Luke 10
10
Jezi mi tuma alwoni a nde
1Amana bwa, Mfumu vuri swoli ekuumu ba alwoni ncaami ŋa bwele akima. Nde tumi bo bwele bwele, kavuzu o nde nca engundu eso bila nca ebiri eli nde-ankulu kiigi aje. 2Nde ŋa bo ndi: «Ŋaa ovu wu biila emi vula kuna nca nguunu, ŋaa ma lemigi loankulu lia, bege le baari yiga surusuru ma kayuga mbari a Njyami. Le bwono mfumu a nguunu katuma ajanji akima. 3Leje, mi etuma be ŋa, mva baana ba endombo nca ango. 4Lebizi kabira se ampara, se mpye, se akorogo akima. Ŋaa be leto ma njila, be lebizi kasuga ma ka biga mbuuru. 5Be leto nca njo ye anyunuŋa be, jaa lencomi le asa be bo, obigi wu: Kadusu kaka bila be. 6Aka ŋa mbuuru wo njo yia eli ŋa njala kadusu ka Njyami, kadusu ka be kaka bila nde, bo abiza be levurugi bila ko. 7Mpini biri ye anyunuŋa be, ye ba yamba be, be leki ŋaa. Ŋaa kaja, ŋa kanyua ampa be leyaga, kabila ojanji ave bagi wura le nde. Be lebizi kaciege nca njo yia ma kaje anjo akima. 8Mpini kangundu kanyunuŋa be, amono baari ayambi be, mpini biila ba bampa be, be leji. 9Le salaga abieri ba kangundu kia! Ŋaa lelyele ŋa bo ni: Antini ma omfumu o Njyami amito mpaniŋi a be. 10Ŋaa be leto nca kangundu, bo abiza yamba be, be leyeni ebiri eli baari amaakuga, be le lyeli ŋa bo ni: 11Bizi le kubuga ncye ye kangundu ka be yeeli kayila miili e bizi, ŋaa bizi levuta be-ankulu yo. Ŋaa ave be leyaa ni omfumu o Njyami omi ya nciina mpaana be. 12Sisyele mi elyele be ni, ma cugu lia opami wo apama Njyami kangundu ki, avula kangundu ka Sodome.»
Nyia eli ma engundu be bizi yalaga Jezi
13Ŋaa Jezi ndi: «Be asi Korazi nya eli ŋa be, be asi Betezayida nya eli ŋa be! Kabila ampiri maasa mi ka mpila be, ma kaka ka Tire bila Sidon, ke bo ama laaza amfa ma ndogo, ŋaa bo amakila lewuzu, ma kamvyere ndi bo amakaala etuma. 14Yia biri eli, ma cugu le opami, esisi e be, beevula opami wo baari a Tire bila Sidon. 15Be baari ba kangundu ka kapenawume, be le cimiŋa ni Njyami atese be tii yulu? Kali, be le vuruga tii ncina ancwo.» 16Ŋaa Jezi vuri dugi ŋa alwoni ndi: «We ayuga be, mi kayugi, ŋa wo abiza yamba be, mi kabizi kayamba. Ŋaa wo abiza yamba mi, aka yamba wo tumi mi ŋi.»
Eyi vuruga ba alwoni ba ekwumu ncaami ŋa bwele
17Alwoni ba ekwumu ncaami ŋa bwele ayi vuruga nca kase keenini ŋa bo ndi: «Ee Mfumu, ma nkuumu a we, se epundu beebi yiga ba enyima bizi!» 18Ŋaa Jezi kaali ŋa bo ndi: «Mi moni Satan ofi yulu vi mva kapete ngari. 19Mono, mi mi mpa be mpari ma kajata antaari bila angya, ŋa ma kajata mpari Satan eso, ŋaa mpamaŋa kibuna ciila be ŋi. 20Ŋaa lebira kaswere ma epundu ba be enyima be, ŋaa leswere ma ankuumu a be ma mi teende ka yulu.»
Jezi ampa Taara leve
21Ntini yomankulu yia Oduduma Cece mpi Jezi kase, ŋa nde njuru eyaani, ŋaa nde ndi: «We ŋa ove, Taara, Mfumu a yulu bila ncye. We ŋa ove, ma we wo lonoŋo ba ba alyele ndi bo acuga bila eyeri ba amaami ma, ŋaa we ma mvyere ma baali mva baari ba baavuruga mbiza mva baana ba abuuzu mon. Ee Taara, mi empa we leve ma lemigi lejii we.
22«Taara mi ma ampa biibi njwori nca jyala e mi. Mbuuru okima ki ya mi o Mwana ŋi, ŋaa Njyami Taara oya. Se mbuuru okima ki ya Taara ŋi ŋaa mi ya, mi o Mwana bila baari ba swoli mi ma kamvyere Taara bo aya.»
23Ŋaa Jezi ka kaligi mpila alwoni a nde, nde ŋa bo ndi: «Kase kali ŋa baari ba baamono maami ma amono be. 24Sisiele mi elyele be ni, kuna le antuma-Njyami, ŋa amfumu ba esi, ama samaŋa kamono maami ma amono be, ŋa bo akimono mon ŋi. Bo asagi yuga mbari ye ayuga be, ŋa bo aki yuga yo ŋi.»
Lempiini le ati ma balaga le Samari
25Ŋaa mono, oyizigi angiri omon temiŋi ma kamiga Jezi, ŋa nde ŋa nde ndi: «Mfumu, mi bunu esa ma kabaga omuon ba obu obu?» 26Ŋaa Jezi kaali ŋa nde ndi: «Jo ema ateende nca buku le angiri? Ka aliri we, we yo bunu a yuga?» 27Ŋaa oyizigi angiri wua kaali ŋa nde ndi: «Amaateende ndi: Jya Mfumu wo Njyami a we, ma otuma we oso, ma o mbuuru o we oso, ma mpari we eso bila ebarigi e we eso. Ŋa we jya buga lengulu mva kajya we mankulu.» 28Jezi alyele ŋa nde ndi: «We yemiŋi kaali, ŋaa sa bwa we baga omuon ba obu obu.»
29Ŋaa oyizigi angiri yiga aselege mbari a nde ye kawobi ŋa Jezi ndi: «Ŋa buga lengulu le mi na?» 30Jezi vuri yagi mbari, nde ndi: «Cugu lemon balaga lemon le fi Zerizaleme ma kasuruga Zeriko, nde vuniŋi bila epira, jo ebumi nde luuba, epini nde biibi eso tii amfa anjuru, ŋaa jo eyeni, ka anyina bo nde, nde kiigi yiga tuga ka kpaa.» 31Ka lesa bwa ompi ambwoŋi wo Njo Njyami omon, oyiri se ma njila yia. Kamono balaga lia, obaagi. 32Olevi omon, ojanji a Njo Njyami, kato ŋaa obaagi se. 33Ŋaa balaga le Samari le leekiigi je onjya, leto mpaana balaga lya, nde kamono nde, nkerigi esi. 34Nde yi nciina mpaana nde, cuki nde ampura, legi nde maari bila mali aba, ŋaa kuri nde mon. Legi nde yila nyama nde-ankulu. Amana nde biri nde nca njo ye eka anjia, ŋa nde seligi nde. 35Enyuzuga, balaga le Samari lia kato ma kaje, yagi ampara mpi ŋa ojanji a njo wua. Ŋaa nde ŋa nde ndi: «We kozi nde. Okorogo jo evula kuna baasa we nde, mi eya mi ewura.» 36Ŋaa Jezi pizi ŋa oyizigi angiri ndi: «Ma we, nca baari ba atari baa, wooli buga lengulu le balaga le aberi lya wunu?» 37Nde kaali ndi: «Mbuuru wo moni nde nya.» Ŋaa Jezi ŋa nde ndi: «Je, ŋaa we se sa bwa.»
Marete bila Mariya ba yamba Jezi
38Ŋaa Jezi bila alwoni a nde ava ma njila, bo anyunuŋi nca mpugu. Kaŋaa okaazi omon nkuumu Marete, biri bo njo nde. 39Nde kiigi ŋa nkeri nkuumu Mariya. Ŋaa Mariya yi ka mancina ka miili e Mfumu Jezi, ma kayuzuga maami a nde ma kiigi yiziga. 40Ntini yia Marete kakuza ma kasa bege le ajanja. Ŋaa nde yi mpila Jezi ndi: «Mfumu, we akamono obi ma lemigi eli nkeri a mi ma anyina mi esa janja mi otu ŋi? Duga nde kaya baga mi.» 41Ŋaa Mfumu akaala ŋa nde ndi: «Ee Marete, ee Marete, mono we akpaa, we a fuba ma bege le amaami. 42Okorogo jaa lemon levuli yemiŋi, le swoli Mariya, ŋaa mbuuru kibuna cieze nde lo ŋi.»
Currently Selected:
Luke 10: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES