Neto'te 19
19
Bo be bagte ngô Sodom, Lot yôg
1Angél bàa kum Sodom mfetnjù. A lo be be ndù Lot tswe nsi ntshu mbu' ngô Sodom. Lot yen yub ndo nsi nèn mbumte boa bo, ngwù nsi kabkab. 2Lot tshob ndù: Me le'te ba Tshùaben ndù bo bam neswe' nèn la' ngafa' yub me nzi bwe, nsôg nku mube, kà njù ndàn bo mbèn ntam manze. Là bo tshob ndù: Nga, bag zi à nsen ni. 3A nànte yub neshu kà bo nèn la' i, ntsho ndà. A nabte jujù bo, ngù bo na bàn ke te ywibte, mfà bo, bo jù.
4Ndùse bo be ke yoṅ nô kunndà là, ba ntùm ngô, ba Sodom, neto' num bônke' nkum num ywèn benntùn se', ndiaṅ ba' mbume; njoṅ benntùn fa kù nde nse'e. 5Bo #Ghasa'. 19.22-24tsiaṅ Lot tshob yi ndù: Benntùn tse bo se' ntsho ndà o yen tèttswe' li là yà? Ghù bo tum nse' njù bag nô yube. 6Lot tum nèn mbaṅ bo ntshundà, mfùn nzendà njam i. 7Ntshob bo ndù: Fèt tshàm, me le'te zin ndù kà bin ghù nukebwô! 8Bin ju'u, me ghù bonngon nsen ni bàa tse bo ke' yoṅ ndèn mandum nà, m'a' lo' yub mfà bin, bin ghù num bo mba bin kô là, kà bin ghù nu tshen benntùn ni tse bo se' ntsho bam ngàmndà màm nà. 9Bo bùnte yi ndù: Lo nsen nà! Tshù ta' ngùn n'a se' la' be nke ndiag netô be là! Ndonni bag a' ghù kebwô num o ntshùa yube. Bo tsho' ngwù num Lot, mfél i, ntôg nèn mbe'te nzendà. 10Tshen ben nà tse bo be ndà là tshag bu nsoṅ Lot, ngù a se' mbaṅ bo mum ndà, bo fùn nzendà. 11Bo #2 Fen. 6.18kag fù miag ben tse bo be ntshundà là, neto' num tse nke' nèn nkum num tse ndùb, kà bo ke bèn neyen nzendà.
12Tshen ben nà tse bo be ndà là tshob Lot ndù: O bèn ngù mo' mén nsen ni ké? Bon tsho tse bandum boa tse bènnzwi, njoṅ tsho ben fa tse bo ntùm ngô là, ghù bo tum yen dù' li. 13Nummbe bag nsi bagte yen dù' li. Tshu'te z'a be nse' mbwe Tshùaben num bo là yàm. A tum yag ndù bag se' mbiagte yube. 14Lot nèn ntshob ben tse bo bètte ngonngon tse là ndù: Bin kù, ntum yen dù' li; nummbe Tshùaben a' bagte ngô. Yen nu là tswe num miag tse tse mba komzwi là.
15Ndùse njù to' nefoṅ nà, ba Angél nànte Lot ntshob ndù: Lo nsi ndo' nzwi o boa ngonngon tsho bàa tse bo nsen ni là ntume, mbwôg ndù kà bin bi ndùse ngô nsi bagte vù là. 16Mb'a #2 Pét. 2.7ke nsoṅ nku nsi là, Tshùaben ko ndèn mi, tshen ben nà tshùb bu i, ze nzwi i boa mbu ngonngon tse bàa, ndo' yub ntum yi tà nkum njam tusô kà nkag yube. 17Ngelaṅ ze bo ke ndo' yub ntum yi là, bo tshob ndù: Yôg tu wul o; kà lôte njam o, ke tsin manze mum njoṅ tômbo' fa; kù nèn mfe num tu mbale, mbwôg ndù k'o bi. 18Lot bùnte bo ndù: Ṅ, me labte me Tshùaben. 19Tshù, ngafa' o fon kondèn mbw'o, o bèn nda'te tshàmndèn z'a zi là num àm, ngù me nke nke' njôge. Là, be me ke kù nèn mfe tu mbale, mbwôg ndù kà nge' yab mbu num àm, me kwù. 20Tshù, yen metsit tusô li mbwe ke' ghebte mb'a be me kù nèn bwe ké? Bam ndù me kù nèn bwe, njôge. 21A bùnte ndù: Me bèn mbam kondèn àm wù; me ke bagte tusô s'o tshwèt ntshob là. 22Là, nànte nkù nde nèn bwe, nummbe me ke nsi ghù sàm ju, a be z'o ke' yoṅ nzin nkum bwe là. A ndùlala ze bo be ntsiaṅ tusô là ndù Tsoar là.
23Lagnyam lo be tum Lot nke ntsho ntùm tusô Tsoar. 24Ndùlala #Mat. 10.15; 11.23-24; Luk. 10.12; 17.29; 2 Pét. 2.6; Yu. 7Tshùaben ghù mbwôg njôg swe' mfe kamànyam ngwù mum ngô Sodom bo Gomora mba mbaṅ nà. 25Nsate tshen ngô là boa njoṅ tômbo' fa, njoṅ benntùn fa tse bo be ntswe mum ngô là, boa njoṅ tshu fa ts'a bit num tsha' là. 26Nzwi #Luk. 17.32Lot lôte njam nkaṅ ntù' loṅ ngwa. 27Abraham tum mà nkebnjù nèn dù' z'a na' ntsin bwe mbwe Tshùaben nà. 28A lôte nze Sodom bo Gomora, mba nze njoṅ bag ngô tômbo' fa, njen mba nzembwôg tshwèt nko' fe num tsha' nke ko' mba nzembwôg ndùb là.
29Ngelaṅ Nsi ke mbagte ngô ts'a tômbo' là, Nsi kwimte Abraham ngù Lot tum ntshu yen nge' là, k'a mbiagte ngô tse Lot ke ntswe mum bwe là.
Lot boa ngonngon tse
30Lot lo Tsoar nèn mfe tu, nte ze dù'ntswe mfe num mbale, boa ngonngon tse bàa, nummb'a lo ke mbwôg netswe Tsoar. A tswe ntùm mo' ngabloṅ boa ngonngon tse bàa. 31Ntshùambwe tshob ntù'njam ndù: Tà be ywène; sàm mandum ke nsen ni z'a ghù nelo' be, mba ngôngô fa be ngù là. 32Be fà ndu' yi a nu mbume, bag à bin bo be, ndù be tshùa njam tà be ntshèt ndù kà nzwit be bi! 33Ndùlala bo ghù tà yub nu ndu' yen tèttswe' là mbume; ntshùambwe nèn mbe bo tàab. Tàab ke lèn ndùs'a be bo yi là, mba ndùs'a lo là.
34A be ndamnjù, ntshùambwe tshob ntù'njam ndù: O yen ndù me lo mbe bag tàa nkôg. Be bèn ngù a nu ndu' yen tèttswe' li mbume, o nèn bin yi be. Ndùlala be nsi tshùa njam tà be tshèt ndù kà nzwit be bi. 35Bo bèn ngù tà yub nu ndu' mbum yen tèttswe' là, ntù'njam nèn ntèl i bo yi be. Tàab ke lèn ndùs'a lo mbe bo yi là, mba ndùs'a lo là.
36Ndùlala Lot be boa ngonngon tse kà bo lét, njùme. 37Ntshùambwe bwe mén mandum ntswi lén se ndù Moab. A b'a tànjam njoṅ ba Moab fa tse bo be tà nkum sènni là. 38Ntù'njam bwe ze be mén mandum, ntswi lén se ndù Ben-Ammi. A b'a tànjam ba Ammon tse bo be tà nkum sènni là.
Currently Selected:
Neto'te 19: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.