KALAQAMA 1
1
MAGANU KALQE KALAQINO GARA
1Maganu umo asse gordonna baatto kalaqino. 2Hatte yannara, baatto suudu noosekkitenna mullichote; tunsichuno diimete aana no; Maganu Ayyaani wayi iimaanni millisanni no.
3Hakkunni gedensaanni Maganu, «Xawaabba ikko» yii; xawaabbano ikki. 4Maganuno, xawaabbu dancha ikkinota lai; xawaabbano tunsichuwiinni badi. 5Xawaabbaho, «Barra» tunsichoho, «Hashsha» yee su'ma fushshi; barru hashshi; hashshuno soodi; kuni umi barraati.
6Hakkunni gedensaanni Maganu, «Iimi waa uullahuwiinni badate gordu dukkanu gede ikkona» yii; 7kunni garinni Maganu gordo dukkanu gede asse seekki; qoleno dukkanu gede ikkino gordira aleenninna woroonni noo wayibba badantanno gede assi; yiino gedeno ikki. 8Maganu hakkonne dukkana, «Gordo» yii. Barru hashshi; hashshuno soodi; kuni layinki barraati.
9Hakkunni gedensaanni Maganu, «Uulla reqecci yite leeltanno gede, gordoho woroonni noo wayi baalu mitto darga gamba yoo» yii; yiino gedeno ikki. 10Maganu uulla, «Baatto» yii; mitto darga gamba yiino waano, «Baara» yii; Maganu hakkuno dancha ikkinota lai. 11Hakkunni gedensaanni Maganu, «Baatto laalanno gidenna addi addi mu'ro, sirchi sirchinsa garinni laaltanno haqqe mu'risso» yii; yiino gedeno ikki. 12Baatto guma laalanno gidenna mu'ro sirchi sirchinsa garinni gumu afidhino laalo laaltanno haqqe sirchi sirchinsa garinni mu'rissu. Maganu hakkuno dancha ikkinota lai. 13Barru hashshi; hashshuno soodi; kuni sayikki barraati.
14Hakkunni gedensaanni Maganu, «Barra hashshuwiinni badate addi addi caabbiyye gordu aana heedho; barruwa, wogganna diro baddanno malaatta ikkito; 15baattote xawaabba aate gordu aana heedhe xawisso» yii; yiino gedeno ikki. 16Kunni garinni Maganu lame lowiddaanna caabbiyye kalaqi; jawu caabbichi arrishsho barra, shiimu caabbichi aganu hashsha xawanno gede assi; hattono beeddahe kalaqi. 17Tenne caabbiyye gordoho wori; konne assinohu, baattote xawaabba uyitanno gede, 18barrunna hashshu aana roorre heedhannonsa gedeetinna tunsichonna xawaabba baddaraati. Maganu hakkuno dancha ikkino gede lai. 19Barru hashshi; hashshuno soodi; kuni shoolki barraati.
20Hakkunni gedensaanni Maganu, «Wayi giddo lubbo afi'rinohu addi addi kalaqami wo'mo; ceano iima buubbo» yii. 21Kunni garinni Maganu lowiddaanna baaru moyichubba, wolootano wayi giddo heedhannorenna milli yitannore addi addi kalaqama hattono addi addi dani cea kalaqi. Maganu hakkuno dancha ikkinota lai. 22Maganu, «Qalle qalamme sirchi'ne baaru waa wo'mo; ceano baattote aana batidho» yee maassi'rinsa. 23Barru hashshi; hashshuno soodi; kuni ontikki barraati.
24Hakkunni gedensaanni Maganu, «Baatto addi addi kalaqama lubbo noonsare, addi addi saada, godowunni ha'ranno kalaqamanna moyicho fushshito» yii; yiino gedeno ikki; 25Kunni garinni Maganu addi addi moyicho, addi addi saada, baattote aana godowunni hadhanno kalaqama danu danunkunni kalaqi. Maganu hakkuno dancha ikkinota lai.
26Hakkunni gedensaanni Maganu, «Manna daninkenninna suudinkenni kalanqo; mannuno baaru giddo hee'ranno qulxu'me, iima buubbanno cea, saadatenna baattote aana godowunni ha'ranno kalaqama, hattono baatto baala gashshona» yii.
27Maganu manna umisi daninni kalaqi; kalaqinosihuno umisi daninniiti; manna kalaqi woyite, labbaahanna meyata asse kalaqinonsa. 28Maganu manna, «Ille ilamme, sirchi'ne baatto wo'mo; baattono ki'ne gashshitinannita ikkito; baaru giddo hee'ranno qulxu'mira, gordoho buubbanno cearanna baattote aana milli yaanno kalaqami lubbo afi'rinohu baalu aana roorre afidhe» yee maassi'rinsa. 29Maganuno, «Sagale ikkanno'ne gede baatto baalate aana nooha gidu laalchonna guma afidhino laalo uyitanno haqqe baala oommo'ne; 30hattono baattote aana heedhanno saada duuchantera, iima buubbanno cea duuchantera, baattote aana milli yaannohura lubbo afi'rino kalaqami duuchunkura, sagale ikkitannonsa gede lattino hayissonna haqqe baala oommonsa» yii; yiino gedeno ikki. 31Maganu kalaqinoha baala lai; lowo geeshsha dancha ikkinota lai. Barru hashshi; hashshuno soodi; kuni leelki barraati.
Currently Selected:
KALAQAMA 1: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014