Lúkási 22
22
Yúdas a á ega eswīŋɛ á Yɛɛ́so
(Mat 26.1-5, 14-16; Mlk 14.10-11; Jáŋ 11.45-53)
1Aleʼé lekāk zīi mɛ́ tɔ́ŋɔ lɛ Páska, á shʉʼ nnɔ̄ŋ ŋkūʼɔ, ńdɔkɔ nzīi meleʼé mīi epuɔ Yúda, é lɛɛ́ mpfɛ́tɛ mmɔʼ ntií mblɛ te levwi. 2Wɔ nɔŋ‑epɔʼ epi melʉɛ pɔ́ wɔ kɛ́ʼte‑mbé Ndém, é nɔŋ efāʼa eshhʉ̄ yīi, pɔ́ gɔ elɔk ezwhí á Yɛɛ́so. Ńnɔŋ efāʼa páʼ pɔ́ e tsia épúp, melaʼ mīi pɔ́ é si mbɔ́kɔ menēk alāʼ. 3Sɛ́ta á lɛ ŋkó á ntē Yúdas, éyi mɛ́ lɛɛ́ nzéŋɛ ntɔ́ŋɔ á yí lɛ, Iskaliɔt. Á gɔ́ mmɔʼ ŋiŋ ánɛ meziŋ‑ntō Yɛɛ́so, á nnɔ epi emɔ̄ʼ ntsɔp pīa mé legēm. 4Yúdas mɛ́t á gʉɔ njʉ́ɔ wɔ nɔŋ‑epɔʼ epi melʉɛ, pɔ́ a wɔ tshí‑mvhɔ ánɛ lepīp á Mía Ŋgyā Ndém. Pɔ́ a pɔ́p é cuŋte páʼ á tsia épúp, tɛ́ a eswīŋ á Yɛɛ́so á mbū pɔ́p. 5Pɔ́ júʼ, ŋgɔŋ é pú mbɔ̄ŋ á wɔ́p. Pɔ́ phʉ́ á yí ŋkāp, 6á véŋ. Ńdɛ nzī á lefaʼ eshhʉ̄ á lelɔk nnéŋ á Yɛɛ́so á mbū pɔ́p, tɛ alāʼ á le zhɛ́.
Yɛɛ́so a á ega ntúɔ́ megaŋ nnɔ pí ŋ́gɛ, pɔ́ egʉɔ ncūŋte etsō Páska
(Mat 26.17-25; Mlk 14.12-21; Jáŋ 13.21-30)
7Aleʼé á lɛ ŋkūʼ ánɛ meleʼé mɛ́t, ŋ́gɔ́ aleʼé zīi mɛ́ lɛɛ́ mpfɛ́tɛ mblɛ te levwi, áleʼé zīi mɛ́ gɔ á nzwhí mvhō, tɛ́ elɔk elá etsō lekāk Páska. 8Yɛɛ́so á tó á Piɛ pɔ́ Jáaŋ, ńdé mé pɔ́p ŋ́gɛ: «Pɛ egʉɔ ncūŋte etsímpɛ ecū mīi, ḿpɛ gɔ elɔk ejhʉ́ lekāk Páska. » 9Pɔ́ zɛ́tte á yí ŋ́gɛ: «O ó si ŋkɔ̄ŋɔ ŋ́gɛ, pek ecūŋte etsō mɛ́t egɔ́?»
10Á pwɛt á mbū pɔ́p ŋ́gɛ: «Pɛ ejúʼ á mbɔŋɔ́. Pɛ e gʉɔ tɛ ekó á tésɔŋ, éjʉ́ɔ á ŋiŋ mbaŋa, a epīʼ atʉ̄ɔ́ ntshi. Pɛ ezhɛ̄ne á yí, tɛ a ekó á ŋgyā, pɛ ekó azɛ́. 11Pɛ ekó éwú ntswī á mbū ŋgaŋ ŋgyā ŋ́gɛ, Ndi a á gɛ, pek ezɛ́tte á wú ntē ŋgyā yīi, pɔ́ a nnɔ yí é gɔ á njhʉ́ lekāk Páska éwú. 12A etswī á wɛ́ mmɔʼ mía lewup ŋgyā, ánɛ leleŋ athʉ́, mbɔ mɛ́ lē ndáʼ ncūŋte tɛ́ é pɔŋ. Pɛ ekó éwú, ńtɛ́ne etsímpɛ etsō lekāk. »
13Pɔ́ lɛ ŋgʉ̄ɔ, ŋ́kó njʉ́ɔ akʉ̄ɛ akʉ̄ɛ á gɔ́ ndeŋ ndeŋ páʼ, a á ŋghíte á wɔ́p épúp. Pɔ́ cuŋte etsō lekāk Páska á ŋgyā mɛ́t.
Yɛɛ́so pɔ́ a nnɔ yí é ega njhʉ́ɛ lekāk Páska
(Mat 26.26-30; Mlk 14.22-26)
14Afʉʼ á náŋ tɛ ŋkūʼ, Yɛɛ́so pɔ́ a meziŋ‑ntō pí, é shʉʼ nnáŋ á esī ŋgɔ̄ á mpfɛ́t azō. 15Á lé á mbū pɔ́p ŋ́gɛ: «Meŋ ke pú nnɔ̄ŋ ntsáa ŋ́gɛ, ḿpɛ ejhʉ́ lekāk Páska cʉɔ, tɛ́ meŋ ekó á nté ŋgʉɔ̄ʼ. 16Meŋ shúŋɔ á wɛ́ anuúnē ŋ́gɛ, meŋ te láʼ ezéŋ ejhʉ́ mmɔʼ Páska á, tɛ eláʼ etshí ánɛ afʉʼ zīi, Ndém á sáʼa lefɔ tsí, ŋ́ghʉ̄ɛ, anu Páska jʉɔ mɛ́t, á puɔ. »
17Á lé á mbū pɔ́p épúp, ńdɛ ŋkʉ̄ɛ ndɔ̄ŋ meluʼ, ésyákne á Ndém, ńdé á mbū pɔ́p ŋ́gɛ: «Pɛ metsem, e ekɔ nnú. 18Meŋ ndɔkɔ eshúŋɔ á wɛ́ ndeŋ ndeŋ ŋ́gɛ, tɛ efhó tsetsɔŋɔ, meŋ te e láʼ ezéŋ emuɔ meluʼ enú ú, tɛ eláʼ etshí ánɛ afʉʼ zīi, Ndém a sáʼa lefɔ tsí. » 19Ńzéŋ mbɛ́ mblɛ, ésyákne á Ndém, ḿbwɔ́ʼte, ŋ́gē egapte á mbū pɔ́p, ńdé ŋ́gɛ: «Pɛ ekɔ, ejʉɔ é si ŋgɔ́ mbe nnɛ̄t za, [meŋ ŋgyáa ánɛ athū zɛ́. Pɛ ecʉ́ʼɛ nnáŋa ŋghʉ̄ɛ páʼa, ńdɔkɔ ŋkímtɛ á gá. » 20Pɔ́ pfɛ́t tɛ é mi, á kʉɛ ndɔ̄ŋ meluʼ, ńzéŋ ŋghʉ̄ épúp, ŋ́gē eyá mé pɔ́p, ńdé ŋ́gɛ: «Emuɔ é si ŋgɔ́ metshi má, meŋ pfɛttɛ ánɛ athū zɛ́ páʼa, Ndém á lɔkɔ ŋkʉɔ́ʼɔ eka eswhī.]#22.20 Emɔ̄ʼ membúʼ meŋwaʼne tɛ efʉʼ mvhɔ, é té menu mīi, é ntē akɛ [..] la wɛ̄ɛ.
21Meŋ ké ndʉ́ɛ́ páʼa, ŋiŋ yīi a a swiŋ á gá, á náŋ azí á nnɔ ega, tɛ pek yí é si mbútɛ etsō mpfɛ́tɛ. 22Á kwaʼ anuúnē ŋ́gɛ, Méŋ‑Ŋiŋnɔŋ wuɔ, a a shʉʼ ekwhʉ́ áa páʼ Ndém a le néŋ épúp. Táʼ, ndɔ é athū ŋiŋ yīi, a a swiŋ á yí, tɛ́ mɛ́ ezwhí á yí. » 23Meziŋ‑ntō pí é júʼ épúp, ńzī á lezɛ̄tte á tsetsɛlɛ pɔ́p, á ŋiŋ yīi, a gɔ efhó éwú, éfʉ̄ʼ ntií anu épúp.
Ntií ŋiŋ zīi á gɔ egɔ́ á mɔ́ ndʉɛ
24Afʉʼ á kuʼ, nnɔ Yɛɛ́so é zi á leŋak á tsetsɛlɛ pɔ́p, éfāʼa á lezhɛ̄ á ŋiŋ yīi, a á nnɔ pɔ́p, mɛ́ jʉ́ɔ á yí páʼ mía ŋiŋ. 25Yɛɛ́so á lé á mbū pɔ́p ŋ́gɛ: «Pɛ é si nzhɛ́ɛ á mbɔŋɔ́ á légɛ, mefɔ é egʉ́ɛ egʉ́ɛ á ntē ŋgɔŋ, ńnɔŋ esáʼa elāʼ tsɔ́p, éswɛ́tɛ á wɔ́p swɛ́te. Wɔ sáʼ‑ŋgɔŋ tɛ mmī, é zéŋ nnɔ̄ŋ ŋkɔ̄ŋɔ ŋghʉ̄ áa lɛ, mɛ́ etɔ́ŋ á wɔ́p lɛ, wɔ ghʉ‑anu mbɔŋ. 26Táʼ, ḿbiŋ ŋgɔ́ mé pɛ, mbɔ á ka pɔ̄ŋ ŋ́gɛ, pɛ eghʉ̄ épúp ɔ́. Ŋiŋ yīi a á tsetsɛlɛ pɛ, ŋ́gɔ́ á mía ŋiŋ, a eghʉ̄ páʼ méŋkhʉ̄ wɛ lā. Ŋiŋ yīi a piīŋ ntshí á mvhɔ pɛ, ésáʼa á wɛ́, a egɔ́ páʼ ŋgaŋ afaʼ wɛ lā. 27Pɛ elɛ eshúŋ á gá: á shʉʉ̄ʼ ánɛ ŋiŋ yīi, a wɛɛ̄ á lelā, ńtswíʼ ŋgyá mɛ́ pfɛ́t, pɔ́ ŋiŋ yīi, a naáŋ á esī mbáŋne akhu mpfɛ́tɛ péʼe, awɔ́ á gɔ́ á mía ŋiŋ ŋ̄? A te gɔ́ áa ŋiŋ yīi, a naáŋ á esī mpfɛ́tɛ kɛ? Tɛ́ meŋ eké ŋgɔ́ azá á tsetsɛlɛ pɛ, áa páʼ méŋkhʉ̄ wɛ lā. 28Ɔ táʼ, páʼ meŋ ke nɔ̄ŋ njʉ́ɔ ŋgʉɔ̄ʼ le akɔ̄ lɛ́, pɛ pwɔ̄ mé ké ŋgɔ́ á lezēŋ meŋ lā, 29pɛ e shʉʼ ejhʉ́ apɛ: páʼ mɔʼɔ́ ga a ke yá lefɔ á mbū meŋ lā, meŋ a láʼ ezéŋ ecuŋte azɛ́ ajʉʼ, á ntē lefɔ mɛ́t. 30Afʉʼ mɛ́t, meŋ egɔ́ á efɔ, ḿpɛ epúte ŋgwʉ́ŋ, ḿpfɛ́t, ńnú, pɛ epiŋ nnáŋ ánɛ ekɔʼ lefɔ, ésáʼ nzwɛt ŋgyā Islaɛl, étseŋ ŋgyā ntsɔp pīa mé legēm. »
Yɛɛ́so a á ega esīa ŋ́gɛ, Piɛ a shʉʼ epuŋne á yí
(Mat 26.31-35; Mlk 14.27-31; Jáŋ 13.36-38)
31Yɛɛ́so á náŋ tɛ ndé á mbū Simɔŋ Piɛ ŋ́gɛ: «Simɔŋ, Simɔŋ, Sɛ́ta a lē ndáʼ ndɔ́ á lecʉʼne á wɛ́ metsem, páʼ mɛ́ cʉʼɛ mesāŋ lā. 32Táʼ, meŋ á swíŋte á Ndém ánɛ athū jú ŋ́gɛ, ndɛ́ʼ o eká tɛ ŋká, ánɛ lefɛ̄ nnɛ̄t ŋgyá á mbū meŋ. Afʉʼ zīi, o ó zéŋ efɛ́ nnɛ̄t ŋgyá á mbū meŋ, o etɔ́te epɔ̄ memía pú. » 33Piɛ á gɛ: «Ndi, azi ŋgɔ́ á lekō atʉɛ́, mbɔ pɔkɔ, ŋ́gɔ́ á lewhʉ̄, mbɔ pɔkɔ mé kwhʉ́. » 34Yɛɛ́so á júʼ épúp, ńdé ŋ́gɛ: «Piɛ, zwíʼtɛ meŋ eshúŋ á wú. Ŋkʉɔʼ a ghʉ ege etɔ́ŋ melanjhʉ̄ ayáʼa, mbɔ o ó puŋne á gá ŋgʉɔ ntɛ́t. »
Yɛɛ́so a á ega ntékɛ nnɔ yí ŋ́gɛ, pɔ́ ecūŋte nnɛ̄t, ńzwíʼte ŋgʉɔ̄ʼ
35Yɛɛ́so á piŋ nzɛ́tte nnɔ yí ŋ́gɛ: «Pɛ ekímte afʉʼ zīi, meŋ nde tó á wɛ́ á leziŋ, té ŋkāp, té apa, té meláŋ. Pɛ le zók nziŋɛ péʼe, azō á láʼ ŋkíŋ á mbū pɛ kɛ?» Pɔ́ gɛ: «Ŋgáŋ, amɔ̄ʼ azō á lɛ te kíŋ. » 36Á gɛ: «Á tsetsɔŋɔ mbɔ á kúmne. Ŋiŋ a wiɛ ŋkāp zi, á pɛ́. Ŋ́gwɛ̄ apa, á pɛ́. Ŋiŋ yīi, a te ŋŋí ncu wɛ̄ɛ, a eswīŋ nzhó efwɔ̄k zi, ńdɔk nzó ezi. 37Meŋ ndʉ́ɛ páʼa melaʼ mīi, anu zīi mɛ́ le tí á ntē aŋwaʼne Ndém á athū meŋ, ŋ́gɛ: «Mɛ́ e láʼ esáŋ á yí á nnɔ epuɔ tepɔŋ. » Anu mɛ́t a ké epo tsetsɔŋɔ. Pɛ ezhɛ́ á légɛ, anu jʉɔ mɛ́t á si ŋgɔ̄ á mbūɔ̄. » 38Nnɔ yí é lé á mbū yí ŋ́gɛ: «Ndi, meŋŋí e emuɔ á esī mɛ́mbīa. » Yɛɛ́so á gɛ: «Á kuʼ páʼā. »
Yɛɛ́so a á ega eswíŋtɛ á Ndém á ndo lekwɛ̄t Methʉ́ Olive
(Mat 26.36-46; Mlk 14.32-42)
39Yɛɛ́so á lé épúp, éfhó á ŋgyā ntó, pɔ́ a nnɔ yí, ŋ́gʉ̄ɔ mé lekwɛ̄t Methʉ́ Olive, páʼ a gɛ nzī ŋghʉ̄ɛ épúp. 40Pɔ́ gʉɔ tɛ ŋkó éwú, á lé á mbū pɔ́p ŋ́gɛ: «Pɛ eswíŋte á Ndém, ḿbɔ́k á wɛ́ á lewhʉ ánɛ táte. » 41Ńdé épúp, ésákne á wɔ́p, ńnáʼ ŋgʉɔ ntshí ánɛ ŋgia á lemaʼ tɔ́, ńtswíʼte á esī, éswíŋte á Ndém ndé ŋ́gɛ: 42«Mɔ́ʼɔ, o elɛ mvéŋ, o epāʼne ejʉɔ ntūʼ ŋgʉɔ̄ʼ, tɛ meŋ ńde nú. Táʼ, meŋ te ndʉ́ɛ́ ŋ́gɛ, o eghʉ̄ ánɛ lekɔŋ ga á, ghʉ̄ɛ ánɛ páʼ o ó kɔŋ. » [ 43Éswíŋte épúp, cɔʼ Ndém á fhó á lephū, ésóʼo eshʉʼ ńtɔ́te á yí. 44Anu ŋgʉɔ̄ʼ zīi a gɔ ekó éwú, á nɔŋ mpfɛ́tɛ á yí, á tswiʼne eswíŋte á Ndém nnéŋ ntē, tɛ aziʼne á tó ánɛ yí, ńtsyákte á esī páʼ metshi lā.]
45Á swíŋte á Ndém tɛ á mi, ḿbʉ́ʼɛ nnɛ̄t, ḿbīŋ nzem mé lezēŋ nnɔ yí. Ŋ́gē eshʉʼe, ńjʉ́ɔ mbɔ pɔ́ é mek tɛ ŋká, ńdí. 46Á lé á mbū pɔ́p ŋ́gɛ: «Pɛ líi akɔ̄ páʼa ā? Pɛ eziɛ eswíŋte á Ndém, ḿbɔ́k á wɛ́ á lewhʉ ánɛ táte. »
Mɛ́ gɔ á Yɛɛ́so
(Mat 26.47-56; Mlk 14.43-50; Jáŋ 18.3-11)
47Á zɛ́t á nzhɛ á eshúŋnɛ, nnɔ epuɔ tɛ nzáa é sáʼne á mvhɔ yí, Yúdas yīi, a lɛ mmɔʼ ŋiŋ ánɛ meziŋ‑ntō pí ntsɔp pīa mé legēm, á tshí mvhɔ, ńtshóte nnɛ̄t mé lezēŋ Yɛɛ́so, ŋ́gɔ̄ á ntsaʼté á yí, éseŋte á yí. 48Yɛɛ́so á lé á mbū yí ŋ́gɛ: «Yúdas, o gɔ elɔk áa atsaʼte pɔ́ leseŋte meŋ, tɛ́ eghʉ mɛ́ egɔ̄ á Méŋ‑Ŋiŋnɔŋ wuɔ lɛ́?
49Megaŋ akhu Yɛɛ́so pīi e lɛ á lezēŋ yí, é jʉ́ɔ ajū mīi á si ŋgɔ̄ á ntɔ́kɔ, ńzɛ́tte á yí ŋ́gɛ: «Ndi, pek elɔ̄k meŋŋí ncu, ńdʉɔ́ʼ e?» 50Mmɔʼ ŋiŋ nnɔ wɔp á lɛ esɔ̄ŋ ŋŋí, ŋ́gɛ yí lɔkɔ ŋgɔ̄ á ŋkʉɔ́ʼ ŋiŋ, ŋ́kó mbāŋ letuúŋ ŋiŋ yīi tɛŋgyā wɔ nɔŋ‑epɔʼ a á nzāp ŋkaʼte yí, étsi ŋkɔʼɔ́ apū ete. 51Tɛ́ Yɛɛ́so á lé ŋ́gɛ: «Pɛ ecʉ́ʼ páʼā, á kuʼ páʼā. » Ńdé épúp, ńdɛ mpfēŋ letuúŋ ŋiŋ mɛ́t, é lɛ ntē.
52Á pekne nnɛ̄t, ńzɛ́tte wɔ nɔŋ‑epɔʼ epi melʉɛ, pɔ́ wɔ tshí‑mvhɔ ánɛ lepīp á Mía Ŋgyā Ndém, mbɔɔ emɔ̄ʼ mekém pīi, é le shʉ̄ʼ á ŋgɔɔ̄ yí, ŋ́gɛ: «Pɛ é gaá, ńdɔ̄k meŋŋí pɔ́ a mekéseŋ, éshʉ̄ʼ páʼ pɛ gɔ á ŋgɔɔ̄ ntsɔ́ŋ ŋ́? 53Ḿpɛ mé ke nɔ̄ŋ nzóko eleʼé tsem, á ntē Mía Ŋgyā Ndém, pɛ láʼ te gá pfeŋ. Táʼ, azɛ́ afʉʼ ajʉɔ zīi á kuʼ lāa, ŋ́gɔ́ afʉʼ zīi, Sɛ́ta a á si efʉ̄ʼtɛ menu mí. »
Piɛ a á ega mbūŋnɛ á Yɛɛ́so
(Mat 26.57-58, 69-75; Mlk 14.53-54, 66-72; Jáŋ 18.12-18, 25-27)
54Epuɔ mɛ́t é gɔ á Yɛɛ́so, ńdɔ̄k á yí ŋgʉ̄ɔ mé mba tɛŋgyā wɔ nɔŋ‑epɔʼ. Ńnɔŋ ŋgʉ̄ɔ, Piɛ á gɔ́ tɛ nzem, ńzhɛ̄nɛ á wɔ́p. 55Piɛ á ge eshʉʼe, pɔ́ nɔŋ nzóko mmók á esɔŋ atetá. Á shʉʼ azí, ńnáŋ á nnɔ pɔ́p. 56Mmók é kɛʼɛ ejʉʼ, mmɔʼ mɔ́ menzwí yīi, a á ŋgaŋ afaʼ á mba mɛ́t, á jʉ́ɔ á yí, ḿbʉ́ʼɛ menēk mí ntshí ánɛ yí, ńdé ŋ́gɛ: «Ŋiŋ wuɔ pɔ́ ŋiŋ yīi, mɛ́ gɔ á yí lā, mé kɛɛ́ nziŋɛ. » 57Piɛ á lɛʼte ŋ́gɛ: «Menzwí wɔ, meŋ ka yí zhɛ́ ɛ́. » 58Méŋ afʉʼ á tɔ́k, mmɔʼ ŋiŋ mbaŋa á cʉ á yí tɛ ndé ŋ́gɛ: «O ó ajú mmɔʼ ŋiŋ nnɔ yi. » Piɛ á tsɔ́ʼ á mbū yí ŋ́gɛ: «Azaŋá, pek yí gɛ te nzīŋɛ. »
59Á náʼ nzī nnáŋ, mmɔʼ ŋiŋ ndɛʼɛ á shúŋ tɛ nzáʼ ŋkwɛ ŋ́gɛ: «Á té anu efaʼ efaʼ á, pɔ́ ŋiŋ wuɔ mé kɛɛ́ nziŋɛ, a á ŋiŋ Ŋgaliléa páʼ yí. » 60Piɛ á pwɛt á mbū ŋiŋ mɛ́t ŋ́gɛ: «Yaāa me wu, meŋ ka zhɛ́ anu zīi o shúŋɔ lā. » Ńzɛ́t á nzhɛ á eshúŋnɛ, ŋkʉɔʼ á tɔ́ŋ. 61Ndi Yɛɛ́so á pekne nnɛ̄t, ńdɛ ŋgē ecʉte á Piɛ, menēk mɔ́p yí é gɛ, tsáʼ noʼ. Piɛ á lɛ ŋkímte páʼ Yɛɛ́so a ke lé á mbū yí ŋ́gɛ: «Ŋkʉɔʼ a ghʉ ege etɔ́ŋ ayáʼa, mbɔ o ó lɛʼte ŋgʉɔ ntɛ́t ŋ́gɛ, o ka á gá zhɛ́ ɛ́. » 62Piɛ á kímte épúp, ńdɛ ntó ŋ́kó á apɛ́, ḿbú ndā mé ŋgʉɔ̄ʼ.
Mɛ́ é ega nzɔ̄tɛ á Yɛɛ́so, ńtswáa á yí
(Mat 26.67-68; Mlk 14.65)
63Epuɔ pīi é le nɔ̄ŋ mbípɛ á Yɛɛ́so, é le nɔ̄ŋ nzwīi á yí, ńnɔŋ ntswáa á yí. 64Ńzéŋ ŋkwɛ́t eshhʉ̄ yí, ńtswá á yí, ńzɛ́tte á yí ŋ́gɛ: «Ghʉ anu ntswi‑ŋke Ndém aziɛ́ tsetsɔŋɔ, ńtá á ŋiŋ yīi, a á tswá á wú. 65Pɔ́ lé épúp, ńzéŋ nnɔŋ ntswīʼnɛ nzɔ̄tɛ á yí.
Wɔ sáʼ ŋgɔŋ epuɔ Yúda é ega ŋŋāka á Yɛɛ́so
(Mat 26.59-66; Mlk 14.55-64; Jáŋ 18.19-24)
66Njhʉ̄ é lá, wɔ sáʼ‑ŋgɔŋ epuɔ Yúda é cúʼte, ŋ́gɔ́ mekém alāʼ mbɔɔ wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, ńtswī mɛ́ lɔk á Yɛɛ́so eshʉ̄ʼ mé mvhɔ asāʼ, á mvhɔ pɔ́p. 67Pɔ́ zi á leŋak á yí. Ńzɛ́tte á yí ŋ́gɛ: «Wu mé Nzaʼ‑Ŋkhʉ á ntɔ̄ŋ apuʼ yīi, Ndém a le laʼnē e? Sia eshúŋ á wék. »
Yɛɛ́so á tsɔ́ʼ á mbū pɔ́p ŋ́gɛ: «Meŋ shúŋɔ á wɛ́, mbɔ pɛ te véŋ ɛ́. 68Ḿbīŋ nzɛ́tte á wɛ́ anu, mbɔ pɛ te tsɔ́ʼ ɔ́. 69Táʼ, tɛ efhó tsetsɔŋɔ, Atsyantsɔp Ndém, a a ghʉ enáŋ á Méŋ‑Ŋiŋnɔŋ wuɔ, á ŋkɔʼɔ́ apū ete yí. »
70Pɔ́ metsem é júʼ épúp, ńdɛ mbwɛ̄t ŋ́gɛ: «Ńdɔkɔ ndʉ́ɛ́ ŋ́gɛ, o ó Méŋ Ndém lɛ́?» Yɛɛ́so á tsɔ́ʼ ŋ́gɛ: «Pɛ mé lʉ́ɛ́, meŋ á ewiɛ́. » 71Pɔ́ lɛ mbēkne nnɛ̄t, ńdé á tsetsɛlɛ pɔ́p ŋ́gɛ: «Á ké ŋgɔ́ páʼa, ḿpɛ ké nzóko nzéŋɛ efāʼa wɔ njhʉɛ‑njʉ́ɔ lɛ́? Ḿpɛ é chʉ́ nnɛ̄t njúʼ anu zīi, á tó á nchu yí. »
Currently Selected:
Lúkási 22: ybb
Highlight
Share
Copy
Want to have your highlights saved across all your devices? Sign up or sign in
© CABTAL