मत्ती 19
19
ईसु छुटा छुटीः राः बारे तेय लाय तेडा
(मरकुस 10:1-12)
1हेना वरी ईसु नआँ कहनी हनी केडते, गलील जिला वरिय चलो एना; अवुर जरदन जोड़ खँडा केते अहूदिया छेतर रेय सेनेना। 2तहाँ हेंय तयोम ते अखीर होड़कू सेनतेडा, अवुर हेना रे रोगिया कुय चिकन तेडा।
3तहाँ फरीसिकू मेंडे कुछ होड़कू अजमोविय लगड हेंय थरे मेजकेन तेकू होंबोर तेडा, “अबू राः धरम नियम राः अनुसार ते कनारा राः चलते तेहो अपन कोड़ीहोन बगिवय जयेज गिआ किदो कोवानू?” 4हेना वरी हेंय जबाब तेडा, “अपे बेगर पे पढ़होआ किदो, भगवान होड़कुय बनो तेड रे सुनुरू रे कोड़ाहोन अवुर कोड़ीहोन बनो केतेय कहनी तेडा, कि
5‘हेनाते होड़ इंगत अपत वरी बेघर कोःते कोड़ीहोन तू सुदाय दोहोना,
अवुर बना होड़ मिनियें टंगाआ देंह कींञ दोहोना?’
6हेनाते हेंकींञ बा होड़ कोवा कींञा, लेकिन मिनियें टंगाआ देंह हवे। हेनाते भगवान जुमो केडकिञाँ, हेंकींञ होड़कू अलोकू अलग किञूँ।” 7#मत्ती 5:31हेना वरी हेंकू कहनी तेडा, “फेर मूसा पंचनमा कागद बनो केते बगिवय मेनते ची लगाडिय कहनी केडा?” 8हेना वरी ईसु कहनी तेडा, “मूसा दो अपे राः मन कठोर गिआ ते बगिवा कू लगाडिय इकावड पेआ, लेकिन सुरू वरी न घयते मेने दोहो गना। 9#मत्ती 5:32; 1 कुरि 7:10,11अवुर इंञ अपे थरेंञ कहनी यडा, कनय हो अपन कोड़ीहोन लंद फँदुः वरी कनर एटाः घियाः चलते तेय बगी वयू, अवुर एटागिय असुल रेदो, हेंय लंद फँदुः तनायू; अवुर जे हेंय बगी वडिय हेंय कोड़ीहोनिय असुल रेदो, हेंय होय लंद फाँदुः तना।”
10चेला कुतय ईसु थरे कू कहनी तेडा, “अगर न घयते इदान रेदो, अनालो बियाहुऊ हे-ना बढ़ियाँ गिआ।” 11हेना वरी ईसु हेंकुय कहनी वडा, “न टेबोः सींड़कू मेने कू जेर सकोआ, लेकिन भगवान जे समझोः राः अकीलिय ओवड कुआ हेंनकू भर जेर सकोआ। 12कहेकि कुछ होड़कू ईनिंगत लाज वरी कोड़ाहोन राः स्वभाव लेयते बेगर कू जनामा। अवुर कुछ होड़कू, कोड़ाहोन राः स्वभाव अलो दोहोन लगड होड़कू उडूंग केडा, अवुर कुछ होड़कू सरग राज लगड अपन आप वरी कोड़ाहोन राः स्वभाव कू उडूंग गोत्तेडा। जे नआँ मनो गिसानिया, हें-नी मनोवे।”
चोंडिजकू आसीर्वादिय ओवडकू
(मरकुस 10:13-16; लूका 18:15-17)
13तहाँ होड़कू चोंडिजकू तीत तेय छुवों कू लगड अवुर बिनती वकू लगड ईसु थरे कू अगतेड कुआ, लेकिन चेलाकू हेंकुकू दबेट तेडा। 14हेना वरी ईसु कहनी तेडा, “चोंडिजकू इंञ थरे पे इकम मेजवा कू, अलोपे मँदा कू, कहेकि सरग राज नेन घियाः कुराः हवे।” 15ईसु हेंकू चोंडिजकू छुयों केकुते आसीर्वादिय ओवड कुआ, अवुर हेना जघा वरिय चलो यनु।
धनमान ढिंगवा अवुर अनन्त जीवन
(मरकुस 10:17-31; लूका 18:18-30)
16मियाँ एस मियाँहोड़ होड़ ईसु थरेय मेजेना, अवुर हेंय थरेय होंबोर तेडा, “ए गुरू, अनन्त जीवन ञँम लगड, करा घियाआ भला कामिंञ कामा?” 17हेना वरी ईसु हेंय थरेय कहनी तेडा, “करा भला गिआ हेना राः बारे ते इंञ ची लगड मी होंबोर यडिञाँ? भला दो मिनियें होड़ इदाना, अगर अम अनन्त जीवन ञँम लगड मी चहोः तन रेदो, हुकूम केड हेनम मनो।” 18हेना वरी ढिंगवा होंबोर तेडा, “करा हुकुमू?” हेना वरी ईसु कहनी तेडा, “कनय अलोपे ञेंड गो-जू, अलोपे लंद फँदुऊ, अलोपे चोचोरा, झूठ मुठ ते गोवाही अलोपे एमेयू, 19अपन इंग आप राः सिमाम रखो, अवुर अपे रेनकू परोसिकू अनापे घयतेपे परेम कू।” 20हेना वरी हेंय ढिंगवा कहनी तेडा, “नआँ दो सींड़िंञ मनो यडा; निहों इंञ थरे करा टेबोः राः कमी इदाना?” 21हेना वरी ईसु हेंय थरेय कहनी तेडा, “अगर अम पक्काः मी चहोः तन रेदो, जू, अमाः अन धन केजा केते गरीब कुम ओवा, अवुर सरग रे अम लगड धन ञँमुआ; अवुर मेजकोःते इंञ तयोम तेम से-ने।” 22तहाँ हेंय ढिंगवा नआँ टेबोः अँजोम केते मन उदास यनतेय चलो यनु, कहेकि हेंय अखीर धनमानिय दोहो एना।
23तहाँ ईसु अनेज रेनकू चेलाकू थरेय कहनी तेडा, “इंञ अपे थरे सही मेतेंञ कहनी यडा, धनी होड़ सरग राज रे बोल लगड तिमीन किलिस गिआ। 24अपे थरे फेरेचिंञ कहनी यडा, भगवान राः राज रे धनी होड़ बोल सेथा दो, ऊँट सुजी बुचाः ते खँडाः हेना सहज गिआ।” 25नआँ अँजोम केते चेलाकू अखीर कू अहचरज यन तेकू कहनी तेडा, “हेंडे दो ईया उबारुआ?” 26तहाँ ईसु हेंकू हनिय तको केतेय कहनी तेडा, “होड़कू सयते दो एरो होया एना, लेकिन भगवान सयते सींड़ होया सकोआ।” 27हेना वरी पतरस कहनी तेडा, “अले दो सींड़ चीज बगी वते अम तयोम तेले सेनियाडा, हेंडे दो अले ची ञँमुआ?” 28#मत्ती 25:31; लूका 22:30हेना वरी ईसु हेंकू थरेय कहनी तेडा, “इंञ अपे थरे सही मेतेंञ कहनी यडा, भगवान नवाँः राजीय बनो रे इंञ होड़ होपोन ईनिञाँः महिमा राः गद्दी रेंञ दुड़ूब रे अपे हो इंञ तयोम तेपे सेनियड हेंकू बारह गोटंग गद्दी रे दुड़ूब कोःते इसराएलिकू बारह गोती रेनकू राः पे न्यायेआ। 29अवुर कनय हो अपन ओड़ाः चहे भाईकू चहे बेहिनकू, चहे इंग आप कू, चहे चोंडिजकू, चहे खेत ईञाः ञुमू राः चलते तेकू बगी वडा, हेंकू सव गुना ञँमुआ, अवुर हेंकू अनन्त जीवन राः हँकदारी कू होयाआ। 30#मत्ती 20:16; लूका 13:30लेकिन अखीर होड़कू मड़ाँगाःकू, तयोमुआँकू; अवुर तयोमाःकू मड़ाँगुआकू।”
Currently Selected:
मत्ती 19: ksz
Highlight
Share
Copy
Want to have your highlights saved across all your devices? Sign up or sign in
© 2022, Wycliffe India. All rights reserved.