Luk 16
16
Fare sḭḭ ge ndu ge koy kaŋ koyya ge na vin̰a go to ne
1Zeso gwan jan na nda ge ame hateya ma go iya: Ndu ge gan njonjon̰ a̰me kaa ge ndu ge koy kaŋ ɗu, àa mbô ya taa ne no go ne ndu ge koy ne kaŋ mbe vḛḛne ne kaŋ gan ma go. 2Tol na ndu ge koy kaŋ mbe ya, jan ne go me: Mbi za̰a̰ fare ge sone ma go mo pagal! Wa̰a̰ mbi kaŋ ge no mo tok go, ge mo koy ma pe gale, ago mo vin̰a ge daa gwan koy mbi kaŋ ma to baɗ. 3Ndu ge koy kaŋ mbe ele tene go: Mbi ba ge zok ndage mbi ge mbi sok koy na kaŋ ma go ɗaŋ-noo, mbi ke tene gyana de? Kee tèmel suwa me ɗe! Mbi pool to me. Anna buwal kaɗe kaŋ me ɗe! A daŋso ge mbi pe me. 4Gyala ge àa kin̰are yan mbi ya ge mbi sok koy kaŋ go, sok ge nda ɔwabe mbi ge maa zok ma diŋ ɗe, na̰! Mbi kuwa kaŋ ge mbi keeya ya no! 5Sok mbe go, ɗege tol nda ge ame gobso ge na ba ge zok ne ma ya ɗu ge ɗu, jan ndu ge zḛḛge go: Mo mbiya poɗ mbi ba ge zok gyana ga de? 6Gwan ge ne fare janna go: Nùm birmil wol. Ndu ge koy kaŋ jan ne go: Ame mo kaɗkaɗ no, kaa se vun cab, mo njaŋe zì: Birmil nuwan̰. 7Guwa̰, jan ge ɗogle go: Mo ɗe, mo mbiya poɗ gyana ga de? Gwan ge ne fare janna go: Suwal geme kis. Ndu ge koy kaŋ jan ne go: Ame mo kaɗkaɗ no, njaŋe zì kis wa gezi zi. 8Bagezok dore ndu ge koy kaŋ koyya ge na vin̰a go to mbe, ge ne kaŋ keeya ge ke ge zwam mbe pe. Ago nda ge zaman mbe zì ma, àa nda ge zwam ma ne ge maa ka̰a̰m ta, waɗe kɔn̰al van ma.
9Kaɗɗa ge mbi, mbi jan ḛ go: Ge ḛ kaŋ gan ge ḛ see num koo ge na vin̰a go to mbe ma waɗme, ḛ wan kondore ge num, ge go, dwam ge ḛ deɗ ja hoɗegeya zì, Dok ame ḛ ge na sok kàɗɗa ge ɗiŋ ge din zì yà. 10Ndu ge no ɗeŋer ge kaŋ ge hoɗege guwa ma zì, a ɗeŋer ge kaŋ ge gḛḛ ceɗeɗ ma zì waɗme. Ndu ge koy kaŋ koyya ge na vin̰a go to, ge kaŋ ge hoɗege guwa ma zì, a ndu ge koy kaŋ koyya ge na vin̰a go to ne, ge kaŋ ge gḛḛ ceɗeɗ ma zì waɗme. 11Kaɗɗa ḛ be ngay go ḛ nda ge ɗeŋer ma ne, ge kaŋ gan ge maa vin̰a go to mbe ma zì no, a huɗi mbo vin ee ḛ ne kaŋ gan ge fareba ma wa go de? 12Kaɗɗa ḛ be kaɗ ɗeŋer to, ge kaŋ ge ndu ne wa go no, a huɗi mbo vin ne go na n̰a ḛ kaɗ ḛ ḛ ma wa go de? 13Moor a̰me ge kee tèmel nda zi diŋ jwàg to. Ago mbo seŋe ge ɗu na guwa̰, ne laa wan gegene me. To puy, mbarge tene ge ɗu, kuri gegene me. Ḛ ge pool kee tèmel ge Dok mage bware pe go jwàg to.
Eeya mage muluk ge Dok ne
14 Farisi mbe ge laa wa̰a̰ bware gḛḛ ma ka za̰a̰ Zeso fare mbe ma, àa ka man ne. 15Jan num go: Ḛ, ḛ nda ge ndil ta go, ḛ nda ge temel ma ne ge nda duwana ma ndwa se, ɗaŋɗe, Dok kuwa ḛ dul wa ma kuwa. Ago kaŋ ge nda duwana ma ndil ne ngaraŋ, kaɗ kaŋ ge sone kakatag ge Dok ta. 16Eeya ge Moyiz ne mage fare ge nda ge zwagre Dok wa ma hate num ma dee ya ɗiŋ ge zaman ge Yohana ba ge kee nda baptem ne go. Ge zaman ge Yohana ne go no me ɗe, àa oy Fare ge Kwaɗa ge faa fare ge muluk ge Dok ne no, ndu ge diige harge tene ge pool ndwa waɗ ne zì. 17A fogol waɗeya ge go pḭḭ mage suwa burmi gezi, ge go kḭḭliya a̰me ge eeya ge Dok ne ma buwal zì go ɗu ne kale gezi. 18Ndu ge diige ge yan na gwale ya, gwan san ge ɗogle ya, kee zina. Ndu ge diige ge san gwale ge ne obe n̰a ne ya, kee zina waɗme.
Ndu ge gan mage Lazar
Luk 12.15-21; 6.20-21, 24-25
19Ndu ge seɗ kaŋ a̰me ɗu, ka kan ba̰a̰ ge kàal sasaw mage ba̰a̰ ge lɔgwa lalan̰ ge bware ma jajan, ka an̰n̰a dwam ma mɔɗwag ge laa saal zì. 20Ndu ge a̰se kaa ɗu waɗme, ge àa ka tol ne Lazar, duul jwaŋ jan, ka fiiya ge ne ndaa wa pagal zum yà. 21Ka ɓyare vin̰a ge ndal na dul pe ge kaŋ zam pe ge gaa taabul pagal ge ndu ge seɗ kaŋ ne ma. Ano puy, juu ma ka mbo ya ɗaa ne jwaŋ ma iya. 22Ɗeɗ-ɗa go, ndu ge a̰se wa̰a̰, suu no, malayka ma gene ne ge Abraham kṵwa̰l zì yà. Ndu ge seɗ kaŋ suu no waɗme, àa mbuu ne no. 23Ge sok kàɗɗa ge nda ge swày ma way yà, kuwa go na iigiya ma zì, hee na ndwa digi, ge kaal ya, kuwa Abraham, Lazar kàɗɗa ne kṵwa̰l zì. 24Sok mbe go oy digi go: Mbi baŋ Abraham, kuwa mbi a̰se nde no de, jin̰a Lazar ne pa na tok wa mam pagal, teme ne mbo ya ɗele mbi ka̰a̰l pe, ago mbi za̰a̰ go yal ge ol swala mbe no zì. 25Abraham gwan ge ne janna go: Mbi van, kuwa go mo dee seɗ mo kaŋ gan ma ya go ge kàɗɗa ge amo zì ge suwa pagal. Dinna ge amo go, ge Lazar ne ka yal njoɗɗa. Ge sego, seɗ laa eyalla ya go ge go go, ɗaŋɗe, ge amo gaa yal njoɗɗa. 26Ta iya, tugul ga̰a̰l ge heleg a ge nè ge ḛ ma buwal zì, ndwa go, nda ge ɓyare ɗege ge go go mbo ḛ ta yà ma, num see vin̰a mbo yà go to, ndu see vin̰a ge ya go mbo ya ge i ta to me. 27Ndu ge seɗ kaŋ gwan jan ne go, kaɗɗa na mbe go: Mbi kaɗe mo kaɗe, Baŋ, teme Lazar ge mbi ba diŋ yà, 28ago mbi yà ge na̰ van ge soɗob ma nuwan̰, ne mbo ndiri num tɔgwa, ne kaa ge go num sḛ ma waɗme, num dee ya ge sok iigiya mbe no zì to. 29Abraham gwan jan ne go: Àa ge eeya ge Moyiz ne mage kaŋ ge nda ge zwagre Dok wa ma njaŋe ma, n̰a num ke tèmel num pagal. 30Ndu ge seɗ kaŋ gwan jan ne go: To, baŋ Abraham, daa na go ndu a̰me ɗu ge nda ge swày ma buwal zì mbo ne ge num ta yà, àa mà seŋe ta ya se. 31Abraham jan ne go me: Kaɗɗa àa kee tèmel ge eeya ge Moyiz ne mage nda ge zwagre Dok wa ma kaŋ ge njaŋe ma pagal to, àa vin fare ge ndu a̰me ge ta̰a̰ ge nda ge swày ma buwal zì ne to.
Currently Selected:
Luk 16: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.