞌa, na kúni kuꞌun ichí i, xíniñuꞌu na kuꞌvi ni ka ini na kuni na yeꞌe nuu na veꞌe na. Saa tu naꞌa, na kúꞌvi ni ka ini xíni iva na, án siꞌí na, án seꞌe taa na, án seꞌe síꞌi na, ta na yóꞌó ta küvi kundikun na yeꞌe. 38Ndiꞌi na köo xíin kusoko cruzin mií na, ta xïin na xaa súvi na tuꞌun i, ta na yóꞌó, ta köo kúu mií na ichí kundikun na yeꞌe. 39Tá ndá naꞌa kúni sikaku mií, ta na ndáñuꞌu va ku na, tá ndá naꞌa síndiꞌi xaꞌa mií ya ndíkun na yeꞌe, na ñaa ku na kuchiñu kaku ―káchi Jesús.
Ñaꞌa ya niꞌi na kándixa Jesús
(Mr. 9:41)
40’Ndiꞌi na ndíkiꞌin vaꞌa ndóꞌo̱, ta yeꞌe ku i ndíkiꞌin na, ta ndiꞌi na ndíkiꞌin yeꞌe ta ndíkiꞌin na Iva i Ndioxi, ra ti̱ꞌvi yeꞌe vaxi i. 41Na ndíkiꞌin ra kúu profeta, xaꞌa ya káꞌan ndoso ra tuꞌun Ndioxi, tá kuꞌva káa ya vaꞌa niꞌi ra profeta nuu Ndioxi, saa koo ya vaꞌa niꞌi na nuu Ndioxi. Saa tu na ndíkiꞌin iin taa, ra vaꞌa, ra ndaa ini, tá kuꞌva káa ya vaꞌa niꞌi ra ikán nuu Ndioxi, saa koo ya vaꞌa niꞌi na ikán nuu Ndioxi. 42Saa ndiꞌi na táxi án nda iin vaso loꞌo tikuii vixin koꞌo na vali yóꞌó, ta niꞌi na ya vaꞌa nuu Ndioxi, xaꞌa ya íkan na saa xiꞌin na ndíkun yeꞌe ―káchi Jesús.
Currently Selected:
San Mateo 10: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.