Luk 4
4
Sɛtan Oyoma Jisɔs
1Masɛ Jisɔs ukwun kɔ ɔranga kwɛ Jɔdan, ɔkpakpa kwu Ubɨnɔkpaabyi inɨnga abɛ, utɨm-ɛ owem kɔ ɔwang kwɔ ɔnang ɔnɔ urɨg. 2Jisɔs unɨng muma ngwu araw affa ra Sɛtan ɔnang-ɛ eyoma. Ɔttɔg nutsa kɨ ngwu ndo, masɛ ngwu ndo ɛkwɛ wem, okwo ɔkam-ɛ. 3Muma Sɛtan oben Jisɔs abɛ, “Odesɛ ɔma ade Unwa kwu Ubɨnɔkpaabyi wag ɛta nza atsɛ ede utsapfɛ.”
4Jisɔs ɔpɔn-ɛ abɛ, “Aba akkɛr ku nnwɛr kwu Ubɨnɔkpaabyi abɛ: ‘Ɔnang ku utsapfɛ mɨntsen mu urɨg.’ ” 5Sɛtan utɨma Jisɔs opfona ko okpetso kwo ogorogor ɔkɔg-ɛ mazizan ifon ri sawɔsaw rɔ ɔyagbɨn. 6Ukwu oben Jisɔs abɛ, “Amma nɨ nɔng-ɔ ɛffa ɔttara ka abarada pɛ ma tɨma anang ɔttara ki ifon da rɔ ɔyagbɨn, ɛffa nzo abɛ ka amma ananga nkkema nang ɔnang kwɔ ɔdag-m abɛ nnang. 7Pɛrɛ wɛrɛ odesɔ ɔma akpɨg-m, akpow-m, ɔyagbɨn node kwɔ ibɨng.”
8Jisɔs ɔpɔn-ɛ abɛ, “Aba akkɛr ku nnwɛr kwu Ubɨnɔkpaabyi abɛ: ‘Kpowa ɔttara atsera ɔtɔm anang Ɔvaar Ubɨnɔkpaabyi mɨntsen.’ ”
9Sɛtan ɔtaga Jisɔs opfona ga Jɛrusɛlɛm, ɔtag-ɛ obe kɔ ɔwang kwo ogor kidam ga kɔ ɔtsɔm kwa atɨm kwu Ubɨnɔkpaabyi. Sɛtan oben Jisɔs abɛ, “Odesɛ ɔma ade unwa kwu Ubɨnɔkpaabyi kpara ma ɔwang ngwo atto ki iseg. 10Ukwurabe, abɛ kakkɛra ku nnwɛr kwu Ubɨnɔkpaabyi abɛ:
“ ‘Ubɨnɔkpaabyi no oben atɔmɔtɔm pɛ;
aba akker-ɔ ɔdamɔdam.
11Abɛ na dɨr-ɔ kɨ mbɔg ra abɛ,
sa anang nfog atwug kɛ ɛta.’ ”
12Jisɔs ɔpɔn-ɛ abɛ, “Abɛ kakkɛra abɛ: ‘Nang eyoma atɨm ator ɔvaar Ubɨnɔkpaabyi.’ ”
13Ibe rɨn nyoma ndo rɛ Sɛtan ɛra ibɨng, Sɛtan ubɨna urɨg Jisɔs, oror ibe re eyoma ɔkkatsɛ.
Anang Afum Jisɔs ga Nazarɛt
14Jisɔs ukwuna ga Galili nsam rɔ ɔkpakpa kwu Ubɨnɔkpaabyi arɨrɛ, ɔnang kwidede osonga idɨg zuwa rɛ nussi ki ifon ndo. 15Jisɔs okpew anang itɔnga ru Ubɨnɔkpaabyi ka adappa, ɔnang kwidede ɔttag-ɛ.
16Uyɨn ga Nazarɛt kɔ ɔwang kwa aba tɨm-ɛ taar ɔbar, kɛ ɛwɔngkwoga gwu tsi Izɨrɛl, ɛma oseng ɔtɔ nwa kɔ ɔdappa, tsekwɛ ɛmmana tsɛ ede, ubɨna obe abɛ ojer. 17Aba taga nnwɛr kwo otegɛkkawa kwu Ubɨnɔkpaabyi kwo kpen Azaya aba taga akɛ kɔ ɔbɔg. Ɛma gwonga nnwɛr nwo, ose ɔwang kwa aba akkɛr abɛ:
18“Ɔkpakpa kwɔ Ɔvaar unɨnga amabɛ,
ukwurabɛ kam orenga,
abɛ amma ntɨma ɛkkawa zuwa ntsena akpukpora.
Kam ɔtɔma abɛ nteg ɛnnanga tsa agbakɔw nang
ɔttara ka atsen gwonga pa akpatsen,
kam ɔtɔma abɛ nkkana anang pa pɛ na dɔw irem ka anang kɨ mbɔg,
19kam ɔtɔma abɛ nteg utso kwɔ Ɔvaar mɔkɔga uzuwada.”
20Ɛma ɔtaga nnwɛr ubuwa, ɔtaga ɔnang ɔnang kwɛ no okker ɔwang ngwo, ɔraga ɛyar unɨga. Anang mbo pa anɨng ma kɔ ɔdappa aba agwonga atsen akker-ɛ. 21Otto ki itso oteg bɛ abɛ, “Tsemma ɔtɔnga kwu Ubɨnɔkpaabyi akwɛ kuyɨna ɔnang banga otse kwɛ abanga na wanga.”
22Abɛma ibɨng pana wang-ɛ akwɛ okkon bɛ ki itɔnga zuwa rɛ ni iyɨn-ɛ kɛ ɛmma. Aba abɔw, “Unwa kwɛ Josɛf sang mama?”
23Jisɔs oteg bɛ abɛ, “Nsong ma abɛ abanga nateg-m nwer nza: ‘Ussi-ntsakpa gweng ɔma oyen; tse kwa amana awang abɛ ɔma na si ga Kapanum, si otsengwo ma ko ofon kwɔ.’ ”
24Jisɔs oteg bɛ abɛ, “Nnɨ benbɛ nteg banga udɨg ɔkka, otegɛkkawa kwu Ubɨnɔkpaabyi abɛ kɛkatag masɛ ɔttɔg ko ofon kwɛ oyɛn. 25Nnɨ benbɛ nteg banga udɨg ɔkka, apokwa asawɔsaw ki Izɨrɛl ki ibe rɛ Ɛlaija ki ibe ru Ubɨnɔkpaabyi ɔkpag ɛrang abɛ ɔnang assi otew ki itso ittan ɔman iwaga, okwo pfi itɨtam ukwu ki iseg ri Izɨrɛl. 26Ubɨnɔkpaabyi Ɛlaija nɔtɔma abɛ ɔtɔkkana apokwa pi Izɨrɛl, ɔmanga ɔtɔmɛ ko opokwa kwa Zarɛfat ki iwang rɛ Sidon. 27Adɛgɛ, anang gbag-gbag pa akpokora amma bɛ ki Izɨrɛl ki ibe rɛ Ɛlaisha, otegɛkkawa kwu Ubɨnɔkpaabyi, ɔnang wan wan kwo gweng gweng kode oyonga Neman kwu bɨn Siriya.”
28Anang mbo ibɨng akwɛ ɔdwag bɛ tɔng sa aba wang ɔtɔnga kwɛ Jisɔs masɛ aba nɨng kɔ ɔdappa. 29Aba bɨna abe, aba akuw-ɛ uyɨn ko ofon, aba tɨm-ɛ aba awem ko okpetso kwo ofon ngwo urɨg fasɛ aba annun-ɛ ake ma ke eppe. 30Jisɔs oseng bɛ ma opfona.
Jisɔs Ukuw Ɔkpakpa Pyuwa
31Jisɔs oseng opfona ko ofon kwa aba jer Kapanum ki iseg rɨ Galili, igwu zan kɛ ɛwɔngkwoga gwu tsa abɛ, Jisɔs no okpew bɛ ɔtɔnga kwu Ubɨnɔkpaabyi. 32Akwɛ okkon bɛ ke ekpewa tsa Jisɔs, ukwurabɛ ɔtɔnga kwɛ ɔkam ɛffa.
33Ketanga kwɔ ɔdappa masɛ Jisɔs nɔnang ekpewa nzo, udwunɨng wan kwa ɔkpakpa pyuwa ibuw-ɛ ɔgama ɛmang kɛ ɛrang, 34“Hee, Jisɔs kwɛ Nazarɛt, aror bugudɨg abbabɛ? Akwu aba kwa alɨg mana? Nsong ɔnang ɔma kwɔ ma ade: Ɔnang kwu Uwuruwur kwu Ubɨnɔkpaabyi.”
35“Myi tɔng!” Jisɔs ɔkpɛm-ɛ “Yɨn ki iyan rɨg udwunɨng nwa.” Ɔkpakpa pyuwa nwo unnun udwunɨng nwo ɔzɛ ki iseg. Ka atsen pa abɛma ibɨng, ɔkpakpa pyuwa uyɨn, eden kɛno orenga!
36Anang mbo ibɨng akwɛ okkon bɛ, aba awag atɔnga ayog abɛ, “Bɨg itɔnga dɔ ma? Kɛ ɛffa ɔttara kɨ nsam udwunɨng nwama oben akpakpa pyuwa apyɛ iyɨn.” 37Idɨg rɛ unusi arɛ immana ki ifon ndo ibɨng.
Jisɔs Ogweng Anang Pa Sawɔsaw
38Masɛ Jisɔs ubɨn kɔ ɔdappa oseng uyɨn kɔ ɔtsɔm kwɛ Saimɔn, ibe ro owem, okew ɔnyɛ kwɛ Saimɔn sa adodɛnya pyuwa ammɛ, aba atsɨn Jisɔs abɛ ogweng-ɛ. 39Jisɔs obe ɔbang-ɛ, ɔkpɛm adodɛnya mbyo, adodɛnya ibɨna irɨg-ɛ, ukwanɨng nwo ubɨna obe otɨtso ku utsapfɛ pfɛ mɔ ɔnang bɛ.
40Masɛ ɛtsɔga ekwe ewem anang pa asawɔsaw aba tɨm anang pu mmada kakɨra-kakɨra aba tsenɛ Jisɔs, ɔnan bɛ ɔbɔg, ogweng bɛ mmada ndo ibɨng. 41Adɛgɛ, akpakpa pyuwa iyɨn irɨg anang pa asawɔsaw, aba agwon kɛ ɛrang, “Ɔma wɔ ade Unwa kwu Ubɨnɔkpaabyi.” Jisɔs ɔkpɛm bɛ abɛ ɛwang bɛ nuriga, aba atɔnga ukwurabɛ aba song ma abɛ ɛma wɔ ode Krais.
42Si igwu etsow, Jisɔs ubɨna ga ko ofon opfona kɔ ɔwang kwɛ ɛma munɨnga mɨntsen. Anang aba atitso arror-ɛ, ibe rɛ aba kwa asɛ aba ayɔr aba tsog-ɛ ɔnang ubɨn urɨg bɛ. 43Jisɔs oteg bɛ, “Nɨtɨm ɔtɔnga zuwa ngwa kwɛ Ɛvaar tsu Ubɨnɔkpaabyi nteg ifon ɔdwɔgɔdwag, ukwurabɛ Ubɨnɔkpaabyi wɔ ɔtɔm-m.” 44Jisɔs ubɨna osenga oteg bɛ ɛkkawa tsu Ubɨnɔkpaabyi ka ɔdappa pa Judiya.
Currently Selected:
Luk 4: mfn
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation