Matiu 12
12
Juu Ịnyọ́sárá Éné Ma Gboloma Gbilányẹ
(Mak 2.23-28; Luk 6.1-5)
1Anịsáa ma ḅụ, Jizọs sịmgbọ́lụ dua ma ḅụ nwángị ḅọ́rọ́arị Juuapụ Ịnyọ́sárá Éné ma ḅụ. Fị́nyẹ ori ọḅụduaapụ tárịm, nnị warị saghị witi, ọrọsị kịka sịmgbọlụ kiẹnị sị tẹ́ndẹ fịị. 2Farisiiapụ ma mịma árị sáá, nnị ọ ḅẹm, <<Dighi ị́yẹ́ ọḅụduaapụ nnị ólóghó ma na kuragha nyẹ mịẹarị Juuapụ Ịnyọ́sárá Éné ma ḅụ.>>
3Ori n pagharam, <<Na ọ gogha Deviti mịẹnyẹ ori na oria túminị́, fị́nyẹ ọ tarị sáá? 4Ọ Tamuno warị ma sọm ori na oria túminị́ sị tọ́n ḅụ fịnị fịtúrú ma fịị, ólóghó na karakáragha nyẹ sị n mịẹ, kụ́ma igwagwaapụ ma ngéré. 5Na ọ gogha ólóghó diri ma bie ḅẹẹ, Juu Ịnyọ́sárá Éné ma ḅụ Tamunoopuwarị ma bie fịrịnwangịarịapụ ine Ịnyọ́sárá Éne ólóghó ma kaabẹm anịsọ nnị ólóghó kórógha? 6A dugho ọ pịrịm ḅẹ́ mịnga dụḅa Tamunoopuwarị ma nẹngịḅọ imim. 7Nnị gịẹkórómam Tọ́ndiri ma bie, Tamuno dugho angaá ḅẹẹ, <A tọ́rụ́kụrụkụ́rụ́ bim, igwagwaghaa.> Ọ ḅọ́rọ́ mịná dughonyẹ ma akanyaḅo ólóghó kóróghapụ ọ mịnị n ḅadumgha. 8Ḅẹẹ Tumḅọ yii Tụwọ ma ori anịị Ịnyọ́sárá Éné ma Nyánáḅọ.>>
Gbẹ́rẹ́ Bárafịị Owitụ́wọ
(Mak 3.1-6; Luk 6.6-11)
9Anị ngaa saghị ọ ḅọ́rọ́ nna Juu kobiri yọ ma sọm, 10anị ngaa ọ gbẹ́rẹ́ ḅara ikúléḅọ arịm. Juuapụ ma asọ dọghụarị nnị pa ḅẹ́rẹ́ pa ọ sịbị gbánā bẹ ḅara, n warị o gbíla, <<Anị karakárá ḅẹẹ nnị kị́nị́ gwọọ Ịnyọsára Éné ma ḅụ.>>
11Ọ warị n ḅẹẹ, <<Ḅọ́rọ́ ọmịna bie ánáná nyánáḅọ imii, ánáná ma warị sóghóró póghóló kiribie sọ Ịnyọ́sárá Éné ma ḅụ, ọ ḅara sụụma anị ku pághámaḅobịgha? 12Tumḅọ, n ḅọ nyẹ́laa ánáná nẹngịgha? Anịgosi anị ólóghó na kuram ḅẹẹ tumḅọ ibinyẹ mịẹ Ịnyọsára Éné ma ḅụ.>>
13Anịsáa ọ warị owitụ́wọ ma ḅẹẹ, <<I ḅara sụụma.>> Ọ warị anị sụụma, ọ warị árị ḅẹẹ anị káara ḅara pa gwọmam, isi nganyẹ ma fịnị ḅara. 14Kụ́ma Farisiiapụ pághá nụ́ngọ múm sị muu bia n ḅara warị Jizọs ḅáa bẹ ḅara.
Jizọs Anịị Tamuno Sẹlẹakị Fịrịnwangịḅọ
15Jizọs nna sii kóróma nimi ḅoo sáá, ọ warị ọ ḅụ si akị anị ngaa ma ḅụ. Tọghaapụ ọ duam, ọ warị pịghị nna obiapụ mamgba gwọfama, 16n biri nụ́nụ́arị ḅẹẹ n dugho gbẹ́rẹ́ḅọ sọ pịrịma ḅẹ́ ori anịị nwọfịnịḅọ. 17Mịma anị mịẹnyẹ sị ikiakoro Aizaya dughonyẹ ma ḅoo karakárányẹ sọ:
18<<Mịị ngaa anịị iyẹ
fịrịnwangịḅọ a sẹ́lẹ́akịmáaḅọ,
a ḅẹlẹma ḅo, a ọ dighi bieḅẹlẹm;
a i Tẹ́mẹ́ pa ọ ḅụ suabẹm ọ pịghị
ḅẹ́rẹ́kọ dugho wásámabẹm sẹ sẹ sẹ ḅụ.
19Ọ kam kóróbịgha anịgha owu pághámá;
gbẹ́rẹ́ḅọ sọ ọ pụghọ naabịgha asọogbo.
20Ọ penge ányị́nyá ḅẹ́lẹ̄ anyịmabịghaa
anịgha ḅidụmaarị tọndọ bima,
ọ ḅụọ kụ́rọ́mabẹm kiriakị muu
ḅẹ́rẹ́kọ ngámángba láa sáá láa.
21Ori ẹ́rẹ́ ḅụ anịị sẹ́ sẹ́ sẹ́
tẹ́mẹ́ gbánā bẹnyẹ.>>
Jizọs Na Belizibọlụ
(Mak 3.20-30; Luk 11.14-23)
22Anịsáa nnị warị tọ́rụ́pụụ́ pịghị oḅuu ọlọ sitẹ́mẹ́ ḅụ fịnịḅọ pa ọ damaḅo, Jizọs warị ọ gwọọ, ọ warị saghị ẹ́gẹ́rẹ́ pịghị nyẹ arịị. 23Túminị́ kpo ma anị n ḅụ ḅụ́gbérépumam Jizọs nwángị fịrị ma ḅụ, warị ḅẹẹ, <<Mịị ḅọ ma ọ sị ḅẹẹ ori Deviti Tụwọ?>> 24Kụ́ma Farisiiapụ ma mịma náa sáá, n dughom ḅẹẹ, <<Bẹlizibọlụ sitẹ́mẹ́ sịbịdáḅọ kụrọ ngéré ḅụ anịị ọ pa sitẹ́mẹ́ deesiarị nyẹ.>> 25Jizọs nna kóróma nimim warị n ḅẹẹ, <<Amịna ḅụ die ogbo ogbo pịrị ásẹ́mẹ́kiri gulugulubẹm pịghị amịna ḅụ die ogbo ogbo pịrị opu ama anịgha ḅurusuapụ ine sẹbịgha. 26Ḅọ́rọ́ Satanị, Satanị deesiarị ori ọḅụ die ogbo ogbo pịrịmam, ori ásẹ́mẹ́kiri tọ́rọ́ pa sẹ́ bẹ? 27A ḅọ́rọ́ Bẹlizibọlụ kụrọ pa sitẹ́mẹ́ deesiarị, ọmịna túminị́ n tẹ́ kụrọ pa sitẹ́mẹ́ ma deesi? Anịgo nnị ọmịna ḅẹ́rẹ́kọapụ dighibẹm. 28Kụma a ḅọ́rọ́ Tamuno Tẹ́mẹ́ pa sitẹ́mẹ́ deesi, anịsáa Tamuno Ásẹ́mẹ́kiri ma ọ dámáḅómam.
29<<Anịgha jẹ́nyẹ, tumḅọ tọ́rọ́pa kụrọ tumḅọ warị sọ bẹ sị ori ngọ taa akị, ọ parị kụrọ tumḅọ ma kpọbẹm. Anịsáa ori ine ọ warị furubẹm.
30<<Iju fịnịgha ḅọ anịị ị́yẹ́ iruonaḅọ, pịghị i nana kobirighaḅọ gálágálámaarị. 31Anịgo a dugho ọ pịrịm, tumḅọ mịẹ siinyẹ na n pa Tamuno dughosima siinyẹ gonyẹ́ gonyẹ́ n pa siḅụḅarasi n ḅọ pịrịbẹm, kụ́ma Tẹ́mẹ́ ma dughosima ḅọ siiḅụḅarasi nyánábịgha. 32Sii ẹ́gẹ́rẹ́kọ Tumḅọ yii Tụwọ ma pịrị ḅo gonyẹ́ gonyẹ́ nnị siiḅụḅarasi n ḅo pịrịbẹm, kụma sii ẹ́gẹ́rẹ́kọọ Tọ́ntọ́ Tẹ́mẹ́ ma pịrịḅọ nnị siḅụḅarasi n ḅọ pịrịbịgha, mị tuminikiri ma ḅụ na pịghị ḅọ bẹnyẹ ma ḅụ.
Sị Na Anị Sua Sịmgbọlụ
(Luk 6.43-45)
33<<Sị ma mịẹ ibima anịsáa anị sịmgbọlụ sọ ibibẹm, anịgha sị́ mịẹ sima anịsáa anị sịmgbọlụ sọ sibẹm, ḅẹ́ sị́ nnị anị lighilighim anị suarị sịmgbọlụ ḅụ ḅọ́rọ́. 34Ọmịnị sii ododó awọ, ọmịnị siiapụ tegó sị ibinyẹ dugho bẹ́? Ḅẹẹ, nyẹ kúkúbie ma bie bi wásámāmam n ḅẹḅẹ bịpị ma anị dugho pághámam. 35Ibi tumḅọ ma ibinyẹ akuoarị n ḅọ bie n ḅọ kokowarị ibi nyẹ ma ḅụ, sịị tumḅọ pịghị siinyẹ akuoarị n ḅọ bie n ḅọ kokowarị siinyẹ ma ḅụ ḅọ́rọ́. 36Kuma a dugho ọ pịrịm ḅẹẹ ḅẹ́rẹ́kọ éné túminị́ dughobẹm nnị nwangikọ ḅara, n papa kọọ ẹ́gẹ́rẹ́ gonyẹ́ gonyẹ́ ḅụ. 37Ọmịna ẹ́gẹ́rẹ́ bịpị anị nnị pa ọ sịbị ḅẹ́rẹ́kọ bẹnyẹ ḅọ́rọ́ ịrị ólóghókóró na ịrị ólóghó kórógha na.>>
Jona Gboloma Dienyẹ
(Mak 8.11,12; Luk 11.29-32)
38Anịsáa, jẹa Farisiiapụ na ólóghó nyẹ́dieapụ warị ọ ḅẹẹ, <<Nyẹ́dieḅọ wa ḅụ́gbérépuma ilíghíma bim ị ḅara.>> 39Ọ warị pagharam, <<Mị tuminikiriapụ ma ọ tọ́rọ́fịnị sii túminị́ na pịghị Tamuno nímighaapụ, sị ḅụ́gbérépuma ilíghíma biarị, kụma n gbẹ́rẹ́nyẹ sọ pa nnị pịrịbịgha, Jona ikiakoroḅọ ma ilíghíma siima. 40Jona tẹ́rẹ́ éné na tẹ́rẹ́ a dii pa opu nji ma furobie fịnị ḅara, anịị Tumḅọ yii Tụwọ ma tẹ́rẹ́ a éné na tẹ́rẹ́ a dii pa kiribie fịnị bẹ ḅara. 41Ḅẹ́rẹ́kọ éné ma, Niniveapụ saghịbẹm sị ḅẹ́rẹ́ pa ọ́ sịbị gbánā, tegó nnị Jona dugho págháma oku ma náa sáá, nnị nna, sii ḅụ pighim. Ḅẹẹ mị́sa Jona nẹngịḅọ mịnga imii. 42Ḅẹ́rẹ́kọ éné ma Seba ámányáná ọ́rụ́ḅọ saghị sẹbẹm sị ḅẹ́rẹ́ pa ọ sịbị gbánā, tegó árị ara ama warịsom sị árụ́ ḅụlọ ḅo ámányánáḅọ Solomọn nyẹ nimi dienyẹ ma pughu, ḅẹẹ mị́sa Solomọn nẹngịḅọ mịnga imii.
Sitẹ́mẹ́ Pịghịma Ḅoo
(Luk 11.24-26)
43<<Sitẹ́mẹ́ tumḅọ oju bie saghị págháḅomaẹrẹ anị sámụ́nọ ngá muu ikélekélem ịnyọsára ngaa dọghụarị, sị anị dọghụḅogha ḅogha, 44anịsáa, anị ḅẹbẹm, <A pịghịma a saghị ḅo wárị ma muubẹm.> Anị anị ngaa láa sáá, anị dọghụ pághámaḅom ḅẹẹ, kị́nị́ warị ma ḅụ ofori sị nnị anị ofịm sị anị tẹ́lẹ́ma kóróma. 45Anịsáa anị muubẹm sị mú jẹ́ Sọ́nọ́ma sitẹ́mẹ́ akị anị ḅụ sua, sisịbịbie nyáná anị nẹngị nyẹ, n warị muubẹm sị muu anị ngá ngaa, Kunemaá anị tumḅọ ma fịnị ḅara sii parị ma nẹ́ngịbẹm. Anịị anị fịnị mị sịbịkụ́rọ ḅụ́ọ́apụ ma pịrịbẹ ḅara.>>
Jizọs Nyingiḅọ Na Ori Amịna Owiapụ
(Mak 3.31-35; Luk 8.19-21)
46Jizọs pa ẹ́gẹ́rẹ́kọ túminị́ kpo ma pịrịarị sáá, o nyingi na ori amịna owiapụ nụ́ngọbie sẹm kúruarị nnị ẹ́gẹ́rẹ́ kọ ọ pịrịbẹ ḅara. 47Gbẹ́rẹ́ tumḅọ warị dugho ọ pịrị ḅẹẹ, <<I nyingi na ị́yẹ́ amịna owiapụ nụ́ngọbie sẹ́fịnịarị asọ dọghụarị nnị ẹ́gẹ́rẹ́kọ ị pịrịbẹ ḅara.>> 48Ori ọ pagharam, <<I nyingi tụọ, tụọ pịghị ị́yẹ́ amịna owiapụ?>> 49Ḅara pa ori ọḅụduaapụ tụ́ụ́maarị, ọ ḅẹm ḅẹẹ, <<Mịị ịyẹa nyingi pịghị ịyẹa mịna owiapụ. 50Ḅẹẹ i Daá sobie fịnịḅọ ma ḅụḅẹ́lẹ́nyẹ mịẹarịḅọ gonyẹ́ gonyẹ́ anị tumḅọ ma anịị ị́yẹ́ amịna owiḅọ, ị́yẹ́ amịna ọ́rụ́ḅọ na pịghị ị́yẹ́ nyingiḅọ.>>
Currently Selected:
Matiu 12: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation