Neto'te 24
24
Mba Isak bo Rébéka nandà là
1Abraham lo ywène, ngu'njù tse nèn mbwe, ndùlala Tshùaben yab kàn Abraham, a be ngafu' num njoṅ tshu fa. 2Abraham tshob ngafa' i z'a tswe ndà i yàme, mbèn mbe ngalé' njoṅ tshu tse fa là ndù: Me le't'o, yab bu o njam tammbwe àm; 3ndù me ghù o kàn mfe num lén Tshùaben. Kàn mfe num lén Nsi nganabte kamànyam bo tsha' ndù o ke nsi diag nzwi nshum àm à netèt ngonngon Kanaan, tse me tshwèt ntswe netèt bo là. 4Tshob me ndù o nsi nèn à ntùm ngô àm mba ntùm yàm nzwit diag nzwi nshum àm Isak bwe.
5Ngafa' bùnte yi ndù: Be mo' ndù mènnzwi ke kô nebwe àm, nse' ntùm yen ngô li. A mbe ndùlala me lo' nshum o nèn yi mum ngô z'o tum bwe là ké?
6Abraham bùnte yi ndù: Bamnà nelo' nshum àm nèn yi bwe. 7Tshùaben, Nsi kamànyam, z'a na' ndo' àm ntùm ndà tàa, mba mum ngô ze bo bwe àm bwe là, lo tshob me nsaṅlaṅ bwe, ntshob ndù: Me nsi fà yen ngô li nzwil o. Tu wul i nsi tum Angél i mbwe o; o nsi nèn à bwe diag nzwi nshum àm bwe. 8A be z'a ke' bwe o là, mba ju ke ghù o num nkànmfe z'o ghù me là. A mbe be ndùke lo kà lo' mén àm nèn yi bwe. 9Ndùlala ngafa' Abraham yab bu njam tammbwe tàfa' i, nkàn mfe num yen nu là.
10Ndùlala ngafa' Abraham lo' kamél gham netèt kamél tàfa' i ndo ntam nze; a bèn ndo' bon tshu mebwô ts'a la' tàfa' i là mfét tun bu i. A lo ntam nze nenèn Aram Naharayim, ngô Nakor. 11A ghù ba kamél nôte nsi njam ngô, mbaṅ mo' tôntse ndù mfetnjù, ngelaṅ bènnzwi be ntum nse' tu' ntse là. 12A tshob ndù: Tshùaben, Nsi tàfa' àm Abraham, ghù me fon ju ze me tshwèt ndiag là sènni, ghù bwôntù num tàfa' àm Abraham. 13Tshù me li me tsin mbaṅ ntse là, ngonngon benntùn tshwèt ntumte mum ngô nse' tu' ntse. 14Ménngon ze me nsi tshob yi ndù: Ben so tshaṅ ntse me nu, a tshob me ndù me nu, a bèn mfà mba mi ba kamél là b'a yen nà z'o tsho' njab ngafa' o Isak là. A nsi tshùa ndùlala me lèn ndù o ghù bwôntù num tàfa' àm Abraham.
15Mb'a be ke yoṅ miagte netshob là, Rébéka ṅwag ndù a te tshaṅ ntse nkembe' i. A na' mb'a ngon Bétuél, nshum Milka nzwi Nakor mfèt Abraham. 16Ménngon nà lo bwô neshu, num se i, mbe ketabte, sàm mandum ke yoṅ ndèn i. A swe' ntsho ntse, ntu' ntse k'a dun, a tum. 17Ngafa' Abraham kù nde nèn mbumte bo yi, ntshob ndù: Faṅ me nu mén ntse ntùm tshaṅ ntse so.
18A bùnte ndù: Nu me tshùaben àm. A nànte neswe' tshaṅ ntse mum mbu mi, mfà ntse yi a nu. 19Ndùs'a miagte nefà ntse yi là, a tshob ndù: M'a' tu' ntse mfà mba kamél tsho tà nkum ngelaṅ bo nu yub njoṅ i ku' là. 20A nànte nsô ntse mi a tshaṅ nà ntùm let ntse ba nyàm, nkù nde nèn ntu' ntse, ntu' ntse num njoṅ kamél tse fa. 21Mandum nà nke ndôt'é ntùm netshàme, ke tshob sàm ju, nke mbéb neyen a be ze Tshùaben ghù a jù bin nkatt'é ke nga lo là.
22Ndùse ba kamél miagte nenu ntse là, mandum nà lo' kwa tanjoṅ bo mbwô tanjoṅ mbàa mfà yi, 23ntshob ndù: O b'a ngon we? Me labt'o, soṅ àm. Be dù' nezi be ntùm ndà tàan bag zi bwe ké? 24A bùnte ndù: Me b'a ngon Bétuél, nshum Milka bo Nakor. 25Mbèn ntshob yi ndù: Bèn bo nenà nyàm num la' bag yàme, mba dù' nezi bwe. 26Ndùlala mandum nà kwim ntunkekwi' mi nsi mbwe Tshùaben. 27Ntshob ndù: Ghamte be Tshùaben, Nsi tàfa' àm Abraham; a ghù bwôntù i num tàfa' àm, mbèn mbe mèn nenùn yi. A Tshùaben bèn ntshagt'àm num manze tà nèn nkum ndà fèt tàfa' àm.
28Ménngon nà kù nde nèn ndà màab, nsoṅ i tshen nu là. 29Tshù, Rébéka lo ghù mfèl i ze mandum lén se Laban. Laban tum nkù nde nèn mbaṅ mandum nà mbaṅ ntse. 30Ndùs'a yoṅ njen kwa tanjoṅ bo mbwô tanjoṅ bu ngon màab, mbèn njoṅ nju' ntshob mi ngon màab tshob ndù: Mandum nà tshob me ndù; a tum nèn mbaṅ mandum nà z'a ke' mbaṅ ba kamél mfe tu ntse là. 31Ntshob yi ndù: Ngafen mbwe Tshùaben, se'e. Numk'o ntswe ntshundà à? M'a nabte dù' ndà mba dù' ba kamél. 32Mandum nà se' ndà, Laban kiagte tshu num ba kamél, mfà bèn bo nenà bo. A fà ntse mandum mba ben tse bo à bo be là ndù bo sôg nku mub yi. 33Bo fà jujù yi, l'a tshob ndù: Me ke nsi jù jujù ke be ndù me tshob ju z'a bam àm nà. Laban bùnte ndù: Tshobe.
34A tshob ndù: Me b'a ngafa' Abraham. 35Tshùaben lo' tàfa' àm ngù ngafu' yi, a tù' ngafu' ze ndùb: A fà mbwe boa ba nyàmna' yi, mfà nkàb bo gol yi, mfà ghafa' tse bandum boa tse bènnzwi yi, mfà ba kamél bo nkekwèn yi. 36Sara nzwi tàfa' àm lo bwe mén mandum yi ndùs'a ywèn nà, a fà njoṅ tshu fa ts'a ghù là mén nà. 37Tàfa' àm lo ghù me kàn mfe ndù me ke nsi diag nzwi nshum i a netèt ngonngon Kanaan ts'a be ntswe netèt bo là. 38A lo ntshob mbe ndon nsi tsho tu àm, a be ze me ke' nèn à ndà tàab, ntùm tunndà i, ndiag nzwi nshum i bwe là. 39Me lo tshob tàfa' àm ndù: Mo' ndù mènnzwi ke nsi kô tse nebwe àm! 40Abraham tshob me ndù: Tshùaben ze me ke nzin mbwe i là nsi tum Angél i wù bin yi nène, a nsi ghù ndù o jù bin yu nkatte: O nsi diag nzwi nshum àm à ntùm tunndà àm, ntùm ndà tàa. 41Ndùlala ndon àm ke nsi tsho tu o, a be z'o nèn ntùm tunndà àm nà. A be ze bo gha wù là, mba ndon àm ke nsi tsho tu o. 42Me fe nzin nkum ntshu ntse sènni, ntshob ndù: Tshùaben, Nsi tàfa' àm Abraham, me le't'o ndù o la'te manze z'a bwô ndù me tshùa bwe yàm nkatte bumte là me. 43Tshù me li me mbaṅ ntse là, mba zit ménngon neku' lo z'a nsi tum se' tu' ntse, ze me nsi tshob yi ndù: Bam ndù me nu ntse ntùm tshaṅ so, 44a bùnte me ndù: nu me bèn ntu' mba mi kamél tsho là, b'a mènnzwi ze Tshùaben tsho' njab nshum tàfa' àm nà. 45Me lo ke yoṅ miagte netshob yen nu là ntù àm, Rébéka ṅwag ndù a te tshaṅ ntse nkembe' i. A swe' ntsho ntse, ntu' ntse, me tshob yi ndù: Me le't'o fà ntse me, me nu. 46A nànte nte tshaṅ ntse se nsi ntshob ndù: Nu, m'a' fà mba mi kamél tsho. Me lo nu, a bèn mfà mba mi kamél tshàm. 47Me lo mbètt'é ndù: O b'a ngon we? A bùnte ndù: Me b'a ngon Bétuél, nshum Milka bo Nakor. Ndùlala me lo nso kwa tanjoṅ ntselag i, nso mbwô tanjoṅ mbàa bu i. 48Nte ntunkekwi' màm nsi ngwù nsi mbwe Tshùaben, nyàmte Tshùaben, Nsi tàfa' àm Abraham, z'a tshagt'àm num manze ntùn, ndù me diag ngon mfèt tàfa' àm, mfà nshum i là. 49Ndonni a be ze bin kô neghù bwôntù bo nenùn tàfa' àm nà, bin tshob me, ndùlala ndù me lèn mba me nsi ghù là.
50Laban bo Bétuél bùnte ntshob ndù: Yen nu là fe à Tshùaben. Be bag ke tshob nu num bwe. 51Tshù Rébéka là mbwe o, lo' i nèn yi, a be nzwi nshum tàfa' o, mba Tshùaben tshob là. 52Ndùse ngafa' Abraham ju' men ntshob li là, a vù nsi mbwe Tshùaben. 53A sô nkwa, nkàb boa mi gol, boa nzwe, mfà Rébéka; a fà tshu tanjoṅ mfèl i mba màab. 54Bo jù mbèn nu, yi mba benntùn tse bo se' tshag i là, mbèn nzi.
Njù làn, bo lo nsi, a tshob ndù: Bin faṅ me nèn ju tàfa' àm. 55Ndùlala mfèt Rébéka bo màab tshob ndù: A bwô ndù bag à ménngon bèn ngubte tsemo' bon lé'njù, nguan lé'njù gham, k'a nène. 56L'a bùnte bo ndù: Mba Tshùaben ghù njoṅ i fa bumte là, kà bin bèn ngù me ghubte nsen ni. Bin faṅ me nène, nèn ju tàfa' àm. 57Bo tshob ndù: Be tsiaṅ ménngon mbètt'é mi nkwate. 58Bo tsiaṅ Rébéka mbètt'é ndù: O kô nenèn bin yen mandum ni ké? A bùnte ndù: Me kô kua' mebwô. 59Ndùlala bo faṅ ngon màa yub Rébéka mba nz'é nèn boa ngafa' Abraham, boa benntùn bo à bo be là. 60Bo yab kàn Rébéka ntshob ndù: Mfèt yag, a bwô ndù ben ntsha'ntsha', ben ntshu'ntshu' tum num o! A bwô ndù nzwil o lo' ngô ghakeban tse.
61Rébéka boa ghafa' tse tse bènnzwi lo nsi nko' num ba kamél, ntam njam ngafa' Abraham. Ngafa' Abraham lo' Rébéka nène.
62Isak lo se' kônkwa, tôntse Lasha-Roi, nummb'a ke ntswe à ntùm ngô Négéb. 63Tshù, Isak tum nke nkatte ndù mfetnjù mà tshwèt, mbù' miag mi njen bwoṅ kamél nke nse'e. 64Rébéka bù' miag mi njen Isak, njwèt num kamél ngwù nsi, 65ntshob ngafa' Abraham ndù: Yen mandum din z'a tshwèt nse' mà tshwèt bag bin bo bumte là b'a we? Ngafa' Abraham bùnte ndù: A b'a tàfa' àm; ndùlal'a lo' kam nzwe nkabte se i yi. 66Ngafa' Abraham soṅ Isak njoṅ tshu fa ts'a ghù là. 67Isak lo' Rébéka ntsho i mum ntàb i. A lo' i k'a tù' nzwi i. A kô i. Ntù Isak fite mb'a na' mbe be ndù màab kwù là.
Currently Selected:
Neto'te 24: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.