Matiye 11
11
Hɔ̀ bòo lɛ ɛ́ Zãn Batiisi ɛ́ tɔrɛ mí kɛ̀ránzɛ̀ɓɛ̀ nɛ ɓɛ vɛ dìe àá Yiezu bòo
Lik 7.18-35
1Ɛ́ bòo lɛ ɛ́ Yiezu ɛ́ lɛ́ hɔ́pe bérɛ́ sɔ sí mí kɛ̀ránzɛ̀ɓɛ̀ píru àá nìɛ ɓɛ̀ ɲu vɔ́, á khie cɔ́ van hɔ̀ lóoniɛ lɛ wi hɔ pe pɛ̃̀hɛ̃ sɔ hũn, ɛ́ van ɓɛ̀ nìnbirìe ɛ̀ kɛ̀rán kɛ́ á lè Bentĩnu ɛ̀ buie. 2Hɔ́rɔsí ɛ̀ Zãn Batiisi wi hɔ kɛ̀si hũn, á ɲɛ́ á Kirisa bòo, á tɔrɛ mí kɛ̀ránzɛ̀ɓɛ̀ dɔ̀ nɛ ɓɛ vɛ piè viì, 3ɛ̀ vɛ diè ɔ̀ ǹ nɛ làa: «Kɔ́ iè ɔ̀pe lɛ ɛ́ Dɔfĩn ɛ́ hàarí bie bòo nɛ mí ɓén tɔn yée kɛ́ ké sãawi ɛ̀ kè hìé nì-ɓuɛ̀?» 4Ɛ́ Yiezu zɔn bie lɛ́ ɓà ǹ nɛ làa: «Hɔ̀ bòo lɛ ɛ́ mí ɛ́ ɲí àá hɔ́ lɛ ɛ́ mí loo ɛ́ mí vɛ khɛ́ lɛ́ á Zãn: 5ɓɛ̀ muaɓɛ̀ ɛ́ yìe loo bòo, ɛ̀ ɓɛ̀ lóohĩ́ ɛ́ vɛ, ɛ̀ ɓɛ̀ ɓèríe ɛ́ wɛ, ɛ̀ ɓɛ̀ bekiè ɛ́ ɲɛkɛ̀a ɛ́ bòo ɲí, ɛ̀ ɓɛ̀ nìhiè ɛ́ vìé, ɛ̀ lè Bentĩnu ɛ́ buie ɛ̀ lɛ́ ɓɛ́ nìkherà ǹ. 6Álɛ kɛ́ á yí fùansí hɔ́ lɛ á dũmuasɛ̃̀ mi ǹ, ɛ̀ ɓàasɔ ɲún ɛ́ tĩ.»
7Ɛ́ bòo lɛ ɛ́ Zãn kɛ̀ránzɛ̀ɓɛ̀ ɛ́ khũ̀a cɔ́ vɔ́, ɛ́ Yiezu ɛ́ khie ɔ̀pe Zãn bòo ɛ̀ bie àá ɓɛ́ nìzã̀amáa ɛ́ nɛ làa: «Hɔ̀ lɛ ɛ́ mí van lè ńɲiherà hũn, ɛ́ hɔ́ iè ńɓùo ɛ́ mí hṹn cɛ̀ ɛ́ mii vɛ mi? À iè nìnbírɔ lɛ cũ̀kṹ mí kɛ̀a le kã́anú lɛ lé pinpinù ɛ́ zɛ̀kɛ̀nikɛ yée? Ńɓùé lò! 8Ɛ́ hɔ́ wo iè ńɓùo ɛ́ mí hṹn cɛ̀ ɛ́ mí vɛ mi? À iè nìnbírɔ lɛ ɛ́ zɔn tĩ̀ɛ lɛ yàamu hie yée? Ɛ́ ɓɛ́pe lɛ wóò zɔ hɔ tĩ̀ɛ lɛ yàamu hie ɛ́ wóò kań àá ɓɛ́ bɛ́zɛ̀ɓɛ̀ zĩhĩ́ɛ hũn lò! 9Ɛ́ hɔ́ den wo iè ńɓùo ɛ́ mí hṹn cɛ̀ ɛ́ mii vɛ mi? À iè Dɔfĩn bɔ̀háanírɔ yée? Ũun, nín bie hɔ lɛ́ miɛ ǹ. Kɛ́ á lò den pɛwi pɔ Dɔfĩn bɔ̀háanírɔ. 10Iè hɔ̀ lɛ á Zãn ɛ́ iè ɔ̀pe lɛ ɛ́ Dɔfĩn bie bòo mí bienù vɛ̃hṹ hũn ɛ́ nɛ làa: “Húi ń nɛ niǹ tɔnkɛrɔ ɛ̀ dí kɔ́ híɛhɔ́, ɛ̀ ɓen wookɛ kɔ wṹn ɛ̀ lɛ́ kɔ̀ ǹ.” 11Nín bie hɔ lɛ́ miɛ ǹ àá bɔ̀bín nɛ ɓɛ nìnbirìe lɛ tɔn tɔnlɔ́ ɓɛ́kùi hũn, ɛ́ nìnbírɔ lɛ pɔ Zãn Batiisi ɛ́ mí wɛ̀. Hɔ́rɔsí kɛ́ á nìnbírɔ lɛ mìníɛ pɔ ɓɛ lɛ kɛ́ ɓɛ́kùi lè Dɔfĩn bɛ́záanú hũn ɛ́ lò den ɛ́ ɓàń pɔ a. 12Ɛ̀ dàá vɛ mìí lé yìi lɛ á Zãn Batiisi ɛ́ dàa hàarí ɛ́ lè Bentĩnu ɛ̀ buie fúu ɛ́ ɓen dɛ̃ zoòni, ɛ́ lé hóohũn bɛ́záanú ɛ́ wo ɛ́ ɓen àá pànkɛ́, ɛ́ ɓɛ́ iè ɓɛ̀lɛ ɛ́ pĩ̀iniɛ ɓɛ́te ɛ́ te le wóò yí. 13Ɓɛ̀ Dɔfĩn bɔ̀háaníriè ɓɛ́kùi àá ɔ́ Moyiize làndɛ́ ɛ́ hàarí bie hɔ̀ Dɔfĩn bɛ́záanú bòo lɛ vaá-ɓen fúu ɛ́ ɓen dɛ̃un ɔ̀ Zãn Batiisi pɛ̃̀hṹ. 14Ɛ́ mí ɓen tɛ̀ ɛ́ mi ɛ̀ dɛsĩ̀ mi ǹ, ɛ̀ nín bie lɛ́ miɛ ǹ nɛ a Zãn ɛ́ iè ɔ̀pe Elii lɛ ɛ́ ɓɛ́ bie bòo nɛ a ɓén ɓen. 15Ɛ́ mí ɓen dàa ɲɛkɛ̃̀a ɛ́ dàa wóò ɲí bòo, ɛ̀ mì ɲí hɔ́ sãàní!
16Ɓɛ̀ iè bíɛ ɛ́ nin dàá màaní ɓɛ́pe zoòni sɔ lɛ nìɛ? Ɓɛ̀ lɔ́ɓán àá zĩncãahɛ̃ lɛ ɛ́ kɛsí lé yàa khúie hũn, lɛ ɛ́ ɓɛ́dɔ̀ ɛ́ wóò khíi ve ɓán ńkɔhĩ́ ɛ̀ ɓɛ̀ bie lɛ́ ɓà ǹ nɛ làa:
17“Ké ɓɛ́ hɔ́ yɔrɔ́ tĩ̀ɛ,
Ɛ́ mí yí yɔ wɛ̀.
Ɛ̀ kè tɛ̀ lè yúrú yèrè,
Ɛ́ mí lò yí wírí wɛ̀.”
18Iè hɔ̀ lɛ á Zãn ɛ́ ɓɛrɛ, à hṹn yáà dí bòo, à lò hṹn yáà ɲu ɲɛmù wɛ̀. Ɛ́ ɓɛ́ nɛ a iè ńɲíkĩ́rɔ ɛ́ temu wi è ǹ. 19Á nìnbírɔ Zuú ɛ́ ɓɛrɛ, à wóò dí, à ɲu, ɛ́ ɓɛ́ nɛ a iè nùún lɛ wɔ́ hɔ́ díe àá hɔ́ ɲɛ-ɲunlɔ́ á bɔ̀ máahṹ, iè ɓɛ̀ lànpó-fériè àá ɓɛ̀ bɔ̀konwériè ɛ́ temu wɔ́ ɓà pàáɓɛ́. Kɛ́ Dɔfĩn bɔ̀dũmunù bòo lɛ ɛ́ Hɔ́ wóò wé, ɛ́ temu ɛ́ zɛ̃́ní kɛ́ hɔ́ iè bɔ̀dũmunù#11.19 Yiezu ɛ́ ɓen nɛ «nìnbírɔ Zuú» ɛ̀ hɔ̀ iè ɔ̀pe kùusɔ á nɛ̀..»
Hɔ̀ bòo lɛ ɓén wé hɔ́ lóoniɛ̀ lɛ yí dɛsĩ̀ Yiezu ǹ bòo
Lik 10.13-15
20Ɛ́ Yiezu ɛ́ khie fi àá hɔ́ looniɛ̀ lɛ á wɔ́ hɔ́ yéréké bòo cɛ̀rìɛɛ hũn, iè hɔ̀ lɛ ɛ́ hɔ́pe lóoniɛ̀ sɔ nìɛ ɛ́ yí zɛ̀ní ɓɛ́ tĩ̀ɛ ɛ̀ ɓɛ̀ fùansí ɓɛ́ bɔ̀koohɛ̃ wénlɔ́ ǹ wɛ̀. À zɔn bie nɛ làa: 21«Mìpe Koraziinɛ nìɛ, mì yìi ɛ́ ɓén mi hɔ, ɛ̀ mìpe Bɛtesayida nìɛ, mì yìi ɓén mi hɔ. Iè hɔ̀ lɛ ɛ́ hɔ́pe yéréké bòo lɛ wɔ́ mí tĩ́ihṹ ɛ́ hṹn wɔ́ Tiire àá Sidɔn lóoniɛ̀ hũn, nɛ peɓɛ̀ lóo nìɛ ɛ́ khuie hɔ̀ bùanìɛ ɛ́ zɔn, ɛ̀ ɓɛ̀ khuie hɔ̀ sãani ɛ́ koo ɓɛ́ lɔ̀n ɛ́ dàá ɛ́ zɛ̃́niɛ kɛ́ ɓɛ́ zɛ̀niɛ ɓɛ́ tĩɛ̀ ɛ̀ ɓɛ̀ fùɛrɛ̀sí ɓɛ́ bɔ̀koohɛ̃ wénlɔ̀ ǹ. 22Ɛ́ sí iè hɔ̀pe, ɛ́ ń dàa nin bie hɔ lɛ́ miɛ ǹ nɛ hɔ lìe lènlɔ́ zɔn, ɛ̀ lè lɔ̀nbiè lɛ mii yí miɛ ɛ́ ɓén pɔní hɔ́ lɛ mii wé Tiire àá Sidɔn lóo nìɛ ǹ. 23Ɛ̀ mìpe Kapɛrɛnayiimu nìɛ, mí tĩì ɛ̀ mì nɛ mí ɓén dɛ̃ fúu ɛ́ yòó vɛ líi hɔ́ hóohũn yée? Ńɓùé dɛ́, mí ɓén síɛ fúu ɛ́ vɛ́ síɛ dɛ̃ ɓɛ nìhiè lóo. Iè hɔ̀ lɛ ɛ́ hɔ́pe yéréké bòo lɛ wɔ́ mí lóo hũn ɛ́ hṹn ɛ́ wɔ́ Sodɔɔmu hũn, nɛ ɛ̀ zooni lɛ ɛ́ hɔ́pe Sodɔɔmu sɔ ɛ́ pɛ́wi ɛ́ wi yán. 24Ɛ́ sí iè hɔ̀pe ɛ́ ń dàa ɛ́ nin khɛ́ hɔ́ lɛ́ miɛ ǹ nɛ hɔ lìe lènlɔ́ zɔǹ, ɛ̀ lè lɔ̀nbiè lɛ mii yí miɛ ɛ́ ɓén pɔní ɓɛ́ Sodɔɔmu nìɛ lɔ̀n-biè.»
Ńvũùnín ɛ́ wóò yí àá Yiezu viì
Lik 10.21-22
25Ɛ́ pehɔ̀ yìi hũn, ɛ́ Yiezu zɔn bie ɛ́ nɛ làa: «Yàá, kɔ̀pe lɛ iè Ɲunsɔ hɔ̀ hóohũn àá lé sṹsùnù, nín kɔ̀ ɓàanínin iè hɔ̀ lɛ ɛ́ kɔ́ tànkɔ̀niɛ kɔ̀ bɛ́záanú bòo àá ɓɛ́ bɔ̀dũmunù ɓàasiè àá ɓɛ́ hɛciri ɓàasiè, ɛ̀ kɔ̀ ɛ́ zɛ̃́niɛ hɔ̀ ɛ́ lɛ́ ɓɛ́lɛ ɛ́ dɛ̃̀ kɛ̀a ie zĩncãahɛ̃ ǹ. 26Ũun, Yàá, kɔ́ temu wɛniɛ nɛ hɔ wé kɛ̀amu.»
27«Kìe Yàá dɔ́ bòo míkùi niǹ núnú hũn. Nìnbírɔ dɔ̀ ɛ́ yí dũ a Zuú kɛ́ á Yàá ɛ́ ɓen bòo mí, ɛ̀ nìnbírɔ dɔ̀ ɛ́ yí dũ a Yàá kɛ́ á Zuú ɛ́ ɓen bòo mí, àá ɓɛ́ lɛ á Zuú ɛ́ wɛ mii zɛ̃́ní-ɛ pe Yàá ɛ̀ lɛ́ nin.»
28«Mì ɓen niǹ viì, mìpe lɛ ɛ́ tìe hɔ̀ tìerɔ́ lɛ lì mìkùi ɛ́ mí tan, ɛ́ nín lɛ́ ńvũùnín miɛ ǹ. 29Mì tɛ̀ ɛ̀ tɛ́ niǹ tɔnlɔ́, ɛ̀ mì fùansí nɛ ń bé miɛ, iè hɔ̀ lɛ ɛ́ ń wuawi, ɛ̀ niǹ tĩì lò sãa, ɛ́ mí ɓén yí ńvũùnín niǹ viì. 30Niǹ tɔnlɔ́ ɛ́ wuawi, ɛ̀ hɔ̀ bòo lɛ ɛ́ ń nɛ mi wé ɛ́ lò wénlɔ́ tĩ.»
Currently Selected:
Matiye 11: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation