Neto'te 41
41
Njem tse Faraon yen nà
1A lo be kum ngu'njù bàa ndaṅndaṅ, Faraon yen njem. A yen ntùm njem mb'a tsin kaṅntse Nil là; 2a yen mfô sammbàa tum ntùm Nil, ndù bo bwô, ndune, nto' nefèt nenà kaṅntse. 3A bèn mbe yen tsemo' mfô sammbàa bèn ntum ntùm Nil njam tse mbwe. Ntshù mub bag neshu, ndù bo jum kua' neshu. Bo tsinte mbaṅ mfô nedune, num kaṅ Nil. 4Tshen mfô nebage, jumte là mfèt mfô sammbàa ts'a bwô, ts'a dunte là. Miaglo keb tu Faraon.
5Faraon bèn nzi, njen mbatte njem bàa. A yen tsha nsa sammbàa tum num tun nsa ntshù'. Tshen tsha nsa là dun, mbwô, ntswe. 6A bèn njen tsemo' tsha nsa sammbàa tse nejume, tse fetmbaṅ bag mbinyam lab i là tum njam tse mbwe. 7Là tsha nsa sammbàa tse nejumte mi tsha nsa sammbàa ts'a dunte, ngu' là. Yen ngelaṅ nà, miaglo keb tu Faraon, a yen ndù a lo mb'a njem.
8Njù #Dan. 2.2làn, zenu Faraon tshu', a ghù bo tsiaṅ njoṅ tse ghangàm fa boa njoṅ tse ghazenu fa. Faraon soṅ njem ts'a lo njen nà, sàm mèn ke ku'ni netote ntun mi yi.
9Ndùlala mfen ghama' ndu' tshob Faraon ndù: A bwô me bam mfànnu màm sènni. 10Faraon lo ya ntù num ghafa' tse, ngù bo ma' àm ndàtsha, ntùm ndà mfen ghabéb ntshwèt bag mfen ghana bàn. 11A lo be mo' tèttswe', bag yen njem, mba we lo yen ze njem, mi mbagte ntun njem be tù' i. 12Bag à mo' ménnshum lo be bwe, ze Héber, ngafa' mfen ghabéb ntshwèt. Bag lo soṅ i njem tse bag yen nà, a tote mba ze njem we lo yi. 13A lo tum num bag be ndaṅndaṅ mb'a tshob là: Tu wul àm, o lo bèn njab àm num yàm dù' fa', ntaṅ mfen ghana bàn tù.
Yosèf bagte tun njem Faraon
14Faraon tum bo nèn ntsiaṅ Yosèf. Bo sô i ndàtsha ndende; Yosèf kom tu i. Mbate nzwe tse, nèn mbwe Faraon. 15Faraon tshob Yosèf ndù: Me yen mo' njem, mèn z'a tote ntun mi me là ke be. Là, me ju' bo tshob ndù a be z'o ju' ta' njem nà, mb'a b'o tote ntun mi. 16Yosèf bùnte Faraon ntshob ndù: A ke b'a me, a b'a Nsi nsi bèn bùnte tshob ju z'a bwô num Faraon nà yi.
17Faraon tshob Yosèf ndù: Me lo tsin kaṅntse Nil ntùm njem, 18mbe yen mfô sammbàa ts'a dunte, ts'a bwô là tum ntùm Nil, nto' nefèt nenà kaṅntse. 19Tsemo' mfô sammbàa tum njam tshen tse mbwe là, ndù bo li, mbag neyene, njum neshu. Me ke' to' yen lèn tshen bagkèt tse là sàm dù' mum ngô Egipto. 20Tshen jumte mfô mba bagkèt tse là fèt mbwe mfô sammbàa ts'a dunte là, 21nso yub bam bo, sàm mèn ke lèn ndù bo tsho bam bo, ntshù mub bèn mbe be nebag mb'a lo mbe mbwe là. Miaglo keb tu àm. 22Me bèn njen njem, njen tsha nsa sammbàa ndù a dun, mbwô, tum num tun nsa ntshù'. 23Me bèn njen tsha nsa sammbàa ts'a bi to'o, njumte, ndù fetmbaṅ bag mbinyam lab i fa là tum njam tse mbwe. 24Tsha nsa nejumte sammbàa mi mbwe tse ts'a bwô là. Me tshob tshàm ghangàme, là sàm mèn ke' tote ntun mi mfà me.
25Yosèf tshob Faraon ndù: Njem tse Faraon yen nà b'a ta' ju ntshù'; Nsi diag à neghù Faraon lèn ju z'a nsi ghù là. 26Mfô mebwô sammbàa b'a ngu'njù mebwô tse sammbàa, tsha nsa sammbàa b'a ngu'njù sammbàa. A b'a ta' njem ntshù'. 27Mfô sammbàa ts'a tum njam tse mbwe ndù bo jum, mbag là b'a ngu'njù sammbàa, tsha nsa sammbàa tse nebi to'o, tse fetmbaṅ bag mbinyam lab i là, nsi b'a ngu'njù nziku' sammbàa. 28Ndaṅndaṅ mba me lo netshob Faraon nà, Nsi diag neghù Faraon lèn à ju z'a nsi ghù là. 29Tshù, ngu'njù jujù nsi be ntùm njoṅ ngô Egipto fafa sammbàa. 30Tshen nà nsi be tôge, ngu'njù nziku' sammbàa be. Bo nsi lag ngu'njù jujù ts'a be mum ngô Egipto là, nummbe nziku' nsi biagte ngô. 31Nebwoṅ jujù nsi be ntùm ngô, ndùse yen nziku' là nsi se' là, nummbe yen nziku' là nsi ta gha' mbu. 32A be ze njem nà lo nse' mbwe Faraon yoṅ bàa là, mb'a b'a ndù Nsi yab ntù i ndù yen nu là nsi be. Nsi a' ghù ndù yen nu là bumte kua' ndende. 33Yosèf tshob Faraon ndù: Ndonni, tsho' ta' mènntùn z'a zi'te, mbe ngazenu là, njab i num tu ngô Egipto. 34A bwô ndù Faraon yabte ghafa' mum njoṅ Egipto fa; nànte benntùn ndù bo ke ngabte jujù nze tàn, mfà bag ntshù' bo ke ndeme, ndùlala num ngu'njù sammbàa. 35Bo nsi tse'te jujù num tshen ngu'njù ntùn nà ts'a tshwèt nse' là; bo nsi lem njoṅ i fa ntùm nta, tu wut Faraon ke nte lag bwe; a bwô bo lé' njoṅ jujù fa ntùm ntusô ndùbndùb. 36Njoṅ yen jujù fa là nsi ywimte ngô mum ngu'njù sammbàa tse nziku' vù, mum ngô Egipto là, ndù kà ngô kwù nziku'.
Yosèf tù' nkambwe'e mfen Faraon
37Men ntshob là bwô Faraon boa njoṅ ghafa' tse fa. 38Faraon tshob ghafa' tse ndù: Be be fon mo' mènntùn ze ywèt Nsi be num i mba yen mèn ni là ké? 39Ndùlala Faraon tshob Yosèf ndù: Mba Nsi ghù o lèn yen njoṅ nu li fa là, mo' mèn z'a zi'te, mbe ngazenu mba wù là ke bwe. 40Me #Mfa' Gha. 7.10te à wù num tu ndà àm; mba ke lo z'o nsi tshob là, njoṅ yàm ngô fa nsi ju' bame; me nsi lo' à nda' ko'fen tshùa o yi mum ngô. 41Faraon tshob Yosèf ndù: Tshù, me yab o num tu njoṅ ngô Egipto fa. 42Faraon #Dan. 5.29sô mbwô bu i, ma' bu Yosèf, ma' ṅwa'ṅwa' nzwe mebwô num i, ma' ntàmtu' gol tô i. 43A ghù Yosèf ko' ntswe ntùm kalig s'a na' mbe njam se num nu bwô là, bo nke nkua' mbwe i, ntshob ndù: Bin kab tu zin nsi.
Tshù mba Faraon fà ngwùt njoṅ ngô Egipto fa bu Yosèf là. 44Faraon bèn ntshob Yosèf ndù: Me b'a mfen Faraon: Nda' ndù a ke wù mba sàm mènntùn ke nsi bù' bu i ke ku i lo nsi ntùm njoṅ ngô Egipto fa. 45Faraon yab lén Yosèf ndù Tsafnat Paenéak; a fà mènnzwi Yosèf, lén se Asnat, ngon Potiféra. A b'a ngon ngale'te Nsi z'a ke ntswe tusô On nà. Yosèf zinte ntùm njoṅ ngô Egipto fa num nelèn dù'.
46Yosèf lo be nèn mbwe Faraon mfen Egipto ndù a ghù ngu'njù ṅam ntat; ndùs'a lo mbwe Faraon nà, a katte ntùm njoṅ ngô Egipto fa.
47A be num ngu'njù sammbàa tse njù bwô là, tsha' fà jujù kua' yàme. 48Yosèf tse'te jujù num tshen ngu'njù sammbàa là ntùm ngô Egipto; a kùmte tshu ntùm ntusô ndùbndùb fa, njab tshu ts'a tum ntùm nà ts'a ghebte là mba sit tusô ndùb lo. 49Yosèf tse'te nsa, a yàm mba nkwango' dibantse là, njàm ntshùate kà bo ke bèn nesiaṅe, nummbe njoṅ i lo ke bèn nebe.
50Ngu'njù nziku' lo be se', ndù Asnat ngon Potiféra, ngale'te Nsi z'a ke ntswe tusô On nà bwe bon bandum Yosèf bàa. 51Yosèf tswi lén tuswe i ndù Manasé, nummb'a lo tshob ndù: Nsi ghù me lag njoṅ nge' àm fa bo ndà tàa. 52A tswi lén mbatte bàa ndù Efraim, nummb'a lo tshob ndù: Nsi ghù me jù bin ntùm ngô ze me yen nge' bwe là. 53Ngu'njù jujù sammbàa ntùm ngô Egipto tôg. 54Ngu'njù #Mfa' Gha. 7.11nziku' sammbàa to' nese' ndaṅndaṅ mba Yosèf tshob là. Nziku' be ntùm njoṅ tsemo' ngô fafa; là ntùm njoṅ ngô Egipto fa jujù ke bwoṅ bwe.
55Ndùse #Yoha. 2.5njoṅ ngô Egipto fa to' neju' nziku' là, bo kua' Faraon num nu jujù. Faraon tshob njoṅ ba Egipto fa ndù: Bin nèn ntèt Yosèf, ngù ndaṅndaṅ mb'a nsi tshob bin nà. 56Nziku' be njoṅ dù' fa mum ngô Egipto. Ndùlala Yosèf tsho' njoṅ nze nta fa, nswèn nsa ba Egipto. Nziku' nke nèn be mbwe mà Egipto. 57Benntùn nke ndo ntùm ngôngô nèn jun nsa Yosèf mà Egipto; nummbe nziku' lo ta neshu ntùm njoṅ ngôngô fa.
Currently Selected:
Neto'te 41: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.