Mata 10
10
Temeya ge nda ge ame hateya ge wol pɔgwa zi ma way
Luk 6.12-16; 9.1-6; 10.2; 12.2-9
1Guwa̰, Zeso tol na nda ge ame hateya ge wol pɔgwa zi ma ya se, hon num pool ge yan on̰om ge sone ma, ge zon tuguɗi mage sulugu ge diige pe ma peɗ me. 2Nda ge ame hateya ge wol pɔgwa zi mbe ge seŋe ya nda ge temeya ma dḭḭl ma no: Ge zḛḛge, Simo̰ ge àa tol ne Piyer, Andre ge ne na̰ van, Jak ge Zebede van mage na na̰ van Yohana, 3Filib mage Bartelemi, Tomas mage Mata ndu ge chal siyal, Jak ge Alfe van mage Tade, 4Simo̰ ge iyal kyarga ge na suwal pe, Yudas ge àa tol ne Iskariyoɗ, ne ge mbo dee yaɗ Zeso ya gezi me.
5Num mbe ge wol pɔgwa zi ge Zeso too num ya ma, sok teme num go, ho num na wa no go: Ḛ mbo no! Ḛ mbo ge nda ge no pe rusu Yahuɗ zì to ma ta to, ḛ waɗ ge suwal ga̰a̰l ge nda ge Samari ma way ma diŋ to me. 6Ne kwaɗa go, ḛ mbo ge Izrayel van ma ta, num ge no ge tame ge ba̰a̰ ma go. 7Sok anna oy fare go, ḛ ka jan nda go, sok ge Dok kee muluk mbyaɗɗa go. 8Ḛ zo̰o̰ nda ge kee tuguɗi ma, ḛ ta̰a̰ nda ge swày ma, ḛ zo̰o̰ nda ge kṵṵ swàm ma num haa kɔn̰al, ḛ yin̰a on̰om ge sone ma me. Ago ḛ see pool mbe boo, ḛ zo̰o̰ nda boo me. 9Ḛ he koo dinar, koo bware saal, koo silay ge ḛ patar ma zì to, 10koo galam ge mbo gɔswal, koo ba̰a̰ ge eya ta, koo tyako ge ɗogle to, koo hee calaŋ. Ago ndu ge kee tèmel hoɗege na kaŋ zam to.
11Sok ge ḛ mbo waɗ-ɗa ge suwal ga̰a̰l koo ge jiyale a̰me diŋ, ḛ ele fare pe kwaɗa, ḛ mbo ge ndu ge mà vin tene ya ame ḛ na diŋ, ḛ kaɗ ne diŋ ɗiŋ ḛ dwam waɗ zum go. 12Sok waɗ ge ndu mbe diŋ go, ḛ jin̰a nda ge zok diŋ-ge ma go, halas ne kaa ge zok no diŋ. 13Kaɗɗa àa ame ḛ ya, ago halas mbe kaa ge num diŋ. Ɗaŋɗe, kaɗɗa àa kuri ḛ ya, ḛ wa guwa̰ ya ge ḛ pagal. 14Sok ge àa mbo ame ḛ ya to, àa vin fare ge ḛ jan maa ma to me ɗe, sok waɗ zum ge zok mbe diŋ koo ge suwal ga̰a̰l mbe diŋ go, ḛ poy ḛ ko kuci ma ge sok mbe ma go, ndwa ngayya go, ḛ kuri num kuri babaɗ. 15Fareba mbi jan ḛ ne no: Ge dwam ge Dok mbo dee ɗege ya kun sariya go, mbo ee dṵṵl ge yan̰a ge nda mbe ma no pagal, waɗe nda ge suwa Sodom mage Gomor ge na dee tii num wal gezi ma way ma.
Njon̰n̰a ge nda ge temeya ma mbo seɗ num ya ma
Mrk 13.9-13; Luk 21.12-17
16Ḛ za̰a̰ mbi kwaɗa, mbi teme ḛ no, ḛ mbo kaɗ dinna ge tame ma go ge bagomso ma buwal zì. Ḛ kaa zwam yaŋ-yaŋ dinna ge bwam ma go, ḛ kaɗ suul dinna ge maale ma go me. 17Ḛ koy ta kwaɗa ge fare ge mbo seɗ ḛ ya ma pe. Nda a̰me ma mbo wan ḛ, àa gene ḛ nda ge kun sariya ge no zok kee kaɗeya ge Yahuɗ ma way ma zì ma ndwa se yà, àa mbo dwagle ḛ ge bol me. 18Àa zwal ḛ bibil mbo goformo̰ mage gan ga̰a̰l ma ndwa se yà, ge mbi pe. Go mbe no, ḛ mbo kee sayda ge ambi, ge num ta, ge nda ge no rusu Yahuɗ zì to ma ta me. 19Ɗaŋɗe, sok ge àa mbo kaɗ-ɗa ka gene ḛ ge sok sariya ma go, ne kaa ge ḛ ele ta go, i mà mbo faa ma̰ fare de to. Fare ge mbiya ḛ faa num ma, ḛ mbo seɗ num sok mbe go gaw. 20Ago, ḛ sḛ ma mbo faa ne to, ɗaŋɗe, a On̰om ge ḛ Ba Dok ne sḛ mbo paa fare ge ḛ mbo faa num ya ma ne, ge ḛ wa zì. 21Nda a̰me ma mbo ɓyan maa na̰ van ma gezi nda tok go, ba a̰me ma mbo ɓyan maa van ma mbe go waɗme. Van a̰me ma mbo ɗege ho̰o̰l digi ge maa ba ma, àa mbo ɓyan num gezi me. 22Nda mbo kuri ḛ gezi peɗ, ge mbi pe. Ɗaŋɗe, ndu ge mbo wan tene deŋel ya ɗiŋ mbo wa yà, mbo seɗ monna. 23Sok ge àa mbo ɗege ya njon̰ ḛ ge suwal ga̰a̰l a̰me diŋ, ḛ chiya mbo ge suwal ga̰a̰l ge ɗogle yà. Fareba mbi jan ḛ ne no: Van ge Ndu ne mbo mbo ya seɗ ḛ, be ge ḛ an suwal ga̰a̰l ge Izrayel ne ma diŋ mɔɗwag to peɗ.
24Àa hon ndu ge ame hateya ga̰a̰l waɗe na ba ge hate na to koo moor waɗe na ndu ge zok to me. 25Ndu ge ame hateya mbiya kaɗ dinna ge na ba ge hate na go. Moor kaɗ dinna ge na ndu ge zok go me. Kaɗɗa àa ndi mbi, Bagezok dinna ca ge Belzebul go, àa mbo sal ḛ ge kàre mbi pe ma ndwa gyana ga de?
Fare oyya be voo
Luk 12.2-9
26Go mbe no, ne kaa ge ḛ chiya ndu a̰me voo to baɗ. Ago kaŋ a̰me ma ge way no ge sego ma peɗ mbo dyan zum ge kɔn̰al go. Kaŋ ge kee ge ɗimil zì ma, nda mbo kuwa num benna kɔn̰al. 27Fare ge mbi jan ḛ ne ge chala zì jan no, ḛ fa ne zum ge nda ta peɗ. Fare ge mbi wuwase ḛ ne no, ḛ sṵṵ ne tuŋ. 28Ḛ chiya nda duwana ma voo to, àa ge pool hun ndu, ɗaŋɗe, àa mbyaɗ hun ne on̰om to. Kaɗɗa ndu ge ḛ chiya ne voo go ɗe, a Dok ɗu, ge dape, a ge pool hun ndu, gwan dol ne ge sok njoɗ yal zì yà. 29Nda yaɗ njoole ban zi gezi ge silay ɗu pe bàba to de? Go no puy, be laa ɓyareya ge Dok ge ḛ Ba ne to, a̰me ɗu deɗ-ɗa suwa pagal se to. 30Kaɗɗa ge ḛ sḛ ma ɗe, koo susu ge ḛ pagal digi ma, Dok kuwa kuwa go num go gyana ga de. 31Kaɗɗa na mbe go, ḛ chiya ndu a̰me voo to, ago koo njoole ban ma kaa gyana ga de puy, ḛ waɗe num waɗe.
32Go mbe no, ndu ge diige ge mbo wan na wa ya ngangaɗ ge nda duwana ma ndwa se go, na ge ambi ne, mbi sḛ mbo jan zum waŋ waɗme go, ne ge ambi ne, ge mbi Ba ge no pḭḭ ma zì yà ndwa se yà. 33Ɗaŋɗe, ndu ge diige ge mbo kuri ya gezi babaɗ ge nda duwana ma ndwa se go, na ge ambi ne to, mbi sḛ mbo jan zum waŋ waɗme go, mbi kuwa ne to, ge mbi Ba ge no pḭḭ ma zì yà ndwa se yà.
Kàre Zeso pe fare ge guwa ne to
Luk 12.51-53; 14.26-27
34Ḛ ta mà dwaɗ go, mbi gene ya halas ge suwa pagal mekyala de ɗe, mbi be gene ya halas to, ɗaŋɗe, mbi gene ya ho̰o̰l. 35Ago mbi mbo ya ee ho̰o̰l ge van son mage na ba buwal zì, van gwale mage na na̰ buwal zì, van gwale mage na tisi ge gwale buwal zì me. 36Nda ge mo zok diŋ-ge ma guwa mbo seŋe mo nda ge ho̰o̰l ma ne.#Mic 7.6.
37Ndu ge ne laa wan na ba koo na na̰ waɗe mbi, be mbyaɗ kaɗ ndu ge ambi to. Ndu ge ne laa wan na van ge son koo ge gwale waɗe mbi, be mbyaɗ kaɗ ndu ge ambi to me. 38Ndu ge mbo hee na kaŋre ya to, ka dwaɗ tene, hee dṵṵl ge kàre mbi pe to, be mbyaɗ kaɗ ndu ge ambi to. 39Ndu ge mbo kaɗ-ɗa kwacware ndwa ge na ne, mbo ban ne gezi. Ndu ge mbo hon tene ya gezi, ge mbi pe, mbo seɗ ndwa ge fareba. 40Ndu ge ame ḛ ya na diŋ, ame mbi. Ndu ge ame mbi ya me ɗe, ame Ba ge teme mbi ya. 41Ndu ge mbo ame ndu ge zwagre Dok wa ya na diŋ, hon ne hormo ge ndu ge zwagre Dok wa go, àa mbo poɗ ne poɗɗa ge nda ge zwagre Dok wa ma way. Ndu ge mbo ame ndu ge temel ya ge na diŋ, hon ne hormo ge ndu ge temel ne, àa mbo poɗ ne, poɗɗa ge nda ge temel ma way me. 42Ndu ge diige, ge mbo hee ya kob mam eyalam gagag, hon ɗu ge jiyale mbe ma buwal zì, ndwa go ne mbi ndu ge ame hateya ne, fareba mbi jan ḛ ne no, mbo hoɗege na tok kon̰a go fyalag to baɗ.
Currently Selected:
Mata 10: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.