Neto'te 26
26
Tshô Isak bo Abimélék
1Mo' kekua bèn mbe ntùm ngô, njab mbaṅ z'a be num ze ngelaṅ Abraham nà. Isak nèn mbaṅ Abimélék mfen ba Filistia. 2Tshùaben tèt Isak ntshob yi ndù: Kà swe' nèn mà Egipto, tswe ntùm ngô ze me nsi tshob wù là. 3Tswe #Net. 22.16-18mum yen ngô li. Me nsi be bag wù, yab kàn wù, nummbe me nsi fà tshen ngô li wù mba nzwil o, me nsi ghù ndù nu ze me na' nka' tàan Abraham nà bumte; 4me nsi ghù nzwil o yàm mba nsa mi a mfe kamànyam nà, me bèn mfà tshen ngô li nzwil o; me nsi tshùa njam nzwil o kà yab kàn njoṅ ngôngô nsitsha' fa. 5Nummbe Abraham lo ju' nz'àm, nze ju ze me tshob là: Ntag màm, nkàn màm boa ntshù' màm.
6Ndùlala Isak tswe Gérar. 7Ngelaṅ #Net. 12.13; 20.2ze ba la' ke mbètt'é nu num nzwi i là, a tshob ndù a b'a mfèl i. Nummb'a lo ke mbwôg ndù a be z'a tshob ndù a b'a nzwi i là, mba bo nsi zwi i, nummbe Rébéka lo bwô neshu. 8Mba bo tswe mum ngô yàm nà, Abimélék mfen ba Filistia be mo' lé'njù mbe lôte tôndà njen Isak bo nzwi i Rébéka nke ngag tshobe. 9Abimélék tsiaṅ Isak ntshob ndù: Kua' nenùn a b'a nzwi o. A tshùat'a ndùke k'o na' ntshob ndù a b'a mfèl o à? Isak bùnte yi ndù: Me na' ntshob ndùlala nummbe me lo ke mbwôg nekwù vù num tu i. 10Abimélék tshob ndù: O ghù bag ndùlala numke? A tsi metsili mo' ndù mba mo' mèn ntùm ngô lo' nzwi o, a tshùa num tu o bag tù' ghafànnu. 11Ndùlala Abimélék fà sen kàn ni mum njoṅ ngô fa ndù: Mèn z'a nsi kwag yen mandum ni ke nzwi i lo là, mba bo nsi zwi ng'é. 12Isak ywit tshu ntùm yen ngô là. Ntsho' tshu yen ngu'njù là, a yàm ntshùa tsemo' ngu'njù yoṅ nkù; nummbe Tshùaben lo yab kàn yi. 13Yen mandum ni tù' ngaju, ntù' ke ngù ju nèn yi be mbwe tà nkum ndùs'a tù' kua' ngaju tshùate là. 14A lo ghù bwoṅ nyàm, tse nke'nke' boa tse ndùbndùb, ngù ghafa' yàme.
Isak bo Abimélék wat kàn
A tshùa ndùlala ba Filistia te lag ghe'te num i. 15Ba Filistia lo' tsha' nzwiag njoṅ ntôntse fa mi ghafa' tàab na' ntswe' num ze ngelaṅ tàab Abraham nà. 16Abimélék tshob Isak ndù: Tum la' bag nène, nummb'o ta ntshùa yag neshu. 17Isak lo bwe nèn nte nkàn tômbo' Gérar. 18Isak bèn ntswe' ntôntse mi bo na' ntswe' num ze ngelaṅ tàab Abraham, ba Filistia zwiag ndùse tàab Abraham kwù là; Isak bèn njab à be ndèn mi tàab yab là men ntôntse là.
19Ghafa' Isak tswe' ntse tômbo' mfon ntse nefite bwe, a nke ntume. 20Ghabéb mbwe tse bo Gérar là kam ntsha boa tse Isak, ntshob ndù: Men ntse li b'a mage. Isak yab lén tôntse là ndù Esék, nummbe bo à bo lo kam ntanta num bwe. 21Ghafa' Isak bèn ntswe' mo' tôntse, bo bèn nkam tantshu mba num sen nà; Isak yab lén se ndù Sitna. 22Bo lo nsen nà nèn ntswe' mo' tôntse. Bo ke kam ntsha num sen tôntse là; Isak yab lén se ndù Rehobot. Nummb'a lo tshob ndù: Ndonni Tshùaben ghù bag gha'te wut yag, bag nsi nèn mbwe mum ngô.
23A lo nko' nèn Ber-Shéba. 24Tshùaben ṅwag, ntèl i yen tèttswe' là ntshob yi ndù: Me b'a Nsi tàan Abraham. Kà bwôg sàm ju, bag wù bèn mbe, me nsi yab kàn wù, ghù nzwil o yàm num lén ngafa' àm Abraham. 25A bom tômbwôg bwe, ntsiaṅ lén Tshùaben, nyitte ntàb i bwe, Ghafa' Isak tswe' tôntse bwe.
26Abimélék #Net. 21.22nèn mbaṅ Isak mà Gérar, bo shun i Ahuzzat mba Pikol ze tàndà ntsho. 27Isak tshob bo ndù: Mba bin be mbàn àm, mbe ndù bin lo ta' àm la' bin nà, numke bin nse' mbaṅ àm à? 28Bo tshob ndù: Bag lo yen kua' mebwô ndù bin Tshùaben bèn mbe, ndùlala bag tshob ndù a bwô ndù bag bin ghù nkàn mfe netèt be num nu fite, mbèn ngwat mba kàn netèt be. 29O ke nsi ghù sàm kebwô num bag, be ndaṅndaṅ bag lo ke kwag o, là ngù be nda' mebwô num o, nta' o ntùm fite. Ndonni o b'a mèn ze Tshùaben yab kàn yi là. 30Ndùlala Isak ghù jùa num lén sobe, bo jù njwèle, mbèn nu. 31Bo lo nsi nkebnjù nkàn mfe bo bo, Isak lé'te yube, bo lo la' i, mbèn njam ntùm fite.
32A be num sen lé'njù là, ghafa' Isak se' nsoṅ i nu num tôntse se bo tswe' là, ntshob ndù: Bag fon ntse! 33A yab lén se ndù Shiba. A ju z'a ghù kà bo njab lén yen ngô là ndù Ber-Shéba, tà nse' nkum sènni là.
Nandà Esau
34Esau lo kum ngu'njù ṅam nkuà, nso bènnzwi, lén mo' Judit, ngon Beéri ze Hétia, lén mo' be Basmat ngon Elon ze Hétia. 35Tshen bènnzwi là kag zwentù yàm ntù Isak bo Rébéka.
Currently Selected:
Neto'te 26: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.