Yohana 2
2
Vḛḛso sanna ge suwal Kana diŋ
1Dwam zi guwa̰, vḛḛso sanna kaa ge suwal Kana ge no suwa ge Galile ne go diŋ. Ge sok mbe go, Zeso na̰ wa ya. 2Zeso sḛ waɗme, àa too ne ya ge vḛḛso sanna mbe go ɓanna ge na nda ge ame hateya ma. 3Sok ge on̰or jìn̰al hoɗege nda go, Zeso na̰ jan ne go: On̰or jìn̰al daa be gaa go fyalag ge nda pe to. 4Gwan ge na na̰ janna go: Na̰a̰, za̰a̰ mbi gale, fare no, a mbi fare ne, ɗaŋɗe, mbi dwam ma gale be mbyaɗ to. 5Ne na̰ jan nda ge tèmel vaa kaŋ ma go: Ḛ ke kaŋ ge mbi van mà jan ḛ ya go, ḛ ke num ma peɗ.
6Ge sok mbe go, njal ge àa ca num ge il ga̰a̰l go ma kaa menengal, ge Yahuɗ ma kan mam num zì usi ta ndwa haɗ ta kɔn̰al uware Dok. Il ge diige ge pool ame mam soo pul ndà waɗeya. 7Zeso jan nda ge tèmel vaa kaŋ ma go: Ḛ huy il mbe ma ge mam. Àa mbo ya huy num kebe-kebe. 8Ge sok mbe go, jan num go: Ḛ zaa mam mbe do, ḛ gene ne mbo hon ga̰a̰l ge nuusi vḛḛso mbe ne. Àa mbo ya keeya ge mojo̰o̰ ne jin̰a maa mbe go. 9Sok ge ga̰a̰l mbe tare mam ge seŋe ya on̰or jìn̰al go, wan pe go nda see ne ge dii ya de to. Ɗaŋɗe, nda ge tèmel ge zaa mam mbe ya ma kaa ge ne kuwaya. 10Tol gwale jin̰al obe, jan ne go, nda ee fare janna go go: Mo gale ee pe vaa on̰or jìn̰al ge kê kwaɗa ɓiya, sok ge nda ge àa too num ya ma njoɗ ne ya mbyaɗɗa tab, mo wa gaa vaa ge lulum go. Mo zane gwan koy on̰or jìn̰al ge ke kwaɗa zì no jan bà!
11Ano, a kaŋ ajab ge Zeso kee ne wal cecew ne, ge suwal Kana diŋ ge no suwa ge Galile ne go. Ngay pool ge na ne zum ge sok mbe go, a ge pe, ne nda ge ame hateya ma ho fareba ne ta no. 12Ge ano mbe guwa̰, Zeso hee vin̰a mbo suwal ga̰a̰l Kapernawom yà ɓanna ge na na̰, na na̰ van ge soɗob mage na nda ge ame hateya ma. Àa kee dwam ma gḛḛ to ge suwal mbe diŋ.
Zeso waɗ ge zok ge Dok ne zì
Mat 12.38-40; Mrk 11.15-18; Luk 19.45, 46
13Sok ge Yahuɗ ma vḛḛso keeya ge Paska ne dwam ma gaa guwa, Zeso ɗege ge sok mbe go mbo Jerusalem. 14Sok ge dee yà, sok waɗ mbo ge zok ge Dok ne pul ge zum-ge zì yà go, kuwa nda ge ka yaɗ nday ma, gini mage tugtug ma gezi ɓanna ge nda ge ka eya bware ge zok ge Dok ne pul ge zum-ge go ma kàɗɗa ge maa taabul ma wa go. 15Ge sok mbe go, ɔwabe tàal, nuusi ne ge bol go, yan num ya zum peɗ ɓanna ge maa tame mage maa nday ma, pugi nda ge eya bware ma taabul ma se, num silay ma ɓasare se me. 16Hoɗ nda ge ka yaɗ tugtug gezi ma na wa go: Ḛ ɔwabe tugtug mbe ma gezi ge sok mbe no go! Ḛ ɓyare seŋe zok ge mbi Ba ne, sok kee suk de? 17Sok ge ne nda ge ame hateya ma za̰a̰ fare mbe go, num pagal kale dwaɗ fare ge no Njaŋeya ge Dok ne sok a̰me zì go: «Laa wanna ge ambi ge gḛḛ ge mo zok pe, mbo ee mbi seɗ swày, mbi Dok-goo.»#Mkm 69.10.
18Ge sok mbe go, Yahuɗ ma ga̰a̰l a̰me ma hee fare, àa jan Zeso go: Ke kaŋ ajab a̰me ɗu ndwa ngay i go, Dok ho̰ mo vin̰a ge kee kaŋ mbe ge mo kee ne no ne. 19Gwan ge num janna go: Kaɗɗa ḛ gul zok ge Dok ne mbe no ya se puy, mbi mbo gwan ne digi sinna ge dwam ge taa ma pul zì. 20Àa gwan ge ne janna go: Zok ge Dok ne mbe sinna kee del warndà pɔgwa menengal, mo me, mo jan go, mo mbo sin ne digi ge dwam ge taa ma pul zì ya? 21Zane no, Zok ge Dok ne mbe ge ka faa ne fare, a ne sḛ duul. 22Guwa̰ ge Zeso ta̰a̰ ge nda ge swày ma buwal zì go, ne nda ge ame hateya ma pagal kale tyan gezi ge fare mbe ge ne dee jin̰a maa ne pagal. Àa mbo ya hoɗ fareba ge fare ge no Njaŋeya ge Dok ne zì pagal, ge Zeso fare ge jin̰a ne ta me.
Zeso kuwa ndu ge diige dul wa kuwa
23Sok ge Zeso kaa ge suwal ga̰a̰l Jerusalem diŋ ge Yahuɗ ma vḛḛso keeya ge Paska ne pe, nda mbo ya hoɗ fareba gḛḛ ne ta, sok kuwa kaŋ ajab ge ne ka kee num ma go. 24Ɗaŋɗe, num fare keeya ma be ka huri Zeso to, ge dape, ka kuwa num kwaɗa. 25Be ɓyare go nda jin̰a na fare ge nda duwana ma way ma jan to, ge dape, ne sḛ ka kuwa kaŋ ge no ndu ge diige dul wa zì kuwa.
Currently Selected:
Yohana 2: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.