Luka 7
7
Thsitawo thsa mukuru o mashwarare o Maroma
(Mat 8.5-13)
1Yesu ou a manine ku amba eyo yoyihe kwanu, wa thzire ku Kapenauma. 2Kethso thsikati, mupika muendithsi o mashwarare o Maroma oyu a shimine nene wa korire nene o ku kokangera. 3Oya muendithsi o mashwarare o Maroma ou a yuvire ya Yesu, wa tumine akuru o Majuda ku ka mu romba ci a keye na a mu porithsere mupikenthzi. 4Ou a ka kumine kwa Yesu, a ka mu adikanenine nene ku mu romba ci: “Oyu munu oyu aa roera ku kwathsiwa. 5Inene aa shima nene ditunga dyetu, yodiyo wa tu umberire no sinagoge.” 6Yesu wa thzireno.
Ou a kumine po pepi, oya muendithsi o mashwarare o Maroma wa tumine karo ambushenthzi kwa Yesu ci: “Wa ciayithsa Fumu, inene ka i roerire ci o keye mu nthzio thzange. 7Mane ame naa cishimba ci ka ni roerire ku keya ku koe. Unone o ambe pohuma diywi no mupikange kenge a pora. 8Inene name mushi thzokoro thzowa a na ni endithsa ni di, karo name ni di no mashwarare aa ni na endithsa. Ku ambera yumweya ci: ‘O thze,’ aa thza. Ku tumina yumweya ci: ‘O keye,’ aa keya. Karo ngeci naa ambera mupikange ci: ‘O kwame eyi,’ aa i kwama.”
9Yesu ou a yuvire eyo wa komokire nene. Wa thsiurukerire kwanu awa a mu shupwerire no ku wa ambera ci: “Naa mi ambera ci ka na ni wana thsitawo thsothsikuru eci ethsi shaanga mu Isiraele.” 10Awa tumiwire a hukire ku nthzio thza mukuru o mashwarare, a ka wanine oya mupika wa korire o ku na poro ku porerera.
Yesu aa pindura mwana difakathzi o mukwerumeana
11Diyuwa edi dya randireko, Yesu wa thzire mu diumbo edi di nethsiwa Naine. Erongwa yenthzi nanu owangi a thzire nenthzi. 12Ou a kokerire ku mengeneno o diumbo, wa hanganine anu awa a shimbire thsithzimbi o kwa thsi twara ku mararo ku ka thsi vumbeka. Oyu wa fire po nedi mwana yofoci pakamutwa o mukwerumeana kwa mama wenthzi o difakathzi. Mbunga thzothzikuru ku tunderera omo mu mbongi thzekarire nenthzi. 13Fumu ou a mu monine wa mu yuverire ñekeñeke. Wa mu amberire ci: “Wa dira!”
14Wa henyenine ku thsara no ku thsi kwata, awa a thsi shimbire emanine. Yesu wa ambire ci: “Mushumba, naa ku ambera ci o pinduke!” 15Mufu wa pindukire no ku tateka ku amba. Yesu wa mu pire kwa mama wenthzi.
16Anu wahe a yapire no ku shangara Nyambi ci: “Mukwakukethza shokuru mu kaci ketu a di,” “Nyambi na keya ku na kwathsa anuenthzi.” 17Eyi a kwamine Yesu ya yukire nene mu ditunga dyodihe dya Judea no matunga aa a di po pepi na Judea.
Johani aa tuma erongwa yenthzi kwa Yesu
(Mat 11.2-19)
18Erongwa ya Johani ya mu tongwerire ekwama yoihe ya Yesu aye o ku di mu kamenga. Mweyo, Johani wethsire idi ku kwayo, 19no ku i tuma kwa Fumu ku ka mwipura ci: “Ene yowe oyu tu taterera nji, nji tu taterereko wao?”
20Ou ya ka kumine kwa Yesu, ya ka ambire ci: “Johani Mukwakukorovethza na tu tumu ku na kwipura ci: ‘Ene yowe oyu tu taterera nji, nji tu taterereko wao?’ ”
21Mwethso thsikati Yesu wa porithsire anu owangi awa ekarire nekora yo mishovoshovo, akwamathzimu, karo wa thsikurire meho o tupuputwa totungi. 22Mweyo, wa tawire erongwa ya Johani ci: “Mu huke kwa Johani mu ka mu tongwere eyi mu na mono no ku yuva. Tupuputwa twaa mona, ekunga yaa enda, akwengondwe aa pora, akwa kufa matwi aa yuva, afu aa pinduka no ku yoya, karo Muthzimbu Ouwa o Kutumina kwa Nyambi waa hongiwa kwahepwe. 23Wa thsiyauthzi munu o kukana ku huka munyima o ku na tawa ku kwange.”
24Erongwa ya Johani ou ya thzire, Yesu wa tatekire ku ambaura ku mbunga ya Johani ci, “Ou mwa thzire mu dikunguthsitu ne thsine mwa fotire ku ka mona? Dimbungu edi di pungithsiwa ku mupepo nji? 25Ngeci kadi kengeyo ne, edye oyu mwa fotire ku ka mona? Munu oyu na vata evata yoiwa nji? Dyombo! Awa a na vatanga evata yo kurerema po aa yoya nawa karo aekara mu marombe. 26Unone edye oyu mwa thzererire ku ka mona? Mukwakukethza nji? Ii, naa mi tongwera ci Johani po mukuru kupita mukwakukethza. 27Johani yodiyo oyu i na ñoriwa yenthzi mu Mañoro ci:
“ ‘Kenge na ku tuma kanganda kange ku rupara rwoe,
ku ka ku roithsera dikuñwa dyoe.’
28“Naa mi tongwera ci kwithsa munu oyu erekire mbuyama o mukuru kupita Johani. Unone o muonye mu Kutumina kwa Nyambi po mukuru kwa Johani.”
29Anu wahe ou a yuvire eyi, mofoci kengeyo naterithsi, a tawire ci makuñwa a Nyambi po a ku oroka, inene kuma korovethziwire ko korovethzo thza Johani. 30Unone Afarithsi nakwakutongonona murao o Thsijuda a kanine eanekera ya Nyambi pa ku kana ku wa korovethza Johani.
31Wa ambire karo ci: “No thsine nga ni wa piturithsa anu o rerodino? Aa pitura thsine? 32Aa cipitura eci anuke awa a di pa mbanthza o kwethsa aenthzo ci:
“ ‘Tu na mi shikera maoma,
unone ka mu kinine,
tu na mimbera membo o pa thsidiro,
napo karo ka mu dirire makuano.’
33“Johani Mukwakukorovethza wa keyire ko kukana ku dya makende nji ku nwa waine, unone mwaa amba ci: ‘O di no mupepo oumango.’ 34Mwana Munu wa keyire no ku dya no ku nwa, karo mwaa amba ci: ‘Oyo dyakudya karo thsitakwa, mbusha waterithsi nanu wevi.’ 35Unone onyanyami wa Nyambi waa monahara ci uwawa kowa na u tambura wahe.”
Mbuyama o thsivi aa wethsa maathzi Yesu
36Mufarithsi yumweya wethsire Yesu ku ka dya nenthzi ku nthzio thzenthzi. Yesu wa thzire ku nthzio thzoyo Mufarithsi no ku kekara ku tafure ku dya. 37Omo mu diumbo kwekarire mbuyama o thsivi. Ou a yuvire ci Yesu mu nthzio thzoyo Mufarithsi a di, wa keyire no kakeka kenthzi ko alabasitere#7.37 Alabasitere po thsa kupitura eci kakeka. ko thsende. 38Wa nekarire ku mauru a Yesu o ku dira. Mihothzi thzenthzi thzorithsire edyato ya Yesu. Ngou a i pororire no huki thzenthzi no ku i yamwa no ku i wethsa thsende.
39Oya Mufarithsi wa raire Yesu ou a i monine wa ambire mu mucima ci: “Oyu munu nga mukwakukethza, nga na dimuka ci oyu mbuyama ne munu o ngepi oyu mu kwatakwata ku mauru, inene munu o thsivi.”
40Yesu wa mu tawire ci: “Simoni, ni ku tongwereko thsinu thsimweya?” Simoni wa mu tawire ci: “Murongithsi, o ni tongwere.”
41Yesu wa ambire ci: “Munu yumweya wa korotithsire anu aidi madi. O kutanga wa korotire dikumi dyo makumi mutanu o madi (500),#7.41 Dimadi dyofoci kuma dya kwamiwerangire diyuwa mutumbi. o muthsidi makumi o mutanu (50). 42Ou a kwangire ku futura makongo, thsinda thsa madi wa wa amberire ci a ku futura aya madi momu widi wo. Powa anu aidi ne edye oyu wa ku shima nene oya munu?”
43Simoni wa tawire ci: “Naa anekera ci oya na teteriwa makongo oakuru.”
Yesu wa ambire ci: “O na tawa nawa.”
44Yesu wa thsiurukerire koya mbuyama no ku ambera Simoni ci: “O na mu mono oyu mbuyama? Ni na keya mu nthzio thzoe, ko ni pire meyu o ku cihupa kwidyato yange, unone aye o na hupu edyato yange ko mihothzi thzenthzi no ku i porora no huki thzenthzi. 45Ko ni vumenenine ko ku ni yamwa, unone aye ka a thsiire ku yamwa edyato yange shimbi ni nengenena muno. 46Ko ni wethsire thsende ku mutwi, unone aye o na ni wethse thsende kwidyato. 47Naa ku ambera ci thsishimo thsenthzi thsothsikuru ethsi a na monithsa thsaa pa ombangi ci evi yenthzi yoingi i na teteriwa. Unone o ku teteriwa yoipu aa monithsa thsishimo thsothsipu karo.”
48Yesu wa amberire oya mbuyama ci: “Evi yoe i na teteriwa.”
49Awa a dire nenthzi a tatekire ku cipaura mu kaciko ci: “Oyu ne edye, o ku tetera evi?”
50Unone Yesu wa amberire oyo mbuyama ci: “Thsitawo thsoe thsi na ku yoyithsa, o thze mu thsiyaro.”
Currently Selected:
Luka 7: mho
Highlight
Share
Copy
Want to have your highlights saved across all your devices? Sign up or sign in
©2023 The Seed Company