Luk Vɛnalɛvɛ yɛ Luk âsaŋgɛ kɛ oŋgwe ɔna, ɛnɛ vɛlɛ yee
Vɛnalɛvɛ yɛ Luk âsaŋgɛ kɛ oŋgwe ɔna, ɛnɛ vɛlɛ yee
Ɔnʉl wʉ Luk alɛ-lɛ
Luk wʉ alɛ-lɛ ɔnʉl wʉ itiŋ, ɛnɛ âsaŋgɛ oŋgwe wee. Âsaŋgɛ kpaa oŋgwe wʉ Ɛtʉmʉ iyɛ Acɛnda wʉ ɔ̂lɛ ɔlʉŋgʉ nɛ Pɔl. Alɛ-saŋgɛ voŋgwe vee omwem kɛ nɛ Tiyofilus, ɔnʉmʉnʉl kɛ ɛyaŋ iyɛ Loma.
Akɛ ndalɛ Tiyofilus alɛ-ŋgwa ye ɔtɛlɛ wʉsɛɛ cɔɔ, kɛ ito kɛɛ Zisɔs Klais. Luk âliye ala Tiyofilus ãcili ŋgɛ-ŋgɛ ala, vɛnalɛvɛ yɛ ɔsaŋgɛ kɛ ito kɛɛ Zisɔs ayɛ kɛlɛ cɛb. Asɔ asaŋgɛ ɔmanɛmanɛ kɛɛ ɔsanɛghɛ nɛ kɛɛ ɛyɛma nɛ kɛɛ ɔtʉmʉ ɔna. Asaŋgɛ kpaa kɛ oku ɔna nɛ ndalɛsɛ Zisɔs âsime kɛ ikund. Luk âsaŋgɛ kɛ ɔlʉŋ ndalɛsɛ vɛnalɛvɛ yee vîyeli.
Kɛ ɔkambɛlɛ wɔɔ, Loma ofolu ɔswaŋɛ wʉ Iselel, ɔkɔla vɛnʉl vee kɛ ɔtavɛ. Siza, mɛfʉwa wʉboona kɛ ɛyaŋ iyɛ Loma, ɔn âlɛ itoghu kɛɛ ibo ifo ɛswaŋɛ imem iyɛ vɛnʉl vɛ ɛta vɛ Loma ôfolu.
Luk âsaŋgɛ wʉ áte ala Zisɔs ɛnɛ alɛ ɔnʉl wʉ Ofilikpamɛ ɔcɔw wʉ áwal vɛnʉl ɔnavɛ. Ɔtɛlɛ wʉsɛɛ wee awʉ kici yɛ vɛnʉl omwem kan ɔtalɛ. Sɛ Luk âlɛ ɔnʉl wʉ Zu ga, ɛnɛ asaŋga kpaa kɛ nɛ Tiyofilus wʉ âlɛ Zu ga, âgba wʉ ápalɛgh iyeli yɛ vɛ Zu ŋgɛ-ŋgɛ kɛ nɔnʉn.
Atindi ayɛ Luk asaŋgɛ
Vɛnalɛvɛ yɛ Luk asaŋgɛ kɛ oŋgwe ɔna, ɛnɛ vɛlɛ yee:
Ɛyana iyɛ Zisɔs: awʉ Ɔkʉ, awʉ kpaa Mɛfʉwa wʉ Ɛwalɛ (wʉ ɔyɛla ɔn ala Klais), wʉ Ofilikpamɛ ɔ̂vɔlʉ ala ɔnʉ ɔ́tɛma.
Mʉndʉ wʉ Ofilikpamɛ
Mɛveli
Ɛnalɛvɛ yɛ ɛwaā vɛnʉl vɛ ɛcianɛvɛ ɛsɛma, ɛnaā kpaa acɛ kɛ nɛ vɛnʉl vɛ aŋgɔlʉvʉ.
Sɛ Ofilikpamɛ oliye wʉ ɔnʉ ógife asu, nɛ sɛ asu kpaa sɛ̃gife vɛnʉl vedivi.
Sɛ okevi kpaa ɔ̂lʉŋwa Zisɔs, nɛ sɛ ôkpendi ɔn.
Currently Selected:
Luk Vɛnalɛvɛ yɛ Luk âsaŋgɛ kɛ oŋgwe ɔna, ɛnɛ vɛlɛ yee: Iceve-Maci
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation