Luk 14
14
Zonna ge ndu ge tuguɗi ne ge dwam sabaɗ go
Luk 6.6-11; 13.10-17
1Ɗeɗ-ɗa ge dwam sabaɗ a̰me go ɗu go, Zeso waɗ ge ga̰a̰l ge Farisi ma way a̰me diŋ mbo zam kaŋ zam. Nda ge kaa sok mbe go ma dol ndwa ne pagal keceɗ. 2Ḛ kuwa, ndu a̰me ge ne ko kaa hḛḛreya jindiliŋ mḛḛ no ne ndwa zḛḛ no. 3Sok mbe go Zeso ele nda ge hate eeya ge Moyiz ne mage Farisi ma go: Vin̰a, hage hage koo tele tele go àa zo̰o̰ ndu ge dwam sabaɗ go de? 4Ɗaŋɗe, àa gwan ge ne fare janna byalam go to. Sok mbe go seŋe tene ge ndu ge tuguɗi mbe ta, zon ne, n̰a ne mboya me. 5Guwa̰ jan num go: Mà deɗ ja go, ne ndu a̰me ge ḛ buwal zige van koo ne nday dee tub se ne, dwam sabaɗ go no, mà haa tene mbo wan ne ya digi vun cab gaw to de? 6Àa seɗ fare ge gwan ge ne janna pagal to.
Fare sḭḭ ge tal sok kàɗɗa ne
7Guwa̰, kee nda ge àa too num ya ma fare sḭḭ ɗu, ndwa kee num kuwaya pe gyana ge num kaɗ tal sok kàɗɗa ge zḛḛge ma de. Sok mbe go, jan num go: 8Sok ge ndu a̰me tol mo ya, ge sok vḛḛso sanna go, kaa ge be mo tal sok kàɗɗa ge zḛḛge to. Tamekyala, ndu ge ciciliŋ a̰me ge pool deɗ-ɗa ge sok mbe go, 9ndu ge too ḛ ge ne ya mbe, mbo ya jan mo go: N̰a ne sok kàɗɗa. Sok mbe go, daŋso mà wan mo, sok mbo kaɗ ge pe ge dwab se yà go. 10Ɗaŋɗe, sok ge àa tol mo ya, mbo ɓyare sok kàɗɗa ge guwa̰ se yà ge, ndwa go, sok ge ndu ge too mo ya mà yan ja, ne jin̰a mo go: Kondore, mbo ya kaɗ zḛḛ go. Sok mbe go, mo mà seɗ hormo ge nda gegene ge àa too num ya ma ndwa go peɗ. 11Ago ndu ge diige ge hee na pagal digi, Dok mbo gwan ge ne nda guwa̰ se yà, ge gwan na pagal se, mbo hee ne pagal digi me.
12Guwa̰, Zeso jan ndu ge too na ya mbe go: Sok ge mo tol nda ya zam kaŋ gyala koo gasamal, too mo kondore ge wa kag ma, mo na̰ van ma, mo sele ma, koo mo nda ge zok pe ge tok seɗɗa ma to, ge go num sḛ ma too mo waɗme, ne seŋe poɗɗa to. 13Ɗaŋɗe, sok ge mo kee vḛḛso kaŋ zam, too ya nda ge hoɗegeya ma, nda ge looɗeya ma, nda ge giɗi mage nda ge ɓaal ma. 14Mo mbo kaɗ ge laa saal, ajo̰o̰ num a̰me ge gwan ge mo byalam go to. Ago Dok mbo poɗ mo ge dwam ge na mbo ɗege ja tan nda ge mbo mboya ge temel ma go.
Fare sḭḭ ge num ge kuri tolla ma way
Mat 22.2-14
15Ndu a̰me ɗu, ge num mbe ge àa too num ya zam kaŋ zam ma buwal zige, guwa̰ ge za̰a̰ Zeso fare mbe ma go, jan ne go: Laa saal kee ndu ge mbo dee mbo zam kaŋ zam ge muluk ge Dok ne zì yà! 16Zeso gwan ge ne janna go: Ndu a̰me ɗu nuusi vḛḛso kaŋ zam ge gasamal, tol nda ya gḛḛ-gḛḛ. 17Sok ge sok mbiya go àa zam kaŋ zam ge gasamal mbe ɗe, teme na ndu ge tèmel mbo jan nda ge àa too num ma go: Ḛ mbo ya, ago kaŋ ma nuusi ya go. 18Ɗaŋɗe, ge num ge see tolla ma mɔɗwag, ge diige puy ɗege jan geŋeya ge tele na be mbo ya. Ndu ge zḛḛge jan ne go: Mbi yiya gaaso go ɗu, a ngaɗ go mbi mbo ndil ne. Mbi kaɗe mo kaɗe, jin̰a mo ndu ge zok go, ne pore mbi nde. 19Gegene jan ne go: Mbi yiya nday gaa kaŋ go mbɔmbwag nuwan̰, mbi ɓyare kugi num. Mbo jan ne go, mbi kaɗe ne, ne pore mbi. 20Ge ɗogle jan ne go: Mbi kaa zok kaɗ no gale, go mbe no mbi seɗ vin̰a mbo yà mà to. 21Sok ge ndu ge tèmel mbe guwa̰ ya diŋ, wan na ndu ge zok fare mbe ma pe, sok mbe go ndu ge zok laa hoɗ, jan na ndu ge tèmel go: Guwa̰ vun cab ge sok ɓan pagal ma yà, ge suwal ga̰a̰l vin̰a pul ma zum yà, gene nda ge a̰se ma, nda ge looɗeya ma, nda ge ɓaal mage nda ge giɗi ma ya go go. 22Guwa̰ swag, ndu ge tèmel mbe jan ne go: Mbi ndu ge zok, mbi kee ja ge wa hoɗɗa ge amo pagal tem, sok gwan gaa go iya. 23Ndu ge zok mbe jan na ndu ge tèmel go: He vin̰a mbo suwal ge ful zige ma yà, ge ɗagarta ma kin̰a ma go, mo mà seɗ nda ya, ke num mboya ya mbi diŋ vun cab, ndwa go mbi zok ne huy. 24Ago mbi jan ḛ ne no: Ndu a̰me ɗu ge nda mbe ge zḛḛge ge see tolla ma mbo taɗ kaŋ zam ge gasamal mbe na wa zì to.
Nda kàre Zeso pe pe gyana de
Mat 10.37-39
25Dwam ma guwa̰ kwaɗa lag, Zeso sok mboya go, nda ɓase nɔnɔg ka mboya ge ne dagre, seŋe tene ya num ta se, jan num go: 26Kaɗɗa ndu a̰me ɓyare mbo ge mbi dagre, ɓyare go ne laa wa̰a̰ mbi waɗe na ba mage na na̰, na gwale mage na van ma, na na̰ van ge soɗob mage gwale ma, ɓyare go ne duwa ge tene to me, kaɗɗa go to, mbyaɗ kaɗ mbi ndu ge ame hateya to. 27Ndu ge diige ge hee dṵṵl ge in na kaŋre, ndwa kàre mbi pe to, mbyaɗ kaɗ mbi ndu ge ame hateya to me.
28A huɗi ne ge ḛ buwal zì, sok ɓyare sin zok ge haal ɗoo, wa gale kaɗ se wan kaŋ ge na mbiya ban num ma guy to de, ndwa ndilla go na kin̰are mbo deɗ ge na tèmel mbe wa aaya yà ko ɓade. 29Kaɗɗa na go to, a ge voo ge go na doo zok pe, na pool ge aa ne kaa to ɗoo, nda peɗ ge kin̰are kaɗ-ɗa ka kuwa ne ma, num ka coɗ na, num ka janna go: 30Ḛ kuwa gale, ndu mbe ee zok pe sinna, ne pool a̰me ge aa ne to peɗ.
31Tamekyala, gan ga̰a̰l a̰me ɓyare mbo mbal twam ge na kon ge ɗogle, a ge nda dudubu wol. Ɓyare go ne kaa se gale guy ndilla go, ge nda dudubu wol no, na ge pool mḛḛ na kon ge no ge nda dudubu warzi ndwa zì kode? 32Kaɗɗa na seɗ-ɗa go na pool to, ajo̰o̰ gan ga̰a̰l gegene mbe gale yà kaal nde ɗe, mà teme nda mbo ne ndwa zì yà, mbo ɓyare vin̰a ge halas ne pe. 33Zeso gwan jan num iya go: Ndu ge diige ge ḛ buwal zige ge kuri kaŋ seɗɗa ma ya peɗ to, mbyaɗ kaɗ mbi ndu ge ame hateya to.
34Ḛ kuwa kuwa go nuwam kaŋ ge kwaɗa ne, ɗaŋɗe, mà kaɗɗa nuwam camam gaa daa ya to no, a ge da ta ɗoo ndu wa mbo gwan ge ne camam mbe ya de? 35Daa gwan mbaa a̰me to, koo ge suwa pe, koo ge kaŋ hubi suwa pe, àa gaa kan ne gezi. Kaɗɗa ndu ge tɔgwa ge za̰a̰ fare mbe ma, ne za̰a̰ num kwaɗa.
Currently Selected:
Luk 14: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.