JOŊRE 8
8
1Sol a kəlaŋ ku a kel gə minti kaŋ waataŋ minti awə Etiyen la wəraŋ gəm.
Sol ji caa a kaa kə doo-deŋ
Dər hi toŋa ateŋa faɗi kəyaŋ, lasi də cəwa-cəwa awaŋ cəərə kaa kə Tapi gə Zeruzalema. Kəya kaa kə doo-deŋ neŋneŋ keɗe meerteŋ wəra məna-məna giidə seŋka də Zudeŋa, də Samariŋa gəm. *Kaa kə vaa-veŋ, teŋ kooroŋ ba, yə yaakaŋ Zeruzalema. 2Kəya sərdə kaa gə minti bə ɗe gud Pepeŋaŋ haŋ titi də Etiyen bə ɗe a gaara a tələŋkə daana yə juunu hage du wəra pisi.
3Səma kə Sol ha'aŋ, wə bə bande nuutuŋ saksaki haa minti tó tawə kaa kə Tapiŋ la wəra anə re'-re'i. Kəya wə əsəŋ bə kalte wəra ku kuliŋa ŋel-ŋel keɗe bə ɗe a humti kaa kə doo-deŋ də waŋ, kaŋkar də kəram keɗe. Kəya wə ɗeŋ a fəkəy warna a daŋgay na.
Filipi waate Kel pəsaŋ kəmarwaŋ giidə seŋka də Samariŋa
4Kaa kə doo-de gə minti a meerteŋ wəraŋ, əsəŋ bə ɓəkti giidə seŋka na warna bə waate *Kel pəsaŋ kəmarwaŋa wəra a kaŋ. 5Bədoona kəya, Filipi tuluŋ giidə vil mooto də Samariŋa. Wə əsəŋ bə waate kela a kaŋ cəərə Kristu, *Hulum bə minti Pepeŋ ŋəmnu wəraŋ. 6Bə minti kaa kə ablaw keɗe bə əski kel gə minti wə bə wəətiyaŋ daana bə gole kar gə məɗ-miɗi gə minti wə bə jiyaŋ wəra də diri gəm, yə əsəŋ ɗeketi bə jiɓru ku kir minti té əskə gud kel teŋ la. 7Bədoona ta, kəwal gə minti a jəŋ bə ji caa a kaa ablaw əsəŋ bə pi wəra. Teŋ ɗəlaŋ ne pi wəra cəərə hulumaŋ, yə naakte kuy koloŋ də səɓaki, yə koore faɗi. Kaa kə hurufiŋ, də kaa kə dagtə-dagteŋ ablaw, seereŋ wəra gəm. 8Gud teŋa ta, ku tarmə kaa gə giidə vil də Samariŋ jəŋ wəra fənay-fənay də waale.
9Kəya hulum kəman a laataŋ giidə vil də Samariŋa, yə məntu minti Simoŋ. Wə haa hulum bə zogoy boblo səm moŋ, wə ŋəltəŋ kaŋ ablaw giidə seŋka taŋa də zogoy nuutuŋ. Wə a bə ji kusru haa minti tó hulum boblo ŋaanaanə mo. 10Kəya kaŋ keɗe, məlaŋ guudi cəərə kəmar koncoŋ da warna hãã də kaa kəmtəŋ, yə jiɓru ku haa anə ɓet-ɓeti. Yə minti: «Hulum toŋ kəla, wə haa Səɓaki kə Pepeŋ də kusrə faɗi, səɓaki nayta də minti yə manta minti ‹səɓaki mootoŋ#8.10 Kaŋ a ɗəkəŋ minti Simoŋ máŋ haa Pepeŋ də kusru.›.» 11Yə duunu wəra siri anə lããt-lããti gud bə minti wə bə ŋiliya də joŋre bə zogoy nuutuŋ wəra laate ablaw. 12Səma, də ko bə minti kaŋ doŋ gud *Kel pəsaŋ kəmarwaŋ gə minti Filipi a bə wəətəy diŋ cəərə *Kumna kə Pepeŋa daana cəərə Yeesu Kristuŋ gəm, yə jiiniy batem wəra, kaa kaŋkar də kəram keɗe. 13Simoŋ də kusru doŋ wəra gud kel gə minti Filipi a wəətənəy wəraŋ daana yə juunu batem wəra gəm. Də ko toŋ a teŋa kəyaŋ, wə paapa kirka yaake Filipi pəda. Kar gə məɗ-miɗi daana kar kə ŋili kaa gə minti Filipi bə jiyaŋ, Simoŋ toŋ koloŋ máŋ bə ŋili kəəsi ŋili gəm ɗaw.
14Də ko bə minti *kaa kə vaa-ve gə minti a yaakaŋ Zeruzalem daŋ əskəŋ anəkay minti *kaanə Samariŋ doŋ ne wəra gud kel kə Pepeŋa, yə vaŋ anə Piyer daana Zaŋ na a niini. 15Də ko bə minti yə co'oŋ kəyaŋ, yə toosoŋ cəərə kaa kə doo-de kəmarwaŋa kir minti Tiiru Cetcetaŋ bəə la ciiri. 16Gud maa mo Tiiru Cetcetaŋ a bəŋ kəm cəərə huluma guudi anə məna ba. Yə a jiiniy batem wəra təwa də sam Barkaŋ Yeesu. 17Kəya anə Piyer daana Zaŋ əsəŋ bə mele kasi wəra cəərə kaa kə doo-deŋa, Tiiru Cetcetaŋ tuluŋ ciiri a ko toŋa faɗi gəm.
18Simoŋ asaŋ anəkay minti Tiiru Cetcetaŋ bə bi cəərə kaŋa a kəkəy bə minti kaa kə vaa-veŋ bə mele kasiŋa ciiriŋ, wə piiniy soloy faɗi. 19Wə əsəŋ bə wəətiya minti: «Aŋ ayan abay taŋ la kəm a nəənən gəm mo, kir minti Tiiru Cetcetaŋ tulə la cəərə kaa gə minti ten bə mələy kaasən yaŋ ciiri gəm.» 20Səma Piyer hərnu kel minti: «Tam, basə la wəra də soloy nəmtiŋ anə kurup keɗe! Tam a ɗəkəŋ haa naanaanə ɗiki mo minti karman bə minti Pepeŋ əynu boobo, tam gusu də soloy? 21Kel kə Tiiru Cetcetaŋ gə minti bə ji hebkəna ta'aŋ, karman nəmti paapa ada anə weseka pəda, gud bə minti tarməyam paapa pasa dər Pepeŋa ba. 22Kolə kerkem la a ɗiki nəmti bə baymeleŋ. Toosə Barkaŋ la, jəw kamkam la, wə vəəgi giidu yaŋ wəra cəərə baymele nəmti tó bə ku tarməyama ɗawmay. 23Gud maa mo karman bə minti ten bə əsu sarəma ha'aŋ, tam gila sərkə raawaŋ ku tarməyama ablaw daana baymeleŋ hayɗənam wəra.» 24Kəya Simoŋ haraŋ kel a anə Zaŋ daana Piyer minti: «Aŋ toosə Barkaŋ la máŋ cəərəna aŋ də kusrəŋ gəm ta, kir minti kel gə minti aŋ a wəətənəy gil kəna keɗeŋ, karman a jən gud kel di anə weseka ba.»
25Kəya anə Piyer daana Zaŋ nuutu bə waate kaŋa saksaki də kel gə minti yə a əsnəy cəərə Yeesuŋ, daana bə wəətəy kel kə Barkaŋa gəm. Adordə kel teŋa kəyaŋ, yə kooroŋ Zeruzalem faɗi. A kəkəy bə hareŋ daŋ, yə kaltaŋ giidə wəlasi bə seŋka də Samariŋa ablaw bə wəətəy Kel pəsaŋ kəmarwaŋa ada gəm.
Filipi də hulum boblo bə minti ji joŋre Etiyopi
26Kəya *hulum bə digi kə Barkaŋ waataŋ Filipi minti: «Faa la bə ɗe, harə dərəm la agal kə tamka na anəkay. Haa la haa kəkəy bə minti faŋ Zeruzalem da, wə ɗe Gaaza, kəkəy bə minti kaŋ paapa bə təku ablaw baŋ.»
27Filipi faŋ anə cəlam kəyaŋ, wə awaŋ a kəkəya nuutu faɗi. Kəya wə ŋəfaŋ də hulum boblo kəman bə minti ji joŋre kə Kandasi#8.27 Sam bə Kandasi ha'aŋ, yə məltu haa a kəram gə minti kolte kəkamnaŋ neŋneŋ Etiyopi., həlgə a kumna də seŋka də Etiyopi. Wə wəra hulum bə tu'-tu'i#8.27 Kaa kaŋkar gə minti a joŋreŋa kasi kəkamnaŋ kərama, a jəŋ ha'aŋ, yə tu'-ti'iy kiliini wəra. Gud ku gili kə kaanə Ziwifiŋa ha'aŋ, yə de hulum toŋ siri ba, yə əyu joŋre kə Pep kəəsu ba (Deut. 23.2)., wə haa hulum bə joŋre bə ame bege kə həlgə kumnaŋ taŋ keɗe. Hulum toŋ a bəŋ a ke awalna a Pepeŋ Zeruzalema. 28Kəya wə máŋ haa bə hare akera girdu, wə bə luu-li giidə puspusi pisi kə kaa kə joŋre kəmtəŋa. Wə je'i giidə puspusi toŋa kəya taŋ, wə bə aŋke keftera wəra koloŋ, haa kefter bə minti Ezay, *hulum bə jogte ku mini kə Pepeŋ, a jiirunuŋ. 29Kəya Tiiru Cetcetaŋ waataŋ Filipi minti: «Haa kampəram la ajewa wəra cəlam gud puspusi toŋa, zee la agəjaŋ du máŋ bə ɗe kar.» 30Kəya Filipi fəŋ tara da sar puspusiŋ da. Wə əsəŋ bə jeɓre, wə əskəŋ ha'aŋ hulum bə Etiyopiŋ bə aŋke kela giidə kefter bə minti Ezay, hulum bə jogte ku mini kə Pepeŋ, a jiirunu wəraŋ. Kəya wə əsəŋ bə law ku minti: «Kel gə minti tam bə əŋkəya ha'aŋ, tam nuutu bə iski guudiŋa mo?» 31Hulum hərnu kel minti: «Gud kel teŋ paapa bə iski kaasəna ba, gud bə minti hulum bə don guudi wəra kaŋkaŋ paapa.» Kəya wə waataŋ Filipi minti wə luu da sar tó da giidə pusiŋ da, wə bəə la a isi agəjaŋ də tó kəna. 32Kel gə minti hulum a bə əŋkəya giidə Kefter kə Pepeŋaŋ, haa kel teŋ ta'i kənaŋ minti:
«Wə jəŋ damdi taaməka də minti yə doona bə ɗe jeme ana,
damdi kormə taaməka bə minti isi ba'-ba'i
tiinə kaa gə minti bə caw kaaɗe du wəra ana.
Wə bəŋəŋ ku wəra a kela ba.
33Kaŋ kulnu kese wəra anə keɗe-keɗe,
yə jəmnu kəəti nuutuŋ ɗeker ba.
Mindi bə waate sam kəsar du ajew na pə mo?
Gud maa mo yə bəsnu dədərgə du wəra kəna cəərə seŋkaŋa garja#8.33 Es. 53.7-8.»
34Kəya hulum bə Etiyopiŋ əsəŋ bə le ku Filipi minti: «Gosə waatan la kəm gəəzi tə mo, hulum bə jogte ku mini kə Pepeŋ waate haa ta'i kəna sam mindi mo? Wə waate haa sam kusru toki mo, sam hulum baalaŋ mo?»
35Kəya Filipi əsəŋ bə həru kela gəm ta. Wə əsəŋ bə tupu bəlam də kel gə minti wə a jəŋ bə əŋkəya, wə wəətunu *Kel pəsaŋ kəmarwaŋ cəərə Yeesu haa də kel teŋ derra faɗi gəm. 36Də bə minti yə raawaŋ kəm bə ɗe də kumsi a kəkəy naŋ, yə tuluŋ sar ko bə kan kəmana maŋ. Kəya hulum bə Etiyopiŋ waataŋ Filipi faɗi minti: «Golə la, ha'aŋ kan bə mo? Karman bə han kun bay ji batem yaŋ kəm ada pə mo?» [ 37Kəya Filipi wəətunu minti: «Tam doŋ ne wəra gud Yeesu də ku tarməyam soki məna, tam bə nakə-neke kir ji batem.» Hulum bə Etiyopiŋ duunu haa minti: «Gəəzi, ten wəra bə doo-de gud Yeesu Kristu, minti wə haa Kormə Pepeŋ.»]
38Adoro kəya, hulum bə Etiyopiŋ waataŋ hulum bə joŋreŋ nuutu minti wə malə puspusiŋ la ta'i. Anə Filipi də hulum bə Etiyopi vaŋ warda ɓasi keɗe adawra, yə ɗeŋ a ve dər kana. Kəya Filipi juunu batem faɗi. 39Də ko bə minti yə luŋ warda anəkay dər kan daŋ, Tiiru kə Barkaŋ həənu warna anə waw faɗi! Hulum bə Etiyopiŋ əsnu pəda. Kəya wə raawaŋ a kəkəy nuutuŋa ku tərmuyu wəra də waale fənay-fənay. 40Kə Filipiŋ kəya gəm taŋ, wə ɗeŋ a ase máŋ ha'aŋ, wə warna giidə vil də Azotiŋ na ɗaw. A ko toŋa kəya wə haŋ kəkəy bə ɗe Sezareŋ bə waate Kel pəsaŋ kəmarwaŋ na a kaŋ giidə vil də minti wə bə kalte na giidə na keɗe hãã wə ɗeŋ a tuuki warna Sezare na.
Currently Selected:
JOŊRE 8: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.