Luka 11
11
Yesu aa rongithsa erongwa yenthzi dyo ku rombera
(Mat 6.9-13; 7.7-11)
1Diyuwa dimweya Yesu kuma a romberire mu ndau thzimweya. Ou a manine, thsimweya kwirongwa yenthzi thsa ambire ci: “Fumu, o tu rongithse ku rombera eci Johani edi a rongithsire erongwa yenthzi.”
2Wa i amberire ci: “O ku mu rombera, mu ambe kenge ci:
“ ‘Tata,
dithzina dyoe di hengekiwe dyodikenu,
Kutumina koe kwiye.
3O tu pe diyuwa no diyuwa edya yetu yo diyuwa no diyuwa.
4O tu tetere evi yetu,
inene natwe twaa teteranga akwamirandu thzetu.
Karo wa tu twara mwitumaura.’”
5Wa ambire karo ci: “Tu fekithse kenge ci munu aa thza ku nthzio thza mbushenthzi pa kaci kothsiku no ku ka amba ci: ‘Mbusha, o ni korotithseko manganja ahatu oshunga, 6inene na ni turera mbusha oyu di mu ruendo, unone ka ni di neyi yo ku mu yumbura.’
7“Karo tu fekithse kenge ci oya di muya mu nthzio aa tawa ci: ‘Wa ni shupa. Ni na pata ku thsero no ku rara ni na rara nanange owaonye. Ka ni twethse ku pinduka ku na ku pa eyi o fota.’ 8Naa mi ambera ci shaanga ka a fotire ku pinduka ci na a mu pe eyi a na foto pakuninga ci mbushenthzi, kenge a pinduka ku na mu pa eyi a na foto mukaci ko muooto wenthzi.
9“Mweyo, naa mi ambera ci: Mu rombe kenge mwa ku piwa, mu fote kenge mwa ku wana, mu ngongomone kenge mwa ku yanthzurweriwera. 10Inene munu yomuhe o ku romba aa piwa, o ku fota aa wana, karo o ku ngongomona aa yanthzurweriwera.
11“Ene kwaa di ku kwenu mwashemi, o ku pa mwane diyoka o ku na rombo ethsi? 12Nji ku mu pa nge o ku na rombo diyaki? 13Ngeci honi amwe mwanu owamango mwaa dimuka ku pa anenu epa yoiwa, aye Tata wenu o ku wiru ne kwa ku kuma kupi kupa o ku a ku pa Mupepo Oukenu kowa a na mu rombo!”
Yesu no ñathsire o mathzimu
(Mat 12.22-30; Mar 3.20-27)
14Diyuwa dimweya Yesu wa cithzire mupepo oumango kwa mukwerume o shiamba. Ou wa mu tundire wa tatekire ku amba, mbunga thza komokire. 15Unone anu amweya a ambire ci: “Aa cithza mathzimu kokoro wa Beelezebule, ñathsire o mathzimu.” 16Amweya a erekire Yesu ko ku mu romba ci a wa monithse thsimonithso thso ku tunda ku wiru, ci a rakwe ci ya shemwa Mwana Nyambi.
17Aye wa dimukire eanekera yo, waa wa amberire ci: “Kutumina ko ku cia ko ku cirwithsa kenge kwa kwipa, no mwanda o kwikareranga ku cirwithsa kenge wa ku citepa. 18Ngeci Satana aa citepa yothsinda ne, ngepi nga ku tanara kutumina kwenthzi? Naa amba kengeyo, inene mwaa amba ci naa cithza mathzimu kokoro wa Beelezebule. 19Ngeci ame naa cithza mathzimu kokoro wa Beelezebule ne, awa anuenu ne aa cithza mathzimu kokoro o ku tunda kupi? Kenge a ku mi ratura keyi mu na amba. 20Uno honi ngeci naa cithza mathzimu kokoro wa Nyambi, Kutumina kwa Nyambi ku na kumu ku kwenu.
21“Munu o mukoro oyu na kwaterera erwithsa yenthzi ku nyunga nthzio thzenthzi, etenga yenthzi yoihe yaekara nawa. 22Unone o mukoro ku mu pita yoihe a mu rwithsa no ku mu othza, aa mu nyanga erwithsa yenthzi eyi a na kurupera no ku tapera eyi a na pukura.
23“Yomuhe o kukana ku nimanena aa ni rwithsa, noyu o kukana kungera nange aa shandura.”
Kukahuka ko mupepo oumango
(Mat 12.43-45)
24Yesu wa shumunine ku amba ci: “Mupepo oumango yoihe u tunda kwa munu, waa thza mu dikunguthsitu ku ka fota ko ku turumwithsera. Unone o ku u na kana ku wana mo ku turumwithsera waa amba ci: ‘Naa huka mu nthzio omu na ni tundu.’ 25Yoihe u ka huka no ku na wana nthzio ci thzi na kombiwa no ku roithsiwa nawa, 26waa thza ku ka shimba mipepo thzimweya thzo mutanu na thzidi thzothzimango nene ku u pita. Thzothzihe thzaa keya no ku na tungamo, ku hura oya munu kenge a kwipa kupita pa kutanga.”
Kwikara no thsiyauthzi shemwa
27Yesu o ku amba eyi, mbuyama mu mbunga wa tumukire ku amba ci: “Wa thsiyauthzi mbuyama oyu wa kwerekire no ku ku yamwithsa.”
28Yesu wa tawire ci: “Ii, unone awa di nene no thsiyauthzi po awa na yuvu diywi dya Nyambi no ku di hengeka.”
Thsimonithso thso ku tunda kwa Nyambi
(Mat 12.38-42)
29Yesu o ku thzi na mu umbu mbunga wa ambire ci: “Amwe mwanu o rerodino po mwamango, mwaa fota thsimonithso thso ku tunda kwa Nyambi. Unone ka mwa ku thsi mona shime thsimonithso thsa Jonasi. 30Dyodi ekarire Jonasi thsimonithso thsAkwaNinive, no Mwana Munu dya a kwikara thsimonithso kwanu o rerodino.
31“Mu diyuwa dyo raturo, Fumu o mbuyama o ku mboera kenge a kwimana ku ratura anu o rerodino. Wa tundire ku hura o kaye ku na yuva erongithsa yonyanyami wa Solomoni, unone o mukuru kupita Solomoni pa a di pano. 32Mu diyuwa dyo raturo AkwaNinive kenge a kwimana no ku ratura anu o rerodino. Inene a cerire omango wo ou a yuvire erongithsa ya Jonasi. Uno honi pano po paa di o mukuru kupita Jonasi, unone mwaa kana ku teerera ku kwenthzi.
Mwethzi no mirema
(Mat 5.15; 6.22-23)
33“Kwithsa munu o ku muneka kambarambara no ku ka horeka nji ku ka furumeka kafuma, unone aa ka paka pa thsimeko ci awa engena a mone mwethzi. 34Dithziho dyoe po odiyo mumunyi werama yoe. Dithziho yoihe di mona nawa, erama yoe yoihe yaekara mu mwethzi. Unone dithziho dyoe ngeci ka di monine nawa, erama yoe yoihe yaekara mu mirema. 35Uno honi o mamere ci ou mwethzi u di ku koe wekara mirema. 36Mweyo, ngeci erama yoe yoihe mu mwethzi i di ko kupira thsirama ethsi thsi di mu mirema, erama yoe kenge ya kwikara mu mwethzi pohuma eci kambarambara aka ka muneka pa poe.”
Yesu aa shomorora Afarithsi narongithsi o murao
(Mat 23.1-36; Mar 12.38-40)
37Yesu ou a manine ku amba, Mufarithsi yumweya wa mwithsire ci a ka dye nenthzi. Wa thzire no ku kekara ku tafure. 38Unone Mufarithsi wa komokire ou a monine Yesu o ku dya ko kukana ku ciyoa ku moko.
39Fumu wa mu amberire ci: “Amwe mwAfarithsi namwe dyo mu di, mwaa yoanga turonga no manganja peuru, unone mu kaci ko micima thzenu mu na yara rununa nomango. 40Amwe mwanu o kupira maano! Ene oyu Nyambi wa kwamine peuru ne kadi yo wa kwamine no mu kaci nji? 41Uno honi mu pe ahepwe eyi i di mu manganja no mu turonga twenu, apo honi enu yoihe kenge ya kwikara yoikenu ku kwenu.
42“Mwakwothsimo amwe mwAfarithsi, inene mwaa panga Nyambi thso mudikumi kweyi mu na dimanga yo kupitura eci minta, kumini no miroho thzothzihe. Unone mwaa kwanga ku kwama anu nawa no kukana thsishimo thsa Nyambi. Eyi po yodiyo mu na roera ku kwama ko kukana ku thsiererako imweya.
43“Othsimo po wenu, amwe mwAfarithsi, inene mwaa shimanga kwikara mwipura yo direma mu masinagoge no ku vumeneniwa ko direma mu maurithsero.
44“Othsimo po wenu, inene mwaa cipitura no idi yo kukana ku makiwa, apa endaura anu ko kukana ku i dimuka.”
45Yumweya kwakwakutongonona murao o Thsijuda wa mu tawire ci: “Fumu, ku amba kengeyo po waa tu tuka natwe.”
46Yesu wa mu tawire ci: “Namwe mwakwakutongonona murao o Thsijuda mwakwothsimo, inene mwaa shimbithsa anu mipango thzothziremu ethzi a kwanga ku shimba, unone amwe kadi mwakwa ku kwatako shaanga no kanyehe ci mu wa kwathse.
47“Mwakwothsimo, inene mwaa umba idi yakwakukethza awa epaiwire kwakwathsañuruenu. 48Yoshemwa mwaa monithsa ci mwaa tawa ekwama yakwathsañuruenu eyi a kwamine. Epaire akwakukethza, unone amwe mwaa umba idi yo. 49Mukaci keyi, Nyambi konyanyami wenthzi wa ambire ci: ‘Kenge na ku wa tumena akwakukethza no tunganda, kenge a ku nepaa amweya no ku nyandithsa amweya.’ 50Mweyo, anu o rerodino wahe kenge a ku wana murandu o kwipaa akwakukethza a Nyambi, awa epaiwa ku tunda ku matatekero o kaye. 51Ku tunda pa kwipaiwa kwa Abele ku na kuma pa kwipaiwa kwa Zakariya oyu epaerire mu kaci ko katara no Tembere. Yoshemwa ou murandu o kwipaiwa kowa anu kenge wa ku huka kwanu o rerodino.
52“Othsimo po wenu amwe mwakwakutongonona murao o Thsijuda, inene mu na shimbi dipao dyodimukero. Amwe mwaa kana kwingenamo, karo mwaa kwangithsa nowa a fota kwingenamo.”
53Yesu ou a punine omo, arongithsi o murao nAfarithsi a tatekire ku mu rwithsa nene ko ku mwipaura mangudi oangi. 54Kuma a erekire ku mu ta pa rudimi ci nga a wane yo ku mu capa.
Currently Selected:
Luka 11: mho
Highlight
Share
Copy
Want to have your highlights saved across all your devices? Sign up or sign in
©2023 The Seed Company