Lúkási 4
4
Sɛ́ta a á táte á Yɛɛ́so, Yɛɛ́so á jhʉ́
(Mat 4.1-11; Mlk 1.12-13)
1Mɛ́ le nōʼ á Yɛɛ́so á ntshi á Juldɛŋ páʼā, á fhó éwú ŋ́gʉ̄ɔ. Azwakne Ndém á gɔ́ mé yí, ŋ́ghʉ̄ á gʉɔ mé késáatswɛt. 2Ŋ́kó éwú, Sɛ́ta á táte á yí eleʼé alāʼ megēm lekua, á nɔŋ nnáŋa té pfɛ́t azō. Meleʼé muɔ mɛ́t é gē etɔ́ke, nzi é pú nzáŋ á yí. 3Sɛ́ta á lɛ eshʉ̄ʼ, ńdé á mbū yí ŋ́gɛ: «Páʼ o ó Méŋ Ndém lā, tswiī tɔ́ wuɔ a esɛnne ncʉ́ʼ etsō lejhʉ̄. » 4Yɛɛ́so á pwɛt á mbū yí ŋ́gɛ: «Mɛ́ le tí á ntē aŋwaʼne Ndém ŋ́gɛ: “Ŋiŋnɔŋ a te lɛ̄ mpfɛ́t áa etsō lejhʉ̄ ndaʼ, tɛ́ ndɔk ŋgɔ́ éwú ú.”»
5Sɛ́ta á zéŋ ndɔ̄k á yí ŋkɔ́ʼ tɛ ŋkó amɔ̄ʼ ajʉʼ, tɛ ndo athʉ́, ńtshí éwú, ńtswī á yí é lɛ glɛ, élāʼ ntsem tsīi é ndo esī atsetsáʼ. 6Ńdé á mbū yí ŋ́gɛ: «Mɛ́ lē mbú ŋgyá melāʼ muɔ, mbɔɔ lewūʼ tsīi, é ntē éwú á mbū meŋ, ḿbiŋ ŋgɔ́ yīi, meŋ gɔ ezéŋ ŋ́gyá á mbū ŋiŋ yīi, meŋ á kɔŋ. Meŋ a pú eyá á mbū wu, o esáʼ. 7O lɛ ŋké ntswíʼte á esī á mvhɔ meŋ, ŋ́gūʼte á gá, é pú ncʉ́ʼ elāʼ cú. » 8Yɛɛ́so á pwɛt á mbū yí ŋ́gɛ: «Mɛ́ le tí á ntē aŋwaʼne Ndém ŋ́gɛ: “Ŋiŋ a ewūʼte áa ndaʼ Atsyapuɔ Ndém, ńjúʼ áa ndaʼ nchu yí.”»
9Sɛ́ta á lɔk á yí mé Yelósalɛm, ŋ́kɔ́ʼne á yí ntshí á ndo ntsɔʼ Mía Ŋgyā Ndém. Ńdé á mbū yí ŋ́gɛ: «Páʼ o ké ŋgɔ́ á Méŋ Ndém lā, fhó ega ŋkyɛ́t ntshí á esī. 10Mɛ́ le tí á ntē aŋwaʼne Ndém ŋ́gɛ: “Ndém a a shʉʼ etswii, mecɔʼ pí e epíp á wú.” 11Ńzéŋ ntí ŋ́gɛ: “Pɔ́ e shʉʼ eŋímne ekʉlɛ á wú, éwɛ á ntē mbū pɔ́p, tɛ ŋgɔ́ yīi, o gɔ le ánɛ tɔ́ kwate.”» 12Yɛɛ́so á pwɛt á mbū yí ŋ́gɛ: «Aŋwaʼne Ndém á zeéŋ ndé ŋ́gɛ: “Ndɛ́ʼ ŋiŋ á kone kone, tɛ́ Atsyapuɔ Ndém á ghʉ ajū mīi, ŋgaŋ a á si nzɛ́ttɛ.”» 13Menu mīi Sɛ́ta a le nɔ̄ŋ ndɔkɔ ntátɛ á Yɛɛ́so, é le mīī, á tshi á yí nnéŋ ŋgʉ̄ɔ, ńdɔ̄k nzwíʼte á afʉʼ ndɛʼɛ.
Yɛɛ́so a á ega ŋgɔ̄ á nzií afaʼ zí á ntē Ŋgaliléa
(Mat 4.12-17; Mlk 1.14-15)
14Yɛɛ́so á le gē epiŋ nzem mé Ŋgaliléa, Azwakne Ndém á gɔ́ á ntē yí, ńnɔŋ ŋgyáa á yí mete ánɛ mefaʼ Ndém. Mɛ́ pú nnɔ̄ŋ ŋghítɛ á yí ejʉʼ tsem, á eshhʉ̄ ajʉʼ mɛ́t. 15Á nɔŋ ntɔ́ktɛ ánɛ meŋgyā aswiŋte epuɔ Yúda, ńzíʼnɛ á wɔ́p. Epuɔ pīi é le nɔ̄ŋ njúʼɔ ashuŋne zí, é le nɔ̄ŋ ŋguʼtɛ á yí.
Epuɔ Naázalɛt é ka Yɛɛ́so véŋ ɛ́
(Mat 13.53-58; Mlk 6.1-6)
16Yɛɛ́so á piŋ nzem mé Naázalɛt, á ajʉʼ zīi a le tswhí éwú. Aleʼé aswite á kuʼ, á kó á ntē ŋgyā aswiŋte, páʼ a gɛ nzī ŋghʉ̄ɛ épúp. Afʉʼ á kuʼ, á lu á esī ntshí ajʉʼ, ŋ́gɔ̄ á ntɔ́ŋ aŋwaʼne Ndém á mbū alāʼ. 17Mɛ́ pɛ́ aŋwaʼne ntswi‑ŋke Ndém Izayi, ŋ́gyá á mbū yí, á ŋáʼa tɛ njʉ́ɔ amɔ̄ʼ ajʉʼ, ńzī á letɔ̄ŋ, mbɔ mɛ́ le tí éwú ŋ́gɛ:
18«Azwakne Atsyapuɔ Ndém ánɛ meŋ,
melaʼ mīi a ke chʉ́ á gá,
ńtó á gá ŋ́gɛ,
meŋ egʉɔ ntswī ŋke mbɔŋ
á mbū wɔ te kuʼ ánɛ azō.
Ŋ́gɛ, meŋ egʉɔ esáʼ ŋ́gɛ,
mɛ́ e shʉʼ ekɛ́ʼɛ ŋkhʉ
á ntɔ̄ŋ megaŋ atʉɛ́.
Wɔ efʉʉ́‑menēk
e epiŋ njʉ́ɔ ejʉʼ.
A ke zéŋ ntó á gá ŋ́gɛ,
meŋ egʉɔ ŋghʉ̄, epuɔ pīi mɛ́ swɛ́tɛ á wɔ́p,
e etó á ntē ŋgʉɔ̄ʼ.
19Ḿbiŋ mbhʉ́ ŋ́gɛ,
ŋguʼ zīi Ndém a gɔ̄ á ntswiī apɔŋɔ́ ntē zí,
e ejʉɔ páʼa. »
20Yɛɛ́so á tɔ́ŋ aŋwaʼne mɛ́t tɛ á mi, á kápte, ŋ́gyá á mbū ŋiŋ yīi a gɛ eféŋɛ, ŋ́gʉɔ nnáŋ á esī, ŋ́gɔ̄ á ŋkɛ́ʼtɛ anu zīi a á tɔ́ŋ. Epuɔ metsem pīi, é mbú ŋgɔ́ á ntē ŋgyā aswiŋte egā, é pʉ́ʼɛ menēk ntshí ánɛ yí. 21Á lɛ nzī á lekɛ̄ʼte eshúŋ á wɔ́p ŋ́gɛ: «Ajʉʼ aŋwaʼne zīi pɛ júʼɔ tsetsɔŋɔ lāa, á gɔ́ mbo po ayáʼa wuɔ. » 22Epuɔ metsem é le nɔ̄ŋ njúʼɔ á yí, á piŋ ŋgɔ́ si eshúŋɔ meshuŋne mbwɛ́né. Mɛ́ gɔ́ si ŋkɔ̄ŋtɛ á yí, tɛ́, á piŋ ŋkʉ̄ʼne á wɔ́p ntií ashuŋne zīi, e túɔ́ á nchu yí. Afʉʼ á piŋ nnáŋ tɛ ŋkūʼ, pɔ́ zwɛ́tte ŋ́gɛ, mɔ́ wuɔ a te gɔ́ áa méŋ Yosɛ́p ɛ́ kɛ? 23Yɛɛ́so á lɛ ndé á mbū pɔ́p ŋ́gɛ: «Pɛ́ ghʉɛ páʼā, ŋ́gɔ̄ á eshúŋ ashuŋne lepúʼ jʉɔ á mbū meŋ, élé gɛ: “Wu mbɛt‑epuɔ, pɛ́t nnɛ̄t ju wu méŋwɛ̄t.” Pɛ e zéŋ elé mbɔɔ gɛ: “Meŋkʉʼne menu mīi pek ke júʼē, mɛ́ gɛ o ke ghʉ̄ á Kafaanawum lā, zéŋɛ́ ŋghʉ̄ ega, á ntē mba pɛ.”» 24Yɛɛ́so á zéŋ ndé mé pɔ́p ŋ́gɛ: «Kwaʼ anuúnē meŋ shúŋɔ á wɛ́, mɛ́ la zī mvéŋ á ntswi‑ŋke Ndém á alāʼ pɔ́p ɔ́. 25Pɛ ezéŋ njúʼ: á lɛ ŋguʼ ntswi‑ŋke Ndém Eli, mbɔ Ndém a ke ghʉ̄ʉ̄, mbeŋ é náŋ té lú ŋguʼ tɛ́t mé mesaŋ ntokó, mía mía afʉɔne á pú ŋgwhʉ̄ alāʼ. Meŋ chʉ́ɛ nnɛ̄t eshúŋɔ á wɛ́ ŋ́gɛ, afʉʼ mɛ́t, mepfók wɔnzwí é gɔ́ á tsetsɛlɛ epuɔ Islaɛl tɛ nzáne. 26Táʼ, Ndém á láʼ te tó á ntswi‑ŋke yi Eli ŋ́gɛ, a egʉɔ ntswíte á ŋiŋ wɔp ɔ́, ḿbiŋ ntó á yí áa mbū mmɔʼ mpfók menzwí ndɛʼɛ, á tésɔŋ Salɛ̄pta á eshhʉ̄ Sidɔŋ. 27Amɔ̄ʼ anu páʼ ajʉɔ lā, á le zéŋ ntɔ́k ŋguʼ ntswi‑ŋke Ndém Elizé. Megaŋ kaʼpáp é lɛ á tsetsɛlɛ epuɔ Islaɛl tɛ nzáne. Elizé á láʼ te ŋiŋ á nnɔ pɔ́p pɛ́t, ḿbiŋ mbɛ́t áa ndaʼ Naāman, tɛ́ á piŋ ŋgɔ́ á ŋiŋ ŋgɔŋ Sília. »
28Epuɔ pīi é lɛ á ŋgyā aswiŋte, é júʼ páʼ a shúŋɔ emuɔ menu mɛ́t, ntɔ̄ŋ wɔ́p é fuʼ. 29Pɔ́ lu á esī, ḿbō ánɛ yí, ŋ́gɔ̄ á yí, éshūŋne á yí ndɔk efhó á tésɔŋ ntó, ŋ́gɔ̄ á ntshóne á yí, a efɛ́ ŋkʉŋɛ́, á gɔ́ páʼ tésɔŋ wɔp a lɛ á ndo lekwɛ̄t. 30Táʼ, Yɛɛ́so á lɛ esɛ̄t nnɛ̄t, ńtɔ́k á tsetsɛlɛ pɔ́p, ŋ́gʉ̄ɔ á yí.
Yɛɛ́so a á ega njūŋɔ esī ánɛ ŋiŋ
(Mlk 1.21-28)
31Yɛɛ́so á lɛ ncú ŋgʉ̄ɔ mé mmɔʼ tésɔŋ Ŋgaliléa, mɛ́ tɔ́ŋ lɛ Kafaanawum. Ŋ́kó éwú, ńnáŋa nzíʼnɛ epuɔ ánɛ meleʼé aswite, á ntē ŋgyā aswiŋte pɔ́p. 32Ezi ntií lezīʼne, é nɔŋ ŋkʉ̄ʼnɛ epuɔ tɛʼ, melaʼ mīi, a á si eshúŋnɛ páʼ ŋiŋ yīi, Ndém mé tó á yí. 33Mmɔʼ ŋiŋ a lɛ á ntē ŋgyā aswiŋte ega mɛ́t, mbɔ mmɔʼ esī é gɛ ŋgyáa á yí ŋgʉɔ̄ʼ, ńnáŋ tɛ afʉʼ á kuʼ, é gaʼte mé ŋghi teté ŋ́gɛ: 34«Woó yée. Yɛɛ́so ŋiŋ Naázalɛt, o tswíi akɔ̄ á mbū pek ē? O kɛɛ́ eshʉʼɛ áa mbík pek kɛ? Meŋ á zhɛ́ á ŋiŋ yīi, o ó ewiɛ́. O ó te alɔ́ʼ, éfhɔ́ɔ á mbū Ndém. » 35Yɛɛ́so á cɔ́k esī mɛ́t, ńdé ŋ́gɛ: «Láŋtɛ́. Fhó ánɛ ŋiŋ wuɔ ntó. » É lɛ esɛ̄t á yí mmāʼ á esī á mvhɔ epuɔ metsem, éfhó ánɛ yí ntó, ŋ́ké te yí mé azō ghʉ.
36Á pú ntsyā epuɔ pīi, é ŋgɔ́ á ŋgyā mɛ́t, pɔ́ lé á tsetsɛlɛ pɔ́p ŋ́gɛ, eziɛ́ ntií ashuŋne e ejʉɔ páʼa ā? Ŋiŋ wuɔ á wɛɛ̄ mete, á ega eshúŋnɛ, ńcɔ́kɔ mesī, ńjūŋɔ á wɔ́p ánɛ epuɔ. 37Á fhó épúp, mɛ́ pú ŋghíte á Yɛɛ́so ánɛ eshhʉ̄ ajʉʼ mɛ́t ntsem.
Yɛɛ́so á ega ŋghʉ̄ɛ, megaŋ agɔ é tʉɛ
(Mat 8.14-17; Mlk 1.29-34)
38Yɛɛ́so á fhó á ŋgyā aswiŋte mɛ́t ntó, ŋ́gʉ̄ɔ mé mba mmɔʼ ŋiŋ, lezēŋ tsí é gɔ́ lɛ Simɔŋ. Ŋ́gē eshʉʼe, ntenté nnɛ̄t é nɔŋ ŋkɔ́ʼɔ á ŋgém yi. Mɛ́ lɛ eswíŋte á Yɛɛ́so ŋ́gɛ, a eghʉ̄, a etē. 39Á lɛ ntshóte nnɛ̄t mé lezēŋ ŋgɔ, ŋ́ŋɔ́ʼne á ajʉʼ zīi a á nnɔ̄ŋ éwú, ńcɔ́k nnɛ̄t mɛ́t, é záʼa. Ŋgɔ á lɛ ndū á esī, éfāʼ azō, ńdɔk ŋghī á wɔ́p.
40Á gɔ́ afʉʼ mbwɛɛ́t‑njhʉ̄, epuɔ pīi é ŋgwɛ̄ megaŋ agɔ ntií ntiī á mba pɔ́p, pɔ́ lɔk eshʉ̄ʼ njʉ́ɔ á Yɛɛ́so. Á nɔŋ nzápa mbū mí á athū ewiɛ́ ŋgaŋ agɔ lɛ́, á tʉɛ. 41Mesī é le zéŋ nnɔŋ ŋgē efhɔ́ɔ ánɛ megaŋ agɔ tɛ nzáne, épi mɛ́ ndɔ̄k á wɔ́p eshʉ̄ʼ, étúɔ́, ńnɔŋ ŋgāʼtɛ mé nte ndʉ́ɛ́ ŋ́gɛ: «O ó Méŋ Ndém. » Yɛɛ́so á lɔk ncɔ̄k ŋkāk á wɔ́p, ńtɔ̄ʼ ŋ́gɛ, ndɛ́ʼ pɔ́ zéŋ anu ndé, melaʼ mīi pɔ́ le nɔ̄ŋ nzhɛ́ɛ á légɛ, Yɛɛ́so á Nzaʼ‑Ŋkhʉ yīi, Ndém a le laʼnēē.
Yɛɛ́so á ega ntswī ŋke mbɔŋ á Yudéa
(Mlk 1.35-39)
42Njhʉ̄ é shʉʼ ndá, Yɛɛ́so á fhó á tésɔŋ ntó, ŋ́gʉ̄ɔ mé ajʉʼ zīi ŋiŋ a te éwú ú. Alāʼ á cʉ́ʼ te á yí jʉ́ɔ, ńzī á lefaʼ á yí, ńdáʼ efāʼ á yí tɛ njʉ́ɔ. Ḿbiŋ efāʼ eshhʉ̄ á lekūʼte á yí, tɛ a á le tshī á wɔ́p néŋ ŋgʉ̄ɔ ɔ́. 43Táʼ, Yɛɛ́so á piŋ ndé á mbū pɔ́p ŋ́gɛ: «Meŋ mbɔŋteé á gá á legʉɔ á ntē emɔ̄ʼ mekap alāʼ, ńtswī ŋke mbɔŋ ŋ́gɛ: “Ndém á si nɔŋ ŋgɔ̄ ezi á leghʉ, mɛ́ ejʉ́ɔ lefɔ tsí, melaʼ épúp tɛ́, a le tó á gá á ŋgɔŋ ega.”» 44Á lé épúp, ńnɔŋ ŋkʉ́ʼnɛ á ntē ŋgɔŋ epuɔ Yúda, ńtswīi ŋke mbɔŋ mɛ́t, á ntē meŋgyā aswiŋte.
Currently Selected:
Lúkási 4: ybb
Highlight
Share
Copy
Want to have your highlights saved across all your devices? Sign up or sign in
© CABTAL