Luka 5
5
Yesu aethsa erongwa yo kutanga
(Mat 4.18-22; Mar 1.16-20)
1Diyuwa dimweya, Yesu wemanine pa diya dyo Diviya dya Genesareta. Anu a cithsindakanenine ku kwenthzi ci na yuve diywi dya Nyambi. 2Wa monine mato edi o ku a na thsekeriwa mu diya, unone eyambi yothsi ayo o ku i na tundumo, o ku i yoa matuwa ayo. 3Wa shamukerire mu wato umweya no ku romba thsinda thsa wato Simoni Peturu ci a u thsindekere pa meyu. Wa kekarire mu wato no ku tateka ku rongithsa mbunga.
4Ou a manine ku rongithsa, wa amberire Simoni ci: “O hunyune wato woe honi o thze po shothzungi mu ka kuhere matuwa enu mu koke.”
5Simoni wa tawire ci: “Ñathsire wange, tu na vendana othsiku ouhe, kwithsa ethsi tu na wana. Unone ko diywi dyoe kenge ni kuhera matuwa karo.”
6A thzire no ku ka tateka ku kuhera matuwa o. Ou a kokire, a waninepo ethsi thzothzingi kuninga ci shaanga matuwa o a tatekire ku yatuka. 7A rapethzire aenthzo awa ekarire mu wato umweya ku ninga ci na wa kwathse. Nawo a keyire, a yarithsire mato o momu widi wao, mane shime aa fota no ku rowera.
8Simoni Peturu ou a monine kengeyo, wa keyire no ku na wera ku mauru a Yesu no ku amba ci: “Fumu, o tunde ku kwange, inene no munu o thsivi!” 9Aye nowa ekarireno a komokire nene ongi wethzo ethsi a wanine. 10A Jakovo na Johani ana Zebedea aenthza Simoni nawo a komokire. Yesu wa amberire Simoni ci: “Wa yapa, ku tunda rero kenge o yambanga anu honi.” 11Ou a ka kumithsire mato pa dikambo, Simoni, Jakovo na Johani a thsiire enu yoihe no ku shupwera Yesu.
Yesu aa porithsa mukwengondwe
(Mat 8.1-4; Mar 1.40-45)
12Diyuwa dimweya Yesu o ku di mu diumbo dimweya, kwa keyire mukwerume oyu wa korire nene engondwe. Ou a monine Yesu, wa na kupamine ku mauru enthzi no ku mu adikanena ci: “Fumu, nga o i shime kenge nga o ni porithsa.”
13Yesu wa ororire dyoko dyenthzi no ku mu kwata ci: “Ni na i shimi, o pore.” Ko wanguwangu engondwe ya pwire. 14Wa mu amberire ci: “Katere i tongwere munu eyi. O thze kwa mupurisita a ka ku mone. O ka punithse thsikunda thso kukenithsiwa koe, eci edi a i raire Mushe ci ikare ombangi kwanu.”
15Muthzimbu keyi ya Yesu wa henyine nene, mane anu owangi a keyire ku kwenthzi ku na teerera diywi dya Nyambi no ku na porithsiwa kwikora yo. 16Unone rorungi Yesu wa thzangire kokumengi ku ka rombera.
Yesu aa porithsa o kuara
(Mat 9.1-8; Mar 2.1-12)
17Diyuwa dimweya Yesu o ku rongithsa, Afarithsi narongithsi o murao ekarire po pepi nenthzi, awa a tundire mu maumbo oahe a Galilea na Judea no mu Yerusalema. Okoro wa Fumu o ku porithsa ekora wekarire kwa Yesu. 18Kwa keyire akwerume awa a shimbire munu o kuara podidi. Kuma fotire kwingena ci a mu tware kwa Yesu. 19Unone ko ku vura nene mbunga, a pirire ko ku pitera. A thzinine pa thsituwa thso nthzio omu ekarire Yesu no ku ka thsi tuyura. Ngou a shurumweninemo mwethzi nodidi wenthzi mukaci kanu pa rupara rwa Yesu.
20Yesu ou a monine thsitawo thso wa amberire oyo mukwerume ci: “Shadi, evi yoe i na teteriwa.”
21Arongithsi o murao nAfarithsi a tatekire ku cipaura ci: “Edye oyu o ku yengwa kengeya? Edye o ku twethsa ku tetera evi ngeci kadi Nyambi yofoci?”
22Yesu wa dimukire eanekera yo, ngou a wa amberire ci: “Mwaa cipaura ine mu micima thzenu? 23Thso thsoto ne thsipi, no ku amba ci: evi yoe i na teteriwa, nji ku amba ci, o katuke o ende? 24Uno honi naa fota ci mu dimuke ci Mwana Munu o di nokoro o ku tetera evi muno mu kaye.” Wa amberire oyo mukwerume o ku ara ci: “Naa ku ambera, o katuke, o shimbe odidi woe, o thze ku diumbo.” 25Popo wemanine mu kaciko, no ku shimba odidi apa a mu rangekire, ayepo thza ku diumbo o ku ka thza o shangara Nyambi. 26A komokire wahe no ku shangara Nyambi. A yapire nene no ku amba ci: “Rero tu na mono enu yo ku komokithsa!”
Yesu aethsa Livi
(Mat 9.9-13; Mar 2.13-17)
27Munyima thzeyo, Yesu wa tundire mu mbongi, wa monine muterithsi o dithzina dyo Livi, o ku nekara mu ofithsi thzenthzi. Wa mu amberire ci: “O ni shupwere, o wikare thsirongwa thsange.” 28Wa katukire, wa thsiire enu yoihe no ku mu shupwera.
29Munyima, Livi wa ka tenderire Yesu dishambirera dyodikuru ku nthzio thzenthzi. Wa raire aterithsi owangi nene nanu amweya awa a ka direno. 30Afarithsi narongithsi o murao ou a i monine a shonaurire no kwipura erongwa yenthzi ci: “Ine eyi mu dyera no ku nwa naterithsi nanu wevi?”
31Yesu wa wa tawire ci: “Anu o kukana ku kora tumba foto mukwakupanga, shime awa a na koro wodiyo o ku fota mukwakupanga. 32Ka na ni keyera anu owawawa, unone naa keyera ku nethsa anu wevi, awa a na roera ku cera.”
Ngudi keyi yo ku cikanganga no nthzara
(Mat 9.14-17; Mar 2.18-22)
33Anu amweya a amberire Yesu ci: “Erongwa ya Johani yaa cikanganga no nthzara rorungi no ku rombera, nerongwa yAfarithsi nayo yaa tendanga kengeyo, uno honi eyi erongwa yoe ayo po yaa dya no ku nwa ne ine?”
34Yesu wa wa tawire ci: “Ene ambusha mukwakuyeka ne aa cikanganga no nthzara mu thsidika o kwa di na mukwakuyeka nji? Dyombo! 35Unone honi thsikati kenge thsa ku keya ou a ku tundithsiwa mukwakuyeka mu kaciko, apo honi kenge a ku cikanga no nthzara.”
36Karo wa wa terire kathsimo ci: “Kwithsa munu o ku yatura thsikoveyo thsenthzi thsothsipe ci a shimbepo thsikamba a pake pa thsikoveyo thsenthzi thsothsikurukuru. Kamona ayepo tenda kengeyo a epithsa thsikoveyo thsothsipe, nathso thsikamba ka thsa ku roera pa thsikoveyo thsothsikurukuru. 37Karo kwithsa munu o ku rongera waine omupe mu tuhupa totukurukuru. Ngeci ayepo tenda kengeyo, waine omupe kenge a yatura tuhupa karo waine kenge a mwaara, no tuhupa kenge twipa. 38Waine omupe aa roera ku rongeriwa mu tuhupa totupe. 39Kwithsa munu o ku fota ku nwa waine omupe, o ku na nu o kare. Kenge a ninga ci: ‘O kare yo muwa nene.’ ”
Currently Selected:
Luka 5: mho
Highlight
Share
Copy
Want to have your highlights saved across all your devices? Sign up or sign in
©2023 The Seed Company