Luke 1
1
Luke alyele kabila bila lemigi le eteende nde buku li
1Ee mbuuru a mi Tofile#1.1. Lekese nca buku le atende ajanja ma asi antuma a Zezi katini kancomi ka olwo omon. (ajanja1.1) , bege le baari asi mpari ma kateende maami a Zezi ma ayiri ka mpanaŋi a bizi. 2Bo ateendi maami ma lemigi le ba amoni ebaani e mon, ŋaa bo ka anaani bizi. Ba amoni baa yiga amfumu ba baampa mbari a Njyami. 3Mi se mana ya lemigi le kacia ka maami ma kaabani mon, lekani mi kateende maami maa se, ŋa mi si bwa ma we wooli mbuuru a mi Tofile . 4Mi si bwa, ma buni we yaa ni eyizigi ba ayizigi we ba siele.
Njyami mi tuma ntuma nde o yulu mpila Zakari
5Ma ntini ye Erode mfumu wo bungu le Zide, kiigi ŋa ompi ambwoŋi, nkuumu Zakari. Nde kiigi nca oju wo ba Abia.#1.5 Lekese nca 1aKoretye 24.7-18. Okari a nde nkuumu kiigi Elizabete, mpabigi Aron. 6Bo aso abwele kiigi tele ka miizi a Njyami ŋaa bo ba ka nyima angiri bila ekele e Mfumu eso, akimono se jaa leebi ma bo ŋi. 7Ŋaa bo kiigi baana onyaŋa, kabila Elizabete kiigi kankuma, ŋaa bo abwele kiigi ekubu.
8Cugu le oju o Zakari kato ma kampa ambwoŋi kanca Njo Njyami, ŋaa nde nyuniŋi ma kasa janja. 9Aswoli Zakari ma lemigi le baana sa baari ba baampa ambwoŋi kanca njo Mfumu. Nde nyuniŋi nca otuma njo ma kacuga amuomi#1.9 Lekese nca Ekezode 30.7-8.. 10Kuna le baari kiigi le li kajii ma ntini ye akiigi cuga amwomi kayila mbisa. 11Parabu ntuma omon a yulu o Mfumu oyi mpila Zakari, oki ma otele ma kwogo ka kalumu ka mpaani a mbisa#1.11 Lekese nca Ekezode 30.1-6, 1 Akunji 7.48.. 12Zakari kamono nde, bwogo boonini osi nde, ŋaa nde ancagi ayeni swaga. 13Ŋaa ntuma a yulu ŋa nde ndi: «Ndaga bwogo ka mono, kabila Njyami mi yalaga obwoni a we. Okari a we Elizabete akula we mwana wo balaga, ŋaa nkuumu ye ampa we nde Zan. 14We aje kamono kase bila ove ma mwana wua, ŋaa bege le baari leeka nca kase keenini ma ntini ye ba akula nde. 15Okorogo nde aka mbuuru woonini ka miizi a Mfumu. Nde aka nyua mali amburu a vinye, se mali akima ankaala ŋi#1.15 Lekese nca Nombere 6. 3.. Ŋaa mpari Oduduma Santi ye je kasuruga yila nde, keeli nde kini nca muon ngwugu a nde. 16Nde aya vuruga bila bege le baana ba Ezerayele mpila Mfumu wo Njyami a bo#1.16 Lekese nca Malaci 2. 6. . 17Ŋaa nde aje kavuzu o Mfumu, bila oduduma ŋa mpari a Eli. Ŋaa nde aya vuzuga ataara bila baana, nde akaala etuma e baari angaa kamba, eka tele. Nde aselege etuma e baari ma eyi e Mfumu.» 18Zakari ŋa ntuma a yulu ndi: «Mi bunu eya mini siele? Kabila mi mi nkubuga, ŋaa okari a mi yiga ngaa mbuuru.» 19Ntuma a yulu ŋa nde ndi: «Mi Ngabiriyele#1.19 Lekese nca Danyel 8. 16, 9. 21, Liki 1. 26. , mi ndi kavuzu o Njyami ma kasa janja. Mi atuma ma kalyele bila we, ma kampa we ncia yeemve, 20ŋaa we kiyalaga maami ami me dugi we ŋi. Ŋaa ntini eto we amono maami maa, ma bwa we akiriga nkina we aka ma buna kalyele ŋi, tii ntini ye mono we maami maa.»
Baari ba kajila Zakari
21Ntini ye kiigi Zakari nca Njo Njyami, baari ba akiigi jila nde ka jii akimi le bigi lesi nde. 22Ntini ye cwugi Zakari, nde kiigi yiga kibuna kalyele ŋi, nde kasa bo anjiimi ma eliemi, yia biri ye yayi bo ndi Njyami mi mvyere Zakari kalogo nca njo nde.
Elisabete yiga ŋa yimi
23Zakari kamana ecugu e nde e janja kanca Njo Njyami, nde vurigi njo nde. 24Amana ntini mon, okari a nde Elizabete biri yimi, nde yizigi njuru tii angondo ataani, nde alyele ndi: 25«Mono ove ba si Mfumu mi, nde mi cieze mi kabila kaka kiigi mpa mi okuru ka miizi a baari.»
Esizigi ba kakula ka Zezi
26Elisabete kato angondo asiami, Njyami tumi ntuma nde Ngabiriyele nca kangundu kamon ka Ngalile ka acwoli ma Nazarete, 27mpila ocuuma we okaazi wo kini yaa abalaga ŋi, wo nkuumu Mariya. Ocuuma wua kiigi ama mana mpa nde ma baala ka mpila balaga le nkuumu Zizefu, mpabigi ye Mfumu wo nkuumu Davide. 28Ntuma Njyami o yulu yeni nca njo mpila mwana okaazi wua, ŋa nde ndi: «Mi ebiga we, ma we eli Mfumu ma ampa puga.» 29Ntuma kamana biga Mariya ekoli nde, ŋa nde cimiŋi kanca otuma nde ndi: «Yia sila obigi ma?» 30Ntuma a yulu ŋa nde ndi: «Ndaga kabaraga Mariya! Okorogo we mi baga puga ka miizi a Njyami. 31Ŋaa mono, we aje ka baga yimi, we akula mwana wo balaga, ŋaa we ampa nde nkuumu ye Zezi. 32Nde aka mbuuru woonini, ŋaa ba cwolo nde ma Mwana Njyami onkara yulu. Njyami wo Mfumu ampa nde onkani ba nkaaga nde Davide. 33Nde aka Mfumu wo obu-obu kayila njo Zakobe, ŋaa omfumu o nde bo kawa ŋi#1.33 Lekese nca 2 Samwel 7. 12, 13, 16. Ezayi 9. 6, Danyel 7. 14..» 34Mariya ŋa ntuma a yulu ndi: «Ŋaa mi yimi lia bunu le ya, mi ti nkini yaa abalaga ŋi?» 35Ntuma a yulu akaala ŋa nde ndi: «Oduduma Santi aya yila we, ŋaa mpari a Njyami ye ya yila we, yo ye wuga we mva kayiini. Ma buni mwana wo ba akula aka cece, ba acwolo nde ma Mwana Njyami. 36Ŋaa mono, Elizabete wo mbuuru a ankwono we, mi bira yimi kayila okubu, ŋaa mwana balaga. Nde we acwoli ma kankuma, yiga angondo asiami. 37Okorogo, jaa ye akwono Njyami onyaŋa#1.37 Lekese nca Jeneze 18.14..» 38Mariya ndi: «Mi ojanji a we Mfumu, ŋaa sa maami ma lemigi le dugi we.» Ŋaa ntuma a yulu vurigi.
Mariya yeni mono Elisabete
39Kanca ecugu jo ankulu bia, Mariya cyegi Nazarete yeni ŋa asisari ma kacu ka angaala, nca bungu le Zide. 40Ntini ye toyi nde nca njo Zakari nde bigi Elizabete. 41Ŋa eyugi ba Elizabete obigi wo Mariya, mwana wooli ma muon nde, nyigi, mpari Oduduma Santi eyi yila nde. 42Nde wobi nkeri nkeri ndi: «Njyami ma ampa we ovuma kabila we vuli akaazi aso, ŋaa nde se mi mpa mwana wooli ma muon we puga. 43Mi na, eli ngwugu a Mfumu mi ya mono mi? 44Ŋaa mono, parabu kabigi we mi ŋa, ŋaa eto acu a mi mwana wooli ma muon mi, nyigi. 45We li nca ovuma, we oyaligi maami ma adugi Mfumu we, mon ma aje kaya.»
Luumu le Mariya
46Ŋaa Mariya ndi#1.46 Lekese nca 1Samuel 2.1-10.:
«Mi ekusa Mfumu ma onini o nde.
47Mi esuere ma Njyami wo vuzuga mi. 48Nde ma kese mi bila nya, mi wo ojanji nde, mbuuru wo oca#1.48 Lekese nca 1Samwel 1.11,
ŋaa mono yiga eca eso be lyele ndi mi ŋa sala.
49Kabila Njyami a mpari mi sa mi maami maave, nkuumu a nde cece.
50Ŋaa nkene nde eli kayila eca ŋa eca, kayila ba ba nyiima nde.
51Ma mpari a nde, nde maasa maami maanini, nde ma cala baali nca etuma ebo ŋa ecimiŋi ba kamba.
52Nde mi kaala angaa mpari kayila ambara a bo, ŋaa nde mi kusa baa abaaka nca mpasi#1.52 Lekese nca Job 5.11, 22.9..
53Nde mi mpa baa abaaka ŋa njala, biibi beeve ekukuna, ŋaa nde mi cuta angaa kabaga jiala onyaŋa.
54Nde mi vuzuga Ezerayele, ajanji a nde, ŋaa nde mi baraga ndagi a nde ye kasi bo, ŋaa nde mi sa bo jaa leeve.
55Ma lemigi le lyeli nde ŋa ankaaga a bizi a be, ma Abarayame bila ampabigi a nde obu-obu.»
56Mariya si nkali angondo atari bila Elisabete, amana nde vurugi mpila nde.
Ekuli e Zan Batise
57Ntini ye ekula Elizabete eto, ŋaa nde kuli mwana wo balaga. 58Abuga ba kiigi ka mpaani a nde bila nkuono nde ayugi ndi Mfumu kiigi ma mono nde nkene, ŋaa bo aswori bila nde. 59Cugu le ompwomon bo akeri mwana #1.59 Lekese nca Levitike 12.3. ŋaa bo asagi mpa mwana nkuumu a taara nde Zakari. 60Ŋaa ngwugu a nde yagi mbari, ŋaa nde ndi: «Kali, acwolo nde ma Zan.» 61Bo ŋa nde ndi: «Okorogo se mbuuru omon nca ankwono we, ngaa nkuumu yia kali.» 62Ŋaa bo asi taara anjiimi ma kaya osumbu wo ba acwolo nde. 63Zakari laayi kampaja ma kateende ndi: «Nkuumu a nde Zan.» Iiin! Ŋaa ekoli baari aso. 64Kancinci ŋa, Zakari jui leyi vuruga, nde baani ka seme Njyami nkeri nkeri. 65Baari aso ba tiniŋa lia a moni kamaŋi, ŋa ba ka lyele ma maami maa nca angaala a Zide aso. 66Aso ba akiigi yuga maami maa akieli mon nca etuma e bo, ŋaa yiga ba alyele ndi: «Mwana wua bunu kaje kaka? Ee, jaajaa Mfumu li bila nde.»
Luumu le Zakari
67Ŋaa Oduduma Santi mpi taara mwana mpari. Nde kalyele maami ma kiigi lyele oduduma nde.
68Ndi:
«Lekuma leka ŋa Mfumu, Njyami a Ezerayele, ma lemigi leyi kese nde baari a nde bila leyi vuzuga nde bo.
69Ŋaa nde mi tuma bizi a be ovuzigi woonini kanca njo Davide wo mfumu, wo osali a nde.
70Mva lemigi le elyeli nde ŋa antuma a nde ayiele ma ntini ye kala, ndi,
71Wo aya vuzuga bizi a be kanca alogi bila kacieze le bizi a be nca jiala e baa ma abele bizi a be!»
72Ŋaa ma bwa nde mvyeri nkene nde ma ankaaga a bizi a be, ŋaa nde kini abaraga ndagi a nde e yiele ye kasi ma bo.
73Mva okezi wo labi Njyami kayila nkaaga a bizi a be Abarayame ma ondigi o bo#1.73 Lekese nca Jeneze 22.16-17. .
74Nde legi ndagi ndi nde avuzuga bizi a be nca jiala ba alogi, ma buni bizi a be lesa janja le nde, ŋaa lebiza bwogo kamono.
75Ma kaka tele bila onyimi ka miizi a Njyami ecugu eso ba omwon o bizi a be.
76Zakari vuri dugi ndi: «Ŋaa we wo mwana mi, ba acwolo we ma ntuma onkara yulu.
Kabila we aje kaka kavuzu o Mfumu ma kaselege etuma e baari ba baajila nde#1.76 Lekese nca Malaci 3.1..
77Mono maami ma alyele we ŋa baari a nde, ma buni bo ayaa ndi Njyami avuzuga bo, ŋaa nde abologo maami maabi a bo.
78Njyami a bizi a be ŋa nkene yeenini bila kadusu, nde alege kawaa ka yulu kayila bizi a be, mva ka kyeme muyi wo enciere.
79Ŋaa kawaa koankulu kia ke ekyeme kayila baali nca lempiibi, bila baali ŋa bwogo ba leku, ma kabira bizi a be nca njila ye kadusu#1.79 Lekese nca Ezayi 9.1..»
80Ŋi Zan kayele, ŋaa nde kawama tii nca ecimiŋi e nde, ŋaa nde yiga nde otu nca biri eli baari kali, tii cugu le baani nde kampa mbari a Njyami kanca Ezerayele.
Currently Selected:
Luke 1: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES