Mata 23
23
Zeso mḛḛre nda ge hate eeya ge Moyiz ne ma
Mrk 12.38-39; Luk 11.39-52; 20.45-46
1Guwa̰, Zeso jan ɓase ge ka za̰a̰ na mage na nda ge ame hateya ma go: 2Nda ge hate eeya ge Moyiz ne mage Farisi ma nda ge wan nda eeya ge Moyiz ne mbe ma pe zum ma ne. 3Kaɗɗa na mbe go, ḛ ke kaŋ ge àa hate ḛ num ma, ḛ mbo ge num pagal me. Ɗaŋɗe, ḛ ke kaŋ ge num sḛ ma kee go to. Ago àa hate fare mbe ma hate cuɗ, àa kee tèmel ge num pagal to me. 4Àa haɗ eeya ma ya se fiyal danjan̰, àa ee dṵṵl ge neneg mbe ya ge nda duwana ma gaŋ wa go ge go num mbyaɗ in ne to. Ɗaŋɗe, num sḛ ma ge maa pagal mbyaɗ ee maa tok ya zì mbaa num to peɗ. 5Kaŋ ge àa kee num ma peɗ, àa kee num ndwa go nda kuwa maa. Àa fyaɗe maa warga#23.5 Ge warga mbe zì, àa ya zì eeya ge Moyiz ne sok van a̰me ma, àa vwal num maa sḭḭl mage maa byal ma zì ndwa ngayya go fare ge Dok ne ɓyaleya maa ta. ma se buu, àa a̰a̰le maa ba̰a̰ ga̰a̰l ma wa zum mbe go me. 6Num laa wa̰a̰ sok kàɗɗa ge nda ge hormo ma way ge sok vḛḛso zam kaŋ zam ma go, sok kàɗɗa ge nda ndwa zḛḛge ma ge zok kee kaɗeya ge Yahuɗ ma way zì. 7Num laa wa̰a̰ wa sanna ge hormo ge sok ɓase ma go, nda ka tol maa waɗme go, ba ge hateya. 8Kaɗɗa ge ḛ ɗe, ḛ vḭḭ go àa ka tol ḛ ba ge hateya to, ago, ḛ ba ge hateya ɗu kikiɗ, ḛ sḛ ma mɔɗwag ḛ na̰ van. 9Ḛ too ndu a̰me suwa pagal go Baa to, ago, ḛ ge ba ɗu kikiɗ, ne ge no ge pḭḭ ma zì yà. 10Ne kaa ge ḛ vḭḭ go àa ka tol ḛ ga̰a̰l ge ɗeme nda to, ago, ḛ ge ga̰a̰l ge ɗeme ḛ ɗu kikiɗ, a Krist, Ndu ge Dok taa ne. 11Ndu ge mbiya kaɗ ga̰a̰l ge ḛ buwal zì, ɓyare go ne seŋe ndu ge kee tèmel hon ḛ#23.11 Ge varseya wa gezi zi go mbo ya ge ne varseya wol pɔgwa ɗu go, Zeso ndiri na nda ge ame hateya ma tɔgwa go num ho ga̰a̰l Dok ɗu, be nda duwana ma to.. 12Kaɗɗa ndu yan ga̰a̰l pe, Dok ge pool gwan ge ne nda guwa̰ ya ɗaɗa, kaɗɗa na gwan na pagal ya se, Dok mbo hee ne digi me. 13Woo ge ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ago ḛ tele nda go vin̰a be waɗ muluk ge Dok ne zì. A fareba ḛ sḛ ma waɗ ne zì to, a ge pe, ḛ n̰a nda ge ɓyare waɗ ne zì ma vin̰a to no me. 14[Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ago ḛ zam kumu ma tok, ḛ kee kaɗeya ge twala lindiŋ go nda kuwa ḛ. Ge ano mbe no pe, Dok mbo ee dṵṵl ge meg ge ḛ pagal waɗeya.] 15Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ḛ aa sok ma ya nanna ge ḛ pagal, ndwa fin̰al digi me no, mam ga̰a̰l nuwam se me, ndwa ḛ see ndu go ɗu, ne dee ya mbo ya ge eeya ge Moyiz ne ma pagal. Sok ge ḛ seɗ ne ya, ḛ seŋe ne van ge sok njoɗ yal ne, ndwa zi waɗe ḛ sḛ ma. 16Woo ge ḛ ḛ, ɓaal ge ɗeme nda ma, ge jan go: Kaɗɗa ndu a̰me guni tene ya ge zok ge Dok ne, isi to. Ɗaŋɗe, kaɗɗa ndu a̰me guni tene ya ge dinar ge zok ge Dok ne zige, isi isi. 17Ḛ kaa dàle, ḛ gwan kaɗ ɓaal to ɗaŋ! A ge diige mbiya waɗe na kon ge ga̰a̰l ne de, dinar koo zok ge Dok ne ge haɗ dinar harcal de? 18Ḛ jan go go iya: Ndu a̰me ge guni tene ya ge twal tuwaleya, isi to. Ɗaŋɗe, kaɗɗa ndu a̰me guni tene ya ge bobo ge doo no twal tuwaleya pagal digi, isi isi. 19Ɓaal ma, a ge diige mbiya waɗe na kon ge ga̰a̰l ne de, bobo koo twal tuwaleya ge haɗ bobo harcal de? 20Ndu ge guni tene ge twal tuwaleya, guni tene ge twal tuwaleya mage kaŋ ge no ne pagal digi ma mɔɗwag. 21Ndu ge guni tene ge zok ge Dok ne, guni tene ge zok ge Dok ne mage Dok ge kaa no ne zì waɗme. 22Ndu ge guni tene ge pḭḭ, guni tene ge hòol muluk ge Dok ne mage Ba ge kaa no hòol muluk mbe pagal me.
23Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ago ḛ hon Dok ḛ kaŋ wa ge mbiya fare to ge mojo̰o̰ gefere, gasan̰ mage zul go ma go ɓame, zane no, ḛ vyale kaŋ ge ḛ mbiya kee num ge ciciliŋ ge no eeya ge Moyiz ne zì ma go, ndwa go: Temel taɗ, kuwa a̰se mage hoɗ fareba. A kaŋ ge ḛ mbiya kee num ma ne, be ge ḛ vyale gegene ge gaa ma to me. 24Ge ɓaal mbe ge ɗeme nda ma! Ḛ dol ndwa keceɗ hee sùsù ge deɗ jìn̰al pagal ma gezi, ɗaŋɗe, ḛ uɗi jambal ge na ɓul mɔɗwag.
25Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ago ḛ usi gezi seɗe mage sufra guwa̰ ɗag, zane no, ḛ dul wa ma pella zì cɔcwag ge dwaɗɗa ge sone mage kaŋ ge bàŋ yag ge ḛ ene ee no ge num pagal ma. 26Farisi ge ɓaal ma, ḛ ee pe usi seɗe mage sufra pul guy, ge go guwa̰ ge num way wa haɗ kɔn̰al waɗme. 27Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ḛ dinna ge sḭḭ ge saal taɗag ge nda ndil num siŋli ge guwa̰ zum go, zane no, num pul ma zì huyya ge kal ge nda ge swày ma way, ge kaŋ huri ge diige pe peɗ. 28Ḛ sḛ ma dinna ca mbe go me, ḛ ndil temel ge ndwa, ḛ dul wa ma zì pella ge ndwa mbuɗiya mage kaŋ keeya ge n̰aal kakatag ma. 29Woo ge ḛ ḛ, nda ge hate eeya ge Moyiz ne mage Farisi mbe ge mbuɗi nda ndwa ma! Ago ḛ sin tugul mbul ta siŋli ge nda ge zwagre Dok wa ma pe me no, ḛ ɗebce sḭḭ ma siŋli ge nda ge temel ma pe me, 30ḛ ka janna go: Daa no go, i kaa ge i baŋ ma zaman ma ya, i dana mà ɓan dagre ge num ndwa kan swàm ge nda ge zwagre Dok wa ma way se to. 31Go mbe no, ḛ kaŋ keeya mbe ma kee sayda ne ge ḛ sḛ ma pagal go, ḛ nda ge hṵṵ nda ge zwagre Dok wa ma van ge soɗob ma ne. 32A kwaɗa! Ḛ huy kaŋ ge ḛ baŋ ma ke ma wa ɗaŋ! 33Bwam ma, pe rusu ge dḭḭ ta ge gole go ma! Gyana, gyana, ḛ dee wa mbo ɓuu gezi ge sariya ge wan nda a̰me ma, ee num mbo sok njoɗ yal zì mbe go de? 34Ḛ za̰a̰ gale, mbi mbo teme ḛ nda ge zwagre Dok wa ma, nda ge andaŋ mage nda ge hate eeya ge Moyiz ne ma ya, ḛ mbo hun a̰me ma, ḛ pel num ɔwara kaŋre ta digi, ḛ mbo keme gegene ma ge bol ge ḛ zok kee kaɗeya ma zì, ḛ ka njon̰ num ge suwal ga̰a̰l ma diŋ peɗ me. 35Ano mbe kee ndwa go, nda ge be fare maa pagal mbe ge num swàm kan no se suwa pagal ma peɗ, ge swàm ge Abel ndu ge temel ta ya day, ɗiŋ deɗ-ɗa ge swàm ge Zakari ge Berkiya van ne ta go, ne ge ḛ hṵṵ ne ge sok ge harcal#23.35 Sok ge harcal mage twal tuwaleya ge zok ge Dok ne zì jwàg. mage twal tuwaleya buwal zì, num kaa ge ḛ pagal. 36Fareba mbi jan ḛ ne no, fare mbe ma no peɗ, num dṵṵl mbo deɗ ge ḛ ge doŋ pe ge màno mbe no pagal.
37Nda ge suwal ga̰a̰l Jerusalem diŋ-ge ma! Nda ge suwal ga̰a̰l Jerusalem diŋ-ge ma! Ḛ ge hun nda ge zwagre Dok wa mage mbal nda ge temeya ma gezi ge njal, ndwa gyana ga ge mbi ɓyare kwate ḛ ya mbi ta, dinna ge baare na̰ kwate na van ma ge na faa pul zì go, ano peɗ puy, ḛ be vin sok mbe to. 38Ḛ kuwa, Dok swaɗ zok ya ge ḛ tok go, mbo gaa pṵṵl. 39Ago mbi jan ḛ ne no, ḛ mbo da gwan kuwa mbi ndwa to baɗ, ɗiŋ ge go ḛ jin̰a ge ḛ wa zì go:
«Dok ke wa tare ge ndu ge mbo ya ge dḭḭl ge Bagezok ne pagal!»#Mkm 118.26.
Currently Selected:
Mata 23: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.